'சனாதன தர்மத்திற்கு ஆதரவாக பேசும் ஆளுநர் ரவியை உடனடியாக குடியரசு தலைவர் பதவிநீக்கம் செய்ய வேண்டும்' - கொதிக்கும் வைகோ!

சனாதன தர்மமே இந்தியாவை வளர்த்ததாக தமிழக ஆளுநர் ஆர்.என்.ரவி பேசியிருந்ததற்கு தொடர் கண்டனங்கள் எழுந்துவரும் நிலையில், ஆர்.என்.ரவியை ஆளுநர் பதவியிலிருந்து குடியரசுத் தலைவர் நீக்கவேண்டும் என்று மதிமுக தலைவர் வைகோ தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில், 

"சென்னையில் நடந்த நிகழ்ச்சி ஒன்றில் உரையாற்றிய தமிழ்நாடு ஆளுநர் ஆர்.என் ரவி, சனாதன தருமத்தை உயர்த்திப் பிடித்துள்ளார். அவரது உரையில் கீழ்கண்டவாறு குறிப்பிட்டிருக்கிறார். “ரிஷிகளும், முனிவர்களும் வேதங்கள் மூலமாக வாழ்ந்து கொண்டிருக்கிறார்கள். சனாதன தர்மத்தை நிலைநாட்டுகின்றனர். ஒரே பரமேஸ்வரன், ஒரே கடவுள். அனைவரும் ஒற்றுமையுடன் வாழ்வதை தான் நமது மார்க்கம் கூறுகிறது.

இந்திய அரசியலமைப்புதான் நமது ஆன்மா. வேற்றுமையில் ஒற்றுமை என நாம் நம்மை பற்றி கூறுகிறோம். அதைத்தான் சனாதன தர்மமும் வலியுறுத்துகிறது. ஆயிரம் ஆண்டுகளுக்கு முன்பே நமது இந்திய அரசியலமைப்பு, சனாதன தர்மத்தில் கூறப்பட்டுள்ளது. கிமு 2-ஆம் நூற்றாண்டில் புத்த மதத்தில் கூறப்பட்டுள்ள கருத்துக்களும் தத்துவங்களும் சனாதன தர்மத்தில் இருந்து வந்தவை. சனாதன தர்மம்தான் பாரதத்தை உருவாக்கியது. நமது நாட்டின் எண்ணம், செயல் போன்றவற்றில் சனாதானம் உள்ளது. ஒரே பரமேஸ்வரா என சனாதன தர்மம் சொல்கிறது. அந்த பரமேஸ்வரன் தான் உலகத்தை படைக்கிறார், நம் வேற்றுமையில் வாழ்கிறார் என கூறப்படுகிறது.

பாரதம் ஆயிரம் ஆயிரம் ஆண்டுகளுக்கு முன்பாகவே தோன்றியது. அப்போதே நமது அரசியல் அமைப்பும் எழுதப்பட்டுவிட்டது. “ஏகம் சத் விப்ரா பஹுதா வதந்தி” என அத்வைத தத்துவங்கள் கூறுகின்றன. மற்ற நாடுகளைப் போல ராணுவ வீரர்கள், அரசர்கள் மூலம் இந்த நாட்டை உருவாகவில்லை. இந்த நாடு ரிஷிகளாலும் முனிவர்களாலும் சனாதன தர்மத்தின் ஒளியாலும் உருவாக்கப்பட்டது. இந்தியாவில் ராணுவம் பொருளாதாரத்தில் வளர்ச்சியை போல ஆன்மீகத்தில் வளர்ச்சி அவசியம். அதற்கு சனாதன தர்மம் வழிமுறையாக இருக்கும். சோமநாதர் கோவில் சொத்துக்களை அழித்து காந்தகார், பெஷாவர் போன்ற நகரை கஜினி முகமது உருவாக்கினார். ஆனால், அந்த நகரங்கள் அமெரிக்க குண்டுகளால் தகர்க்கப்பட்டது. இதிலிருந்தே தெரிந்து கொள்ளலாம் சனாதன தர்மத்தின் வலிமை”.

ஆளுநர் பொறுப்பு வகிக்கும் ஒரு நபர் அரசியலமைப்புச் சட்ட நெறிகளை மீறி, சனாதன தர்மம் இந்தியாவை வழி நடத்துகிறது என்று பேசி இருப்பது கடும் கண்டனத்துக்குரியது. மனித சமத்துவத்தை மறுக்கும் வருணாசிரம தருமத்தை நிலைநாட்டத் துடிக்கும் ஆர்.என்.ரவி சங்பரிவாரங்களின் கோட்பாட்டை தூக்கிப்பிடித்து பெருமை பொங்க பேசி உள்ள ஆளுநர் ஆர்.என்.ரவி தான் யார் என்பதை வெளிப்படுத்தி இருக்கிறார். இந்தியாவை வழிநடத்துவது அண்ணல் அம்பேத்கர் வடித்தெடுத்த அரசியல் அமைப்பு சட்டமே தவிர, நால்வருண பேதத்தை வலியுறுத்தும் சனாதன தர்மம் அல்ல.

ஆளுநர் ரவி  தனது பொறுப்பை உணர்ந்து பேச வேண்டும். “பிறப்பொக்கும் எல்லா உயிர்க்கும்” என்ற  குறள் நெறியை உலகுக்குத் தந்த தமிழ்நாட்டில் ஆளுநர் பதவியில் இருந்து கொண்டு பிறவி பேதத்தை கற்பிக்கும் சனாதன தர்மத்திற்கு ஆதரவாக பேசும் ஆளுநர் ரவி, அந்தப் பொறுப்பில் நீடிக்கும் தகுதியை இழந்து விட்டார். உடனடியாக குடியரசு தலைவர் தமிழக ஆளுநரை அப்பொறுப்பிலிருந்து விடுவிக்க வேண்டும்" இவ்வாறு குறிப்பிடப்பட்டுள்ளது.

பதிவு: June 13, 2022
'ஓநாய்க்கூட்டங்கள் தான் எனக்கு எதிராக போராடின; பாரம்பரிய பத்திரிகையாளர்கள் அல்ல' - பேரணியில் அண்ணாமலை பேச்சு!

திமுகவின் ஆட்சிக்காலம் எண்ணப்பட்டு வருவதாகவும், ஊடகம் என்ற பெயரில் இருக்கும் ஓநாய்க்கூட்டத்தினரிடம் தான் தனக்கு பிரச்சினை என்றும், எல்லா ஊடகத்தினருடனும் இல்லை என்றும் பேரணியில் அண்ணாமலை பேசியுள்ளார்.

திமுக தேர்தல் வாக்குறுதியில் பெட்ரோல், டீசல் விலையைக் குறைப்பதாகக் கூறி மக்களை ஏமாற்றிவிட்டதாகவும், அடுத்த 72 மணிநேரத்தில் விலையைக் குறைக்கவில்லை என்றால் பாஜக சார்பில் போராட்டம் நடத்தப்படும் என்றும் தமிழக பாஜக தலைவர் அண்ணாமலை சமீபத்திய செய்தியாளர் சந்திப்பு ஒன்றில் தெரிவித்திருந்தார்.

இந்நிலையில் கெடு முடிந்துவிட்டதாகவும், விலையைக் குறைக்காத தமிழக அரசுக்கு எதிராக இன்று பாஜக சார்பில் பேரணி நடத்தவிருப்பதாகவும் நேற்று அறிவித்திருந்தார். அதன்படி, அண்ணாமலை தலைமையில், தமிழக பாஜகவினர் இன்று தலைமைச் செயலகத்தை முற்றுகையிடும் பேரணியை எழும்பூரில் தொடங்கி தொடர்ந்து நடத்திவருகின்றனர். இந்நிலையில், திமுக எரிபொருட்களின் விலையைக் குறைக்கும்வரை விடப்போவதில்லை என்றும், திமுகவிற்கு அழிவுக்காலம் தொடங்கிவிட்டதாகவும் தெரிவித்தார்.

இதுகுறித்து பேரணியில் பேசிய அவர், "கோட்டையை நோக்கி நாங்கள் வரப்போகிறோம் என்று தெரிந்ததுமே முதல்வர் எஸ்கேப் ஆகி டெல்டா மாவட்டத்திற்குச் சென்றுள்ளார். பெட்ரோல், டீசல் விலையை அரசு குறைக்காதவரை நாங்கள் விடப்போவதில்லை. எங்களுடைய கோரிக்கையை தமிழக அரசு நிறைவேற்றவில்லை என்றால், 20 நாள்கள் கழித்து மாவட்டதோறும் உண்ணாவிரத அறப்பேராட்டம் நடைபெறும். அதனைத்தொடர்ந்து, 30 நாள்கள் திருச்சியை நோக்கி மாபெரும் போராட்டம் நடைபெறும். இதில், 10 லட்சத்திற்கு மேற்பட்ட பாஜகவினர் கலந்து கொள்வார்கள். திருச்சி போராட்டம் திருப்பு முனையாக இருக்கும்.

திமுக அரசின் நாட்கள் எண்ணப்பட்டு வருகின்றன. திமுகவின் அழிவுகாலம் ஆரம்பித்து விட்டது. பாஜகவா? திமுகவா? என்று பார்த்துவிடுவோம். இன்னும் 750 நாட்கள் நாம் பொறுத்துக்கொண்டு தான் ஆகவேண்டும். போராட்டத்திற்கு, கைதிற்கு பாஜகவினர் தயாராக இருக்கவேண்டும். அர்ப்பணிப்பு செய்ய தயாராக இருங்கள்‌" என்று தெரிவித்தார்.

மேலும், செய்தியாளர் சந்திப்பில் பத்திரிகையாளர்களை இழிவாகப் பேசியதாக பத்திரிகையாளர் மன்றம் அவருக்கு எதிராக நடத்திய ஆர்ப்பாட்டம் குறித்து கேட்கப்பட்ட கேள்விக்கு, "ஊடகம், பத்திரிகைகாரர்களுக்கு எதிராக பேசியதாக என்னை கண்டித்து நேற்று ஆர்ப்பாட்டம் நடைபெற்றது. தமிழ்நாட்டைச் சேர்ந்த பாரம்பரியமான, நேர்மையான பத்திரிகையாளர்கள் யாரும் என்னை கண்டித்து ஆர்ப்பாட்டம் செய்யவில்லை. இயேசு நாதர் போன்று ஒரு கன்னத்தில் அடித்தால் மறு கன்னத்தைக் காட்டும் பழக்கம் எங்களுக்கு கிடையாது.

ஊடகம் மீது பெரும் மரியாதை இருக்கிறது. மோடிக்கு மரியாதை செய்யாமல் மீடியா என்ற போர்வைக்குள் சுற்றும் நபர்கள்தான் எனக்கு எதிராக போராட்டம் செய்தனர். எனக்கும் மீடியாவிற்கும் பிரச்சினை இல்லை. ஊடகம் என்ற பெயரில் இருக்கும் ஒநாய்க் கூட்டத்தினரிடம் தான் எனக்குப் பிரச்சினை" என்று தெரிவித்தார்.

பதிவு: May 31, 2022
'தமிழ்நாடு அரசு கல்விக்கு முக்கியத்துவம் அளித்துவருகிறது' - பள்ளி திறப்பு நிகழ்ச்சியில் முதல்வர் ஸ்டாலின் பெருமிதம்!

திமுக அரசு கல்விக்கு முக்கியத்துவம் தந்துவருவதாக பள்ளி திறப்பு நிகழ்ச்சியில் தமிழக முதல்வர் ஸ்டாலின் தெரிவித்துள்ளார்.

சென்னை பள்ளிக்கரணையில் உள்ள டிஏவி பள்ளியை முதல்வர் மு.க.ஸ்டாலின் இன்று திறந்து வைத்தார். இந்நிலையில், திறப்பு நிகழ்ச்சியில் கலந்துகொண்ட அவர் பேசியதாவது:

"பள்ளி, கல்லூரி நிகழ்ச்சியில் பங்கேற்பதன் மூலம் புத்துணர்ச்சி பெறுகிறேன். நான் பிறந்து வளர்ந்த கோபாலபுரத்தில் டிஏவி பள்ளி முதன் முதலாக தொடங்கப்பட்டது. டிஏவி குழுமம், சென்னையில் அரை நூற்றாண்டுகளுக்கும் மேலாக கல்வி சேவை வழங்கி வருகிறது. டிஏவி குழுமத்தில் 30,000 மாணவ, மாணவிகள் பயின்று வருகின்றனர். தாய்மொழி கல்விக்கு ஊக்கம் அளிக்க வேண்டும்.

தாய்மொழிப் பற்றும் தாய்நாடு பற்றும் ஒவ்வொரு மனிதனுக்கும் மிகமிக முக்கியம். போட்டிகள் நிறைந்த உலகத்தில் மாணவர்கள் தங்கள் தனித்திறமையை வளர்த்துக் கொள்ள வேண்டும். கல்வி என்பதே இருளில் இருந்து ஒளிக்கு கொண்டு செல்வது தான். பள்ளிக் கல்விக்கு மட்டுமல்லாமல் கல்லூரி கல்விக்கும் அரசு முக்கியத்துவம் அளித்து வருகிறது. தமிழ்நாடு அரசு கல்விக்கு முக்கியத்துவம் அளித்து வருகிறது.

மனிதர்களிடம் இருந்து பிரிக்க முடியாத சொத்து என்றால் கல்வி மட்டும் தான். அரசு சார்பில் இல்லம் தேடி கல்வித் திட்டம் தொடங்கப்பட்டது. இத்திட்டத்தின் மூலம் லட்சக்கணக்கான மாணவர்களுக்கு தொடர்ந்து கல்வி கொடுத்துள்ளோம். பள்ளிகளில் கொண்டுவரப்படும் திட்டங்களுக்கு தமிழில் பெயர் வைக்கவேண்டும்" 

இவ்வாறு பேசினார். 

பதிவு: May 27, 2022
'மீனவப்பெண்ணை கூட்டுப்பாலியல் வன்கொடுமை செய்த வடமாநில கயவர்கள் மீது மிகக்கடுமையான தண்டனை வேண்டும்' - சீமான்!

இராமேசுவரத்தில் மீனவப் பெண் கூட்டுப் பாலியல் வன்கொடுமை செய்து எரித்துக் கொல்லப்பட்ட நிலையில், குற்றம்சாட்டப்படும் வடமாநில கயவர்கள் மீது கடும் நடவடிக்கை எடுக்க வேண்டும் என நாதக ஒருங்கிணைப்பாளர் சீமான் வலியுறுத்தியுள்ளார்.

இதுகுறித்து அவர் தனது அறிக்கையில்,

"இராமேசுவரம் அருகே உள்ள வடகாடு மீனவ கிராமத்தில் கடற்பாசி எடுக்கச் சென்ற மீனவப்பெண் தங்கை சந்திராவை, அங்கு இறால் பண்ணையில் வேலை பார்த்து வந்த வடமாநிலத்தைச் சேர்ந்த கயவர்களால் கூட்டுப் பாலியல் வன்கொடுமை செய்யப்பட்டு கொடூரமாக எரித்துக் கொலை செய்யப்பட்டிருக்கும் செய்தி கடும் அதிர்ச்சியையும், பெரும் ஆத்திரத்தையும் அளிக்கிறது.

ஆட்சிப் பொறுப்பேற்ற கடந்த ஓராண்டு காலத்தில் தமிழ்நாட்டில் வட மாநிலத்தவரால் தொடர்ந்து அதிகரித்து வரும் கொடுங்குற்றங்களையும், சட்டம் ஒழுங்கு சீரழிவினையும் தடுக்கத் தவறிய திமுக அரசின் செயலற்றத்தன்மை வன்மையான கண்டனத்திற்குரியது.

தமிழ்நாட்டின் மாநகரங்கள் மட்டுமின்றி, இரண்டாம்நிலை நகரங்கள், குக்கிராமங்கள் வரை அனைத்து பகுதிகளிலும் நாளுக்குநாள் வடமாநிலத்தவர் ஆதிக்கம் இலட்சக்கணக்கில் அதிகரித்து வருகிறது. இதனால் தமிழர்களின் வேலைவாய்ப்பு, பொருளாதாரம் ஆகியவை பறிபோவதோடு கொலை, கொள்ளை உள்ளிட்ட கொடுங்குற்றங்கள் அதிகமாகி மக்கள் பொதுவெளியில் நடமுடியாத அளவிற்குச் சட்டம் ஒழுங்கும் சீர்கெட்டு வருகிறது.

கடந்த ஏப்ரல் மாதம் ஈரோடு மாவட்டம் மொடக்குறிச்சியில் வடமாநிலத்தவர்கள் தமிழகக் காவல்துறையினரைத் தாக்கியதில் காவலர்கள் மருத்துவமனையில் சிகிச்சை பெரும் அளவுக்கு தமிழ்நாட்டின் நிலைமை மிகமோசமாகியுள்ளது.

அந்நிகழ்வினை வன்மையாகக் கண்டித்த நாம் தமிழர் கட்சி, தமிழ்நாடு முழுவதும் பல்வேறு இடங்களில் போராட்டங்களை முன்னெடுத்ததோடு, தமிழ்நாட்டில் வேலை பார்க்கும் அனைத்து வடமாநிலத்தவருக்கும் உள்நுழைவுச் சீட்டினை உடனடியாக நடைமுறைப்படுத்தவும் கோரியது.

ஆனால், காவல்துறையினர் மீதான தாக்குதலுக்குப் பிறகும் விழித்துக்கொள்ளாத தமிழ்நாடு அரசு, நாம் தமிழர் கட்சியின் கண்டனத்தையும், கோரிக்கையையும் அலட்சியம் செய்ததன் விளைவே, தற்போது வடமாநிலத்தவர் அப்பாவி மீனவப்பெண்ணைக் கூட்டுப் பாலியல் வன்கொடுமை செய்து கொடூரமாக எரித்துக் கொள்ளும் அளவிற்குச் சட்டம் ஒழுங்கு சீரழிய முக்கியக் காரணமாகும்.

எனவே, காவல்துறையை தன்வசம் வைத்துள்ள தமிழ்நாடு முதலமைச்சர், முற்றுமுழுதாகச் சீரழிந்து வரும் சட்டம் ஒழுங்கினை சீரமைக்க இதன் பிறகாவது உரிய நடவடிக்கை எடுக்க வேண்டுமெனவும், வடமாநிலத்தவருக்கு உள்நுழைவுச் சீட்டு முறையினை உடனடியாக நடைமுறைப்படுத்தி, இதுபோன்ற கொடூரங்கள் இனியும் தொடராதவாறு தடுக்க வேண்டுமெனவும் கேட்டுக்கொள்கிறேன்.

மேலும், மீனவப்பெண் சந்திராவை கூட்டுப் பாலியல் வன்கொடுமை செய்து கொலைசெய்த கொடூரர்களைச் சட்டத்தின் முன் நிறுத்தி, விரைந்து மிகக்கடுமையான தண்டனைப் பெற்றுத்தர வேண்டுமெனவும், பாதிக்கப்பட்ட மீனவப் பெண்ணின் குடும்பத்திற்கு ஒரு கோடி ரூபாய் துயர்துடைப்பு உதவி வழங்குவதோடு, குடும்பத்தில் ஒருவருக்கு அரசு வேலை வழங்கிட வேண்டுமெனவும் நாம் தமிழர் கட்சி சார்பாக வலியுறுத்துகிறேன்"

இவ்வாறு குறிப்பிட்டுள்ளார்.

பதிவு: May 25, 2022
'நான் சமாதியில் இருக்கிறேன், ஆனாலும் இறக்கவில்லை; என் உடலில் ஆராய்ச்சிகள் நடக்கின்றன' - வதந்திகள் குறித்து நித்தியானந்தாவின் 'தினுசான' விளக்கம்!

சர்ச்சை சாமியார் நித்தியானந்தா இறந்துவிட்டதாக வலைதளங்களில் தகவல் பரவிவந்த நிலையில், தான் சமாதியில் இருப்பதாகவும், ஆனாலும் இறக்கவில்லை என்றும் நித்தியானந்தா தனது சமூக ஊடகப் பதிவு மூலம் தெரிவித்துள்ளார்.

தமிழகத்தின் மிகவும் பிரபலமான சாமியார்களில் ஒருவர் சாமியார் நித்தியானந்தா. பிரபலம் என்பதை விட ‘ப்ராப்ளம்’ என்று சொல்வது இவர் விஷயத்தில் சாலச் சிறந்ததாக இருக்கும். அந்த அளவிற்கு பல்வேறு பாலியல் குற்றங்களில் சிக்கியுள்ளார் நித்தியானந்தா.

நடிகை ரஞ்சிதாவுடன் சாமியார் நித்தியானந்தா நெருக்கமாக இருக்கும்படியான காணொலிகள் வெளியாகி நாடெங்கும் பெரும் அதிர்வலைகளைக் கிளப்பியதையடுத்து, தொடர்ந்து பல்வேறு பாலியல் குற்றச்சாட்டுகள் அவரது சீடர்களாலேயே அவர்மீது சுமத்தப்பட்டன.

இந்நிலையில் தான் காவல்துறையிடமிருந்து தப்பிக்க அவர் இந்தியாவை விட்டு வெளியேறி தலைமறைவானார். பின் தீவு ஒன்றை வாங்கி ‘கைலாசம்’ என்ற பெயரில் அதை தனி நாடாக அறிவித்து அதற்கு ரூபாய் நோட்டெல்லாம் வெளியிட்டார்.

உலகில் எங்கு, எவ்வளவு பிரச்சினை நிகழ்ந்தாலும் தானும், தன் கைலாச சீடர்களுமாக குதூகலமான காணொலிகளை தினசரி வெளியிட்டு வந்தார் நித்தியானந்தா. இந்நிலையில், அவர் எலும்பும் தோலுமாக இருப்பது போன்ற புகைப்படங்கள் வலைதளங்களில் வெளியாகி அவர் மரணமடைந்துவிட்டதாக தகவல் பரவியது.

இதனிடையே தான், வதந்திகளுக்கு முற்றுப்புள்ளி வைக்கும் விதமாக, தான் சமாதியில் இருப்பதாகவும், ஆயினும் இறக்கவில்லை என்றும் தினுசான ஒரு பதிவை இட்டுள்ளார் குதூகல சாமியார் நித்தியானந்தா.

இதுகுறித்து அவர் வலைதளத்தில் இட்டுள்ள பதிவில்,  

“நான் இறந்து விட்டதாக பரப்பும் வதந்திகளை நம்ப வேண்டாம். நான் சமாதியில் இருக்கிறேன். ஆனால் இறக்கவில்லை என்று என் சீடர்களுக்கு சொல்ல விரும்புகிறேன். என்னால் பேசவோ அல்லது சத்சங்கங்களை வழங்குவதற்கோ சக்தி வருவதற்கு இன்னும் நேரம் எடுக்கும்.

27 மருத்துவர்கள் எனக்கு சிகிச்சை அளிக்கிறார்கள். மருத்துவ சிகிச்சையில் இருந்து நான் இன்னும் வெளியே வரவில்லை. மருத்துவர்களின் எண்ணிக்கை குறைக்கப்பட்டுள்ளது. அவர்கள் மருத்துவர்கள் என்பதைவிட என் பக்தர்கள் மற்றும் ஆராய்ச்சியாளர்களை போன்றவர்கள்.

பிரபஞ்சத்தின் சக்தியை என் உடல் எப்படி உள்வாங்கி செயல்படுகிறது என்பதை எனக்கு சிகிச்சை அளிக்கும் மருத்துவர்கள் ஆய்வு செய்கிறார்கள். தினந்தோறும் நடைபெறும் நித்ய பூஜை மட்டும் இன்னும் நிற்கவில்லை. மற்றபடி, வேறு எந்த வேலையையும் நான் செய்வதில்லை. உணவு உண்ண முடியவில்லை. தூங்க முடியவில்லை.

எனக்கு அறிமுகமானவர்களை கூட அடையாளம் கண்டுகொள்வதில் சிரமப்படுகிறேன். நான் சாகவில்லை. சமாதி மனநிலையை அடைந்து இருக்கிறேன். விரைவிலேயே பரிபூரண நலம் பெற்று திரும்புவேன்.

