`இந்தியாவில் 600க்கு அதிகமான சட்டவிரோத கடன் செயலிகள்!'‍- பொதுமக்களை எச்சரிக்கும் ரிசர்வ் வங்கி

இந்தியாவில் 600க்கும் அதிகமான சட்டவிரோத கடன் செயலிகள் செயல்பட்டு வருவதாக ரிசர்வ் வங்கி எச்சரிக்கை விடுத்துள்ளது.

2017ம் ஆண்டில் 11,671 கோடி ரூபாயாக இருந்த டிஜிட்டல் கடன் விநியோக சந்தையின் மதிப்பு 2020ல் ரூ.1.41 லட்சம் கோடியாக உயர்ந்துள்ளது. இதனை பயன்படுத்தி கொண்டு சுமார் 1,100 கடன் செயலி நிறுவனங்கள் இந்தியாவில் டிஜிட்டல் கடன் சேவையில் ஈடுபட்டுள்ளன. இவற்றில் 600க்கும் மேற்பட்ட நிறுவனங்கள் சட்டவிரோதமாக செயல்படுவது ரிசர்வ் வங்கியின் ஆய்வில் தெரியவந்துள்ளது.

இத்தகைய நிறுவனங்கள் கடனை வசூலிப்பதில் ஆட்சேபகரமாக முறையில் நடந்து கொள்வதும் கடனாளிகள் மொபைல் விவரங்களை திருடுவதும் அதிர்ச்சியை ஏற்படுத்தி உள்ளன. டிஜிட்டல் கடன் நிறுவனங்கள் மீது கடந்த ஆண்டு ஜனவரி முதல் நடப்பாண்டு 2,562 புகார்கள் குவிந்துள்ளன. மகாராஷ்டிரா, கர்நாடகா, தமிழ்நாடு, டெல்லி, ஹரியானா, ஆந்திரா, உத்தரப் பிரதேசம் உள்ளிட்ட மாநிலங்களில் இருந்தே அதிக புகார்கள் வந்துள்ளன.

எந்த ஒரு நிறுவனத்திடமும் தனிப்பட்ட விவரங்களை கொடுக்கும் முன்பு ரிசர்வ் வங்கியில் பதிவு செய்யப்பட்ட நிறுவனமா என்பதை உறுதிப்படுத்தி கொள்ள வாடிக்கையாளர்களுக்கு அறிவுறுத்தப்பட்டுள்ளது. கடன் வழங்கும் நிறுவனங்களை முழுமையாக ஆராய்ந்து அலுவலகத்திற்கே நேரடியாக சென்று மட்டுமே கடன் பெற வேண்டும் என்றும் ரிசர்வ் வங்கி எச்சரிக்கை விடுத்துள்ளது.

பதிவு: November 24, 2021
ஏர்டெல்லை தொடர்ந்து வோடபோனும் செல்போன் சேவை கட்டணத்தை உயர்த்தியது!

ஏர்டெல் நிறுவனத்தை தொடர்ந்து வோடபோன்- ஐடியா நிறுவனமும் செல்போன் சேவை கட்டணத்தை உயர்த்தியுள்ளது. உயர்த்தப்பட்ட பிரீபெய்டு கட்டணங்கள் வரும் 26ம் தேதி முதல் அமலுக்கு வரும் என்று அறிவிக்கப்பட்டுள்ளது.

அதன்படி 28 நாட்கள் வேலிடிட்டிக்கான ரீசார்ஜ் கட்டணம் ரூ.79-லிருந்து ரூ.99-ஆக உயர்த்தப்பட்டுள்ளது. 28 நாட்களுக்கு 2GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.149-லிருந்து ரூ.179 அதிகரிக்கப்பட்டுள்ளது. 28 நாட்களுக்கு தினமும் 1GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.219-லிருந்து ரூ.269 ஆக உயர்த்தப்பட்டுள்ளது.

28 நாட்களுக்கு தினமும் 1.5GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.249-லிருந்து ரூ.299 ஆகவும், 28 நாட்களுக்கு தினமும் 2GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.299-லிருந்து ரூ.359 ஆகவும் அதிகரிக்கப்பட்டுள்ளது.

56 நாட்களுக்கு தினமும் 1.5GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.399-லிருந்து ரூ.479 ஆகவும், 56 நாட்களுக்கு தினமும் 2GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.449-லிருந்து ரூ.539 ஆகவும், 84 நாட்களுக்கு தினமும் 6GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.379-லிருந்து ரூ.459 ஆகவும் 84 நாட்களுக்கு தினமும் 1.5GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.599-லிருந்து ரூ.719 ஆகவும் உயர்த்தப்பட்டுள்ளது.

84 நாட்களுக்கு தினமும் 2GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.699-லிருந்து ரூ.839 ஆகவும், 365 நாட்களுக்கு 24GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.1499-லிருந்து ரூ.1799 ஆகவும் 365 நாட்களுக்கு தினமும் 2GB மற்றும் அன்லிமிடெட் கால்ஸ் கொண்ட ரீசார்ஜ் கட்டணம் ரூ.2399-லிருந்து ரூ.2899 ஆகவும் அதிகரிக்கப்பட்டுள்ளது.

பதிவு: November 23, 2021
ராக்கெட் வேகத்தில் உயரும் பெட்ரோல், டீசல் விலை!- அதிர்ச்சியில் வாகன ஓட்டிகள்

சென்னையில் பெட்ரோல் விலை இன்று லிட்டர் ஒன்றுக்கு 30 பைசா அதிகரித்து ரூ.105.13க்கும் மற்றும் டீசல் விலை 33 பைசா உயர்ந்து ரூ.101.25க்கும் விற்பனை செய்யப்படுகிறது.