மருத்துவர்களால் எந்த நோயையும், கோளாறுகளையும் என் உடலில் இருந்து கண்டறிய முடியவில்லை. எனது இதயம் 18 வயது வாலிபரின் இதயம் போன்று துடிப்பதாக டாக்டர்கள் கூறுகின்றனர். நித்ய பூஜைக்காக நான் சமாதியில் இருந்து வரும்போது மட்டும் சில சமயங்களில் உங்கள் கருத்துக்களை பார்த்து என் பதிலை தருகிறேன். அனைத்து அன்புக்கும் நன்றி! நலம் பெற வாழ்த்திய அனைவருக்கும் நன்றி! ஆனால் உண்மையில் எனக்கு நோயெல்லாம் ஒன்றும் இல்லை”

இவ்வாறு அதில் குறிப்பிட்டுள்ளார்.

பதிவு: May 12, 2022
'தீபாவளி வந்தால் குடும்பத்திற்காக நிறைய செலவு செய்வார்; ஆனால் எனக்கு வெறும் இனிப்பு மட்டுமே தருவார்' - சென்னை இரட்டைக்கொலை குற்றவாளி பரபரப்பு வாக்குமூலம்!

பட்டயக் கணக்காளர் ஸ்ரீகாந்த், அனுராதா தம்பதியினர், தங்கள் வீட்டில் பணிபுரிந்துவந்த ஓட்டுநராலேயே கொலை செய்யப்பட்ட நிகழ்வில், அதற்கான காரணம் குறித்து அவர் கொடுத்துள்ள வாக்குமூலம் அதிரவைப்பதாக உள்ளது.

சென்னை மயிலாப்பூரில் வசித்துவரும் பட்டயக் கணக்காளர் ஸ்ரீகாந்த், அவரது மனைவி அனுராதா காணாமல் போனதாக கொடுக்கப்பட்ட புகாரின் அடிப்படையில் மேற்கொள்ளப்பட்ட விசாரணையில், அவர்கள் இருவரும், தங்கள் வீட்டில் பெறாத பிள்ளைபோல் இருந்துவந்த கார் ஓட்டுநர் லால் கிருஷ்ணா மற்றும் அவரது கூட்டாளி ரவி உதவியுடன் கொலை செய்யப்பட்ட நிகழ்வு கடும் அதிர்வலைகளைக் கிளப்பியது. 

வெளிநாட்டில் வசிக்கும் தங்கள் மகளைக் காணச் சென்றுவந்த தம்பதியர் இருவரையும், பணத்திற்கு ஆசைப்பட்டு உருட்டுக் கட்டையால் தலையில் அடித்து கொலை செய்து, அவர்களது பண்ணை வீட்டில் திட்டமிட்டபடி ஏற்கனவே தோண்டிவைத்திருந்த குழியில் உடலைப் புதைத்துள்ளனர் கிருஷ்ணாவும், அவரது கூட்டாளி ரவியும்.

நில விற்பனை தொடர்பாக ஸ்ரீகாந்துக்கு ரூ.40 கோடி வரவிருப்பது தெரிந்து இத்திட்டத்தைத் தீட்டியுள்ள கிருஷ்ணா, கொலைக்குப்பின் வீட்டில் இருந்த 1000 சவரன் நகையை மட்டும் எடுத்துக்கொண்டு வீட்டிலிருந்து நண்பருடன் நேபாளத்திற்கு தப்பியுள்ளார். இதனிடையே தான் சிசிடிவி காட்சிகள் உதவியுடன் தப்பிக்கவிருந்த கிருஷ்ணா மற்றும் ரவி ஆகியோர் காவலர்களால் மடக்கிப் பிடிக்கப்பட்டு கைதுசெய்யப்பட்டனர். மேலும் அவர்கள் திருடிச் சென்ற நகைகளும் காவலர்களால் பறிமுதல் செய்யப்பட்டது.

இந்நிலையில், கொலைக்கான காரணம் குறித்து கிருஷ்ணா காவலர்களிடம் வாக்குமூலம் அளித்துள்ளார். அதில், "ஸ்ரீகாந்திடம் நான் 7 வருடங்களாக வேலைபார்த்து வருகிறேன். என் மீது அவர் அளவுகடந்து நம்பிக்கை வைத்திருந்தார். கார் ட்ரைவராக இருந்தாலும் நான் வீட்டு வேலைகளையும் சேர்த்தே செய்வேன். எனக்கு விவாகரத்து ஆகிவிட்டது. என் மகன் டார்ஜிலிங்கில் படிக்கிறான். நான் ஸ்ரீகாந்த் வீட்டிலேயே தங்கி இருக்கிறேன். ஆனால் நான் வேலை பார்த்த அளவுக்கு ஸ்ரீகாந்த் எனக்கு சம்பளம் கொடுக்கவில்லை. மகன் படிப்புக்கு உதவும்படி ஸ்ரீகாந்திடம் உதவி கேட்டேன். அவர் முடியாது எனக் கூறிவிட்டார். அவரிடம் நிறைய பணம் இருந்தும் அவர் உதவவில்லை.

தீபாவளி என்றால் நகைகள் வாங்குவது, துணிகள் வாங்குவது என மிகவும் ஆடம்பரமாக குடும்பத்துடன் கொண்டாடுவார். ஆனால், அவர் வீட்டிலேயே இருக்கும் எனக்கு ஒரு கிலோ இனிப்பு பொட்டலம் மட்டுமே கொடுப்பார். அப்போதுதான் ஈசிஆரில் ஒரு நிலம் விற்கப்பட்டது எனக்கு தெரியவந்தது. அந்த பணம் ரூ.40 கோடி அவரது வீட்டில் இருக்குமென நினைத்தே திட்டமிட்டோம். ஆனால் பணம் இல்லை. அதற்கு பதிலாக நகைகள் நிறைய இருந்தன. உண்மை வெளி உலகுக்கு தெரிந்துவிடக்கூடாது என்பதால் இருவரையும் கொன்று பண்ணை வீட்டில் ஏற்கெனவே தோண்டி வைக்கப்பட்ட குழியில் புதைத்தோம்” இவ்வாறு அவர் கூறியுள்ளார்.

பதிவு: May 09, 2022
'என்ன...பஸ்-லாம் நல்லா ஓடுதா?' - சென்னையில் மாநகரப் பேருந்தில் ஏறி திடீர் ஆய்வு மேற்கொண்ட முதல்வர் ஸ்டாலின்!

திமுகவின் ஓராண்டுகால ஆட்சி இன்றுடன் நிறைவடைவதையடுத்து, சென்னையில் மாநகரப்பேருந்து ஒன்றில் ஏறி முதல்வர் ஸ்டாலின் திடீர் ஆய்வு மேற்கொண்டார்.

தமிழ்நாட்டில் மு.க.ஸ்டாலின் தலைமையிலான திமுக அரசு ஆட்சியமைத்து இன்றுடன் ஓராண்டு நிறைவடைகிறது. இந்நிலையில், ஓராண்டுகால ஆட்சியின் சாதனைகளைக் கொண்டாடும் விதமாக தாயார் தயாளு அம்மாளைச் சந்தித்து அவரிடம் வாழ்த்துகளைப் பெற்றார். தொடர்ந்து, மறைந்த முன்னாள் முதல்வர் கலைஞர் கருணாநிதியின் நினைவிடத்திற்கு சென்று மரியாதை செலுத்தினார்.

இந்நிலையில், அங்கிருந்து சட்டப்பேரவை செல்லும் வழியில், சாலையில் சென்றுகொண்டிருந்த 29சி மாநகர அரசுப் பேருந்தில் ஏறிய முதல்வர், பேருந்தில் திடீர் ஆய்வு மேற்கொண்டார். மேலும் பயணிகளிடம் பேருந்தின் குறைகள் குறித்தும், பேருந்துகளின் இயக்கம் குறித்தும் கேட்டறிந்தார்.

தற்சமயம், சாதாரண பேருந்துகளில் மட்டுமே பெண்கள் இலவசமாக பயணம் மேற்கொள்ளும் வசதி இருப்பதால், சாதாரண கட்டணப் பேருந்துகளை அதிக அளவில் இயக்க வேண்டும் என பெண்கள் முதல்வர் ஸ்டாலினிடம் கோரிக்கை விடுத்தனர். இதையடுத்து பெண்களுக்கான இலவச பேருந்து திட்டம் சாமானிய பெண்கள் மத்தியில் பெரும் வரவேற்பைப் பெற்றுள்ளதாக முதல்வர் ஸ்டாலின் தெரிவித்தார். 

பின்னதாக, சட்டப்பேரவையில், தனது பள்ளிக்காலங்களில் 29சி பேருந்தில் தினமும் பயணித்து பள்ளி சென்றதன் நினைவாக அந்த எண் கொண்ட பேருந்தில் ஏறி ஆய்வு மேற்கொண்டதாக தெரிவித்தது குறிப்பிடத்தக்கது.

பதிவு: May 07, 2022
மாணவர்களுக்கு காலை சிற்றுண்டி வழங்குதல் உள்ளிட்ட 5 முக்கிய திட்டங்களை அறிவித்த முதல்வர் ஸ்டாலின்! அவை என்னென்ன...?

திமுகவின் ஓராண்டுகால ஆட்சி இன்றுடன் நிறைவடைவதையடுத்து தமிழகத்திற்கான புதிய 5 திட்டங்களை சட்டப்பேரவையில் முதல்வர் ஸ்டாலின் இன்று அறிவித்தார். 

தமிழ்நாட்டில் மு.க.ஸ்டாலின் தலைமையிலான திமுக அரசு ஆட்சியமைத்து இன்றுடன் ஓராண்டு நிறைவடைகிறது. இந்நிலையில், ஓராண்டுகால ஆட்சியின் சாதனைகளைக் கொண்டாடும் விதமாக மறைந்த முன்னாள் முதல்வர் கலைஞர் கருணாநிதியின் நினைவிடத்திற்கு சென்று முதல்வர் ஸ்டாலின் ஆசி பெற்றார். மேலும் கழக சாதனைகளை விளக்கும் 12 புத்தகங்களையும் வெளியிட்டார்.

இந்நிலையில், சட்டப்பேரவையில் ஓராண்டு ஆட்சியின் சாதனைகள் குறித்துப் பேசிய முதல்வர் ஸ்டாலின் தமிழகத்திற்கான புதிய 5 திட்டங்கள் குறித்த அறிவிப்பை வெளியிட்டார்.

அவையாவன:

1. 1 முதல் 5-ஆம் வகுப்பு வரையிலான அரசுப்பள்ளி மாணவர்களுக்கு காலை சிற்றுண்டி வழங்கப்படும். முன்னதாக கிராமப்புற மற்றும் குறிப்பிட்ட நகராட்சிகளில் இத்திட்டம் அமல்படுத்தப்பட்டு பின்னர் அனைத்து இடங்களுக்கும் விரிவுபடுத்தப்படும். உள்ளாட்சி அமைப்புகள் மூலம் இதற்கான ஏற்பாடுகள் மேற்கொள்ளப்படும்.

2. 6 வயதிற்குட்பட்ட குழந்தைகளுக்கு சிறப்பு ஊட்டச்சத்து திட்டத்தின் கீழ் உதவிகள் வழங்கப்படும். தமிழக குழந்தைகளை ஊட்டச்சத்து குறைபாடு இல்லாதவர்களாக உருவாக்க இத்திட்டம் அமல்படுத்தப்படவுள்ளது

3. தமிழகமெங்கும் தகைசால் பள்ளிகள் உருவாக்கப்படும். முதற்கட்டமாக 150 கோடி மதிப்பீட்டில் 21 மாநகராட்சிகளில் உள்ள அரசு மேல்நிலைப்பள்ளிகள் தகைசால் பள்ளிகளாக தரம் உயர்த்தப்படும். மேலும் கட்டிடத்தின் தரம் உயர்த்தப்பட்டு, நவீனமயமாக்கப்படும். 

4. கிராமங்களில் ஆரம்ப சுகாதார நிலையங்கள், துணை சுகாதார நிலையங்கள் உள்ளது போல, நகர்ப்புறங்களில் மருத்துவ நிலையங்கள் அமைக்கப்படும். முதற்கட்டமாக 21 மாநகராட்சிகள் மற்றும் 63 நகராட்சிகளில் 708 நகர்ப்புற மருத்துவமனைகள் ஏற்படுத்தப்படும். அரசுப்பொது மருத்துவமனைகளை நோக்கி மக்கள் வரும்போது கூட்டநெரிசலால் அவதிக்குள்ளாகாமல் இருக்கவேண்டி இத்திட்டம் கொண்டுவரப்பட்டுள்ளது.

5. தமிழகத்தின் 234 தொகுதிகளிலும் 'உங்கள் தொகுதியில் முதலமைச்சர் திட்டம்' கொண்டுவரப்படும். இத்திட்டத்தின் மூலம், 234 தொகுதிகளில் நிறைவேற்றப்படாத முக்கிய தேவைகள் குறித்து அந்தந்த சட்டமன்ற உறுப்பினர்களின் பரிந்துரையின் அடிப்படையில் பரிசீலனை செய்யப்பட்டு அவற்றிற்கு தீர்வுகாணப்படும். ஒவ்வொரு சட்டமன்ற உறுப்பினரும் அவரவர் தொகுதியின் 10 முக்கிய பிரச்சினைகள் குறித்த பட்டியலை தயார் செய்து அரசின் கவனத்திற்கு கொண்டுவரும் பொருட்டு, அவற்றில் முக்கியமானவற்றிற்கு முன்னுரிமை அளிக்கப்பட்டு தீர்வுகாணப்படும். 

பதிவு: May 07, 2022
ஆசிரியரை அடிக்க கை ஓங்கிய மாணவன்; சஸ்பெண்ட் செய்து பள்ளி நிர்வாகம் அதிரடி! ஒழுக்கம் கற்பிக்கும் இடத்தில் ஒழுக்கக்கேடான செயல்களா?

ஆதனூரிலுள்ள அரசுப்பள்ளியில் தன்னை கண்டித்த ஆசிரியரை அடிக்க கை ஓங்கிய மாணவனை சஸ்பெண்ட் செய்து பள்ளி நிர்வாகம் நடவடிக்கை எடுத்துள்ளது.

திருப்பத்தூர் மாவட்டம், ஆம்பூருக்கு அருகே மாதனூர் பகுதியில் அரசு மேல்நிலைப்பள்ளி ஒன்று இயங்கி வருகிறது. இங்கு சஞ்சய் என்பவர் தாவரவியல் ஆசிரியராக பணிபுரிந்து வருகிறார்.

இந்நிலையில், பாடம் சார்ந்த ரெக்கார்ட் நோட்டை ஆசிரியர் சஞ்சய் மாணவர்களிடம் சமர்ப்பிக்கக் கூறியுள்ளார். ஆசிரியரின் பேச்சை கண்டுகொள்ளாமல் மாணவர் ஒருவர் வகுப்பிலேயே படுத்து தூங்கியுள்ளார்.

இதனைக் கண்ட ஆசிரியர் சஞ்சை மாணவரை அழைத்துக் கண்டித்துள்ளார். இதனால் ஆத்திரமடைந்த மாணவர் சஞ்சையை தகாத வார்த்தைகளால் திட்டி, ஆபாசமாகப்பேசி அடிக்கக் கை ஓங்கியுள்ளார். வகுப்பிலிருந்த மேலும் இரண்டு மாணவர்கள் இவருடன் சேர்ந்து ஆசிரியரைத் திட்டியுள்ளனர்.

இதையடுத்து, இது பற்றிய காணொலி இணையத்தில் வெளியானதையடுத்து பலரும் அதிர்ச்சியில் உறைந்துள்ளனர். மாணவர்களைத் திருத்த ஆசிரியர்களிடம் அடிக்கச்சொல்லி பெற்றோர்கள் கேட்டுக்கொண்ட காலம் போய், மரியாதையுடன் நடத்தவேண்டிய ஆசிரியர்களை இவ்வாறு ஆபாசமாகப் பேசும், தாக்க முயற்சிக்கும் மாணவர்கள் தற்சமயம் உருவெடுப்பது பலரிடையே அதிர்ச்சியை கிளப்பியுள்ளது.  

காணொலி வைரலானதையடுத்து சம்பவம் குறித்து பள்ளி தலைமை ஆசிரியர் வேலன் மாணவர் மற்றும் ஆசிரியரிடையே விசாரணை நடத்தினார். மேலும் தகவல்களைக் கேட்டறிந்த அவர் மாணவரை பள்ளியிலிருந்து இடைநீக்கம் செய்து உத்தரவிட்டுள்ளார்.

சமீபமாக ஆசிரியர்களை அவமதிக்கும் வகையில் மாணவர்களின் செயல்பாடுகள் தொடர்ந்து அமைந்துவருவது ஆசிரியர்களை கலக்கத்தில் ஆழ்த்தியுள்ளது. ஒழுக்கத்தின் பிறப்பிடமான பள்ளிகளிலேயே இவ்வாறு ஒழுக்கக் கேடான நிகழ்வுகள் நடைபெறுவது பெற்றோரை கவலையில் துவளவைப்பதாக உள்ளது.

பதிவு: April 21, 2022
'பல போட்டிகளில் தன் தனித்திறமையை நிரூபித்தவர் அவர்' - டென்னிஸ் வீரர் விஸ்வா தீனதயாளனுக்கு பிரதமர் மோடி இரங்கல்!

சாலை விபத்தில் உயிரிழந்த தமிழக டென்னிஸ் வீரர் விஸ்வா தீனதயாளனுக்கு பிரதமர் மோடி இரங்கல் தெரிவித்துள்ளார்.

83-வது சீனியர் சாம்பியன்ஷிப் போட்டியில் கலந்துகொள்ளும் பொருட்டு அஸ்ஸாம் சென்றிருந்த தமிழக டென்னிஸ் வீரரான விஸ்வா தீனதயாளன், போட்டி நடைபெறவிருந்த ஷில்லாங் பகுதிக்கு காரில் சென்றுகொண்டிருக்கையில் வேகமாக வந்த சரக்குலாரி மோதி பரிதாபமாக உயிரிழந்தார். அவருக்கு வயது 18. அவருடன் பயணித்த 3 பேர் காயங்களுடன் உயிர்தப்பினர்.

இச்செய்தி நாடெங்கிலும் பலரையும் கண்ணீரில் ஆழ்த்தியது. அவரது இறப்புக்கு தமிழக முதல்வர் மு.க.ஸ்டாலின், நாதக சீமான், ஒ.பன்னீர் செல்வம், எடப்பாடி பழனிசாமி உள்ளிட்ட கட்சித் தலைவர்கள் இரங்கல் தெரிவித்துள்ளனர். மேலும் அவரது குடும்பத்தினருக்கு ரூ.10 லட்சம் நிவாரண நிதியை தமிழக முதல்வர் ஸ்டாலின் அறிவித்துள்ளார்.

இந்நிலையில், உயிரிழந்த டென்னிஸ் வீரர் விஸ்வாவுக்கு இரங்கல் தெரிவித்து பிரதமர் மோடி ட்விட்டரில் பதிவொன்றை இட்டுள்ளார். இதுகுறித்து அவர் ட்விட்டரில்,

"டேபிள் டென்னிஸ் சாம்பியன் விஸ்வா தீனதயாளனின் மறைவு அதிர்ச்சியையும், வருத்தத்தையும் அளிக்கிறது. அவர் மற்ற வீரர்களால் பெரிதும் மதிக்கப்பட்டவர். பல போட்டிகளில் தன் தனித்திறமையை நிரூபித்தவர். இந்த சோகமான நேரத்தில் எனது எண்ணங்கள் அவருடைய குடும்பத்தினருடனும், நண்பர்களுடனும் இருக்கும். ஓம் சாந்தி”

என்று பதிவிட்டு தனது இரங்கலைத் தெரிவித்துள்ளார்.

பதிவு: April 18, 2022
‘இலங்கையிலிருந்து வரும் ஈழச்சொந்தங்களை கைது செய்வது கண்டனத்துக்குரியது’ - நாதக சீமான் அறிக்கை!

இலங்கையிலிருந்து தமிழகம் நோக்கிவரும் ஈழத்தமிழர்களை கைது செய்வது கடும் கண்டனத்திற்குரியது என்றும், அவர்களுக்கு உதவும் பொருட்டு அனைத்து வசதிகளையும் செய்யவேண்டியும் நாம் தமிழர் கட்சி ஒருங்கிணைப்பாளர் சீமான் அறிக்கை வெளியிட்டுள்ளார்.

இதுகுறுத்து அவர் வெளியிட்டுள்ள அறிக்கையில்,

“இலங்கை நாட்டில் ஏற்பட்டுள்ள பொருளாதார வீழ்ச்சியின் விளைவினால் அத்தியாவசியப்பொருட்களின் விலை பன்மடங்கு உயர்ந்து, அந்நாட்டுக் குடிமக்கள் அன்றாடச் செலவினங்களைக்கூட எதிர்கொள்ள முடியாது வறுமைக்கும் ஏழ்மைக்கும் உள்ளாகி, தவித்து வருகிற செய்திகள் கவலையளிக்கின்றன. சிங்கள இனவெறிப்பிடித்து, தமிழர்களை அழித்தொழிக்க உலகெங்கும் கடன்களை வாங்கிக்குவித்து, நாட்டு மக்களின் வாழ்வியல் மேம்பாட்டிலும், அனைவரையும் உள்ளடக்கிய பொருளாதார வளர்ச்சியிலும் கவனம்செலுத்தாத கொடுங்கோல் சிங்கள ஆட்சியாளர்களின் இனவெறிச்செயல்பாடுகளே இத்தகைய நிலைக்குக் காரணமென்றாலும், இன்றைக்கு தமிழர்களும் சேர்ந்துப் பாதிப்புக்குள்ளாகி நிற்பது பெரும் மனவேதனையைத் தருகிறது.

 இவ்வளவு ஆண்டுகளாக, சிங்கள ஆட்சியாளர்களின் இன ஒதுக்கல் நடவடிக்கைகளால் அடக்கி ஒடுக்கப்பட்டு, கொடும் துயரத்திற்கு ஆளாகி நின்ற தமிழ்ச்சொந்தங்கள், இப்போது பொருளாதார நெருக்கடியினாலும், வறுமையின் கோரப்பிடியினாலும் வாடி வதங்கி, வாழ்க்கையை நடத்த முடியாத துயர்மிகு சூழலில், நாளும் அல்லல்பட்டு வருவது பெரும் மனவலியைத் தருகிறது. இத்தகைய கையறு நிலையில், தாய்த்தமிழகத்தில் தஞ்சம்கேட்டு, கடல்வழியாக, படகுகளின் மூலம் அடைக்கலம் தேடிவரும் ஈழச்சொந்தங்களை வழக்குகள் போட்டு கைது செய்வது மேலும் துன்பத்திற்குள்ளாக்குவது கொடுமை. அதிலும் பெற்றோர்களையும் குழந்தைகளையும் பிரித்து சிறையிலும் முகாம்களிலும் அடைப்பது கடும் கண்டனத்திற்குரியது.

அனைத்தையும் இழந்து வரும் நம்மக்களை ஆரத்தழுவி அரவணைத்து, திபெத்திய ஏதிலிகளுக்கு இந்நாடு வழங்கியிருக்கிற சலுகைகளையும், வசதிகளையும் போல நம் சொந்தங்களுக்கும் செய்து கொடுத்து, அவர்களைக் காக்க முன்வர வேண்டுமென நாம் தமிழர் கட்சி சார்பாக மத்திய, மாநில அரசுகளைக் கேட்டுக்கொள்கிறேன்.”

இவ்வாறு தெரிவித்துள்ளார்.

பதிவு: March 24, 2022
‘உக்ரைனிலிருந்து தாயகம் திரும்பும் மாணவர்கள் தங்களது படிப்பை இங்கேயே தொடர வழிவகை செய்க!' - பிரதமருக்கு முதல்வர் ஸ்டாலின் கடிதம்!

ரஷ்யா-உக்ரைன் இடையே நடைபெற்று வரும் போரினால் பாதிக்கப்பட்டு, தாயகம் திரும்பும் மருத்துவ மாணவர்கள் தங்களது படிப்பை இந்தியாவில் தொடரும் வகையில் உரிய நடவடிக்கைகளை உடனடியாக மேற்கொள்ள வலியுறுத்தி பிரதமர் நரேந்திர மோடி அவர்களுக்கு, தமிழ்நாடு முதலமைச்சர் மு.க.ஸ்டாலின் அவர்கள் கடிதம் ஒன்றை எழுதியுள்ளார்.

இதுகுறித்து அவர் எழுதியுள்ள கடிதத்தில்,

“உக்ரைனுக்கும் ரஷ்யாவிற்கும் இடையே நடைபெற்று வரும் போரில் சிக்கித் தவிக்கும் ஆயிரக்கணக்கான இந்திய மாணவர்களை மீட்டு அழைத்து வருவதில் இந்திய அரசு மேற்கொண்டுவரும் முயற்சிகளை அங்கீகரிக்கும் அதேவேளையில், ஆயிரக்கணக்கான மாணவர்கள் தங்கள் படிப்பைத் தொடர்வதில் எதிர்கொள்ளும் நிச்சயமற்ற தன்மையைத் தீர்க்க வேண்டிய அவசியம் உள்ளது.

போர் தொடங்கியதில் இருந்து, இதுவரை 1200-க்கும் மேற்பட்ட மருத்துவ மாணவர்கள் தமிழ்நாட்டிற்குத் திருப்பியுள்ளனர். எஞ்சியுள்ள மாணவர்களும் வரும் நாட்களில் உக்ரைனிலிருந்து தாயகம் திரும்புவார்கள் என்று எதிர்பார்க்கிறேன். தற்போதைய சூழ்நிலை, அம்மாணவர்களின் படிப்பினை சீர்குலைத்துள்ளது; அவர்களின் எதிர்காலம் அச்சுறுத்தலில் உள்ளது.

உக்ரைனில் முன்னெப்போதும் இல்லாத வகையில், தற்போது நிலவும் சூழ்நிலையில், இந்த மருத்துவ மாணவர்கள் உக்ரைனில் உள்ள தங்கள் கல்லூரிகளுக்குத் திரும்புவதும், படிப்பை தொடர்வதும் நடைமுறையில் சாத்தியமில்லை. போர் நிறுத்தப்பட்ட பின்னரும், பல்கலைக்கழகங்களில் இயல்பு நிலை திரும்பும் வரையில் இந்த நிச்சயமற்ற நிலையே நிலவும்.

எனவே இந்தப் பிரச்சினையில் மாண்புமிகு இந்தியப் பிரதமர் அவர்கள் அவசரமாகத் தலையிட்டு, சிறப்புக் கவனம் செலுத்தி, தேசிய மருத்துவ ஆணையம் மற்றும் தொடர்புடைய அமைச்சகங்களின் கவனத்திற்கு கொண்டுசெல்லவேண்டும்.

உக்ரைனில் தங்களது படிப்பு தடைபட்ட நிலையில், அம்மாணவர்கள் இந்தியாவில் உள்ள மருத்துவக் கல்லூரிகளில் தங்களது படிப்பைத் தொடர உடனடியாகத் தீர்வு காண உரிய வழிமுறைகளைக் கண்டறிய அவர்களுக்கு உத்தரவிட வேண்டுமென்று கேட்டுக் கொள்கிறேன். இது தொடர்பாக இந்திய அரசு எடுக்கும் அனைத்து முயற்சிகளுக்கும் தமிழக அரசு தனது இடைவிடாத ஆதரவை அளிக்கும் என்றும் நான் உறுதியளிக்கிறேன்.”

இவ்வாறு குறிப்பிட்டுள்ளார்.

பதிவு: March 07, 2022
கோகுல்ராஜ் ஆணவக்கொலை வழக்கு - 10 பேர் குற்றவாளிகள் என மதுரை சிறப்பு நீதிமன்றம் அதிரடித் தீர்ப்பு!

பொறியியல் மாணவர் கோகுல்ராஜ் ஆணவக்கொலை செய்யப்பட்ட வழக்கில், யுவராஜ் உள்ளிட்ட 10 பேர் குற்றவாளிகள் எனத் தீர்ப்பளித்துள்ளது மதுரை சிறப்பு நீதிமன்றம்.

சேலம் மாவட்டம் ஓமலூரைச் சேர்ந்த பொறியியல் கல்லூரி மாணவரான கோகுல்ராஜ், கடந்த 2015-ஆம் ஆண்டு, ஜூலை 23-ஆம் தேதி, நாமக்கல் மாவட்டத்திலுள்ள தொட்டிப்பாளையம் இரயில் தண்டவாளத்தில் மர்மமான முறையில் கொலைசெய்யப்பட்டு கிடந்தார்.

கல்லூரி சென்றிருந்த கோகுல்ராஜ், வீடு திரும்பாத நிலையில், கோகுல்ராஜின் தாயார் சித்ரா காவல் நிலையத்தில் புகாரளித்தார். இதுகுறித்து காவல்துறையினர் விசாரித்ததில், பட்டியலினத்தைச் சேர்ந்த அவர், வேறு சாதியைச் சேர்ந்த பெண்ணை காதலித்ததும், அதற்கு எதிர்ப்பு தெரிவித்து சங்ககிரி தீரன் சின்னமலைக் கவுண்டர் பேரவை நிறுவனர் யுவராஜ், அவரது கூட்டாளிகளின் உதவியுடன் அவரை கடத்தி, தலையைத் துண்டித்துக்கொன்று இரயில் தண்டவாளத்தில் கிடத்தியதும் தெரியவந்தது.

இந்நிலையில், குற்றம்சாட்டப்பட்ட யுவராஜ் உள்ளிட்ட 17 பேர் மீது வழக்குப்பதிவு செய்யப்பட்டு, இதுகுறித்தான வழக்கு நாமக்கல் சிறப்பு நீதிமன்றத்தின்முன் விசாரணைக்கு வந்தது. பின் இதில் ஒருவர் மரணமடையவும், மற்றொருவர் காணாமல் போகவும், மீண்டும் மதுரை சிறப்பு நீதிமன்ற அமர்வின்முன் விசாரணைக்கு வந்தது.

இதைத் தொடர்ந்து, சுமார் 2 ஆண்டுகளாக நடைபெற்றுவந்த இவ்வழக்கின் மீதான தீர்ப்பை மதுரை சிறப்பு நீதிமன்றம் வழங்கியுள்ளது. அதன்படி குற்றம்சாட்டப்பட்டிருந்த 15 பேரில் 10 பேர் குற்றவாளிகள் என நீதிமன்றம் அதிரடித்தீர்ப்பை வழங்கியுள்ளது. மேலும் குற்றவாளிகளின் தண்டனை குறித்த விபரங்களை மார்ச் 8 அன்று அறிவிப்பதாகவும் நீதிமன்றம் தெரிவித்துள்ளது.

பதிவு: March 05, 2022
'மேகதாது திட்டத்தினை தடுத்து நிறுத்த தமிழ்நாட்டிற்கு அனைத்து உரிமையும் உண்டு' - சித்தராமையாவிற்கு ஒ.பி.எஸ். கடும் கண்டனம்!

மேகதாது திட்டத்திற்கு இடையூறு செய்ய தமிழ்நாட்டிற்கு உரிமை இல்லை என கர்நாடக சட்டமன்ற எதிர்க்கட்சித் தலைவர் சித்தராமையா கூறியிருந்ததை அடுத்து, அதற்கு அதிமுக ஒருங்கிணைப்பாளர் ஒ.பன்னீர்செல்வம் கடும் கண்டனம் தெரிவித்து அறிக்கை ஒன்றை வெளியிட்டுள்ளார். 

இதுகுறித்து அவர் வெளியிட்டுள்ள அறிக்கையில்,

"யானை வரும் பின்னே. மணியோசை வரும் முன்னே" என்ற பழமொழிக்கேற்ப, கர்நாடக சட்டசபை தேர்தல் வரப்போகிறது என்பதற்கு அறிகுறியாக மேகதாது முதல் பெங்களூரு வரை காங்கிரஸ் பாத யாத்திரை மேற்கொள்ளப் போவதாக அறிவித்துள்ள கர்நாடக மாநில முன்னாள் முதலமைச்சரும் தற்போதைய எதிர்க்கட்சித் தலைவருமான திரு. கே. சித்தராமையா அவர்கள், மேகதாது திட்டத்திற்கு இடையூறு செய்ய தமிழ்நாட்டிற்கு உரிமை இல்லை என்று பேட்டி அளித்திருப்பதாக பத்திரிகையில் செய்தி வந்திருப்பது காவேரி நடுவர் மன்றத்தின் இறுதித் தீர்ப்பிற்கு முற்றிலும் எதிரான செயல். இதனை எதிர்த்து குரல் கொடுக்க தமிழ்நாடு காங்கிரஸ் கட்சி தயங்குவது வருத்தமளிக்கும் செயல்.

காவேரி ஆற்றின் குறுக்கே மேகதாது அணையை கட்டுவோம் என்ற குரல் கர்நாடகாவில் நீண்ட நாட்களாக ஒலித்துக் கொண்டிருந்தாலும், கடந்த சில மாதங்களாக இது ஓங்கி ஒலித்துக் கொண்டிருக்கிறது. இதற்குக் காரணம் அடுத்த ஆண்டு கர்நாடக மாநில சட்டமன்றத் தேர்தல் நடக்க இருப்பதுதான்.

கர்நாடகா, தமிழ்நாடு, கேரளா, புதுச்சேரி ஆகிய நான்கு மாநிலங்களிடையே பாயும் நதியான காவேரி ஆற்றின் குறுக்கே எந்தத் திட்டத்தை செயல்படுத்த வேண்டுமானாலும், மேற்படி மாநிலங்களின் அனுமதி இல்லாமல் எந்த அணையையும் கட்ட முடியாது என்று காவேரி நடுவர் மன்ற இறுதித் தீர்ப்பில் தெளிவாக குறிப்பிடப்பட்டுள்ளது. காவேரி நடுவர் மன்ற இறுதித் தீர்ப்பின்படி கர்நாடகா தமிழ்நாட்டிற்கு 192 டி.எம்.சி. தண்ணீர் கொடுக்க வேண்டுமென்றாலும், இதனை விசாரித்த உச்ச நீதிமன்றம், பெங்களூர் குடிநீர்த் தேவையையும் கருத்தில் கொண்டு, தமிழ்நாட்டின் நீர்ப் பங்கினை 177.25 டி.எம்.சி. ஆக குறைத்து, அதாவது 14.75 டி.எம்.சி குறைத்து உத்தரவிட்டது. இந்தச் சூழ்நிலையில், மீண்டும் பெங்களூர் குடிநீர்த் தேவையையும், மின் உற்பத்தித் திட்டத்தையும் சுட்டிக்காட்டி காவேரி ஆற்றின் குறுக்கே 67.16 டி.எம்.சி. கொள்ளளவு கொண்ட அணையை மேகதாதுவில் கட்டுவோம் என்று சொல்வதும், இந்தத் திட்டத்தை செயல்படுத்துவதால் தமிழ்நாட்டின் நலன் பாதிக்காது என்று கூறுவதும் தமிழ்நாட்டிற்கு உரிமை இல்லை என்று சொல்வதும் நியாயமற்ற செயல்,

மேட்டூர் அணையில் காவேரி நீர் வந்து சேரும் இடத்திற்கு சில கிலோ மீட்டர் தூரத்திற்கு முன்னால் உள்ள மேகதாதுவில் 57.15 டி.எம்.சி. கொள்ளளவு கொண்ட அணை கட்டப்பட்டால், காவேரி ஆற்றில் வரும் நீர் மற்றும் இடைப்பட்ட பகுதிகளில் பொழியும் மழைநீர் ஆகியவை மேகதாதுவில் சேமித்து வைக்கப்படும் நிலை உருவாகும். இதன்மூலம் ஒரு சொட்டு நீர் கூட தமிழ்நாட்டிற்கு கிடைக்காத சூழ்நிலை ஏற்படும். ஏற்கனவே காவேரி ஆற்றின் குறுக்கே பல அணைகளை கட்டியுள்ள கர்நாடகம் விவசாயம் மேற்கொள்ளும் பரப்பையும் பல மடங்கு உயர்த்தியுள்ளது. அதே சமயத்தில், காவேரி ஆற்றின் மூலம் விவசாயம் மேற்கொள்ளும் பரப்பு தமிழ்நாட்டில் குறைந்து வருகிறது. இப்போது கூட காவேரி நடுவர்மன்ற இறுதித் தீர்ப்பின்படி மாதாமாதம் தமிழ்நாட்டிற்கு உரிய தண்ணீரை கர்நாடகம் திறந்துவிடுவதில்லை. மாறாக உபரி நீரைத் தான் ஒவ்வொரு ஆண்டும் தமிழ்நாட்டிற்கு கர்நாடகம் அளித்து வருகிறது. உரிய நீருக்குப் பதிலாக உபரி நீர்தான் கிடைக்கிறது.

இந்தச் சூழ்நிலையில் மேகதாதுவில் அணை கட்டப்பட்டால், சுத்தமாக தமிழ்நாட்டிற்கு தண்ணீர் கிடைக்காத சூழ்நிலை உருவாகும். தமிழ்நாட்டை பாலைவனமாக்கும் முயற்சியை கர்நாடகத்தில் உள்ள அரசியல் கட்சிகள் மேற்கொண்டிருக்கின்றன. தமிழ்நாட்டின் ஒப்புதல் இல்லாமல், காவேரி மேலாண்மை வாரியத்தின் அனுமதி இல்லாமல் கர்நாடகா காவேரி ஆற்றின் குறுக்கே அணையை கட்ட முடியாது என்பதையும், இவ்வாறு கூறுவதே காவேரி நடுவர் மன்ற இறுதி ஆணைக்கும், உச்ச நீதிமன்றத் தீர்ப்பிற்கும் முரணான செயல் என்பதையும் நான் சுட்டிக்காட்ட விரும்புகிறேன். தமிழ்நாட்டிற்கு எதிரான கர்நாடகாவின் இந்தச் செயலுக்கு அனைத்திந்திய அண்ணா திராவிட முன்னேற்றக் கழகத்தின் சார்பில் கடும் கண்டனத்தைத் தெரிவித்துக் கொள்வதோடு, மேகதாது திட்டத்தினை தடுத்து நிறுத்துவதற்கான அனைத்து உரிமைகளும் தமிழ்நாட்டிற்கு சட்டப்படி உண்டு என்பதை அழுத்தந்திருத்தமாக இந்த தருணத்தில் தெரிவித்துக் கொள்கிறேன்"

இவ்வாறு அவர் தனது அறிக்கையில் தெரிவித்துள்ளார்.

பதிவு: February 28, 2022
“கோவை மாவட்டம் திமுகவிற்கு மாற்றான் தோட்டத்து மல்லிகை” – வேட்பாளர் அறிமுக கூட்டத்தில் அண்ணாமலை பேச்சு!

திமுக பொய் சொல்லத் துவங்கிவிட்டதாகவும், பாஜக-வை எதிர்த்து தான் திமுக தனது அரசியலை மேற்கொள்வதாகவும் பாஜக மாநிலத் தலைவர் அண்ணாமலை வேட்பாளர் அறிமுகக் கூட்டத்தில் பேசியுள்ளார்.

தமிழகத்தில் நகர்ப்புற உள்ளாட்சித் தேர்தல் பரப்புரை சூடுபிடித்துள்ளது. தேர்தலில் போட்டியிடும் அனைத்து கட்சிகளும் மக்களிடையே தீப்பரப்புரை மேற்கொண்டு வருகின்றனர்.

இந்நிலையில், கோவையில் உள்ளாட்சித் தேர்தலில் போட்டியிடும் பாஜக வேட்பாளர்களின் அறிமுக கூட்டத்தில் கலந்துகொண்ட பாஜக மாநிலத் தலைவர் அண்ணாமலை பேசியதாவது:

“ஆங்கிலேயர் எப்போது செல்வார்கள் என்று சிந்தித்ததை போல் திமுக ஆட்சி எப்போது போகும் என மக்கள் காத்திருக்கின்றனர். திமுக ஆட்சிக்கு வந்தவுடன் கோவையில் தடுப்பூசி தட்டுப்பாடு ஏற்பட்டுள்ளது.

கோவை மாவட்டம் திமுகவிற்கு மாற்றான் தோட்டத்து மல்லிகை என்றாலும் அது மணக்காது. கரூரிலிருந்து ஒரு டூரிஸ்ட் அமைச்சர் வந்துள்ளார். அங்கிருந்து ஆதரவாளர்களை அழைத்து வந்து அரசியல் செய்கிறார். இதை கோவை மக்கள் ரசிக்க மாட்டார்கள்.

மக்களின் ஆதரவு எப்போதும் பாஜகவிற்கு இருக்கும். மக்களுக்கும் வாக்குப்பெட்டிக்கும் இணைப்பு பாலமாக பாஜக வேட்பாளர்கள் இருக்க வேண்டும். இந்த நகர்ப்புற தேர்தலில் தனியாக பாஜக போட்டியிடுகிறது. பாஜக பலத்தை தெரிந்து கொள்ளவே தனித்து போட்டியிடுகிறோம்.

இந்த தேர்தல் சமூக வலைதள தேர்தலாக மாறியுள்ளது. ஸ்மார்ட் வொர்க் மூலமாக மொபைலை பயன்படுத்தி, சமூக வலைதளங்களில் பரப்புரை தொடர்பான காட்சிகள் மற்றும் படக்காட்சிகளை அதிகம் பகிர்ந்து பரப்புரை செய்ய வேண்டும். நேற்றில் இருந்து திமுக பொய் சொல்ல துவங்கிவிட்டது. பா.ஜ.க.,வை எதிர்த்து தான் அரசியல் செய்ய வேண்டும் என முதல்வர் முடிவு செய்து விட்டார்.

நீட் தேர்வை பாஜக திணித்தது என முதலமைச்சர் கூறுகிறார். ஆனால் பாஜக ஆட்சிக்கு வந்த பின் காங்கிரஸ் காலத்தில் தமிழகத்திற்கு ஒதுக்கப்பட்ட மருத்துவ இடங்களை காட்டிலும் கடந்த 7 ஆண்டுகளில் இரட்டிப்பு மடங்கு கூடுதலாக இடங்கள் ஒதுக்கப்பட்டுள்ளன. நீட் தேர்வு காரணமாக அதிக கட்டணம் வசூலிக்க முடியாமல் தமிழகத்தில் அதிக மருத்துவ கல்லூரிகளை இயக்கி வரும் திமுகவினர் தான் பாதிக்கப்பட்டுள்ளனர்.

ஒரு பக்கம் திமுக தனது அதிகாரத்தை காட்டுகிறது. ஒருபக்கம் பாஜக மோடியின் சாதனைகளை சொல்லி வெற்றிபெற உழைக்கிறோம். 2016-ல் நீட் தேர்வு மசோதா குடியரசு தலைவர் வரை சென்று திரும்ப வந்துள்ளது. ஆனால் அதை நினைவில் கொள்ளாமல் திமுக கூட்டணி கட்சிகளை மட்டும் இணைத்து அனைத்து கட்சி கூட்டம் நடத்தப்பட்டு நீட் தேர்விற்கு எதிராக தீர்மானம் நிறைவேற்றப்பட்டுள்ளது.

தமிழகத்தின் அனைத்து வீடுகளுக்கும் தாமரையை எடுத்து செல்வதே எங்கள் இலக்கு. கர்நாடகாவில் மதப்பிரச்னையை உருவாக்கியதே காங்கிரஸ் தான். இந்து என்பது மதமே கிடையாது, அது ஒரு வாழ்வியல். மதம் என்ற வார்த்தையை பயன்படுத்துபவர்கள் புரிதல் இல்லாதவர்கள்”

இவ்வாறு அவர் பேசினார்.

பதிவு: February 07, 2022
“ஆளுநர் ஒன்றும் தபால்காரர் அல்ல” – நீட் விலக்கு விவகாரத்தில் ஆளுநரின் செயல்பாடு குறித்து வானதி சீனிவாசன் சீற்றம்!

நீட் மசோதாவை ஆளுநர் திருப்பி அனுப்ப அவருக்கு அதிகாரம் உண்டு என்றும், அவர் தபால்காரர் அல்ல என்றும், நீட் விவகாரம் குறித்து எம்.பி. வானதி சீனிவாசன் கருத்து தெரிவித்துள்ளார்.

கடந்த செப்டம்பர் 13 அன்று, தமிழக அரசு சர்பாக நீட் தேர்வை விலக்கக் கோரி சட்டமன்றத்தில் நீட் விலக்கு மசோதா நிறைவேற்றப்பட்டு, தமிழக ஆளுநர் ஆர்.என்.ரவிக்கு சமர்ப்பிக்கப்பட்டிருந்தது.

இந்நிலையில் கிட்டத்தட்ட 5 மாதங்கள் கழித்து, அம்மசோதாவை மறுபரிசீலனை செய்யவேண்டி தமிழக ஆளுநர் ஆர்.என் தமிழக அரசுக்கு நேற்றைய தினம்(03/02/2022) திருப்பி அனுப்பினார். இந்நிகழ்வு தமிழகம் முழுவதும் கடும் சர்ச்சைகளைக் கிளப்பியது. ஆளுநரின் இச்செயல்பாட்டுக்கு பல்வேறு அரசியல் தலைவர்களும் கண்டனம் தெரிவித்தனர்.

இதையடுத்து, மாநிலங்கள் அனுப்பும் விஷயங்களை பரிசீலனை செய்யக்கோரி வலியுறுத்த ஆளுநருக்கு அதிகாரம் உண்டு என்று பாஜக எம்.பி. வானதி சீனிவாசன் கருத்து தெரிவித்துள்ளார்.

இதுகுறித்து அவர் விவரிக்கையில், “நீட் தேர்வுக்கு விலக்கு மசோதா தொடர்பாக கடந்த சட்டப்பேரவை கூட்டத் தொடரிலும், அனைத்துக் கட்சிக் கூட்டத்திலும் எங்கள் கட்சியின் நிலைப்பாட்டை தெளிவாக எடுத்து சொல்லிவிட்டோம்.  இந்த மசோதாவை குடியரசுத் தலைவருக்கு அனுப்பாமல் ஆளுநரே வைத்திருக்கிறார் என்று தமிழக அரசு குற்றம் சாட்டி வந்தது. இதை வைத்து ஆளுநரை மாற்ற வேண்டும் என்றும் திமுகவினர் கோரினார்கள்.

மாநில அரசு அனுப்பும் எல்லா விஷயங்களையும் எந்தப் பரிசீலனையும் செய்யாமல் குடியரசுத் தலைவருக்கு அனுப்ப வேண்டும் என்ற கட்டாயம் ஆளுநருக்கு கிடையாது. அப்படிச் செய்வதற்கு ஆளுநர் ஒன்றும் தபால்காரர் கிடையாது. மசோதாவில் இருக்கும் விஷயங்கள் குறித்து தெளிவு பெற ஆளுநருக்கு முழு உரிமை உள்ளது.

நீட் தேர்வு தொடர்பாக உச்ச நீதிமன்றம் தீர்ப்பளித்துள்ளது. அந்தத் தீர்ப்புக்கு இந்த மசோதா எந்த வகையில் மாறுப்பட்டிருக்கிறது என்பதை விளக்க வேண்டிய பொறுப்பு தமிழக அரசுக்கு உள்ளது. எந்தக் காரணத்துக்காக மசோதா திருப்பி அனுப்பப்பட்டுள்ளது என்பதையும் ஆளுநர் குறிப்பிட்டுள்ளார். நீட் விவகாரத்தில் உச்ச நீதிமன்றம் வழங்கியிருக்கும் தீர்ப்பு, தமிழக அரசை கட்டுப்படுத்தாது என நினைக்கும் வரை இந்த விவகாரம் தொடர்ந்து கொண்டேதான் இருக்கும்” இவ்வாறு அவர் கூறியுள்ளார்.