சர்வதேச சந்தையில் நிலவும் கச்சா எண்ணெய் விலைக்கேற்ப இந்தியாவில் பெட்ரோல் மற்றும் டீசல் விலையை நிர்ணயிக்கும் நடைமுறையை எண்ணெய் நிறுவனங்கள் கடைப்பிடித்து வருகின்றன. அதன்படி, பெட்ரோல், டீசல் விலை தினசரி நிர்ணயிக்கப்படுகிறது. சர்வதேச சந்தையில் கச்சா எண்ணெய் விலை உயர்வை சந்தித்துள்ளதால், இந்தியாவில் வரலாறு காணாத அளவில் பெட்ரோல், டீசல் விலை உயர்ந்துள்ளது.

சென்னையில் பெட்ரோல் விலை நேற்று லிட்டருக்கு 31 பைசா அதிகரித்து ரூ.104.83 ஆகவும் மற்றும் டீசல் விலை லிட்டருக்கு 33 பைசா உயர்ந்து ரூ.100.92 ஆகவும் விற்பனையானது. இந்நிலையில் சென்னையில் பெட்ரோல் விலை இன்று லிட்டர் ஒன்றுக்கு 30 பைசா அதிகரித்து ரூ.105.13க்கும் மற்றும் டீசல் விலை 33 பைசா உயர்ந்து ரூ.101.25க்கும் விற்பனை செய்யப்படுகிறது. இந்த விலை உயர்வு இன்று காலை முதல் அமலுக்கு வந்தது. பெட்ரோல், டீசல் விலை தொடர்ந்து உயர்ந்து வருவது பொதுமக்களுக்கு கடும் அதிர்ச்சியை அளித்துள்ளது.

பெட்ரோல், டீசலின் தொடர் விலையேற்றத்தால், வாகன ஓட்டிகள் கடுமையாக பாதிக்கப்பட்டுள்ளனர். அத்தியாவசிய பொருட்களான காய்கறி, மளிகை பொருட்கள் விலை உயர்ந்து வருகிறது. இதனை கட்டுப்படுத்த வேண்டும் என ஒன்றிய அரசை பொதுமக்கள் வலியுறுத்தி வருகின்றனர். விலை ஏற்றத்தை கட்டுப்படுத்த பெட்ரோல், டீசல் மீதான வரியை ஒன்றிய அரசு குறைக்க வேண்டும் என்று எதிர்க்கட்சிகள் தொடர்ந்து வலியுறுத்தி வருகின்றனர்.

இந்த நிலையில் கச்சா எண்ணெய் விலை ஏற்றத்தை கட்டுப்படுத்துவது தொடர்பாக சவூதி அரேபியா, வளைகுடா நாடுகள் மற்றும் ரஷ்யாவுடன் ஒன்றிய அரசு பேச்சுவார்த்தை தொடங்கி இருப்பதாக ஒன்றிய பெட்ரோலியத்துறை அமைச்சர் ஹர்தீப சிங் பூரி கூறியுள்ளார்.

பதிவு: October 28, 2021
ஜெட் வேகத்தில் உயரும் எரிபொருள் விலை!- சென்னையில் சதம் அடிக்கப் போகிறது டீசல் விலை

ஜெட் வேகத்தில் எரிபொருள் விலை உயர்ந்து வருவதால் பெட்ரோல், டீசல் விலை கடந்த 21 நாட்களில் 18வது முறையாக அதிகரித்துள்ளது.

சர்வதேச சந்தையில் கச்சா எண்ணெய் விலைக்கு ஏற்ப பெட்ரோல், டீசல் விலையை தினமும் எண்ணெய் நிறுவனங்களின் கூட்டமைப்பு மாற்றி அமைத்து வருகிறது. கடந்த ஜனவரி மாதத்தில் இருந்து தொடர்ந்து பெட்ரோல், டீசல் விலையை அதிகரித்து வருகின்றனர். இதனால், நாட்டின் பெரும்பாலான நகரங்களில் பெட்ரோல் ரூ.106க்கு அதிகமாகவும், டீசல் ரூ.100க்கு அதிகமாகவும் விற்பனையாகிறது.

இம்மாதத்தில் 4, 18, 19 தேதிகளில் தவிர 18வது முறையாக பெட்ரோல், டீசல் விலை உயர்த்தப்பட்டுள்ளது. இன்று பெட்ரோல் லிட்டருக்கு 30 காசும், டீசல் 33 காசும் அதிகரிக்கப்பட்டது. இதனால், சென்னையில் பெட்ரோல் ரூ.103.61க்கும், டீசல் ரூ.99.59க்கும் விற்பனையாகிறது. சேலத்தில் டீசல் விலை வரலாற்றில் முதன் முறையாக ரூ.100யை தாண்டியது. பெட்ரோல், டீசலின் தொடர் விலையேற்றத்தால், வாகன ஓட்டிகள் கடுமையாக பாதிக்கப்பட்டுள்ளனர். அத்தியாவசிய பொருட்களான காய்கறி, மளிகை பொருட்கள் விலை உயர்ந்து வருகிறது. இதனை கட்டுப்படுத்த வேண்டும் என ஒன்றிய அரசை பொதுமக்கள் வலியுறுத்தி வருகின்றனர்.

பதிவு: October 21, 2021
`வீட்டு கடன், தனி நபர் கடன் வட்டியில் மாற்றமில்லை; ரெப்போ வட்டி விகிதம் 4 சதவிகிதமாக தொடரும்'- ரிசர்வ் வங்கி அறிவிப்பு

குறுகிய கால கடன்களுக்கான ரெப்போ வட்டி விகிதம் எந்த மாற்றமும் இன்றி 4 சதவிகிதமாக தொடரும் என்று ரிசர்வ் வங்கி அறிவித்துள்ளது.

இரண்டு மாதங்களுக்கு ஒருமுறை ரிசர்வ் வங்கியின் கொள்கை கூட்டம் கூடும். இதன்படி, 2 நாட்கள் நடைபெற்ற ரிசர்வ் வங்கியின் நாணய கொள்கை கூட்டம் முடிவடைந்து அதன் முடிவுகளை இன்று ரிசர்வ் வங்கி ஆளுநர் சக்தி காந்த் தாஸ் அறிவித்துள்ளார். அவர் வெளியிட்டுள்ள முடிவுகளின் படி, அனைவரும் கணித்தபடியே ரெப்போ விகிதத்தில் மாற்றமில்லை. தொடர்ந்து 4 சதவீதமாக இருக்கும். இதேபோல் ரிவர்ஸ் ரெப்போ விகிதத்தில் மாற்றமில்லை 3.35 சதவீதம் தொடரும் என ரிசர்வ் வங்கி அறிவித்துள்ளது.

இதன் மூலம் வட்டி விகிதங்களில் எட்டாவது முறையாக மாற்றங்கள் செய்யாமல் பழைய நிலையிலேயே நீடிக்க ரிசா்வ் வங்கி முடிவெடுத்துள்ளது. இந்த அறிவிப்பால் வங்கிகளில் கடனுக்கான வட்டி விகிதம் குறையக் கட்டாயம் வாய்ப்பு இல்லை. இதன் மூலம் கனவு வீட்டை வாங்கத் திட்டமிடுவோர் தற்போது வங்கிகளில் இருக்கும் மிகவும் குறைவான வட்டி விகிதத்தைப் பயன்படுத்திக்கொள்ள முடியும். இதேபோல் வாகன கடன், தனிநபர் கடனுக்கான வட்டி விகிதமும் குறையாது.

மும்பையில் செய்தியாளர்களிடம் பேசிய ரிசர்வ் வங்கி ஆளுநர் சக்தி காந்த தாஸ், '2021 - 22 நிதியாண்டில் ஜிடிபி வளர்ச்சி 9.5 சதவீதமாக இருக்கும் என கணிக்கப்பட்டுள்ளது. இது 2021-22 இரண்டாம் காலாண்டில் 7.9 சதவீதமாகவும், 3ம் காலாண்டில் 6.8 சதவீதமாகவும், 4வது காலாண்டில் 6.1 சதவீதமாகவும் இருக்கும். 2022- 23ம் முதல் காலாண்டில் ஜிடிபி வளர்ச்சி 17.2 சதவீதமாக இருக்கும்.2022 நிதியாண்டில் நுகர்வோர் பணவீக்கம் 5.3% ஆக இருக்கும். 2022-23 நிதியாண்டின் முதல் காலாண்டில் நுகர்வோர் பணவீக்கம் 5.2% ஆக இருக்கும்' என்று தெரிவித்தார்.

பதிவு: October 08, 2021
ஒரே நாளில் எகிறியது தங்கம் விலை!- ஒரு சவரன் ரூ.35,136க்கு விற்பனை

சென்னையில் 22 கேரட் ஆபரணத் தங்கத்தின் விலை அதிரடியாக சவரனுக்கு ரூ.448 உயர்ந்துள்ளது. இதனால் வாடிக்கையாளர்கள் அதிர்ச்சி அடைந்துள்ளனர்.

தமிழகத்தில் சர்வதேச சந்தையை பொறுத்து தங்கத்தின் விலை நிர்ணயம் செய்யப்படுகிறது. சென்ற வாரம் முழுவதும் சரிந்து வந்த தங்கம் இந்த வாரத் தொடக்கத்தில் இருந்தே ஏறியும் இறங்கியும் வருகிறது.

தங்கம் மற்றும் வெள்ளி விலை கடந்த சில மாதங்களாக ஏற்ற இறக்கத்துடன் இருந்து வரும் நிலையில் கடந்த இரண்டு நாட்களாக திடீரென தங்கம் விலை உயர்ந்து அச்சத்தை ஏற்படுத்தியது. இந்த நிலையில் இன்று தங்கம் மற்றும் வெள்ளி விலை சென்னையில் அதிரடியாக உயர்ந்துள்ளது.

சென்னையில் ஆபரணத் தங்கத்தின் விலை சவரனுக்கு ரூ.448 உயர்ந்துள்ளது. ஆபரணத் தங்கம் ஒரு கிராம் ரூ.4,392க்கும், சவரன் ரூ.35,136க்கும் விற்பனை செய்யப்படுகிறது. சென்னையில் சில்லறை வர்த்தகத்தில் ஒரு கிராம் வெள்ளி ரூ.63.70க்கு விற்பனை செய்யப்படுகிறது. தங்கம் விலை திடீரென உயர்ந்துள்ளால் வாடிக்கையாளர்கள் அதிர்ச்சி அடைந்துள்ளனர்.

பதிவு: October 01, 2021
தங்கம் விலை அதிரடியாக சரிவு!- ஒரு பவுன் ரூ.34,920க்கு விற்பனை

தங்கம் விலை அதிரடி குறைவால் வாடிக்கையாளர்கள் நிம்மதி அடைந்துள்ளனர். ஒரு பவுன் இன்று ரூ.34,920க்கு விற்பனையாகிறது.

தங்கம் இந்த செப்டம்பர் மாதத் தொடக்கத்தில் விலையேற்றம் இருந்தது. ஆனால், வாடிக்கையாளர்களுக்கு மகிழ்ச்சி தரும் விதமாக கடந்த ஒரு வாரத்தில் தொடர்ச்சியாக தங்கம் விலை குறைக்கப்பட்டது. நேற்று ஆபரண தங்கத்தின் விலை 176 ரூபாய் குறைந்து 35,440 ரூபாய்க்கு விற்பனையானது. இன்றும் தங்கம் விலை கடுமையாக வீழ்ச்சியை கண்டுள்ளது.