பதிவு: February 04, 2022
‘தமிழகம் முழுவதும் உள்ள டாஸ்மாக் பார்களை உடனடியாக மூட வேண்டும்’ - சென்னை உயர்நீதிமன்றம் அதிரடி உத்தரவு!

தமிழகத்தில் இயங்கிவரும் அனைத்து டாஸ்மாக் பார்களையும் விரைந்து மூடக்கோரி சென்னை உயர்நீதிமன்றம் தமிழக அரசுக்கு உத்தரவிட்டுள்ளது.

தமிழக அரசால் அனுமதியளிக்கப்பட்டு மாநிலம் முழுவதும் பல்வேறு டாஸ்மாக் மதுபானக்கடைகள் இயங்கிவருகின்றன. தமிழகத்தின் நிதி வருவாய்க்கு மிக முக்கிய பங்காற்றக்கூடிய தொழில் டாஸ்மாக் மதுபான விற்பனை என்பது மறுக்கமுடியாத உண்மை.

வருவாய் அதிகம் வரும் தொழில் என்பதாலேயே பல்வேறு எதிர்ப்புகள் வரினும் டாஸ்மாக்கை மூடுவது என்பது எந்த அரசாலும் நினைத்துப்பார்க்க முடியாத ஒரு விஷயமாக இருந்துவருகிறது. பொதுமக்களின் கண்துடைப்புக்காக அவ்வப்போது சில டாஸ்மாக் கடைகளை மூடுவது அரசின் தந்திர உத்திகளில் ஒன்று.

இந்நிலையில் தான், தமிழகம் முழுவதும் இயங்கிவரும் டாஸ்மாக் பார்களை 6 மாதத்திற்குள் மூடவேண்டி தமிழக அரசுக்கு சென்னை உயர்நீதிமன்றம் அதிரடி உத்தரவு பிறப்பித்துள்ளது.

டாஸ்மாக் கடைகளில் மதுபானம் விற்க மட்டுமே சட்டப்படி அனுமதிக்கப்பட்டுள்ளதாகவும், அதனுடன் பார்களை இணைத்து அங்கேயே மது அருந்த அனுமதி இல்லை என்றும் நீதிமன்றம் விளக்கமளித்துள்ளது. மேலும் பார்களுக்கு உரிமம் வழங்கும் அதிகாரம் காவல் வரித்துறை ஆணையருக்கு மட்டுமே உள்ளது எனவும் நீதிமன்றம் தெரிவித்துள்ளது.

இதுகுறித்து மேலும் விளக்கியுள்ள உயர்நீதிமன்றம், பார்களை நேரடியாகவோ, மறைமுகமாகவோ நடத்த சட்டப்படி அனுமதி இல்லை என்றும், டாஸ்மாக் கடைகளுக்கு அருகேயுள்ள இடங்களை மேம்படுத்தி பார் அமைக்க அனுமதி வழங்க முடியாது என்றும் திட்டவட்டமாக அறிவித்துள்ளது.

பதிவு: February 04, 2022
‘இந்திய அரசியலமைப்புச் சட்டத்தின் கருத்தை அழுத்தமாக வெளிப்படுத்தியமைக்கு நன்றி’ – ராகுலைப் பாராட்டி முதல்வர் மு.க.ஸ்டாலின் ட்வீட்!

நாடாளுமன்றத்தில், இந்தியாவின் அரசியலமைப்புச் சட்டத்தின் கருத்தை ஆழமாகப் பதியவைத்தமைக்காக காங்கிரஸ் எம்.பி. ராகுல் காந்திக்கு தமிழக முதல்வர் முக ஸ்டாலின் நன்றி தெரிவித்து ட்விட்டரில் ட்வீட் ஒன்றைப் பதிவிட்டுள்ளார்.

காங்கிரஸ் எம்.பி. ராகுல் காந்தி நேற்றைய தினம், நாடாளுமன்றத்தில் குடியரசுத் தலைவரின் உரைக்கு நன்றி தெரிவிக்கும் விவாதத்தில் பாஜகவை சரமாரியாக விமர்சித்து பேசியிருந்தார்.

அதில் அவர், தனக்கு வேண்டியதைக் கேட்டுப் பெறுவதும் பிறருக்கு வேண்டியதை என்னவென்று கேட்பதும் தான் கூட்டாட்சி முறை என்றும், இந்தியா கூட்டாட்சி நாடே தவிர ராஜ்ஜியம் இல்லை என்றும், பாஜக தமிழ்நாட்டை ஒருபோதும் ஆளவே முடியாது என்றும் அனல் பறக்கப் பேசியிருந்தார்.

இந்நிலையில், ராகுல் காந்தியின் பேச்சை மேற்கோள் காட்டி, அவருக்கு நன்றி தெரிவித்து தமிழக முதல்வர் ஸ்டாலின் தனது ட்விட்டர் பக்கத்தில் பதிவு ஒன்றை இட்டுள்ளார். அதில் அவர், “அன்புள்ள ராகுல் காந்திக்கு….. நாடாளுமன்றத்தில், இந்திய அரசியலமைப்புச் சட்டத்தின் கருத்தை அழுத்தமாக வெளிப்படுத்திய உங்களின் எழுச்சியூட்டும் உரைக்கு அனைத்துத் தமிழர்கள் சார்பாக நன்றியைத் தெரிவித்துக் கொள்கிறேன்.

சுயமரியாதையை மதிக்கும் தனித்துவமான கலாச்சார மற்றும் அரசியல் வேர்களில் தங்கியிருக்கும் தமிழர்களின் நீண்ட கால வாதங்களை பாராளுமன்றத்தில் நீங்கள் பேசியிருக்கிறீர்கள்” என்று பதிவிட்டு நன்றி தெரிவித்துள்ளார்.

பதிவு: February 03, 2022
அனைத்திந்திய சமூகநீதி கூட்டமைப்பில் இணைய சோனியா காந்தி உள்ளிட்ட 37 அரசியல் தலைவர்களுக்கு முதல்வர் ஸ்டாலின் கடிதம்!

அனைத்திந்திய சமூகநீதி கூட்டமைப்பில் இணையுமாறு சோனியா காந்தி, ஓ.பன்னீர் செல்வம் உள்ளிட்ட அரசியல் கட்சித் தலைவர்கள் 37 பேருக்கு முதல்வர் ஸ்டாலின் அவர்கள் கடிதம் எழுதியுள்ளார். அக்கடிதம் மற்றும் குறிப்பிடப்பட்டுள்ள தலைவர்கள் பெயர் குறித்த விபரம்:

                                                    முதலமைச்சரின் கடிதம்

வணக்கம்,

 நலம் திகழ இந்தக் கடிதத்தைப் பெற்றிருப்பீர்கள் என நம்புகிறேன்.

கடந்த 26.01.2022 அன்று நமது நாட்டின் 73-ஆவது குடியரசு நாளை நாம் கொண்டாடிய வேளையில், கூட்டாட்சி மற்றும் சமூகநீதிக் கோட்பாடுகளை வென்றெடுக்க அரசியல் கட்சித் தலைவர்கள், குடிமைச் சமூகத்தின் உறுப்பினர்கள், ஒத்த சிந்தனையுள்ள தனிநபர்கள் ஆகிய அனைவரையும் ஒரு பொதுவான குடையின் கீழ் ஒன்றிணைத்து, அனைத்திந்திய சமூகநீதிக் கூட்டமைப்பு ஒன்றைத் தொடங்கவுள்ளதாக அறிவித்தேன்.

 எல்லாருக்கும் எல்லாம் என்பதை அடிப்படையாய்க் கொண்டதுதான் சமூகநீதியாகும். சமூகநீதி என்பது அனைவருக்கும் சமமான பொருளாதார, அரசியல், சமூக உரிமைகளும் வாய்ப்புகளும் அமையவேண்டும் என்ற எண்ணம்தான். அனைவருக்கும் சமமான வாய்ப்புகள் என்பதை உறுதிசெய்வதன் வழியாகத்தான் நமது அரசியல் சட்டத்தை இயற்றியவர்கள் காண விரும்பிய சமத்துவச் சமுதாயத்தை கட்டியமைக்க முடியும்.

தமிழ்நாட்டில், வாழ்க்கையின் அனைத்துக் கூறுகளிலும் சமூகநீதிக்கான விதைகளை மக்களின் மனங்களிலும் எண்ணங்களிலும் விதைத்து, தந்தை பெரியார் எனும் பகுத்தறிவுச் சுடர் ஏற்படுத்திய சமூகநீதிப் புரட்சியை இம்மண்ணின் ஒவ்வொரு துகளும் விவரிக்கும். அசைக்க முடியாத இந்தத் தத்துவம்தான் கடந்த எண்பது ஆண்டுகளாகத் தமிழ்ச் சமூகத்தின் அடித்தளமாக விளங்கி அதன் அரசியலை பண்படுத்தி வந்துள்ளது. சமத்துவமின்மையை ஒழித்து அனைத்துத் துறைகளிலும் இம்மாநிலத்தை முன்னேற்ற முடிந்ததென்றால் அதற்குக் காரணம் சமூகநீதித் தத்துவத்துக்கு அளிக்கப்பட்ட சிறப்பிடம்தான்.

 இக்கடிதத்தை நான் எழுதும் இவ்வேளையில், தனித்தன்மை மிக்கதும் பன்முகத்தன்மை வாய்ந்த பல பண்பாடுகளால் ஆனதுமான நமது ஒன்றியம் பிரிவினை மற்றும் சமய மேலாதிக்கத்தினால் அச்சுறுத்தலுக்கு உள்ளாகியுள்ளது. சமத்துவம், சுயமரியாதை மற்றும் சமூகநீதி ஆகியவற்றில் நம்பிக்கை கொண்டுள்ள நாம் அனைவரும் ஒன்றிணைந்தால்தான் இவற்றை எதிர்த்துப் போரிட முடியும். இது அரசியல் ஆதாயம் பற்றியதல்ல; மாறாக நமது குடியரசு அமையப் பாடுபட்டோர் காண விழைந்த அடையாளத்தை மீண்டும் நிலைநிறுத்துவது பற்றியது ஆகும்.

 சமூகநீதித் தத்துவத்தின் மீதான தனது உறுதிப்பாட்டைத் திராவிட முன்னேற்றக் கழகம் ஒவ்வொரு முறையும் வலிமையாகப் போராடி வந்துள்ளது என்பது, அண்மையில், நாடு முழுவதும் மருத்துவம் மற்றும் பல் மருத்துவப் படிப்புகளில் அகில இந்திய ஒதுக்கீட்டுக்கு மாநிலங்கள் அளிக்கும் இடங்களில் இதர பிற்படுத்தப்பட்ட பிரிவினருக்கு அரசியல் மற்றும் சட்டப் போராட்டங்கள் வழியாக 27% இடஒதுக்கீட்டைப் பெற்றுத்தந்ததில் மீண்டும் ஒருமுறை நிலைநாட்டப்பட்டுள்ளது. எனினும் சமூகநீதியை உறுதிசெய்ய இடஒதுக்கீடு மட்டுமே போதுமானதல்ல. சமூகத்தின் பொதுநீரோட்டத்தில் இருந்து விலக்கப்பட்டு நூற்றாண்டுகளாய் எதிர்கொண்ட அடக்குமுறையை உடைத்தெறிய வேண்டுமானால் அத்தகையோருக்கு ஒவ்வொரு படியிலும் சில சிறப்புரிமைகள் தரப்பட வேண்டும். சாதிப் பாகுபாட்டுடன் பாலினப் பாகுபாட்டை ஒழிக்கவும்; மாற்றுத்திறனாளிகள் பொதுநீரோட்டத்தில் இணைந்து போட்டியிடக் கூடிய வகையிலும் நாம் முயற்சிகளை மேற்கொண்டாக வேண்டும்.

 மேற்குறிப்பிட்ட குறிக்கோள்களை அடைய, உண்மையாகவே மாநிலங்களாலான ஒன்றியமாக நாம் இணைந்து நிற்க வேண்டிய நேரம் இது என நான் முழுமனதாக நம்புகிறேன். மண்டல் ஆணையத்தை அமைக்க ஒற்றுமையுடன் நாம் காட்டிய அதே உறுதிப்பாட்டையும் நோக்கத்தையும் இப்போதும் வெளிப்படுத்தியாக வேண்டும். ஒவ்வொரு மாநிலத்திலும், வாய்ப்புக்கான கதவுகள் திறக்கப்படுவதற்காக ஒடுக்கப்பட்ட சமூகங்கள் ஆவலுடன் உள்ளன. இந்தியாவில் சமூகநீதிக் கருத்தியலை முன்னெடுத்துச் செல்வதற்கான திட்டத்தை வார்த்தெடுப்பதற்கும்; இன்னும் சிறப்பாகச் செயல்படக் கூடிய பகுதிகளைக் கண்டறிவதற்கும்; அனைத்து மாநிலங்களும் ஏற்றுக்கொள்ளத்தக்க குறைந்தபட்சச் செயல்திட்டத்தை உருவாக்குவதற்குமான தளமாக இக்கூட்டமைப்பு விளங்கும்.

 ஆகவே, தங்கள் அமைப்பில் இருந்து இந்த அனைத்திந்திய சமூகநீதிக் கூட்டமைப்புக்கான பிரதிநிதிகளாகத் தக்க நபர்/நபர்களை நியமிக்குமாறு அக்கறையுடன் கோருகிறேன். ஒடுக்கப்பட்டோருக்கு உண்மையான பொருள்பொதிந்த சமூகநீதி சென்றடைய நாம் ஒன்றுபட்டு இருந்தால்தான் முடியும். சமூகநீதியில் பல பத்தாண்டுகளாக நாம் அடைந்த முன்னேற்றத்துக்குப் பிற்போக்குச் சக்திகள் சவால் விடும் இந்த இடர்மிகு காலத்தில், ஒடுக்கப்பட்டோர் நலனை உறுதிசெய்ய முற்போக்கு ஆற்றல்கள் கைகோக்க வேண்டியது மிக இன்றியமையாதது ஆகும். இம்முன்னெடுப்பில், எங்களுடன் நீங்களும் இணைய உங்களை வரவேற்க நான் எதிர்நோக்குகிறேன்.

நன்றி.

 37 தலைவர்கள்

  1. திருமதி. சோனியா காந்தி (இந்திய தேசிய காங்கிரஸ்)
    2. திரு. லாலு பிரசாத் யாதவ் (ராஷ்டிரிய ஜனதா தளம்)
    3. திரு. ஃபரூக் அப்துல்லா (ஜம்மு காஷ்மீர் தேசிய மாநாடு)
    4. திரு. சரத் பவார் (தேசியவாத காங்கிரஸ்)
    5. திரு. டி. ராஜா (இந்திய கம்யூனிஸ் கட்சி)
    6. திரு. சீதாராம் யெச்சூரி (இந்திய கம்யூனிஸ்ட் கட்சி - மார்க்சிஸ்ட்)
    7. திரு. எச்.டி. தேவேகவுடா (மதச்சார்பற்ற ஜனதா தளம்)
    8. திரு. என். சந்திரபாபு நாயுடு (தெலுங்கு தேசம்)
    9. திரு. நவீன் பட்நாயக் (பிஜூ ஜனதா தளம்)
    10. செல்வி. மமதா பானர்ஜி (திரிணாமூல் காங்கிரஸ்)
    11. திருமதி. மெஹ்பூபா முப்தி (ஜம்மு காஷ்மீர் மக்கள் ஜனநாயக கட்சி)
    12. திரு. உத்தவ் தாக்கரே (சிவ சேனா)
    13. திரு. அரவிந்த் கேஜ்ரிவால் (ஆம் ஆத்மி)
    14. திரு. கே. சந்திரசேகர ராவ் (தெலங்கானா ராஷ்டிர சமிதி)
    15. திரு. ஒய்.எஸ். ஜெகன்மோகன் ரெட்டி (ஒய்.எஸ்.ஆர். காங்கிரஸ்)
    16. திரு. ஹேமந்த் சோரன் (ஜார்க்கண்ட் முக்தி மோர்ச்சா)
    17. திரு. என். ரங்கசாமி (என். ஆர். காங்கிரஸ்)
    18. திரு. லலன் சிங் (ஐக்கிய ஜனதா தளம்)
    19. திரு. அகிலேஷ் யாதவ் (சமாஜ்வாதி)
    20. செல்வி. மாயாவதி (பகுஜன் சமாஜ்)
    21. திரு. பவன் கல்யாண் (ஜன சேனா)
    22. திரு. வேலப்பன் நாயர் (அகில இந்திய பார்வார்டு பிளாக்)
    23. திரு. அசாதுதீன் ஓவைசி (ஏ.ஐ.எம்.ஐ.எம்)
    24. திரு. கே.எம். காதர் மொய்தீன் (இந்திய யூனியன் முஸ்லீம் லீக்)
    25. திருமதி. ரேனு ஜோகி (ஜனதா காங்கிரஸ்)
    26. திரு. அமரீந்தர் சிங் (பஞ்சாப் லோக் காங்கிரஸ்)
    27. திரு. சுக்பீர் சிங் பாதல் (சிரோமணி அகாலி தளம்)
    28. திரு. சிராக் பாஸ்வான் (லோக் ஜனசக்தி - ராம் விலாஸ்)
    29. திரு. ராஜ் தாக்கரே (மகாராஷ்டிர நவநிர்மான் சேனா)
    30. திரு. ஓம் பிரகாஷ் சவுதாலா (இந்திய தேசிய லோக் தளம்)
    31. திரு. கே.எம். மணி (கேரளா காங்கிரஸ் -எம்)
    32. திரு. ஓ. பன்னீர்செல்வம் (அ.இ.அ.தி.மு.க)
    33. திரு. வைகோ (ம.தி.மு.க)
    34. மருத்துவர். ராமதாஸ் (பா.ம.க)
    35. திரு. தொல். திருமாவளவன் (வி.சி.க)
    36. பேராசிரியர் ஜவாஹிருல்லா (ம.ம.க)
    37. திரு. ஈ.ஆர். ஈஸ்வரன் (கொ.ம.தே.க)

 

பதிவு: February 02, 2022
10, 11, 12-வகுப்பு மாணவர்களுக்கு மட்டும் நேரடி வகுப்பு நடத்தலாம் - விஜயகாந்த் யோசனை...

பொதுத் தேர்வை கருத்தில் கொண்டு 10, 11 மற்றும் 12-ம் வகுப்பு மாணவர்களுக்கு மட்டும் நேரடி வகுப்புகளை நடத்த அரசு நடவடிக்கை எடுக்க வேண்டும் என்று தேமுதிக தலைவர் விஜயகாந்த் யோசனை தெரிவித்துள்ளார்.

இதுகுறித்து இன்று அவர் வெளியிட்டுள்ள அறிக்கையில் கூறியிருப்பதாவது:

தமிழகத்தில் பிப்ரவரி 1ம் தேதி முதல் அனைத்துப் பள்ளிகளிலும் பயிலும் 1 முதல் 12-ம் வகுப்பு மாணவர்களுக்கு நேரடி வகுப்புகள் நடத்தப்படும் என தமிழக அரசு அறிவித்திருப்பதை பெற்றோர்களும், ஆசிரியர்களும் மாணவர்களும் வரவேற்பு தெரிவித்துள்ளனர். இந்த அறிவிப்பை தேசிய முற்போக்கு திராவிட கழகமும் வரவேற்கிறது. அதேவேளையில், நியோ கோவ் என்ற புதிய வகை கரோனா வைரஸ் கண்டறியப்பட்டுள்ளது. இது மனிதர்களுக்கு பரவும் வாய்ப்புள்ளது என தகவல் வருகிறது.

நியோகோவ் அதிக இறப்பு விகிதத்தை கொண்டுள்ளது என விஞ்ஞானிகள் எச்சரித்துள்ளனர். எனவே, பள்ளிகள் திறப்பது குழந்தைகளுக்கு பாதுகாப்பானதா என்பதை தமிழக அரசு கவனத்தில் கொள்ள வேண்டும். தமிழகத்தில் கரோனா வைரஸ் பரவல் இன்னும் குறையாத நிலையில் ஏற்கெனவே அமலில் இருந்த இரவு நேர ஊரடங்கு, ஞாயிறு முழு ஊரடங்கு உள்ளிட்ட பல்வேறு கட்டுபாடுகளை தமிழக அரசு ரத்து செய்திருப்பது நகர்புற உள்ளாட்சி தேர்தலுக்காகவோ என்ற சந்தேகம் எழுந்துள்ளது.

தற்போது அனைத்துக்கும் அனுமதி அளிக்கப்பட்ட பிறகு, பள்ளிகளை ஏன் திறக்க கூடாது என்ற கேள்வி எழக்கூடும் என்பதற்காகவே பிப்ரவரி 1-ம் தேதி முதல் அனைத்து பள்ளிகளும், கல்லூரிகளும் திறக்கப்படும் என அறிவித்திருப்பது தேர்தலுக்காகவே என எண்ணத் தோன்றுகிறது. தேர்தல் முடிந்த பின் புதிய வைரஸ் பரவி வருவதாக கூறி தமிழகத்தில் மீண்டும் ஊரடங்கை அமல்படுத்த மாட்டார்கள் என்பது என்ன நிச்சயம்.

எனவே, மாணவர்களின் நலன் கருதி அனைத்து வகுப்புகளுக்கும் நேரடி வகுப்புகள் நடத்தலாமா வேண்டாமா என்பது குறித்து தமிழக அரசு ஆராய்ந்து ஒரு நல்ல முடிவை எடுக்க வேண்டும். பொதுத் தேர்வை கருத்தில் கொண்டு 10, 11 மற்றும் 12-ம் வகுப்பு மாணவர்களுக்கு மட்டும் நேரடி வகுப்புகளை நடத்தலாம்.

இவ்வாறு விஜயகாந்த் கேட்டுக்கொண்டுள்ளார்.

பதிவு: January 29, 2022
நியூகோவ் வைரஸ் பற்றி பொதுமக்களிடம் பதற்றத்தை உருவாக்க வேண்டாம்- அமைச்சர் மா.சுப்பிரமணியன் அறிவுறுத்தல்...

நியூகோவ் வைரஸ் பற்றி பொதுமக்களிடம் பயத்தையும், பதற்றத்தையும் ஏற்படுத்தாமல் இருக்க வேண்டும் என்று அமைச்சர் மா.சுப்பரமணியன் அறிவுறுத்தியுள்ளார்.

கோவிலம்பாக்கம் ஊராட்சியில் நடைபெற்ற 20-வது மெகா தடுப்பூசி முகாமை மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பரமணியன் நேரில் பார்வையிட்டு ஆய்வு செய்தார். பின்னர் செய்தியாளர்களை சந்தித்த அமைச்சர் மா.சுப்பரமணியன் கூறியதாவது:

தமிழக முதல்வரின் வழிகாட்டுதலின்படி 20-வது மெகா மருத்துவ முகாம் தமிழ்நாடு முழுவதும் 50 ஆயிரம் இடங்களில் நடைபெற தொடங்கி உள்ளது. நகர்ப்புற உள்ளாட்சித் தேர்தல் விதிமுறைகள் நடைமுறையில் இருப்பதால், ஊராட்சி பகுதிகளில் நடைபெறக்கூடிய தடுப்பூசி முகாம்கள் ஆய்வு செய்கிறோம். இன்று கோவிலம்பாக்கம் ஊராட்சியில் தடுப்பூசி முகாம் சிறப்பாக நடைபெற்று வருகிறது.

தமிழகத்தில் இதுவரை 9 கோடியே 39 லட்சத்து 87 ஆயிரத்து 902 பேர் தடுப்பூசி செலுத்தியுள்ளனர். இதில் 18 வயதினருக்கும் மேல் முதல் தவணை தடுப்பூசி செலுத்திக் கொண்டவர்கள் 5 கோடியே 20 லட்சத்து 29 ஆயிரத்து 899 பேர். அதாவது 89.88 சதவிகிதம் பேர், 2வது தவணை தடுப்பூசி செலுத்திக்கொண்டவர்கள் 3 கோடியே 90 லட்சத்து 21 ஆயிரத்து 718 பேர். அதாவது 67.41 சதவிகிதத்தினர் செலுத்தியுள்ளனர்.