சென்னையில் இன்று ஒரு கிராம் ஆபரணத் தங்கத்தின் விலை ரூ.4,365 ஆக குறைந்துள்ளது. நேற்று இதன் விலை 4,485 ரூபாயாக இருந்தது. அதேபோல, நேற்று 35,472 ரூபாய்க்கு விற்பனை செய்யப்பட்ட 8 கிராம் ஆபரணத் தங்கம் 400 ரூபாய் குறைந்து 34,920 ரூபாய்க்கு விற்பனையாகிறது. வெள்ளி விலை இன்று உயர்த்தப்பட்டுள்ளது. சென்னையில் ஒரு கிராம் வெள்ளி விலை ரூ.1.50 குறைந்து ரூ.65.50 ஆக விற்பனை செய்யப்படுகிறது. ஒரு கிலோ வெள்ளி 65,500 ரூபாய்க்கு விற்பனை செய்யப்படுகிறது.

பதிவு: September 17, 2021
இந்தியாவில் ஆலையை மூடுகிறது ஃபோர்டு நிறுவனம்! - 4000 தொழிலாளர்கள் வேலையிழக்கும் அபாயம்!

அமெரிக்காவைச் சேர்ந்த முன்னணி வாகன நிறுவனமான ஃபோர்டு, இந்தியாவில் உள்ள உற்பத்தி ஆலைகளை மூட முடிவு செய்துள்ளதாக தகவல் வெளியாகியுள்ளது.

கடந்த 20 வருடங்களாக இந்தியாவில் பல்வேறு வகை கார்களை தொடர்ந்து உற்பத்தி செய்துவரும் ஃபோர்டு நிறுவனம் லாபமின்றி தொடர்ந்து நஷ்டத்தையே சந்தித்து வருவதாகவும், பல்வேறு புதிய மாடல்களை இந்தியாவில் உற்பத்தி செய்தும் நஷ்டமே ஏற்பட்டு வருவதால் உற்பத்தி மிகவும் குறைந்திருப்பதாகக் கூறியிருக்கிறது. இதனால் ஃபோர்டு இந்தியா நிறுவனத்துக்கு 2 பில்லியன் டாலர் நஷ்டம் ஏற்பட்டுள்ளதாகவும் கூறியிருக்கிறது.

இதனால் தமிழ்நாட்டிலுள்ள மறைமலைநகர், குஜராத்திலுள்ள சனண்ட் ஆகிய இரண்டு இடங்களில் உள்ள உற்பத்தி ஆலைகளை மூட முடிவு செய்துள்ளதாக தகவல் வெளியாகியுள்ளது. இனிமேல் இந்தியாவில் கார்களை உற்பத்தி செய்யாமல் அமெரிக்காவில் இருந்து இறக்குமதி செய்யப்படும் வாகனங்களின் விற்பனையை மட்டும் இந்தியாவில் தொடர திட்டமிட்டுள்ளதாகவும் கூறப்பட்டுள்ளது. ஃபோர்டு வாகன உற்பத்தி ஆலை மூடப்பட்டால் சுமார் 4000 தொழிலாளர்கள் வேலையிழக்கும் அபாயம் உள்ளதாகத் தெரிகிறது.

ஜெர்மனி, ஸ்பெயின், பிரிட்டன் ஆகிய நாடுகளில் ஃபோர்டு நிறுவன ஆலைகள் ஏற்கெனவே மூடப்பட்ட நிலையில் இம்முடிவு எடுக்கப்பட்டுள்ளதாக தகவல் வெளியாகியிருக்கிறது.

பதிவு: September 09, 2021
வரிக் கணக்குகளை தாக்கல் செய்வதற்கான தேதியை நீட்டித்தது வருமான வரித்துறை!

பல்வேறு வரிக் கணக்குகளைத் தாக்கல் செய்வதற்கான கடைசி தேதியை, வருமான வரித்துறை நீட்டித்து அறிக்கை வெளியிட்டுள்ளது.

நேரடி வரி தொடா்பாக நிலுவையில் உள்ள பிரச்னைகளுக்கு சுமுகத் தீா்வு காணும் நோக்கில் கொண்டுவரப்பட்டுள்ள ‘விவாத் ஸே விஸ்வாஸ்’ திட்டத்தின் கீழ் கட்டணம் செலுத்துவதற் கான தேதி, செப்டம்பா் 30ம் தேதி வரை நீட்டிக்கப்பட்டுள்ளது. வட்டித் தொகையுடன் சோ்த்து அக்டோபா் 31-க்குள் கட்டணம் செலுத்தலாம் என்று கூறப்பட்டுள்ளது.

ஓய்வூதிய நிதியில் முதலீடு செய்வதற்கான கெடு, ஜூலை 31-ல் இருந்து நவம்பா் 30-ஆம் தேதி வரையிலும், தங்க முதலீட்டுப் பத்திரத் திட்டத்தில் முதலீடு செய்வதற்கான கெடு அக்டோபா் 31-ல் இருந்து டிசம்பா் 31ம் தேதி வரையிலும் நீட்டிக்கப்பட்டுள்ளது.

கடந்த 2017-ஆம் ஆண்டு ஜூலை முதல் 2021-ஆம் ஆண்டு ஏப்ரல் வரையிலான காலகட்டத் தில் ஜிஎஸ்டி வரிக் கணக்கு தாக்கல் செய்யாதவா்களுக்கு சலுகை அளிக்க ஜிஎஸ்டி கவுன் சில், கடந்த மே மாதம் முடிவு செய்தது. அதன்படி, குறைக்கப்பட்ட தாமதக் கட்டணத் தை மத்திய நிதியமைச்சகம் ஜூன் 1-ஆம் தேதி அறிவித்தது.

இந்தக் கட்டணத்தை ஆகஸ்ட் 31-ஆம் தேதிக்குள் செலுத்த வேண்டும் என்று அறிவிக்கப் பட்டிருந்தது. தற்போது, தாமதக் கட்டணம் செலுத்த கடைசி தேதி நவம்பா் 30-ஆம் தேதி வரை நீட்டிக்கப்பட்டுள்ளது.

வருமான வரி கணக்கு தாக்கல் செய்வதற்கான புதிய வலைதளத்தில் கோளாறு ஏற்பட்ட தால், வரிக் கணக்குகளை தாக்கல் செய்வதில் சிரமம் ஏற்பட்டது. இதையடுத்து, வரிக் கணக்குகளை தாக்கல் செய்வதற்கான தேதியை வருமான வரித் துறை நீட்டித்துள்ளது.

பதிவு: August 30, 2021
புதுச்சேரியில் வாட் வரி குறைப்பு!- பெட்ரோல் விலை லிட்டருக்கு ரூ.2.43 சரிவு!

தமிழகத்தைத் தொடர்ந்து புதுச்சேரியிலும் பெட்ரோல் விலை குறைக்கப்பட்டுள்ளது.

புதுச்சேரி மற்றும் காரைக்காலில் விற்கபடும் பெட்ரோல் மீதான 3 சதவீதம் வாட் வரியை குறைப்பதற்கான அமைச்சரவையின் முடிவிக்கு துணை நிலை ஆளுநர் தமிழிசை சௌந்தரராஜன் ஒப்புதல் அளித்துள்ளார். இதன்படி, பெட்ரோல் விலை ரூ.2.43 குறைந்து புதுச்சேரியில் ரூ.99.52 ஆகவும் காரைக்காலில் ரூ.99.30 ஆகவும் விற்பனை செய்யப்படும் என ஆளுநர் மாளிகை வெளியிட்ட செய்திக்குறிப்பில் தெரிவிக்கப்பட்டுள்ளது.

இதேபோல், புதுச்சேரி மற்றும் காரைக்கால் மாவட்டங்களில் உள்ள சிபிஎஸ்இ / ஐசிஎஸ்இ உள்ளிட்ட அரசு பள்ளிகள், அரசு உதவி பெறும் பள்ளிகள் மற்றும் தனியார் பள்ளிகளில் செப்டம்பர் 1ம் தேதி முதல் நேரடி வகுப்புகளைத் தொடங்கும் வகையில் அதற்கான ஆயத்தப் பணிகளை மேற்கொள்ள இன்று முதல் பள்ளிகளைத் திறக்க துணைநிலை ஆளுநர் தமிழிசை சௌந்தரராஜன் ஒப்புதல் அளித்துள்ளார்.

9 முதல் 12 ஆம் வகுப்பு வரையிலான மாணவர்கள் தாமாக முன்வந்து பள்ளிகளுக்கு வர விரும்புவதால், 2021-22 கல்வியாண்டில் மாற்று நாட்களில் பள்ளிகள் காலை 9 மணி முதல் மதியம் 1 மணி வரை (அரை நாள்) வாரத்தில் 6 நாட்கள், கொரோனா வழிகாட்டு நெறிமுறைகளை பின்பற்றி செயல்படும் எனவும் அறிவிக்கப்பட்டுள்ளது.

பதிவு: August 26, 2021
டெபிட், கிரெடிட் கார்டு பண பரிவர்த்தனை!- ஆன்லைன் வணிக நிறுவனங்களுக்கு ஆர்பிஐ `செக்'

டெபிட் கார்டு மற்றும் கிரெடிட் கார்டு மூலமாக ஆன்லைனில் செய்யும் பரிவர்த்தனைகளுக்கு புதிய விதிமுறைகளை ரிசர்வ் வங்கி அறிமுகம் செய்துள்ளது. இந்தப் புதிய விதிமுறைகளின்படி ஆன்லைன் வணிக நிறுவனங்கள் டெபிட், கிரெடிட் கார்டு தகவல்களை சேமிக்க கூடாது என ரிசர்வ் வங்கி உத்தரவிட்டுள்ளது.

அமேசான், பிளிப்கார்ட், நெட்பிளிக்ஸ் உள்ளிட்ட அனைத்து இ-காமர்ஸ் தளங்கள் மற்றும் பிற ஆன்லைன் கட்டண தளங்களும் இதுவரை வாடிக்கையாளர்களின் கிரெடிட் கார்டு, டெபிட் கார்டு தகவல்களை தங்களுடைய சர்வரில் சேமித்து வந்தன. இதனால் வாடிக்கையாளர்கள் சிவிவி எண்ணை மட்டும் உள்ளிட்டு, ஓடிபி எனப்படும் ரகசிய எண்ணை உள்ளிட்டால் பரிவர்த்தனை நிறைவு பெறும். தற்போது அறிமுகப்படுத்தப்பட்டுள்ள புதிய வழிகாட்டுதலின்படி ஒவ்வொரு ஆன்லைன் பரிவர்த்தனைகளின் போதும் 16 இலக்க அட்டை எண், சிவிவி, காலாவதி தேதி ஆகிய அனைத்தையும் உள்ளிட வேண்டியது கட்டாயமாக்கப்பட்டுள்ளது.