முதல்வர் 15 முதல் 18 வயதிற்குட்பட்ட சிறார்களுக்கு சைதாப்பேட்டை மாந்தோப்பு பெண்கள் மேல்நிலைப் பள்ளியில் தடுப்பூசி செலுத்துவதை தொடங்கி வைத்தார். இந்த வயதிற்குட்பட்ட 33 லட்சத்து 46 ஆயிரம் பேருக்கு தடுப்பூசி செலுத்தப்பட வேண்டியுள்ளது. இதுவரை பள்ளிகளிலேயே தடுப்பூசி செலுத்திக்கொண்டவர்கள் 25 லட்சத்து 91 ஆயிரத்து 788 பேருக்கு, அதாவது 77.46 சதவிகிதம் பேருக்கு தடுப்பூசி செலுத்தப்பட்டு சாதனைப் படைக்கப்பட்டிருக்கிறது.

பூஸ்டர் டோஸ் தடுப்பூசி, முன்னெச்சரிக்கை தடுப்பூசி செலுத்துவதை முதல்வர் சென்னையில் இமேஜ் அரங்கத்தில் தொடங்கி வைத்தார். அதில் நேற்று வரை 4 லட்சத்து 48 ஆயிரத்து 394 பேர் பூஸ்டர் தவணை தடுப்பூசி 76.83 சதவிகிதம் பேர் தடுப்பூசி செலுத்திக்கொள்ள தகுதியானவர்கள். அவர்களில் 3 லட்சத்து 44 ஆயிரத்து 497 பேருக்கு முன்னெச்சரிக்கை தடுப்பூசி செலுத்தப்பட்டு பணிகள் நிறைவுபெற்றிருக்கிறது. சிறார்களுக்கு தடுப்பூசி செலுத்தப்பட்டும், முன்னெச்சரிக்கை தடுப்பூசி செலுத்தும் பணிகள் இதுவரை 77 சதவிகிதத்திற்கு பணிகள் முடிக்கப்பட்டு சாதனைப் படைக்கப்பட்டிருக்கிறது. 18 வயதிற்கும் மேற்பட்டவர்கள் 2வது தவணை தடுப்பூசி செலுத்திக்கொள்ள வேண்டியவர்கள் 97 லட்சம் பேர் இருக்கிறார்கள். இவர்களுக்கு தடுப்பூசி செலுத்துவதையே இலக்காகக் கொண்டு வாரந்தோறும் மெகா மருத்துவ முகாம்கள் நடத்தப்பட்டு வருகிறது.

தமிழகம் முழுவதும் உள்ள 12,525 ஊராட்சிகளில் முதல் தவணை 100 சதவிகிதம் தடுப்பூசி செலுத்திக்கொண்டவர்கள் 2,669 பேராக உயர்ந்திருக்கிறது. 24 நகராட்சிகளில் 100 சதவிகிதம் தடுப்பூசி செலுத்தப்பட்டிருப்பது மனநிறைவை தருகிறது. தமிழகம் முழுவதும் முதல் தவணை தடுப்பூசியை 90 சதவிகிதத்தினரும், 2வது தவணை தடுப்பூசியை 67 சதவிகிதம் பேருக்கும் செலுத்தப்பட்டுள்ளது.

100 சதவிகிதம் தடுப்பூசி செலுத்திக்கொண்டால்தான் எதிர்காலத்தில் எந்த விதமான வைரஸ் வந்தாலும் அதை தடுக்கக்கூடியதாக இருக்கும் என்று மருத்துவ ரீதியாக அறிவுறுத்தப்பட்டுள்ளது. இப்போது ஏற்படக்கூடிய 95 சதவிகித உயிரிழப்புகள் தடுப்பூசி செலுத்தாதனாலும், இணை நோய் உள்ளவர்களும்தான் மரணத்தைத் தழுவுகிறார்கள். தடுப்பூசி ஒன்றுதான் நம்மைக் காக்கக்கூடிய ஒன்று. ஆகவே அனைவரும் தடுப்பூசி செலுத்திக்கொள்ள வேண்டும்.

முதல்வர் கிருஷ்ணகிரி மாவட்டம் சாமணப் பள்ளி கிராமத்தில் மக்களைத் தேடி மருத்துவம் என்ற வரலாற்றுச் சிறப்புமிக்க திட்டத்தைத் தொடங்கி வைத்தார். இத்திட்டத்தின் கீழ் உயர் ரத்த அழுத்தத்தினால் பாதிக்கப்பட்ட 19 லட்சத்து 21 ஆயிரத்து 519 பேருக்கு மருத்துவ சிகிச்சை மற்றும் மருந்துகள் வழங்கப்பட்டுள்ளது. நீரிழிவு நோயினால் பாதிக்கப்பட்டவர்களுக்கு 13 லட்சத்து 15 ஆயிரத்து 474 பேருக்கு வீடுதேடி சென்று சிகிச்சை அளிக்கப்பட்டுள்ளது. உயர்ரத்த அழுத்தம் மற்றும் நீரிழிவு நோயினால் பாதிக்கப்பட்ட 9 லட்சத்து 71 ஆயிரத்து 990 பேருக்கு மருந்து மாத்திரைகள் வழங்கப்பட்டுள்ளது. நோய் ஆதரவு சிகிச்சை சேவைகள் 1 லட்சத்து 71 ஆயிரத்து 68 பேருக்கு அளிக்கப்பட்டுள்ளது.

3 லட்சத்து 27 ஆயிரத்து 851 பேருக்கு பிசியோதெரபி சிகிச்சைகள் அளிக்கப்பட்டுள்ளது. இதுவரை 47 லட்சத்து 09 ஆயிரத்து 66 பேர் இத்திட்டத்தில் முதல் முறையாக பயன்பெற்றிருக்கிறார்கள். தொடர்ந்து சிகிச்சை பெறுபவர்கள் 39 லட்சத்து 04 ஆயிரத்து 894 பேர். 86 லட்சம் பேருக்கு மருந்துப் பெட்டகங்கள் இலவசமாக வழங்கப்பட்டு பயன்பெற்றிருக்கிறார்கள்.

இன்னுயிர் காப்போம், நம்மைக் காக்கும் 48 என்ற திட்டத்தை முதல்வர் தொடங்கி வைக்கப்பட்டு 609 மருத்துவமனைகள் மூலம் தினந்தோறும் ஆயிரக்கணக்கானவர்கள் சிகிச்சை பெற்றுவருகிறார்கள். இச்சிறப்பு வாய்ந்த திட்டத்தின் கீழ் நாமக்கல் மாவட்டத்தில் விபத்தில் பாதிக்கப்பட்ட சிறுவன் குணமடைந்து முதல்வருடன் அச்சிறுவனுடன் உரையாடிய செய்தியை தொலைக்காட்சியில் கண்டோம். அதேப்போல் பொள்ளாச்சி கிரிக்கெட் வீரர் மோகன் விபத்தில் முகம் சிதைந்த நிலையில் சிகிச்சைப் பெற்று நலம் பெற்று, சிகிச்சை அளித்த மருத்துவருடன் செல்ஃபி எடுத்தனுப்பிய புகைப்படத்தை காணுகிற போது இத்திட்டத்தின் சிறப்பினை புரிந்துகொள்ளலாம். இத்திட்டத்தினால் 60-70 என்கிற அளவில் ஏற்பட்ட இறப்புகள் பாதிக்கும் மேல் குறைந்திருக்கிறது. மிக அற்புதமான இத்திட்டம் இந்தியாவையே திரும்பி பார்க்க வைத்திருக்கிறது. இத்திட்டத்தினால் இதுவரை பதினைந்து ஆயிரத்திற்கும் மேற்பட்ட உயிர்கள் காக்கப்பட்டிருக்கிறது.

இதனால் பொதுமக்கள் தங்கள் வசிக்கும் பகுதியில் விபத்துக்கள் ஏற்பட்டால் உடனடியாக தொடர்புடைய மருத்துவமனைக்கு கொண்டு சென்று தங்களின் கடமைகளை ஆற்றிட வேண்டுமாய் கேட்டுக்கொள்கிறோம். இப்போது சீனாவில் நியூகோவ் என்கிற வைரஸ் வவ்வாலால் ஏற்படுகிறது என்றும், இந்த வைரஸ் ஏற்பட்டால் 3 பேரில் ஒருவர் இறந்துவிடுவார் போன்ற செய்திகள் சமூக வலைத்தளங்களிலும், ஊடகங்களிலும் பெரிதுப்படுத்தப்பட்டு செய்திகள் வருகின்றன.

இச்செய்திகளை உலக சுகாதார நிறுவனம் போன்ற நிறுவனங்கள் உறுதி செய்யப்பட்டு அவர்கள் அறிவிக்கப்பட்ட பின்னர் இச்செய்திகளை வெளியிடுமாறு கேட்டுக்கொள்கிறோம். ஏனென்றால் பொதுமக்களிடம் பயத்தையும், பதற்றத்தையும் ஏற்படுத்தாமல் இருக்க வேண்டும். இவற்றிற்கெல்லாம் ஒரே வழி தடுப்பூசி ஒன்றுதான்.

இவ்வாறு அமைச்சர் மா.சுப்பரமணியன் தெரிவித்தார்.

பதிவு: January 29, 2022
நகர்ப்புற உள்ளாட்சித் தேர்தல்; தலைவர், துணைத் தலைவர் பதவிகளில் விசிக-வுக்கு வாய்ப்பு வழங்க முதல்வர் ஸ்டாலினிடம் கோரினோம்- திருமாவளவன்...

நகர்ப்புற உள்ளாட்சித் தேர்தலில் பேரூராட்சி, நகராட்சி, மாநகராட்சி போன்றவற்றில் தலைவர், துணை தலைவர் போன்ற பதவிகளை நியமனம் செய்கிற போது, விசிகவுக்கு வாய்ப்புகள் வழங்க வேண்டும் என முதல்வர் மு.க.ஸ்டாலினிடம் வேண்டுகோள் வைத்துள்ளதாக விசிக தலைவர் தொல்.திருமாவளவன் கூறியுள்ளார்.

தமிழகத்தில் 21 மாநகராட்சிகள், 138 நகராட்சிகள், 490 பேரூராட்சிகள் என மொத்தம் 649 நகர்ப்புற உள்ளாட்சிகள் உள்ளன. இவற்றில் உள்ள 12,838 வார்டு உறுப்பினர் பதவியிடங்களுக்கு வரும் பிப்.19-ம் தேதி ஒரே கட்டமாக வாக்குப்பதிவு நடைபெறவுள்ளது. இதனையொட்டி தமிழகத்தில் உள்ள அரசியல் கட்சிகள் அதன் கூட்டணிக் கட்சிகளுடன் பேச்சுவார்த்தை நடத்தி வருகின்றனர்.

சென்னை அண்ணா அறிவாலயத்தில், முதல்வரும், திமுக தலைவருமான மு.க.ஸ்டாலினை விடுதலை சிறுத்தைகள் கட்சியின் தலைவர் தொல்.திருமாவளவன் இன்று சந்தித்தார். பின்னர் செய்தியாளர்களிடம் பேசிய அவர், "புத்தாண்டு பிறந்த பின்னர், முதல்வரை சந்தித்தேன். நகர்புற உள்ளாட்சித் தேர்தல் தொடர்பாக, மாவட்ட அளவில் ஆங்காங்கே திமுக மாவட்டச் செயலாளர்களோடு கூட்டணிக் கட்சிகளின் சார்பில் பேச்சுவார்த்தை நடந்து கொண்டிருக்கிறது. இந்தப் பேச்சுவார்த்தை சுமுகமாக நடந்து கொண்டிருக்கிறது.

விடுதலை சிறுத்தைகள் கட்சியின் சார்பில், மாவட்ட நிர்வாகத்தின் முன்னணி பொறுப்பாளர்கள், விடுதலை சிறுத்தைகள் கட்சிக்கு தேவையான இடங்களை பட்டியலிட்டு திமுக மாவட்டச் செயலாளர்களிடம் சமர்ப்பித்து இரண்டு மூன்று நாட்களாக பேச்சுவார்த்தையில் ஈடுபட்டு வருகின்றனர்.

இதுகுறித்து தமிழக முதல்வரும், திமுக தலைவருமான மு.க.ஸ்டாலினிடம் விடுதலை சிறுத்தைகள் கட்சிக்கு போதிய இடங்களை ஒதுக்க வேண்டும். பேரூராட்சி, நகராட்சி, மாநகராட்சி போன்றவற்றில் தலைவர், துணை தலைவர் போன்ற பதவிகளை நியமனம் செய்கிறபோது, விடுதலை சிறுத்தைகளுக்கும் வாய்ப்புகள் வழங்க வேண்டும் என்று வேண்டுகோள் விடுத்திருக்கிறோம்.

மாநகராட்சி, நகராட்சி, பேரூராட்சி போன்றவற்றில் பெண்களுக்கு 50 விழுக்காடு பிரதிநிதித்துவம் அளிக்கக்கூடிய நிலைப்பாடு போற்றுதலுக்குரியது. இதற்கு சமூகத்தில் பெரிய அளவில் வரவேற்பு இருக்கிறது. குறிப்பாக பெண்களிடத்தில் மிகப்பெரிய அளவில் உற்சாகம் உருவாகியிருக்கிறது. பெரியார் பிறந்த மண்ணில் மூடநம்பிக்கை ஒழிப்புச் சட்டம் கொண்டு வரப்பட வேண்டும். ஏற்கெனவே மறைந்த முதல்வர் கருணாநிதி அதற்கான முயற்சிகளை மேற்கொண்டிருக்கிறார். கர்நாடகா போன்ற அண்டை மாநிலங்களில் கூட அந்தச் சட்டம் நடைமுறையில் இருப்பது தெரியவருகிறது. எனவே, தமிழகத்திலும் அத்தகைய சட்டத்தை கொண்டு வர வேண்டும் என்று விசிக சார்பில் முதல்வரிடம் கோரிக்கை வைத்திருக்கிறோம்.

பொதுவாக கூறியிருக்கிறோம், மாநகராட்சி, நகராட்சி, பேரூராட்சியில் கவுன்சிலர் தேர்தலுக்கு பிறகு விசிகவையும் கவனத்தில் கொண்டு எங்களுக்கான வாய்ப்பை வழங்க வேண்டும் என்று சொல்லியிருக்கிறோம். தேர்தல் முடிந்தபின் அதை கவனத்தில் கொள்வதாக முதல்வர் பதிலளித்துள்ளார். குறிப்பிட்டு இந்த மாநகராட்சியை ஒதுக்க வேண்டும் என கேட்கவில்லை. காரணம், இவை எல்லாமே கவுன்சிலர்கள் மூலமாக தேர்வு செய்யக்கூடிய பதவிகள் இது.

நேரடியாக மக்கள் வாக்களித்து தேர்ந்தெடுக்கக்கூடிய பதவிகளாக இருந்தால், முன்கூட்டியே அதை தீர்மானிக்கக்கூடிய ஒரு தேவை எழும். தற்போதைய சூழலில் தேர்தல் முடிந்து கூட்டணி சார்பில், போதிய அளவிலான கவுன்சிலர்கள் வெற்றி பெற்றால்தான் அந்த பதவியையே நாம் பெறுவதற்கான போட்டியில் இறங்க முடியும். எனவே, அப்படி ஒரு சூழல் வரும்போதுதான் இதுகுறித்து நாம் விரிவாக பேச முடியும்.

ஆனாலும்கூட பொதுவாக நாங்கள், 2006-ஆம் ஆண்டில், மறைந்த முதல்வர் கருணாநிதி எங்களை அழைத்து கூட்டணியில் இணைத்துக் கொண்டபோது, கடலூர் நகராட்சியில் துணை தலைவர் பதவி, நெல்லிக்குப்பம் நகராட்சியில் தலைவர் பொறுப்பு, அதே போல் பாப்பிரெட்டிப்பட்டி, செந்துறை யூனியன் ஆகியவற்றில் ஒன்றிய பெருந்தலைவர் பதவிகளை வழங்கியதை நாங்கள் நினைவுபடுத்தினோம்.

இன்றைய முதல்வர், அப்போது உள்ளாட்சித் துறை அமைச்சராக இருந்த சூழலில் அவரும் எங்களுக்கு இந்த பதவிகளை வழங்கினார். இந்தத் தேர்தலிலும் முடிந்த அளவுக்கு கூட்டணிக் கட்சிகளை அரவணைத்துச் செல்ல வேண்டும் என்ற வேண்டுகோளை வைத்திருக்கிறோம். பேச்சுவார்த்தை நடந்து கொண்டிருக்கிறது, 4-ஆம் தேதி வரை கால அவகாசம் இருக்கிறது. எனவே, பேச்சுவார்த்தை முடிந்த பின்னர், 1-ம் தேதிக்குப் பிறகு வேட்புமனு தாக்கல் தொடங்கும்.

பதிவு: January 29, 2022
பேபி அணைப் பகுதியில் 15 மரங்களை வெட்ட தமிழக அரசு வலியுறுத்த வேண்டும் - ராமதாஸ் வலியுறுத்தல்...

பேபி அணைப் பகுதியில் உள்ள 15 மரங்களை வெட்ட முதலில் அனுமதிக்க வேண்டும். பேபி அணை வலுப்படுத்தப்பட்ட பிறகுதான், முல்லைப் பெரியாறு அணையின் பாதுகாப்பு குறித்த அறிவியல்பூர்வ ஆய்வு மேற்கொள்ளப்பட வேண்டும் என உச்ச நீதிமன்றத்தில் தமிழகம் வலியுறுத்த வேண்டும் என்று பாமக நிறுவனர் டாக்டர் ராமதாஸ் கேட்டுக்கொண்டுள்ளார்.

இது குறித்து இன்று அவர் வெளியிட்டுள்ள அறிக்கையில் கூறியிருப்பதாவது:

முல்லைப் பெரியாறு அணையின் பாதுகாப்பு மனநிறைவு அளிக்கும் வகையில் இருப்பதாகவும், அதே நேரத்தில் அணையின் பாதுகாப்பு குறித்து அறிவியல்பூர்வ ஆய்வு நடத்த வேண்டிய நேரம் வந்துவிட்டது என்றும் மத்திய நீர்வள ஆணையம் உச்ச நீதிமன்றத்தில் தெரிவித்துள்ளது. முல்லைப் பெரியாறு அணையின் பாதுகாப்பு குறித்த ஆய்வு அவசியமானது என்பதை ஏற்றுக்கொள்ளும் அதே நேரத்தில், அந்த ஆய்வு முல்லைப் பெரியாறு அணையின் நீர்மட்டத்தை 152 அடியாக உயர்த்துவதற்கான அடித்தளமாக அமைய வேண்டும்.

முல்லைப் பெரியாறு அணையின் வலிமை குறித்து புதிதாக தொடரப்பட்ட வழக்குகள் உச்ச நீதிமன்றத்தில் வரும் பிப்ரவரி 2ம் நாள் இறுதி விசாரணைக்கு வருகின்றன. அதற்கு முன் மத்திய நீர்வள ஆணையத்தின் சார்பில் அதன் துணை இயக்குனர் ராகேஷ்குமார் கவுதம் தாக்கல் செய்துள்ள அறிக்கையில், "முல்லைப் பெரியாறு அணையை வலுப்படுத்தும் பணிகளை கண்காணிப்பதற்காக உச்ச நீதிமன்றத்தால் அமைக்கப்பட்ட கண்காணிப்புக் குழு, அடிக்கடி அணையை ஆய்வு செய்து அணை பாதுகாப்பாக இருப்பதாக அறிக்கை அளித்துள்ளது. ஆனாலும், 2010-12 காலத்திற்குப் பிறகு அணை அறிவியல் பூர்வமான ஆய்வுக்கு உட்படுத்தப்படவில்லை. அதனால் முல்லைப் பெரியாறு அணையில் அறிவியல்பூர்வமான ஆய்வு மேற்கொள்ள வேண்டிய நேரம் வந்து விட்டது" என்று குறிப்பிட்டிருக்கிறார். முல்லைப் பெரியாறு அணையின் பாதுகாப்பு பற்றி கேரள அரசு அடிக்கடி பரப்பும் வதந்திகளைத் தடுக்க அறிவியல்பூர்வ ஆய்வு நடத்த வேண்டியது அவசியமாகும்.

ஆனால், அதற்கு முன்பாக மேற்கொள்ளப்பட வேண்டிய சில முக்கியப் பணிகள் உள்ளன. அது குறித்தும் ராகேஷ்குமார் கவுதம் தாக்கல் செய்த அறிக்கையில் குறிப்பிடப்பட்டிருக்கிறது. பேபி அணையை வலுப்படுத்த அந்த அணைக்கு கீழ் உள்ள 15 மரங்கள் தடையாக இருப்பதால் அவற்றை அகற்ற அனுமதிக்க வேண்டும் என்று தமிழக அரசால் பல ஆண்டுகளுக்கு முன் விடுக்கப்பட்ட கோரிக்கையை கேரள அரசு இன்னும் ஏற்றுக் கொள்ளவில்லை என்பதையும் மத்திய நீர்வள ஆணையம் அதன் அறிக்கையில் குறிப்பிட்டிருக்கிறது. முல்லைப் பெரியாறு சிக்கல் இன்னும் தீராமல் நீடித்துக் கொண்டே செல்வதற்கும் இது தான் காரணமாகும்.

முல்லைப் பெரியாறு அணையின் ஓர் அங்கமான பேபி அணையை வலுப்படுத்துவதற்கான நடவடிக்கைகள் தாமதப்படுத்தப்பட்டு வரும் நிலையில், அதை செய்து முடிப்பதற்கு முன்பாக அணையை அறிவியல்பூர்வமான ஆய்வுக்கு உட்படுத்துவது வீண் வேலையாகவும், முல்லைப் பெரியாறு அணை சிக்கலுக்கு சுமூகத் தீர்வு காணப்படுவதை தாமதப்படுத்தும் செயலாகவும் தான் இருக்கும். அதை தமிழக அரசு தடுக்க வேண்டும்.

முல்லைப் பெரியாறு அணையின் அதிகபட்ச நீர்மட்ட அளவு 152 அடியாகவே இருந்து வந்தது. 1979ம் ஆண்டில் அணையின் வலிமை குறித்து கேரள அரசு ஐயங்களை எழுப்பியதால் அணையின் நீர்மட்டத்தை அப்போதைய தமிழக அரசு, முதலில் 142 அடியாகவும், பின்னர் 136 அடியாகவும் குறைத்தது. அதன் பின்னர் அணை வலுப்படுத்தப்பட்ட பிறகு தமிழக அரசு தொடர்ந்த வழக்குகளை விசாரித்த உச்ச நீதிமன்றம், அணையின் நீர்மட்டத்தை முதலில் 142 அடியாகவும், பேபி அணை வலுப்படுத்தப்பட்ட பிறகு 152 அடியாகவும் உயர்த்தலாம் என்று 2006ம் ஆண்டிலும், 2014ம் ஆண்டிலும் உச்சநீதிமன்றம் ஆணையிட்டது. அணையை வலுப்படுத்தும் பணிகளை கண்காணிக்க கண்காணிப்பு குழுவையும் நீதிமன்றம் அமைத்தது.

கண்காணிப்புக் குழு அமைக்கப்பட்டு 7 ஆண்டுகளுக்கு மேலாகி விட்ட நிலையில், பேபி அணையையும், மண் அணையையும் வலுப்படுத்தும் பணிகள் இன்னும் நிறைவடையவில்லை. கேரள அரசின் ஒத்துழைப்பு இல்லாததுதான் அதற்குக் காரணம். பேபி அணைக்கு அருகில் உள்ள 15 மரங்களை வெட்டினால் தான் அந்தப் பகுதியில் பேபி அணையை வலுப்படுத்த முடியும். அந்த மரங்களை வெட்ட அனுமதிக்கும்படி கேரள அளவுக்கு கண்காணிப்புக் குழு அறிவுறுத்தியும் அதை கேரள அரசு செய்யவில்லை. காரணம், முல்லைப் பெரியாறு அணையின் நீர்மட்டம் 152 அடியாக உயர்த்தப்படுவதை கேரள அரசு விரும்பவில்லை.