வாடிக்கையாளர்களின் பாதுகாப்பை மேலும் உறுதிப்படுத்த இத்தகைய புதிய விதிமுறைகளைக் கொண்டு வந்துள்ளதாக ரிசர்வ் வங்கி கூறியுள்ளது. இதனால் ஆன்லைன் பரிவர்த்தனை நடைமுறைகள் சற்றுதாமதமாகும் நிலை உண்டாகும். ஆனால் இது வாடிக்கையாளர்களின் வங்கிச் சேவை தகவல்களை பாதுகாப்பதை நோக்கமாகக் கொண்டு அறிமுகப்படுத்தப்பட்டுள்ளதாக ரிசர்வ் வங்கி தெரிவித்துள்ளது. இந்த புதிய விதிமுறைகள் 2022-ம் ஆண்டு ஜனவரி மாதம் முதல் அமலுக்கு வரும் என ரிசர்வ் வங்கி கூறியுள்ளது.

பதிவு: August 24, 2021
காலையில் சரிவு, மாலையில் ஏற்றம்!- கண்ணாமூச்சி ஆடி வரும் தங்கத்தின் விலை

தங்கம் விலை இன்று சவரனுக்கு 32 ரூபாய் குறைந்து ஒரு சவரன் 35,688 ரூபாய்க்கு விற்பனை செய்யப்படுகிறது.

தங்கம் விலையானது கடந்த சில நாட்களாகவே கண்ணாமூச்சி ஆடி வருகிறது. காலையில் சரிவு காண்பதும், மாலையில் ஏற்றம் காண்பதும் தங்கத்தின் வாடிக்கையாகவே இருந்து வருகிறது. எப்படியிருப்பினும் இன்று விலையானது சற்று தடுமாற்றத்தில் காணப்படுகிறது. இது முதலீட்டாளர்களுக்கு நல்ல வாய்ப்பாகவே பார்க்கப்படுகிறது. கொரோனா வைரஸ் பாதிப்பால் ஏற்பட்ட பீதியாலும் தங்கம் விலையில் ஏற்ற இறக்கங்கள் நிலவி வந்தன. தங்கம் வாங்கும் எண்ணத்தில் இருப்பவர்கள் அதை வாங்கவே வேண்டாம் என்று நினைக்கும் அளவுக்கு சென்னையில் தங்கம் விலை அதிரடியாக உயர்ந்து வந்தது.

கொரோனாவின் தாக்கத்தினை தொடர்ந்து கடந்த ஆண்டில் தங்கம் விலையானது வரலாற்று உச்சத்தினை தொட்டது. கொரோனா பிரச்னை, நிதி நெருக்கடி, ஊரடங்கு போன்ற பிரச்னைகள் இருந்தாலும் மக்களிடையே தங்கத்துக்கான தேவை மட்டும் குறையவில்லை. விலை உயர்வு இருந்தாலும் தங்கம் வாங்குவதில் இல்லத்தரசிகள் தீவிரமாகவே இருக்கின்றனர். தற்போது பொருளாதாரம் வளர்ச்சி பாதைக்கு திரும்பிக் கொண்டுள்ள நிலையில், இது கடந்த ஆண்டு வரலாற்று உச்சத்தோடு ஒப்பிடும்போது 9,000 ரூபாய் சரிவில் காணப்படுகிறது.

இந்நிலையில், சென்னையில் ஆபரணத் தங்கத்தின் விலை குறைந்திருப்பது நகை பிரியர்களை சற்று ஆறுதல் படுத்தியுள்ளது. அதன்படி, சென்னையில் 22 கேரட் ஆபரணத் தங்கத்தின் விலை இன்று கிராமுக்கு 4 ரூபாய் குறைந்து, சவரனுக்கு 32 ரூபாய் சரிந்துள்ளது. சென்னையில் 22 கேரட் ஆபரணத் தங்கம் ஒருகிராம் 4,461 ரூபாயாகவும், ஒரு சவரன் 35,688 ரூபாயாகவும் நிர்ணயம் செய்யப்பட்டுள்ளது. 22 கேரட் ஆபரணத் தங்கம் 8 கிராம் 38,600 ரூபாயாக உள்ளது. வெள்ளி ஒருகிராம் 66 ரூபாய் 70 காசுகளாகவும், ஒருகிலோ 66,700 ரூபாயாகவும் உள்ளது.

பதிவு: August 23, 2021
நீங்கள் ஐசிஐசிஐ வாடிக்கையாளரா?- இதை முதலில் படியுங்கள்

ஐசிஐசிஐ வாடிக்கையாளர்களிடம் இருந்து பண பரிவர்த்தனைகளுக்கு கட்டணத்தை நிர்ணயித்துள்ளது. இதை முதலில் பார்ப்போம்.

பண பரிவர்த்தனை கட்டணங்களைப் பொருந்தவரையில் மாதத்திற்கு முதல் 4 பரிவர்த்தனைகள் இலவசம் என அறிவிக்கப்பட்டுள்ளது. அதன் பிறகு ஒவ்வொரு பரிவர்த்தனைக்கும் 150 ரூபாய் கட்டணம் வசூலிக்கப்படுகிறது.

டெல்லி, சென்னை, கொல்கத்தா, பெங்களூரு, ஹைதராபாத், மும்பை உள்ளிட்ட ஆறு நகரங்களில் முதல் 3 பரிவர்த்தனைகளை வாடிக்கையாளர்கள் இலவசமாக செய்யலாம். இவை தவிர மற்ற பகுதிகளில் மாதத்திற்கு முதல் 5 பரிவர்த்தனைகள் இலவசம். அதை மீறும் போது அதிகபட்ச பரிவர்த்தனைகளுக்கு 20 ரூபாய் கட்டணமாகும். காசோலை கட்டணத்தைப் பொருத்தவரையில் ஒரு வருடத்திற்கு 25 காசோலைகளுக்கு கட்டணம் இல்லை. வாடிக்கையாளர்களுக்கு இலவசம் தான். அதற்கு மேற்பட 10 காசோலைகள் கொண்ட ஒவ்வொரு புத்தகத்திற்கும் 20 ரூபாய் வாடிக்கையாளர்களிடம் கட்டணமாக வசூலிக்கப்படுகிறது.

சில்வர் சேமிப்பு சம்பள கணக்கில் மாதத்திற்கு 4 இலவச பரிவர்த்தனைகளை செய்து கொள்ளலாம். அதற்கு மேற்பட்ட ஒவ்வொரு பரிவர்த்தனைக்கும், 150 ரூபாய் கட்டணமாக வசூலிக்கப்படும்.

பதிவு: August 20, 2021
எகிறும் தங்கம் விலை!- சாமானிய மக்கள் வேதனை

சென்னையில் ஆபரணத் தங்கத்தின் விலை சவரனுக்கு ரூ.240 உயர்ந்து ஒரு சவரன் ரூ.35,664க்கு விற்பனை செய்யப்படுகிறது. இதனால் சாமானிய மக்கள் வேதனை அடைந்துள்ளனர்.

சென்னையில் கடந்த வாரத்துக்கு முன்னர் தங்கம் விலை அதிரடியாக சரிந்தது. கடந்த 6ம் தேதியில் இருந்து அடுத்தடுத்த நாட்களில் தொடர் சரிவைக் கண்டு ரூ.36 ஆயிரத்துக்கு மேல் விற்கப்பட்டு வந்த தங்கம், ரூ.35 ஆயிரத்துக்குக் கீழ் சென்றது. அதாவது, 4 நாட்களிலேயே தங்கம் விலை ஆயிரம் ரூபாய்க்கு மேல் குறைந்துவிட்டது.

இப்படியே தங்கம் விலை குறைந்து விடும் என சாமானிய மக்கள் எண்ணிக் கொண்டிருந்த வேளையில் மீண்டும் அதிகரித்து அதிர்ச்சியளித்தது. தொடர்ந்து ஒரு வாரமாக தங்கம் விலை அதிகரித்து வருவதால் தங்கம் விலை மீண்டும் உச்சத்தை அடையுமோ என்ற அச்சம் நிலவுகிறது.

இன்றைய நிலவரப்படி சென்னையில் ஆபரணத் தங்கத்தின் விலை கிராமுக்கு ரூ.10 அதிகரித்து ரூ.4,458க்கு விற்பனையாகிறது. அதன்படி, சவரனுக்கு ரூ.240 அதிகரித்து ரூ.35,664க்கு விற்பனையாகிறது. மேலும் வெள்ளி விலை எந்த மாற்றமும் இன்றி ஒரு கிராம் வெள்ளி ரூ.68.60க்கும் ஒரு கிலோ வெள்ளி ரூ.68,600க்கும் விற்பனையாகிறது.

பதிவு: August 17, 2021
59 நிமிடத்தில் லோன் - எந்த வங்கிகளில் தெரியுமா?

சிறு, குறு மற்றும் நடுத்தர நிறுவனங்களை ஊக்குவிக்கும் பொருட்டுப் பொதுத்துறை வங்கிகளின் வாயிலாக வெறும் 59 நிமிடத்தில் கடன் வழங்கி வருகிறது.

மத்திய அரசின் சிறப்புத் திட்டத்தின் கீழ், இந்திய சிறு தொழில்கள் மேம்பாட்டு வங்கி (SIDBI) PSB லோன்ஸ் என்ற சிறப்புப் பின்டெக் தளத்தை உருவாக்கிச் சிறு, குறு மற்றும் நடுத்தர நிறுவனங்களுக்கு 59 நிமிடத்தில் கடன் கொடுக்கும் வசதியை மத்திய அரசு அறிமுகம் செய்தது. ஸ்டேட் பாங்க் ஆப் இந்தியா, பாங்க ஆப் பரோடா, பஞ்சாப் நேஷனல் வங்கி, விஜயா வங்கி, இந்தியன் வங்கி ஆகிய வங்கிகளில் இந்த திட்டம் தற்போது செயல்பாட்டில் உள்ளது.

இந்தத் திட்டத்தின் கீழ் 1 லட்சம் ரூபாய் முதல் 10 கோடி ரூபாய் வரையிலான கடனுக்கு விண்ணப்பித்து, முதற்கட்ட ஒப்புதலைப் பெறலாம். வர்த்தகக் கடன், தனிநபர் கடன், வீட்டுக்கடன், வாகன கடன் மற்றும் முத்ரா கடன் ஆகியவை இந்த திட்டத்தின் கீழ் வழங்கப்படுகின்றன. வர்த்தகக் கடன் - 5 கோடி ரூபாய், தனிநபர் கடன் - 20 லட்சம் ரூபாய், வீட்டுக் கடன் - 10 கோடி ரூபாய், வாகன கடன் - 1 கோடி ரூபாய் , முத்ரா கடன் - 10 லட்சம் ரூபாய்

இந்த வாய்ப்பைப் பயன்படுத்தி கொண்டு உங்கள் தொழிலை மேம்படுத்துங்கள். ஆன்லைனில் விண்ணப்பிப்பதும் மிகவும் எளிது. அதற்கு முதலில் நீங்கள் செல்ல வேண்டியது SIDBI உருவாக்கிய பின்டெக் தளமான PSB லோன்ஸ் தளத்திற்குச் செல்வது. https://www.psbloansin59minutes.com/home அங்கு தோன்றும் அடுத்தடுத்தப்படிகளை நிரப்பினால் உங்கள் விண்ணப்பம் ஏற்றுக்கொள்ளப்படும். பின்பு உங்கள் தகுதிக்கு ஏற்றவாறு லோன் வழங்கப்படும். இதை சற்று நினைவில் கொள்ளுங்கள். வங்கியில் கடைசிக்கட்ட பணிகள் முதற்கட்ட ஒப்புதல் கடிதம் கிடைத்த பின்பு குறிப்பிட்ட வங்கிக்கு நீங்கள் நேரில் செல்ல வேண்டும். அங்கு, நிறுவனத்தின் நிதிநிலை மற்றும் இதர ஆவணங்களை ஆய்வு செய்து பின்பே வங்கிகள் கடனுக்கு ஒப்புதல் அளிக்கும்.