இத்தகைய சூழலில் அணையின் பாதுகாப்பு குறித்து அறிவியல்பூர்வ ஆய்வு நடத்தப்பட்டால், அது முடிவடைய இரு ஆண்டுகள் ஆகலாம். அதுவரை பேபி அணையை வலுப்படுத்தும் பணிகளை மேற்கொள்ள முடியாது. அறிவியல்பூர்வ ஆய்வு முடிந்த பிறகு அணையை வலுப்படுத்தும் பணிகள் மேற்கொள்ளப்பட்டால் கூட, அதன்பிறகு அணை 152 அடி நீர்மட்டத்தை தாங்குமா? என்பதை உறுதி செய்ய மீண்டும் ஒருமுறை பாதுகாப்பு ஆய்வு மேற்கொள்ளப்பட்ட பிறகு தான் நீர்மட்டத்தை 152 அடியாக உயர்த்த முடியும். இதற்கு குறைந்தது 10 ஆண்டுகளாவது ஆகிவிடும். முல்லைப் பெரியாறு சிக்கல் அவ்வளவு காலம் நீடிக்கக்கூடாது.

மாறாக, பேபி அணையை வலுப்படுத்த தடையாக இருக்கும் 15 மரங்களை வெட்ட அனுமதிக்கப்பட்டால், ஓராண்டிற்குள் அணையை வலுப்படுத்தும் பணிகளை தமிழக அரசு முடித்து விடும். அதன்பிறகு அறிவியல் பூர்வ ஆய்வு மேற்கொள்ளப்பட்டால், அணை வலிமையாக உள்ளதா? அதன் நீர்மட்டத்தை 152 அடியாக உயர்த்தலாமா? என்ற இரு வினாக்களுக்கும் விடை கிடைத்து விடும். அதன் மூலம் அடுத்த சில ஆண்டுகளில் அணை நீர்மட்டம் 152 அடியாக உயர்த்தப்பட்டு விடும்; முல்லைப் பெரியாறு சிக்கலும் நிரந்தரமாக தீர்ந்து விடும்.

எனவே, பேபி அணைப் பகுதியில் உள்ள 15 மரங்களை வெட்ட முதலில் அனுமதிக்க வேண்டும்; பேபி அணை வலுப்படுத்தப்பட்ட பிறகு தான், முல்லைப் பெரியாறு அணையின் பாதுகாப்பு குறித்த அறிவியல்பூர்வ ஆய்வு மேற்கொள்ளப்பட வேண்டும் என உச்ச நீதிமன்றத்தில் தமிழகம் வலியுறுத்த வேண்டும். அதன்மூலம் முல்லைப் பெரியாறு நீர்மட்டம் 152 அடியாக முன்கூட்டியே உயர்த்தப்படுவதை உறுதி செய்ய வேண்டும்.

என்று ராமதாஸ் கேட்டுக்கொண்டுள்ளார்.

பதிவு: January 29, 2022
ஊழல் வழக்கில் முதல்வர் குற்றம்சாட்டிய நிறுவனத்துடன் காவல்துறை ஒப்பந்தமா? - அன்புமணி ராமதாஸ் கேள்வி...

"முதல்வரால் ஊழல் குற்றச்சாட்டு கூறப்பட்ட நிறுவனத்துடன் காவல்துறை ஒப்பந்தமா?" என்று பாமக இளைஞரணித் தலைவர் அன்புமணி ராமதாஸ் கேள்வி எழுப்பியுள்ளார்.

இதுகுறித்து அவர் தனது ட்விட்டர் பக்கத்தில், “காவல்துறையினரின் குடும்பங்களைச் சேர்ந்தவர்களுக்கு போட்டித் தேர்வுகளுக்கு பயிற்சி அளிப்பதற்காக சென்னை அப்பல்லோ பயிற்சி நிறுவனத்துடன் காவல்துறை தலைமை ஒப்பந்தம் செய்து கொண்டுள்ளது. காவல்துறையின் நோக்கம் சரியானது; பயிற்சி நிறுவனத் தேர்வு மிகவும் தவறானது. 2016-ஆம் ஆண்டு டி.என்.பி.எஸ்.சி குரூப் 1 தேர்வு மோசடியில் அப்பல்லோ பயிற்சி நிறுவனத்துக்கு தொடர்பு உள்ளது.

28.06.2017, 01.07.2017 ஆகிய தேதிகளில் இதை பா.ம.க. ஆதாரங்களுடன் அம்பலப்படுத்தியது. ஊழல் குறித்து விசாரணை நடத்த வலியுறுத்தி 01.07.2017 பா.ம.க. போராட்டம் நடத்தியது. டி.என்.பி.எஸ்.சி ஊழல் குறித்து பின்னர் வழக்கு பதிவு செய்யப்பட்டது. அதில் அப்பல்லோ பயிற்சி நிறுவனத்தில் மத்தியக் குற்றப்பிரிவு காவல்துறை 18.01.2018-இல் சோதனை நடத்தியது. அப்பல்லோ நிறுவனம் மீது நடவடிக்கை கோரி 07.02.2020-இல் திமுக தலைவர் மு.க.ஸ்டாலின் அறிக்கை வெளியிட்டார்.

மு.க.ஸ்டாலினால் ஊழல், மோசடி நிறுவனம் என்று குற்றஞ்சாட்டப்பட்ட அப்பல்லோ பயிற்சி நிறுவனத்துடன், அவரது ஆட்சியிலேயே, அந்த நிறுவனத்தில் சோதனை நடத்திய காவல்துறையே ஒப்பந்தம் செய்வது ஊழலுக்கு அளிக்கப்படும் அங்கீகாரமாக அமைந்துவிடாதா?

தமிழக அரசின் இந்த நடவடிக்கையால் அப்பல்லோ நிறுவனத்தின் மீதான வழக்கு விசாரணைகள் நீர்த்துப் போகக்கூடும். அதற்கு இடம் தராத வகையில், அப்பல்லோ பயிற்சி நிறுவனத்துடன் காவல்துறை செய்து கொண்டுள்ள ஒப்பந்தத்தை தமிழக அரசு ரத்து செய்ய வேண்டும்.

இவ்வாறு அன்புமணி ராமதாஸ் கூறியுள்ளார்.

பதிவு: January 29, 2022
கருவுற்ற மகளிருக்கு பணி மறுப்பது பாலின சமத்துவத்துக்கு எதிரானதுன- நிதியமைச்சருக்கு சு.வெங்கடேசன் எம்.பி. கடிதம்...

கருவுற்ற மகளிருக்கு பணி நியமனம் மறுப்பது பாலின சமத்துவத்துக்கு எதிரானது. இந்த சுற்றறிக்கையை எஸ்பிஐ உடனடியாக திரும்பப் பெற நடவடிக்கை எடுக்க வேண்டும் என வலியுறுத்தி நிதியமைச்சருக்கு வெங்கடேஷன் கடிதம் எழுதியுள்ளார்.

இது குறித்து அவர் வெளியிட்டுள்ள அறிக்கையின் விவரம் வருமாறு:

ஸ்டேட் வங்கி 31.12.2021 அன்று பணி நியமனங்கள் குறித்து வெளியிட்டுள்ள சுற்றறிக்கை அதிர்ச்சி தருகிறது. நாடு முழுவதும் ஜனநாயக அமைப்புகளின், மாதர் இயக்கங்களின், தொழிற் சங்கங்களின் கண்டனத்திற்கு ஆளாகி உள்ளது.

ஸ்டேட் வங்கி 250000 ஊழியர்களை கொண்ட அதில் 62000 மகளிர் ஊழியர்களை கொண்ட பெரிய அரசு வங்கி. வங்கித் துறையில் இவ்வளவு அதிகமாக வேலை வாய்ப்பு தருகிற இன்னொரு வங்கி கிடையாது. ஆனால் இவ்வளவு பெரிய வங்கி பாலின நிகர் நிலைப் பார்வையில் இவ்வளவு சுருங்கி இருப்பது வேதனை அளிக்கிறது.

மகளிர் கருவுற்ற காலத்தில் பணி நியமனத் தேர்வு பட்டியலில் இடம் பெற்று இருந்தாலும் அவர்கள் கருவுற்ற காலத்தில் 3 மாதங்களை எட்டி இருந்தால் அவர்களுக்கு பணி நியமனம் தரப்படாது. அவர்கள் "தற்காலிகமாக தகுதி அற்றவர்கள்". அவர்கள் "பிரசவத்திற்கு பின்னர் 4 மாதம் கழித்து பணியில் சேர அனுமதிக்கப்படுவார்கள்". என்ன அர்த்தம்? பெண்கள் 3 மாத கருவுற்ற காலத்தைக் கொண்டவர்களாக இருந்தால் அவர்கள் வங்கி பணி நியமனத்திற்கான எல்லா தேர்ச்சியை பெற்றிருந்தாலும் குறைந்த பட்சம் 7 மாதங்கள் காத்திருக்க வேண்டும். என்ன அநீதி!

இது உளவியல் ரீதியாக பெண்களை பாதிக்காதா? அதுவும் கருவுற்ற காலத்தில் அமைதியான மன நிலையை உறுதி செய்ய வேண்டியது முக்கியமில்லையா? சிலருக்கு உடனடி வேலை வாய்ப்பு என்பது அவர்களின் வாழ்க்கையை நகர்த்துவதற்கான முக்கியத் தேவை என்ற நிலை இருக்கலாம். அரசு நிறுவனங்கள் எனில் "மாதிரி பணி அமர்த்துபவர்" (Model Employer) ஆக இருக்க வேண்டாமா?

கருவுற்ற பெண்கள் வந்தால் பேருந்தில் கூட எழுந்து நின்று இடம் தருகிற பண்பாடு கொண்ட இந்தியச் சமுகத்தில் அவர்களுக்கான இடத்தைப் பறிக்கிற ஸ்டேட் வங்கியின் நிர்வாகத்தை என்ன சொல்வது? இது அப்பட்டமான, புரையோடி சீழ் பிடித்த பெண்ணடித்தன்மை சிந்தனையின் வெளிப்பாடு. இந்திய அரசியல் சாசன பிரிவுகள் 14,15,16 உறுதி செய்கிற சமத்துவத்திற்கு விரோதமானது. வேலை வாய்ப்பில் பாலின பாரபட்சம் கூடாது என்கிற 16 (2) பிரிவை அப்பட்டமாக மீறுவது.

பெண்கள் உங்களிடம் அனுதாபத்தை யாசிக்கவில்லை. உரிமைகளை கேட்கிறார்கள். பெண்களின் உரிமைகள் எல்லாம் நீண்ட நெடிய போராட்டங்கள் வாயிலாக சமூக சீர்திருத்த இயக்கங்களால், மாதர் அமைப்புகளால் ஈட்டப்பட்டவை. நவீன சமூகத்தின் சமத்துவ சிந்தனைகளை, பாலின நிகர் நிலைப் பார்வையை உள் வாங்கி ஒரு அரசு நிறுவனமே செயல்படவில்லை என்றால் தனியார் துறையில் பெண்களின் நிலை என்னவாகும்?

ஸ்டேட் வங்கியின் சுற்றறிக்கை திரும்ப பெறப்பட வேண்டும், கருவுற்ற மகளிருக்கு இழைக்கப்பட்டுள்ள அநீதி களையப்பட வேண்டும் என இன்று நிதியமைச்சர் நிர்மலா சீதாராமனுக்கும், ஸ்டேட் வங்கி தலைவருக்கும் கடிதங்களை எழுதியுள்ளேன்.

இவ்வாறு அதில் குறிப்பிடப்பட்டுள்ளது.

பதிவு: January 29, 2022
அரசு அலுவலர்களையும், காவலரையும் மிரட்டும் போக்கை நிறுத்த வேண்டும் - எடப்பாடி பழனிசாமி வலியுறுத்தல்...

தொடர்ந்து அரசு அலுவலர்களையும், காவல் துறையினரையும் மிரட்டும் அராஜகப் போக்கை உடனே நிறுத்த அரசு நடவடிக்கை எடுக்க வேண்டும் என சட்டப்பேரவை எதிர்க்கட்சித் தலைவர் எடப்பாடி பழனிசாமி வலியுறுத்தியுள்ளார்.

இது குறித்து இன்று அவர் வெளியிட்டுள்ள அறிக்கையில் கூறியுள்ளதாவது:

நிறைவேற்ற முடியாத வாக்குறுதிகளை அளித்து, தமிழக மக்களின் காதுகளில் பூ சுற்றி ஆட்சிக்கு வந்தது முதல் திமுக-வினரின் அட்டகாசம் எல்லை மீறிப் போயுள்ளது. காவல் துறையினரையும், அரசு அதிகாரிகளையும் மற்றும் பொதுமக்களையும் மிரட்டுவதும், சமூக விரோதச் செயல்களில் ஈடுபடுவதும் அன்றாட நிகழ்வுகளாகிவிட்டது.

ரேஷன் கடைகளில் தலையீடு, சட்ட விரோதமாக மணல் அள்ளும்போது தடுக்கும் வருவாய் மற்றும் காவல்துறை அதிகாரிகளைத் தாக்குவது, செய்யாத ஊரக வளர்ச்சிப் பணிகளுக்கு பில் பாஸ் செய்யுமாறு உள்ளாட்சித் துறை அதிகாரிகளை மிரட்டுவது, நேரடி நெல் கொள்முதல் நிலையங்களில் தலையீடு, விசாரணைக்கு அழைத்துச் செல்லும் குற்றம் சாட்டப்பட்ட நபர்களை விடுவிக்க காவல் நிலையத்திற்கு கும்பலாகச் சென்று பணியில் இருக்கும் காவலர்களை மிரட்டி, அவர்களை மீட்பது, சாலை மற்றும் கட்டடப் பணிகளை மேற்கொள்ளும் ஒப்பந்ததாரர்களை மிரட்டுவது, பணி மேற்பார்வையிடும் பொறியாளர்களை மிரட்டுவது என்று, அனைத்துத் துறைகளிலும் திமுக-வினரின் சட்ட விரோதச் செயல்கள் குறித்த செய்திகள் நாள்தோறும் நாளிதழ்களிலும், ஊடகங்களிலும் வெளிவருகின்றன.

நேற்றைய (28.1.2022) ஆங்கில நாளேடு ஒன்றில், திருவொற்றியூர் தொகுதி திமுக எம்எல்ஏ குறித்த செய்தி ஒன்று வெளிவந்துள்ளது. கடந்த புதன் கிழமை (26-ஆம் தேதி) இரவு மாநகராட்சி ஒப்பந்ததாரர், திருவொற்றியூர் பகுதியில் உள்ள நடராஜன் தோட்டம் என்ற இடத்தில் சாலை போடும் பணியில் ஈடுபட்டு வந்துள்ளார்.

சாலை போடும் பணியை மாநகராட்சி உதவிப் பொறியாளர் மேற்பார்வை செய்கிறார். அந்த சமயத்தில், ஒப்பந்ததாரர் தன்னை வந்து முறைப்படி தேதி : 29.1.2022 பார்க்காததால் ஆத்திரமடைந்த திருவொற்றியூர் தொகுதி எம்எல்ஏ தனது அடியாட்களுடன் சென்று சாலைப் பணிகளை நிறுத்தியுள்ளார். சாலை போடும் பணியை மேற்பார்வை செய்த சென்னை மாநகராட்சி உதவிப் பொறியாளரையும், பணியாளர்களையும் மிருகத்தனமாகத் தாக்கி விரட்டியுள்ளார் என்று அந்தப் பத்திரிகையில் செய்தி வெளிவந்துள்ளது.

மேலும், சாலை போடும் பணியில் ஈடுபடுத்தப்பட்ட தார், ஜல்லி கலவை இயந்திரங்கள் மற்றும் வாகனங்களை வலுக்கட்டாயமாக அப்புறப்படுத்தியதாகவும், அடியாட்களால் அடித்து உதைக்கப்பட்ட உதவிப் பொறியாளரை மிரட்டி, காவல் நிலையத்தில் புகார் செய்யவிடாமல் செய்திருக்கிறார், அந்த ஆளும் கட்சி திருவொற்றியூர் தொகுதி எம்எல்ஏ என்று பத்திரிகைச் செய்தி விளக்கமாகத் தெரிவித்துள்ளது.

இந்த அடாவடி மற்றும் அராஜகம் குறித்து ஆங்கிலப் பத்திரிகை செய்தியாளர், சென்னை வடக்கு மண்டல மாநகராட்சி துணை ஆணையாளரிடம் கேட்டதற்கு, இந்த சம்பவம் குறித்து தமக்கு வாய்மொழியாக புகார் வந்ததாகவும், அது குறித்து விசாரிப்பதாகவும் அந்த அதிகாரி பதில் அளித்துள்ளார். திமுக. சட்டமன்ற உறுப்பினரிடம் இந்நிகழ்வு குறித்து கேட்டபோது, முறைப்படி சாலை போடப்படாததை தமது கட்சிக்காரர்கள் போய் கேட்டதாகவும், தான் அங்கு போகவில்லை என்று மறுத்துக் கூறியதாகவும், நாளிதழ் செய்தி வெளியிட்டுள்ளது.

ஆளும் திமுக எம் எல் ஏவின் அடாவடி அராஜகம் பொது வெளியில் மக்களை சென்றடைந்ததை அறிந்த திமுக தலைமை, வேறு வழியின்றி அந்த சட்டமன்ற உறுப்பினரை, திருவொற்றியூர் பகுதி திமுக செயலாளர் பொறுப்பில் இருந்து நீக்கி இருப்பதாக நேற்றைய (28.1.2022) முரசொலி நாளிதழ் மூலம் அறிவித்துள்ளது, இந்த விடியா அரசின் இரட்டை வேடத்தைக் காட்டுகிறது.

ஆளும் கட்சி எம்எல்ஏ, அராஜகத்தில் ஈடுபட்டுள்ளார் என்று வெட்ட வெளிச்சமாகத் தெரிந்த பின்னும், அவரின் கட்சிப் பொறுப்பை மட்டும் பறித்துவிட்டு, வழக்குப் பதிவு செய்யாதது ஏன்? ஏற்கெனவே திருவொற்றியூரில் மீனவக் குடும்பங்களின் மீது தாக்குதல் நடத்தியதாக இவர்கள் மீது அப்பகுதி மக்கள் ஊடகங்களில் பேட்டி அளித்துள்ளனர். இதுவரை தவறு இழைத்தவர்கள் மீது நடவடிக்கை எடுக்கப்படவில்லை.

புண்ணுக்குப் புனுகு பூசும் வேலையையும், கண் துடைப்பு நடவடிக்கையையும், இந்த விடியா அரசு உடனடியாகக் கைவிட வேண்டும். தாக்குதலுக்கு உள்ளான மாநகராட்சி உதவிப் பொறியாளர் மற்றும் சாலை போடும் பணியில் ஈடுபட்ட ஊழியர்களிடம் முறைப்படி புகாரினைப் பெற்று, அவர்களை மிருகத்தனமாகத் தாக்கிய திருவொற்றியூர் தொகுதி திமுக எம்எல்ஏ மீதும், மற்றும் அவரது ஆதரவு ரவுடிகள் மீதும் வழக்குப் பதிவு செய்ய வேண்டும்.

ஆளும் திமுக-வினரின் அராஜகத்தால் உறைந்து போயுள்ள அரசு துறையைச்சேர்ந்தவர்கள், காவல் துறையைச் சேர்ந்தவர்கள் மற்றும் பொதுமக்கள் இது போன்று தாக்குதலுக்கு உள்ளாகும்போது, பத்திரிகை, ஊடகங்கள் மற்றும் சமூக ஊடகங்களில் அவற்றைத் தெரிவிப்பதோடு, தைரியமாக காவல் துறையினரிடமும் புகார் அளிக்க வேண்டும் என்று கேட்டுக்கொள்கிறேன். அரசு ஊழியரை பணி செய்யவிடாமல் தடுத்த திமுக எம்எல்ஏ மற்றும் அவரது ஆதரவாளர்கள் மீது சட்டப்படி நடவடிக்கை எடுக்க வேண்டும் என்று இந்த விடியா அரசை வலியுறுத்துகிறேன்.

இவ்வாறு எடப்பாடி பழனிசாமி தெரிவித்துள்ளார்.

பதிவு: January 29, 2022
தேர்தலில் போட்டியிட்டே கின்னஸ் சாதனை படைத்த ‘தேர்தல் மன்னன்’ பத்மராஜன், 227-வது முறையாக வேட்புமனு தாக்கல்!

தேர்தல் மன்னன் என்று அழைக்கப்படும் சேலம் பத்மராஜன், நடைபெறவிருக்கும் நகர்ப்புற உள்ளாட்சித் தேர்தலில் 227-வது முறையாக போட்டியிடுவதற்கான வேட்புமனுவைத் தாக்கல் செய்துள்ளார்.

‘தேர்தலில் வெற்றி, தோல்வி சகஜம்’ என்ற ஒரு சொல் உண்டு. ஆனால் தேர்தலில் போட்டியிடுவதை மட்டுமே வெற்றியாக்கி, அதில் சாதனையும் புரிந்து நம்மை அசரவைக்கிறார் தேர்தல் மன்னன் என்று அழைக்கப்படும் பத்மராஜன்.

சேலம் மாவட்டம் மேட்டூர் பகுதியை சேர்ந்தவர் பத்மராஜன். இவர் 1988 முதல் உள்ளாட்சி தேர்தல், எம்.எல்.ஏ., எம்.பி., குடியரசுத்தலைவர் உள்ளிட்ட பல்வேறு பதவிகளுக்கு வேட்புமனு தாக்கல் செய்துள்ளார். தமிழகம் தாண்டி புதுச்சேரியிலும் தேர்தல்களில் போட்டியிட்டுள்ளார்.

இதுவரை இவர் 226 தடவை பல்வேறு பதவிகளுக்கு வேட்புமனு தாக்கல் செய்துள்ளார். இச்சாதனை மூலம் கின்னஸ் மற்றும் லிம்கா புத்தகங்களில் இடம்பிடித்தும் உள்ளார். அண்மையில் நடைபெற்று முடிந்த ஊரக உள்ளாட்சித் தேர்தலில், சின்னசேலம் ஊராட்சி ஒன்றியத்திற்கு உட்பட்ட வி.அலம்பளம் ஊராட்சி தலைவர் பதவிக்கும், அம்மையகரம் வார்டு உறுப்பினர் பதவிக்கும் மனுதாக்கல் செய்திருந்தார்.

இந்நிலையில், பிப்ரவரி 19-ல் நடைபெறவிருக்கும் நகர்ப்புற உள்ளாட்சித் தேர்தலில் போட்டியிடும் பொருட்டு, 227-வது முறையாக வீரக்கல் புதூர் பேரூராட்சி இரண்டாவது வார்டு கவுன்சிலர் பதவிக்கு போட்டியிட பத்மராஜன் வேட்பு மனு தாக்கல் செய்துள்ளார்.

நாடக நடிகர் என்ற அடிப்படையில், உறுப்பினர் அட்டையைப் பெற்றுள்ள இவர், நடிகர் சங்கத் தேர்தலைக் கூட விட்டு வைக்காமல் அதிலும் போட்டியிட்டது தான் அதிரிபுதிரி ஹைலைட்.

பதிவு: January 29, 2022
அடுத்த 2 நாட்களுக்கு தமிழகத்தில் மிதமான மழைக்கு வாய்ப்பு- வானிலை ஆய்வு மையம் தவகல்...

தமிழகத்தில் நிலவும் கிழக்கு திசை காற்றின் வேக மாறுபாடு காரணமாக, தமிழகக் கடலோர மாவட்டங்கள், மேற்கு தொடர்ச்சி மலையை ஒட்டிய மாவட்டங்கள் மற்றும் புதுச்சேரி, காரைக்கால் பகுதிகளில் ஓரிரு இடங்களில் அடுத்த 2 நாட்களுக்கு லேசானது முதல் மிதமான மழை பெய்யக்கூடும் என்றுசென்னை வானிலை ஆய்வு மையம் தெரிவித்துள்ளது.

இதுதொடர்பாக வானிலை ஆய்வு மையம் வெளியிட்டுள்ள செய்திக் குறிப்பில் கூறியிருப்பதாவது:

29.01.2022: தமிழகக் கடலோர மாவட்டங்கள், மேற்கு தொடர்ச்சி மலையை ஒட்டிய மாவட்டங்கள் மற்றும் புதுச்சேரி, காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும். ஏனைய மாவட்டங்களில் பெரும்பாலும் வறண்ட வானிலையே நிலவும். 30.01.2022: தென் தமிழக கடலோர மாவட்டங்களில் ஓரிரு இடங்களில் லேசானது முதல் மிதமான மழை பெய்யக்கூடும். ஏனைய மாவட்டங்களில் பெரும்பாலும் வறண்ட வானிலையே நிலவும். 31.01.2022 மற்றும் 01.02.2022: தமிழகம் மற்றும் புதுச்சேரி, காரைக்கால் பகுதிகளில் பெரும்பாலும் வறண்ட வானிலையே நிலவும் என்று தெரிவிக்கப்பட்டுள்ளது.

சென்னையைப் பொறுத்தவரை, அடுத்த 48 மணி நேரத்திற்கு வானம் பொதுவாக மேகமூட்டத்துடன் காணப்படும். நகரின் ஒரு சில பகுதிகளில் லேசான மழை பெய்யக்கூடும். அதிகபட்ச வெப்பநிலை 31 டிகிரி செல்சியஸாகவும், குறைந்தபட்ச வெப்பநிலை 25 டிகிரி செல்சியஸை ஒட்டியிருக்கும். கடந்த 24 மணி நேரத்தில், அதிகபட்சமாக நீலகிரி மாவட்டம் குன்னூரில் 5 சென்டிமீட்டர், கேத்தி, வறளியாறு, அளக்கரை எஸ்டேட்டில் தலா 3 சென்டிமீட்டர் கோத்தகரியில் 2 சென்டிமீட்டர் மழையும் பதிவாகியிருந்தது.

இவ்வாறு அதில் கூறப்பட்டுள்ளது.

பதிவு: January 28, 2022
பெண் எஸ்.பி.-க்கு பாலியல் தொல்லை கொடுத்த புகாரில் முன்னாள் ஐ.ஜி. மீது சிபிசிஐடி விசாரணை தொடங்கியது- தமிழக அரசு தகவல்...

பெண் எஸ்.பி.-க்கு பாலியல் தொல்லை கொடுத்த புகாரில் லஞ்ச ஒழிப்புத் துறையின் முன்னாள் ஐ.ஜி. மீது சிபிசிஜடி விசாரணை தொடங்கிவிட்டதாக சென்னை உயர் நீதிமன்றத்தில் தமிழக அரசு தகவல் தெரிவித்துள்ளது.

லஞ்ச ஒழிப்பு துறை பணியாற்றிய ஐ.ஜி. முருகன் தனக்கு பாலியல் தொந்தரவு கொடுத்ததாக அதே துறையில் பணியாற்றிவந்த பெண் எஸ்.பி கடந்த 2018-ஆம் ஆண்டில் புகார் அளித்தார். அந்தப் புகாரின் மீது அரசு எவ்வித நடவடிக்கையும் எடுக்கவில்லை எனக் கூறி உயர் நீதிமன்றத்தில் பெண் எஸ்.பி வழக்கு தொடர்ந்தார். அந்த வழக்கில் சிபிசிஐடி விசாரணை தொடரலாம் என தனி நீதிபதி பிறப்பித்த உத்தரவை எதிர்த்த மேல்முறையீட்டு மனுவை விசாரித்த இரு நீதிபதிகள் கொண்ட அமர்வு, சிபிசிஐடி மற்றும் விசாகா குழு விசாரணைகளை தெலங்கானாவிற்கு மாற்றியும், அதன் விசாரணை அறிக்கைகளை 6 மாதங்களில் தாக்கல் செய்யவும் கடந்த 2019-ஆம் ஆண்டு ஆகஸ்ட் மாதம் உத்தரவிட்டிருந்தது.

இந்த உத்தரவை எதிர்த்து உச்ச நீதிமன்றத்தில் தமிழக அரசு தாக்கல் செய்த மேல்முறையீட்டு வழக்கில், பாலியல் புகார் தொடர்பான வழக்கு விசாரணையை தெலங்கானாவுக்கு மாற்றிய சென்னை உயர் நீதிமன்ற இரு நீதிபதிகள் அடங்கிய அமர்வின் உத்தரவை ரத்து செய்து தீர்ப்பு வெளியானது.

இதையடுத்து, 2019-ஆம் ஆண்டில் ஐ.ஜி. தொடர்ந்த மேல்முறையீட்டு வழக்கு நீதிபதிகள் எம்.துரைசாமி, ஜெ. சத்திய நாராயணபிரசாத் ஆகியோர் அடங்கிய அமர்வு முன் இன்று விசாரணைக்கு வந்தது. அப்போது மனுதாரர் தரப்பில் வாதங்களை முன்வைக்க நான்கு வார கால அவகாசம் கேட்கப்பட்டது.

அப்போது, தமிழக அரசு சார்பில் ஆஜரான அரசு தலைமை வழக்கறிஞர் ஆர்.சண்முகசுந்தரம், இந்த வழக்கு ஏற்கெனவே மூன்று ஆண்டுகளாக நிலுவையில் இருப்பதாகவும், கால அவகாசம் வழங்கக்கூடாது என்றும் எதிர்ப்பு தெரிவித்தார்.

சிபிசிஐடி சார்பில் ஆஜரான அரசு தலைமை குற்றவியல் வழக்கறிஞர் அசன் முகமது ஜின்னா, விசாகா கமிட்டி விதிகளின்படி துறை ரீதியான பாலியல் புகார்களை 90 நாட்களுக்குள் விசாரித்து முடிக்க வேண்டும் என்று விதி உள்ளதாக குறிப்பிட்டார். மூன்று ஆண்டுகளாக இந்த வழக்கு நிலையில் உள்ளதாகவும், தற்போது சிபிசிஐடி இந்த வழக்கின் விசாரணையை தொடங்கி விட்டதாகவும், எனவே கால அவகாசம் வழங்கக் கூடாது என்றும் எதிர்ப்பு தெரிவித்தார். இதையடுத்து நீதிபதிகள் வழக்கு விசாரணையை 2 வாரத்திற்கு மட்டும் ஒத்திவைத்து உத்தரவிட்டனர்.

பதிவு: January 28, 2022
நகர்ப்புற உள்ளாட்சித் தேர்தல் மக்கள் நீதி மய்யம் கட்சிக்கு திருப்புமுனை- 3-ம் கட்ட வேட்பாளர் பட்டியலை வெளியிட்ட கமல் நம்பிக்கை...

நகர்ப்புற உள்ளாட்சித் தேர்தலையொட்டி, மக்கள் நீதி மய்யம் கட்சி சார்பில் போட்டியிடும் 154 வேட்பாளர்களின் மூன்றாம் கட்ட பட்டியலை அக்கட்சியின் தலைவர் கமல்ஹாசன் வெளியிட்டுள்ளார்.

இது குறித்து இன்று அவர் வெளியிட்டுள்ள அறிக்கையில் கூறியிருப்பதாவது:

மத்தியில் கூட்டாட்சி, மாநிலத்தில் சுயாட்சி, உள்ளாட்சியில் தன்னாட்சி" என்பது மக்கள் நீதி மய்யம் பயணிக்கும் பாதை. உள்ளாட்சி அமைப்புகளை வலுப்படுத்தி, மக்களுக்குத் தேவையான அடிப்படை வசதிகளை உலகத் தரத்தில் ஏற்படுத்திக் கொடுக்க வேண்டும் எனும் லட்சிய தாகம் நமக்கு உண்டு. கிராம சபைகளாகட்டும், உள்ளாட்சித் தேர்தலை காலம் தாழ்த்தாமல் நடத்த வலியுறுத்துவதாகட்டும், முந்திக்கொண்டு ஒலிக்கும் குரலும் முன்சென்று களம் காணும் கரங்களும் நம்முடையவைதான்.

ஒருங்கிணைந்த தமிழ்நாடு நகர்ப்புற உள்ளூர் தன்னாட்சி சட்டத்தை நிறைவேற்றுவது; மக்களுக்கு தடையற்ற சேவைகளை உறுதிசெய்ய, ஸ்மார்ட்போன்கள் மூலம் அனைத்து நகர்ப்புற உள்ளாட்சிகளையும் ஆன்லைன் மயமாக்குதல்; மழை வெள்ளத்தின் தாக்கத்தைத் தடுக்க, சிங்கப்பூரில் இருப்பதுபோல் சர்வதேச தரத்திலான நிரந்தரத் தீர்வு; சென்னையின் வெள்ளப் பிரச்சனைக்குத் தீர்வு; ஐந்து ஆண்டுகளுக்கு ஒருமுறை அனைத்து உள்ளாட்சி அமைப்புகளுக்கான தேர்தல் நடத்தப்படுவதை உறுதிப்படுத்துவது;

நகர்ப்புற தன்னாட்சி அமைப்புகளில், குறிப்பிட்ட கால இடைவெளிகளில் வார்டு கமிட்டிகள் மற்றும் ஏரியா சபைகள், ஊழலற்ற நேர்மையான வெளிப்படையான துரித நிர்வாகம் உள்ளிட்ட எண்ணற்ற தனித்துவம்மிக்க செயல்திட்டங்களை நாம் நமது தேர்தல் அறிக்கையாக வெளியிட்டிருக்கிறோம்.

இவற்றை நடைமுறைப்படுத்தவும் தமிழக அரசை தொடர்ந்து வலியுறுத்தி வருகிறோம். கடந்த நாடாளுமன்ற, சட்டமன்றத் தேர்தல்களில் நகர்ப்புறங்களில் நாம் கணிசமான வாக்குகளைப் பெற்றுள்ளோம். `ஊழலிலும் லஞ்சத்திலும் திளைக்கும் உள்ளாட்சி அமைப்புகளுக்கு, நேர்மையும் திறமையும் வாய்ந்த உறுப்பினர்கள் கிடைக்கமாட்டார்களா? எனும் ஆதங்கம் தமிழக மக்களிடம் இருக்கிறது.

பல ஆண்டுகளாகக் கதறியும் தீர்க்கப்படாத பிரச்சனைகள் தமிழகத்தின் ஒவ்வொரு வீதியிலும் தெருவிலும் இருக்கின்றன. தேர்தலில் வென்று அவற்றைத் தீர்த்தாகவேண்டிய கடமையும் பொறுப்பும் நமக்கு இருக்கின்றன. நடைபெறவிருக்கும் நகர்ப்புற உள்ளாட்சித் தேர்தலில் மக்கள் நீதி மய்யம் சார்பாக சென்னை, தாம்பரம், மயிலாடுதுறை, ஓசூர், மதுரை, பொள்ளாச்சி மற்றும் நாகப்பட்டினம் தொகுதியில்ப் போட்டியிட இருக்கும் தகுதிசால் வேட்பாளர்களின் 154 மூன்றாம் கட்ட பட்டியலை இன்று வெளியிடுகிறேன்.

வேட்பாளர்கள் இக்கணம் முதல் வெற்றி ஒன்றையே இலக்காகக்கொண்டு ஒவ்வொரு வாக்காளரிடமும் நமது கொள்கைகள், செயல் திட்டம், சின்னம் ஆகியவற்றைக் கொண்டுசேர்க்க வேண்டும். இவர்களை வெற்றியடையச் செய்யும் கடமை, நம் ஒவ்வொருவருக்கும் இருக்கிறது. நாம் ஒரு படையாகத் திரண்டு உழைக்க வேண்டும்.

நடைபெறவிருக்கும் மாநகராட்சி, நகராட்சி, பேரூராட்சிகளுக்கான நகர்ப்புற உள்ளாட்சித் தேர்தல், மக்கள் நீதி மய்யத்திற்கு மிகப்பெரிய திருப்புமுனையாக அமையும். நமது உறுப்பினர்களால் நிர்வகிக்கப்படும் உள்ளாட்சிகள், ஒரு முன்மாதிரி மாடலாக இந்தியா முழுக்கப் பேசப்படும் காலம் அருகில் வந்துவிட்டது.

அந்தந்தப் பகுதிகளுக்கான செயல்திட்டத்தை உருவாக்கி இமைப்பொழுதும் சோர்வடையாமல் உழையுங்கள். என்னைப் பொறுத்தவரை உயர்ந்த நோக்கம், நேர்மை, திறமை, விடாமுயற்சி, கடின உழைப்பு ஆகியவைதான் ஒரு மனிதனை வெற்றியை நோக்கிச் செலுத்தும் விசைகள். அடுத்தடுத்த பட்டியல் விரைவில் வெளியாகும்.

இவ்வாறு கமல்ஹாசன் கூறியுள்ளார்.

பதிவு: January 28, 2022

முக்கிய செய்திகள்

'தமிழகத்தில் புழங்கும் பரிசுச்சீட்டு விற்பனையை முற்றிலும் தடை செய்யவேண்டும்' - பாமக நிறுவனர் ராமதாஸ் வலியுறுத்தல்!

தமிழகத்தில் புழக்கத்தில் இருக்கும் பரிசுச்சீட்டு விற்பனையை தமிழக அரசு முற்றிலும் தடைசெய்ய வேண்டும் என்று பாமக நிறுவனர் ராமதாஸ் அறிவுறுத்தியுள்ளார்.

இதுகுறித்து அவர் ட்விட்டரில் வெளியிட்டுள்ள செய்தியறிக்கையில், 

சேலத்தில் தடை செய்யப்பட்ட பரிசுச்சீட்டு விற்பனை நடைபெற்று வருவது காட்சி ஊடகம் மூலம் ஆதாரங்களுடன் அம்பலப்படுத்தப்பட்டிருக்கிறது. தடை செய்யப்பட்ட பரிசுச்சீட்டுகள் கட்டுப்பாடின்றி தொடர்ச்சியாக விற்பனை செய்யப்பட்டு வருவது அதிர்ச்சியளிக்கிறது

சேலம், சென்னை உட்பட தமிழகத்தின் பெரும்பான்மையான இடங்களில் தடை செய்யப்பட்ட பரிசுச்சீட்டுகளும், ஒரு நம்பர் பரிசுச்சீட்டுகளும் தடையின்றி விற்பனை செய்யப்பட்டு வருகின்றன. பாட்டாளி மக்கள் கட்சியும் இந்த சமூகத் தீமையை ஒழிக்க வேண்டும் என வலியுறுத்தி வருகிறது

ஆன்லைன் சூதாட்டம் என்ற மிகப்பெரிய சமூகத் தீமைக்கு தமிழக அரசு முடிவு கட்டியிருக்கிறது. ஆன்லைன் சூதாட்டத்தால் எத்தனைக் குடும்பங்கள் சீரழிகின்றனவோ, அதை விட அதிக எண்ணிக்கையிலான குடும்பங்கள் தடை செய்யப்பட்ட பரிசுச்சீட்டுகளால் சீரழிந்து கொண்டிருக்கின்றன

தமிழகத்தில் 2003-ஆம் ஆண்டே பரிசுச்சீட்டுகள் தடை செய்யப்பட்டு விட்டன. அந்தத் தடையை முழுமையாக செயல்படுத்த வேண்டும். பரிசுச்சீட்டுகளை விற்போர் மீது கடுமையான நடவடிக்கை மேற்கொள்ளப்பட வேண்டும். அதன் மூலம் ஏழைக் குடும்பங்கள் வீதிக்கு வருவதை தடுக்க வேண்டும்" இவ்வாறு தெரிவிக்கப்பட்டுள்ளது.

பதிவு: June 28, 2022
AltNews இணை நிறுவனர் முகமது ஜுபைர் கைது! FIR கூட வழங்காமல் கைதுசெய்துவிட்டதாக மற்றொரு இணை நிறுவனர் தகவல்!

AltNews இணை நிறுவனர் முகமது ஜுபைர் டெல்லி போலீசாரால் கைது செய்யப்பட்டுள்ளார். 2018-ல் அவரது ட்விட்டர் பக்கத்தில் அவர் பதிவிட்ட ஒரு கருத்தின் காரணமாக அவர் கைதுசெய்யப்பட்டுள்ளார்.

ட்விட்டரில் பகிரப்படும் செய்திகளின் உண்மைத்தன்மையை ஆராய்ந்து அதுகுறித்த தகவல்களை ட்விட்டர்வாசிகளுக்குப் பகிர்பவர் பத்திரிகையாளர் முகமது ஜுபைர். இவர் AltNews செய்தி நிறுவனத்தின் இணை இயக்குநர் ஆவார். அண்மையில், தனியார் தொலைக்காட்சியில் நபிகள் நாயகம் குறித்து பாஜக தேசிய செய்தி தொடர்பாளர் நுபுர் சர்மா பேசிய காணொலியை வலைதளங்களில் பகிர்ந்தவர் இவரே. அது உலக அளவில் கவனம் பெற்று பல்வேறு எதிர்ப்பலைகளைக் கிளப்பியது.

இந்நிலையில், 2018-ல் அவரது ட்விட்டர் பக்கத்தில் அவர் பதிவிட்ட ஒரு கருத்தின் காரணமாக நேற்றைய தினம் டெல்லி காவலர்களால் கைது செய்யப்பட்டுள்ளார். கைதிற்கு முன்னதாக வழக்கு ஒன்றின் விசாரணைக்காக திங்கள்கிழமை வருமாறு அவரை டெல்லி காவல்துறையின் தனிப்பிரிவினர் அழைத்திருந்ததாகவும், ஆனால் வேறொரு வழக்கில் அவருக்கு எதிராக பதிவு செய்யப்பட்டிருந்த முதல் தகவல் அறிக்கையின் அடிப்படையில் அவர் கைது செய்யப்பட்டதாக போலீஸார் கூறியதாகவும் AltNews நிறுவனத்தின் மற்றொரு இணை நிறுவனர் பிரதீக் சின்ஹா தெரிவித்தார்.

இதுகுறித்து அவர் தனது ட்விட்டர் பக்கத்தில், "2020-ஆம் ஆண்டு பதிவு செய்யப்பட்டிருந்த வழக்கு ஒன்றின் விசாரணைக்காக வரும்படி டெல்லி காவல்துறையின் தனிப்பிரிவினர் அவரை அழைத்தனர். அந்த வழக்கில் தாம் கைது செய்யப்படாமல் இருக்க நீதிமன்றத்தில் இருந்து முன்னதாகவே உத்தரவைப் பெற்றிருந்தார் முகமது ஜுபைர். ஆனால், விசாரணைக்கு ஆஜரான அவரை மாலை 6.45 மணியளவில் வேறொரு வழக்கில் அதன் முதல் தகவல் அறிக்கை நகலைக் கூட வழங்காமல் போலீஸார் கொண்டு சென்றனர். பல முறை கேட்டும் போலீஸார் முதல் தகவல் அறிக்கையைக் காண்பிக்கவில்லை. அவரைக் கொண்டு சென்ற வேனில் இருந்தவர்கள் தங்களுடைய பெயர் பேட்ஜை சீருடையில் அணிந்திருக்கவில்லை" என்று தெரிவித்துள்ளார்.

முகமது ஜுபைர் மீது இந்திய தண்டனைச் சட்டம் 153A (மதம், இனம், பிறந்த இடம், வசிப்பிடம், மொழி ஆகியவற்றின் அடிப்படையில் வெவ்வேறு குழுக்களிடையே பகைமையை ஊக்குவித்தல்) மற்றும் 295A (எந்தவொரு வகுப்பினரின் மத உணர்வுகளையும் சீற்றம் செய்யும் நோக்கில் வேண்டுமென்றே மற்றும் தீங்கிழைக்கும் செயலில் ஈடுபடுதல் மற்றும் மதம் அல்லது மத நம்பிக்கைகளை அவமதித்தல்) உள்ளிட்ட பிரிவுகளின் கீழ் வழக்குப் பதிவு செய்யப்பட்டுள்ளது. ஆனால், அந்த வழக்கில் புகார்தாரர் யார், அதன் விவரம் என்ன என்பதை போலீஸார் தெரிவிக்கவில்லை.

முகமது ஜுபைரின் கைதிற்கு பல்வேறு அரசியல் கட்சி தலைவர்களும் கண்டனம் தெரிவித்துவருகின்றனர். காங்கிரசார் பலரும், உண்மைக்கு புறம்பான செய்திகளைப் பரப்பும் பாஜக நிர்வாகிகளுக்கு மத்திய அரசு பாதுகாப்பும், உண்மையின் குரலாய் அவதூறுகளை வெளிச்சத்திற்குக் கொண்டுவருபவர்கள் மீது வழக்குகளும் பதிந்துவருவதாக சாடியுள்ளனர்.

இந்நிலையில், ஜுபைர் அகமதின் கைது நடவடிக்கை குறித்து தனது ட்விட்டர் பக்கத்தில் பதிவிட்டுள்ள காங்கிரஸ் எம்.பி. ராகுல்காந்தி, "பாஜகவின் வெறுப்பு, மதவெறி மற்றும் பொய்களை அம்பலப்படுத்தும் ஒவ்வொரு நபருக்கும் அவர்களால் அச்சுறுத்தல் ஏற்படுகிறது. உண்மையின் ஒரு குரலைக் கைது செய்வது இன்னும் ஆயிரம் பேரை தட்டி எழுப்பும். உண்மை எப்போதும் கொடுங்கோன்மையின் மீது வெற்றி பெறும்" என்று தனது எதிர்ப்பைத் தெரிவித்துள்ளார்.

மேலும் இதுகுறித்து மஜ்லிஸ் கட்சியின் தலைவர் அசாதுதீன் ஒவைசி தனது ட்விட்டர் பக்கத்தில், "முகமது ஜுபைர் கைது செய்யப்பட்டிருப்பது வன்மையாக கண்டிக்கத்தக்கது. அவர் எந்த அறிவிப்பும் இல்லாமல் & சில அறியப்படாத FIR-இல் கைது செய்யப்பட்டுள்ளார். டெல்லி காவல்துறை முஸ்லீம்களுக்கு எதிரான இனப்படுகொலை முழக்கங்களைப் பற்றி எதுவும் செய்யவில்லை. ஆனால் வெறுப்பூட்டும் பேச்சு மற்றும் தவறான தகவல்களை எதிர்க்கும் "குற்றத்திற்கு" எதிராக விரைவாக செயல்படுகிறது" என்று தெரிவித்துள்ளார்.

பதிவு: June 28, 2022
தமிழக அரசின் உயர்கல்விக்கான ரூ.1000 உதவித்தொகை பெறும் திட்டத்திற்கு யாரெல்லாம் விண்ணப்பிக்க முடியும், முடியாது! விபரங்கள் இதோ!

அரசுப்பள்ளிகளில் பயின்ற மாணவிகளுக்கு உயர்கல்வி பயில்வதற்காக அரசுத்தரப்பிலிருந்து மாதந்தோறும் ரூ.1000 உதவித்தொகை வழங்கப்படும் என்று அறிவிக்கப்பட்ட நிலையில், அதற்கு யாரெல்லாம் தகுதி பெற்றவர்கள் என்ற விபரங்களை தமிழக அரசு வெளியிட்டுள்ளது. 

அதுகுறித்த விவரங்கள் பின்வருமாறு:

1. மாணவிகள் 6-ஆம் வகுப்பு முதல் 12-ஆம் வகுப்பு வரை தமிழ்நாட்டில் உள்ள அரசுப் பள்ளிகளில் படித்து தமிழ்நாட்டில் உயர்கல்வி பயில்பவராக இருத்தல் வேண்டும்.

2. தனியார்ப் பள்ளியில் Right to Education (RTE)யின் கீழ் 6-ஆம் வகுப்பு முதல் 8-ஆம் வகுப்பு வரை பயின்ற பின் 9-ஆம் வகுப்பு முதல் 12-ஆம் வகுப்பு வரை அரசுப் பள்ளியில் படித்த மாணவியர் இத்திட்டத்தின் கீழ் பயனடையலாம்.

3. அரசுப் பள்ளிகள் என்பது பஞ்சாயத்து யூனியன் தொடக்க மற்றும் நடுநிலைப் பள்ளிகள், ஆதிதிராவிடர் நலப் பள்ளிகள், நகராட்சிப் பள்ளிகள், மாநகராட்சி பள்ளிகள், பழங்குடியினர் நலப் பள்ளிகள், கள்ளர் சீர்மரபினப் பள்ளிகள், பிற்படுத்தப்பட்டோர்/ மிகவும் பிற்படுத்தப்பட்டோர் நல பள்ளிகள், மாற்றுத்திறனாளிகள் நலத்துறை பள்ளிகள், வனத்துறை பள்ளிகள், சமூகப் பாதுகாப்புத் துறை பள்ளிகள் போன்றவற்றில் பயிலும் மாணவிகளும் இத்திட்டத்தின் கீழ் பயனடையலாம்.

4. மாணவிகள் 8 (அ) 10 (அ) 12 வகுப்புகளில் படித்து பின்னர் முதன் முறையாக உயர்கல்வி நிறுவனங்களில் (Higher Education Institutions) சேரும் படிப்புக்கு மட்டுமே இத்திட்டம் பொருந்தும். [சான்றிதழ் (Certificate course), பட்டயம் (Diploma / ITI, D.TEd., courses), இளங்கலைப் பட்டம் (Bachelor's Degree) (B.A., B.Sc., B.Com., BBA., BCA. and all Arts & Science, Fine Arts Courses), தொழில்சார்ந்த படிப்பு (B.E., B.Tech, M.B.B.S., B.D.S., B.Sc.(Agri). B.V.Sc., B.Fsc., B.L, etc.) மற்றும் பாரா மெடிக்கல் படிப்பு (Nursing. Pharmacy, Medical Lab Technology, Physiotherapy etc.. CUITO D000.). தொலைதூரக் கல்வி மற்றும் திறந்தவெளி பல்கலைக்கழகத்தில் பயிலும் மாணவிகளுக்கு இத்திட்டம் பொருந்தாது.

5. 2022-2023ஆம் கல்வியாண்டில், மாணவியர்கள் புதிதாக மேற்படிப்பில் முதலாம் ஆண்டு சேர்ந்த பின்னர், இணையதளம் வழியாக இத்திட்டத்திற்கு விண்ணப்பிக்கலாம். மேலும், இதர முதலாம் ஆண்டிலிருந்து இரண்டாம் ஆண்டு செல்லும் மாணவியரும், இரண்டாம் ஆண்டிலிருந்து மூன்றாம் ஆண்டு செல்லும் இளங்கலை பட்டப்படிப்பு பயிலும் மாணவியர்களும்,தொழிற்கல்வியைப் பொருத்தமட்டில் மூன்றாம் ஆண்டிலிருந்து நான்காம் ஆண்டிற்கு செல்லும் மாணவிகளுக்கும், மருத்துவக் கல்வியைப் பொருத்தமட்டில் நான்காம் ஆண்டிலிருந்து ஐந்தாம் ஆண்டு செல்லும் மாணவியர்களும் இத்திட்டத்தின் கீழ் பயனடையலாம்.

6. 2021-2022 ஆம் ஆண்டில், இறுதியாண்டு பயிலும் மாணவிகள் இத்திட்டத்தின் கீழ் பயனடைய இயலாது. ஏனெனில் ஒரு சில மாதங்களில் இம்மாணவியர்கள் தங்களது இளநிலைப் படிப்பினை (under graduation) நிறைவு செய்துவிடுவார்கள்.

7. இத்திட்டத்தின் கீழ் இளநிலை படிப்பு பயிலும் மாணவிகள் மட்டுமே பயனடைய இயலும், முதுநிலை படிப்பு பயிலும் மாணவியர்கள் இத்திட்டத்தின் கீழ் பயன்பெற இயலாது. இத்திட்டத்தில் பயன்பெறுவது குறித்து தங்களுக்கு தேவையான தெளிவுரைகள்/கூடுதல் விவரங்களை கட்டணமில்லா தொலைப்பேசி எண் 14417 என்ற எண்ணிற்கு தொடர்பு கொண்டு விவரங்களை பெறலாம் என தெரிவிக்கப்படுகிறது.

8. இளநிலை கல்வி பெறும் அனைத்து மாணவியரும் (இளநிலை முதலாம் ஆண்டு சேரும் மாணவியர்களும், இளங்கலை/தொழிற்கல்வி/மருத்துவக் கல்வியில் 2-ஆம் ஆண்டு முதல் 5-ஆம் ஆண்டு வரை பயிலும் மாணவிகளும்) இத்திட்டத்திற்காகப் புதியதாக உருவாக்கப்பட்டுள்ள இணையதளம் https://penkalvi.tn.gov.in வழியாக தங்கள் விண்ணப்பங்களைப் பதிவேற்றம் செய்யக் கேட்டுக் கொள்ளப்படுகிறார்கள்.

 

பதிவு: June 27, 2022
'அஸ்ஸாம் மக்களின் துயரைக் கண்டுகொள்ளாமல் எம்.எல்.ஏ.,க்களை கடத்திவந்து கும்மாளம் போடுகிறீர்களா?; இதுதான் பாஜகவின் உண்மை முகம்' - கே.பாலகிருஷ்ணன் ஆவேசம்!

மழை வெள்ளத்தால் பாதிக்கப்பட்டுள்ள அஸ்ஸாம் மக்களின் துயரத்தை நினைத்து கவலைப்படாமல், பாஜக மாநில அரசு, மகாராஷ்டிராவில் பாஜக ஆட்சி அமைய சகுனி ஆட்டம் ஆடிவருவதாக கம்யூனிஸ்ட் கட்சியின் மாநில செயலாளர் கே.பாலகிருஷ்ணன் குற்றம்சாட்டியுள்ளார்.

இதுகுறித்து ட்விட்டரில் அவர் பதிவிட்டுள்ள செய்திக்குறிப்பில், 

"அசாமில் பெரும் வெள்ளப்பெருக்கு ஏற்பட்டுள்ளது. இதில் லட்சக்கணக்கான மக்கள் பாதிக்கப்பட்டுள்ளார்கள். குறைந்தது 200 உயிர்கள் இதுவரை பலியாகியிருக்கின்றன. உண்மை பலி விபரம் இன்னும் அதிகமாக இருக்கும்.

வீடுகளை, இருப்பிடத்தை இழந்து சாலைகளில் கண்ணீரோடு தவிக்கும் மக்களின் துயரை வார்த்தைகளால் அடக்க முடியாது. இந்த நிலைமை பற்றியெல்லாம் ஒன்றிய அரசுக்கு கொஞ்சமும் கவலை கிடையாது. அசாம் பாஜக முதல்வருக்கும் எந்த பதட்டமும் இல்லை. மாறாக அவர் ரேடிசன் புளூ விடுதியை கண்காணித்துக்கொண்டுள்ளார்.

அங்கேதான், மராட்டிய எம்.எல்.ஏக்கள் கடத்தி வரப்பட்டு, ஐந்து நட்சத்திர விடுதியில் கும்மாளத்துடன் தங்க வைக்கப்பட்டுள்ளனர். கூட்டணி அரசை கவிழ்த்து, மராட்டியத்தில் தான் ஆட்சியமைக்க வேண்டும் என்று பாஜக இந்த சகுனி ஆட்டத்தை நடத்தி வருகிறது.
 
மக்களை கண்ணீரில் தத்தளிக்க விட்டு, அதிகார மமதையில் ஆட்டம் போடுகிறார்கள். இதுதான் பாஜகவின் உண்மை முகம்" இவ்வாறு பதிவிட்டுள்ளார்.
 
பதிவு: June 25, 2022
'முகாமில் அடைக்கப்பட்டுள்ள ஈழச்சொந்தங்களை உடனடியாக அரசு விடுவிக்க வேண்டும்; தவறினால் மாநிலம் தழுவிய போராட்டத்தை முன்னெடுப்போம்' - சீமான்!

திருச்சி முகாமில் அடைக்கப்பட்டுள்ள ஈழத்தமிழர்களை உடனடியாக விடுவிக்க வேண்டும் என்றும் தவறினால் மாநிலம் தழுவிய மக்கள்திரள் போராட்டத்தை முன்னெடுப்பதாகவும் நாம் தமிழர் கட்சி ஒருங்கிணைப்பாளர் சீமான் தமிழக அரசிடம் வலியுறுத்தியுள்ளார்.

இதுகுறித்து அவர் வெளியிட்டுள்ள செய்தியறிக்கையில்,

"திருச்சி, சிறப்பு முகாமில் அடைக்கப்பட்டுள்ள ஈழச்சொந்தங்களில் 30 பேர் மாத்திரை உட்கொண்டும், ஒருவர் தீக்குளித்தும் தற்கொலைக்கு முயன்றதுமான செய்திகள் பேரதிர்ச்சி தருகின்றன. ‘விதியே! விதியே! என் செய நினைத்திட்டாய் என் தமிழ்ச்சாதியை?’ எனும் பெரும்பாவலன் பாரதியின் கூற்றுக்கிணங்க, தாய்த்தமிழகத்திலேயே ஈழச்சொந்தங்களுக்கு நிகழ்ந்தேறும் இக்கொடுமைகள் கண்டு மனம்வெதும்புகிறேன்.

தங்களை ஏதிலிகளென இந்தியச்சட்டத்தின்படி பதிவுசெய்துள்ள ஈழச்சொந்தங்களையும் சட்டவிரோதமாகக் குடியேறியவர்களெனக் கூறி, சிறப்பு முகாம் எனப்படும் சித்திரவதைக்கூடங்களில் அந்நிய நாட்டவர்களோடு அடைத்து வைத்துள்ள அநீதிக்கெதிராக, தங்களை விடுவிக்கக்கோரி 35 நாட்களுக்கும் மேலாகப் பட்டினிப்போராட்டம் செய்து அரசு மனமிறங்காத நிலையிலேயே, ஆற்றாமையும், விரக்தியும் தாளாது இத்தகையக் கொடிய முடிவை ஈழச்சொந்தங்கள் எடுத்துள்ளனர் என்பது ஏற்கவே முடியாதப் பெருந்துயரமாகும்.

இந்நாட்டுக்குத் துளியும் தொடர்பற்ற திபெத்தியர்கள் ஏதிலிகளாக அரசால் அங்கீகரிக்கப்பட்டு, அடிப்படை வசதிகளும், பொருளாதார வாய்ப்புகளும் அவர்களுக்கு வழங்கப்பெற்று, பெரும் மதிப்போடு நடத்தப்படும் வேளையில், இந்நாட்டில் வாழும் எட்டுக்கோடி தமிழ்ச்சொந்தங்களின் தொப்புள்கொடி உறவான ஈழச்சொந்தங்கள் குற்றவாளிகளாகச் சித்தரிக்கப்படுவதும், அடிப்படை மானுட உரிமைகளும், அத்தியாவசிய இருப்பு நடவடிக்கைகளும்கூட அளிக்கப்படாது மறுக்கப்படுவதும் தமிழினத்திற்கு இந்நாட்டு அரசுகள் செய்யும் பெருந்துரோகமாகும். தமிழர்களின் வரலாற்றுத்தாயகமான தமிழகத்திலேயே ஈழச்சொந்தங்கள் நாதியற்றவர்கள் போல நாளும் நடத்தப்படுவதும், அவர்களது உணர்வுகளுக்கும், உரிமைகளுக்கும் மதிப்பளிக்கப்படாது அவமதிக்கப்படுவதும் வெட்கித்தலைகுனிய வேண்டிய பெரும் அவமானமாகும்.

தேர்தலுக்கு முன்பு, ஈழச்சொந்தங்களுக்குக் குடியுரிமைப் பெற்றுத் தருவோம் என வாக்குறுதி அளித்த மாண்புமிகு முதல்வர் ஐயா ஸ்டாலின் அவர்கள், தற்போது ஏதிலிகளாகக்கூட அவர்களை வாழவிடாது வஞ்சிப்பது எந்தவகையில் நியாயம்? இதுதான் சமூக நீதியா? ‘ஈழத்தமிழர் எங்கள் இரத்தம்’ என மேடையில் முழக்கமிட்ட முதல்வர் ஸ்டாலின் அவர்கள், இப்போது இரத்தம் வற்றிப்போகிற அளவுக்கு அவர்கள் பட்டினிக்கிடந்து, உடல்மெலிந்து கோரிக்கை வைத்தும் செவிமடுக்காதது ஏன்? அவர்களுக்கு வாக்கில்லை என்பதால், அவர்களது வறண்ட நாக்குகள் இடுகிற முழக்கங்கள் உங்கள் செவிப்பறைக்கு எட்டவில்லையா முதல்வரே? உயிரை முன்னிறுத்தி, போராட்டம்செய்தும் உங்கள் இதயக்கதவுகள் திறக்காதென்றால், நடப்பது தமிழர்களுக்கான ஆட்சியா? இல்லை! சிங்களர்களுக்கான ஆட்சியா? இதுதான் நீங்கள் விடியல் தரும் இலட்சணமா? வெட்கக்கேடு! பேரவலம்!

ஆகவே, இந்தியச்சட்டநெறிமுறைகளின்படி, தங்களை ஏதிலிகளாகப் பதிவுசெய்தும் சட்டவிரோதக் குடியேறியவர்களெனக்கூறி, திருச்சி, சிறப்பு முகாமில் அடைக்கப்பட்டுள்ள ஈழச்சொந்தங்களை உடனடியாக விடுவிக்க வேண்டுமென தமிழக அரசை வலியுறுத்துகிறேன். அதனைச் செய்யத் தவறும்பட்சத்தில், மாநிலம் தழுவிய மக்கள்திரள் போராட்டத்தை முன்னெடுப்போமெனப் பேரறிவிப்பு செய்கிறேன்" இவ்வாறு குறிப்பிடப்பட்டுள்ளது.

பதிவு: June 25, 2022
'மெட்ரிக் பள்ளிகளில் இடஒதுக்கீடு அளிக்காத பள்ளிகள் மீது கடுமையான நடவடிக்கை எடுக்கவேண்டும்' - அன்புமணி ராமதாஸ் வலியுறுத்தல்!

தமிழகத்திலுள்ள பெரும்பாலான மெட்ரிக் பள்ளிகளில் 69% இடஒதுக்கீடு கடைபிடிக்கப்படுவதில்லை என்றும், அப்பள்ளிகள் மீது அரசு நடவடிக்கை எடுக்கவேண்டும் என்றும் பாமக தலைவர் அன்புமணி ராமதாஸ் வலியுறுத்தியுள்ளார்.

இதுகுறித்து அவரது ட்விட்டர் பக்கத்தில் அவர் பதிவிட்டுள்ள அறிக்கையில்,

"தமிழ்நாட்டில் உள்ள அனைத்து மெட்ரிக் பள்ளிகளிலும் 69% இட ஒதுக்கீட்டை கண்டிப்பாக செயல்படுத்த வேண்டும் என்று பள்ளிக்கல்வித்துறை ஆணையிட்டிருக்கிறது. மாணவர் சேக்கையில் சமூகநீதியை நிலைநாட்ட பள்ளிக்கல்வித்துறை காட்டும் அக்கறை பாராட்டத்தக்கது!

தமிழ்நாட்டில் மெட்ரிக் பள்ளிகள் தொடங்கப்பட்ட நாளில் இருந்தே அவை தமிழக அரசின் இட ஒதுக்கீட்டை கடைபிடிப்பது கட்டாயம் ஆகும். ஆனால், பெரும்பான்மையான தனியார் பள்ளிகள் 69% இட ஒதுக்கீட்டை கடைபிடிப்பதில்லை என்பது தான் வேதனையான உண்மை!

ஊரகப்பகுதிகளில் உள்ள சாதாரண மெட்ரிக் பள்ளிகள் 69% இட ஒதுக்கீட்டை பின்பற்றுகின்றன. அதிகக் கட்டணம் வசூலிக்கும் நகர்ப்புறங்களில் உள்ள புகழ் பெற்ற பள்ளிகள் தான் தமிழக அரசின் இட ஒதுக்கீட்டு விதிகளை மதிப்பதில்லை. அவை மீது கடுமையான நடவடிக்கை எடுக்கப்பட வேண்டும்!

அனைத்து மெட்ரிக் பள்ளிகளிலும் 69% இட ஒதுக்கீடு கடைபிடிக்கப்படுவதை அரசு உறுதி செய்ய வேண்டும்; ஒவ்வொரு ஆண்டும் மாணவர் சேர்க்கை முடிவடைந்த பிறகு பள்ளி வாரியாக இட ஒதுக்கீடு நடைமுறைப்படுத்தப்பட்டது குறித்த விவரங்கள் அடங்கிய வெள்ளை அறிக்கையை அரசு வெளியிட வேண்டும்" இவ்வாறு பதிவிட்டுள்ளார்.

பதிவு: June 24, 2022
ஒபிஎஸ் மீது தண்ணீர் பாட்டில் வீச்சு; வாகனத்தின் டயர் பஞ்சர் செய்யப்பட்டு அட்டூழியம்! கூட்டத்தில் பெரிதும் அவமதிக்கப்பட்ட ஒபிஎஸ்... அடுத்த நகர்வு என்ன?

பரபரப்பான சூழலில் அதிமுக பொதுக்குழுக்கூட்டம் இன்று நடைபெற்ற நிலையில், கட்சியின் ஒருங்கிணைப்பாளர் ஒபிஎஸ் தொண்டர்களால் அவமதிக்கப்பட்டு, அவர் மீது தண்ணீர் பாட்டில் வீசப்ப்ட்டுள்ள நிகழ்வு அதிர்ச்சியை ஏற்படுத்தியுள்ளது.

அதிமுகவில் ஜெயலலிதாவின் மறைவுக்குப்பின் எடப்பாடி பழனிசாமி முதலமைச்சராக பதவியேற்றாலும், கட்சியின் முக்கிய முடிவுகள் அனைத்தும் ஒபிஎஸ் - இபிஎஸ் ஆகிய இரு தலைவர்களின் மேற்பார்வையிலேயே நடைபெற்றுவந்தது. 2021 சட்டமன்றத் தேர்தலில் திமுக ஆட்சியைப் பிடித்தபின் யார் எதிர்க்கட்சித் தலைவர் என்ற பூசல் எழுந்து, பின் எடப்பாடியார் அப்பொறுப்பை ஏற்றார். மேலும் பன்னீர்செல்வம் கட்சி ஒருங்கிணைப்பாளர் பதவியில் நீடித்தார்.

இந்நிலையில், அதிமுக சிறந்த எதிர்க்கட்சியாகத் திகழ ஒற்றைத் தலைமைதான் சரியான முடிவு என்ற பேச்சு அதிமுக நிர்வாகிகளிடையே ஆரம்பமான நிலையில், கடந்த 9 நாட்களாக தொடர் அமளிகளில் அதிமுக நிர்வாகிகள் ஈடுபட்டுவருகின்றனர். ஒபிஎஸ் கட்சியின் பொதுச்செயலாளராக பதவியேற்கவேண்டும் என்று அவரது ஆதரவாளர்களும், இபிஎஸ் தான் பொதுச்செயலாளராக பதவியேற்கவேண்டும் என்று அவரது ஆதரவாளர்களும் குரலெழுப்பிவரும் நிலையில், ஒபிஎஸ் கூறிய சில தீர்மானங்களின் பேரில் அதிமுக பொதுக்குழுக்கூட்டம் இன்று நடைபெற்றது.

ஸ்ரீவாரு திருமண மண்டபத்தில் நடைபெற்ற கூட்டத்திற்கு ஒபிஎஸ் முதலிலேயே வந்துவிட்டார். ஆயினும் கூட்டத்திற்குள் நுழைந்த அவரை இபிஎஸ் ஆதரவாளர்கள் வெளியேறச்சொல்லியும், 'துரோகி' என்று முழக்கமிட்டும் முன்னேறவிடாமல் தடுத்தனர். பின் இபிஎஸ் மண்டபத்திற்குள் நுழையும்போது பலத்த கரகோஷத்துடன் தொண்டர்களால் அவருக்கு வரவேற்பு அளிக்கப்பட்டது. 

பின் மேடையில் இருவரும் அமர்ந்தபின் ஒவ்வொருவராக கட்சி நிர்வாகிகளின் நிலைப்பாடு குறித்தும், ஒற்றைத்தலைமை அதிமுகவிற்கு அவசியம் என்றும் பேசினர். அதிமுகவின் அவைத்தலைவராக தமிழ்மகன் உசேன் ஒருமனதாக தேர்ந்தெடுக்கப்பட்டார். தொடர்ந்து மேடையில் பேசிய நிர்வாகிகள் பலரும் இபிஎஸ் பெயரைக் குறிப்பிட்டு அவரை வரவேற்றனர். ஆனால் யாரும் ஒபிஎஸ்-ஐ வரவேற்கவும் இல்லை, அவரிடம் முகம்கொடுத்து பேசவும் இல்லை.

தொடர்ந்து சி.வி.குமார் உள்ளிட்ட முன்னாள் அமைச்சர்கள், அனைத்து தீர்மானங்களையும் பொதுக்குழு நிராகரித்துவிட்டதாகவும், கட்சிக்கு ஒற்றைத் தலைமை வேண்டும் என்றும் பேசினர். இதனால் கூட்டத்தில் சச்சரவும், கூச்சல் குழப்பமும் நிலவியது. ஒரு கட்டத்திற்கு மேல் ஒபிஎஸ் மேடையில் அமராமல் பாதியிலேயே மேடையை விட்டு வெளியேறினார்.

இந்நிலையில், ஒபிஎஸ் மேடையிலிருந்து வெளியேறும்போது அவர் மீது தண்ணீர் பாட்டில்கள் அதிருப்தி நிர்வாகிகளால் எரியப்பட்டது பரபரப்பை ஏற்படுத்தியது. மேலும் அவர் வந்த வாகனத்தின் சக்கரங்களிலிருந்து காற்று பிடுங்கப்பட்டதும் அதிர்ச்சியைக் கிளப்பியது. பின் மாற்றுவாகன உதவியுடன் அவர் அங்கிருந்து கிளம்பினார்.

இதைத்தொடர்ந்து செய்தியாளர்களிடம் பேசிய ஒபிஎஸ் ஆதரவாளரும், அதிமுக துணை ஒருங்கிணைப்பாளருமான வைத்திலிங்கம், 'கட்சியை அழிவுப்பாதைக்கு அழைத்துச்செல்கின்றனர். சதிகாரர்கள்' என்று ஆவேசமாகப் பேசினார்.

பொதுக்குழுக்கூட்டம் பாதியிலேயே முடிந்து எந்த முடிவும் எட்டப்படாத நிலையில், அடுத்த பொதுக்குழுக்கூட்டம் ஜூலை 11 அன்று மீண்டும் நடைபெறும் என்று அறிவிக்கப்பட்டது. ஆனால் அது ஒபிஎஸ்-ன் கையெழுத்து இல்லாமல் நடைபெறாது என்று வைத்திலிங்கம் தெரிவித்தார்.

ஜூலை 11-ல் நடைபெறும் பொதுக்குழுக்கூட்டத்தில் இபிஎஸ் பொதுச்செயலாளராக தேர்ந்தெடுக்கப்படலாம் என்று கூறப்படுகிறது. ஆயினும் கூட்டம் நடைபெறுமா?, அதில் ஒபிஎஸ் கலந்துகொள்வாரா?, என்னென்ன முடிவுகள் அக்கூட்டத்தில் ஏடுக்கப்படும்? என்பது குறித்து பொறுத்திருந்துதான் பார்க்கவேண்டும். ஆயினும் ஒபிஎஸ், இபிஎஸ் தரப்பு நிர்வாகிகளால் பெரிதளவில் அவமதிக்கப்பட்டது தற்சமயம் பேசுபொருளாகி சர்ச்சையைக் கிளப்பிவருகிறது. 

பதிவு: June 23, 2022

மேலும் செய்திகள்

கொரோனா வைரஸ் அப்டேட்ஸ்