பதிவு: August 16, 2021
தங்கத்திற்கு இன்று முதல் ஹால்மார்க் காட்டாயம்!

தங்க நகைகள் மற்றும் கலைப்பொருட்களில் கட்டாய ஹால்மார்க்கிங் நடைமுறை முதல் கட்டமாக இந்தியா முழுவதும் 256 மாவட்டங்களில் ஜூன் 16-ம் தேதியான இன்று நடைமுறைக்கு வந்துள்ளது. இந்த நடைமுறை இன்று முதல் அமலுக்கு வருவதன் மூலம் இனி தங்க நகைகள் மற்றும் கலைபொருட்களுக்கு ஹால்மார்க் முத்திரையிடுவது கட்டாயம் ஆகும். நகை கடைகளில் விற்கப்படும் தங்க நகைகளுக்கான தரத்தை உறுதிப்படுத்த இந்திய தர நிர்ணயக் கழகத்தின் (பி.ஐ.எஸ்.) ஹால்மார்க் முத்திரை உதவுகிறது. இந்த முத்திரையை கொண்டு வாடிக்கையாளர்கள் தாங்கள் வாங்கும் தங்கத்தின் தரத்தை உறுதி செய்யலாம்.


இதன்படி ஹால்மார்க்கிங் சென்டர்கள் (hallmarking centers) ஏற்கெனவே இருக்கும் நாட்டின் 256 மாவட்டங்களில் கட்டாய தங்க ஹால்மார்க்கிங் முதற்கட்டம் இன்று முதல் செயல்படுத்தப்படுகிறது. தங்கம் உருக்கி நகைகளாக உருவாக்கப்படும் போது எளிதில் உடையாமல் இருக்க அதனுடன் சேர்த்து ஏதேனும் உலோகம் கலக்கப்பட்டு தான் தயாரிக்கப்படுகின்றன. எனவே நாம் வாங்கும் நகைகளில் எவ்வளவு சதவீதம் ஒரிஜினல் தங்கம் இருக்கிறது, எவ்வளவு உலோகம் கலக்கப்பட்டுள்ளது என்று தெரிந்து கொள்ள தங்கத்தின் தூய்மை மற்றும் நேர்த்திக்கு சான்றளிக்கும் செயல்முறையே ஹால்மார்க்கிங் ஆகும்.

உலகளவில் தங்கத்தை அதிகம் வாங்குபவர்களில் இந்தியர்கள் மிக அதிகம். எனவே தங்க நகைகளின் தரத்தை கண்காணிக்க கடந்த 2000-ம் ஆண்டு முதல் தங்க நகைகளுக்கு ஹால்மார்க் தர முத்திரையிடும் நடைமுறை செயலில் உள்ளது. நாம் வாங்கும் தங்கத்தினுடைய தூய்மை குறித்து ஒரு உறுதியான உத்தரவாதத்தை நமக்கு அளிக்கிறது ஹால்மார்க்கிங். நகை விற்பனையாளர்களிடம் இருந்து நாம் வாங்கும் தங்க நகைகள் அல்லது தங்க நாணயத்தில் BIS அடையாளம் இருந்தால், அது இந்திய தரநிலை பணியகத்தால் (BIS) நிர்ணயிக்கப்பட்ட தரநிலைகளுக்கு ஒத்து போகிறது என்று அர்த்தமாகும்.

இதனிடையே நுகர்வோர் விவகார அமைச்சர் பியூஷ் கோயல் தலைமையிலான தொழில் பங்குதாரர்களின் கூட்டத்தில் தங்க நகைகளில் BIS ஹால்மார்க் முத்திரை இனி கட்டாயம் இடம்பெற வேண்டும் என்ற முடிவு எடுக்கப்பட்டது. இது தொடர்பாக நடைபெற்ற கூட்டத்தில் அகில இந்திய வர்த்தகர்கள் கூட்டமைப்பு (சிஐஐடி) மற்றும் அகில இந்திய நகைக்கடை மற்றும் கோல்ட்ஸ்மித் கூட்டமைப்பு (AIJGF) பிரதிநிதிகளும் கலந்து கொண்டனர்.

இதன்படி இன்று முதல் முதற்கட்டமாக நாட்டின் 256 மாவட்டங்களில் கட்டாய தங்க ஹால்மார்க்கிங் நடைமுறைக்கு வந்துள்ளது. இன்று முதல் ஏற்கனவே ஹால்மார்க்கிங் சென்டர்கள் இருக்கும் 256 மாவட்டங்களில் உள்ள நகைக்கடை விற்பனையாளர்கள் 14, 18 மற்றும் 22 காரட் தங்க நகைகளை மட்டுமே விற்க அனுமதிக்கப்படுவார்கள். மேலும் ஹால்மார்க்கிங் செய்ய கூடுதல் 20, 23 மற்றும் 24 காரட் தங்கமும் அனுமதிக்கப்படும். நகை வியாபாரிகள் தங்களிடம் உள்ள பழைய ஸ்டாக்குகளில் ஹால்மார்க்கிங் பெற செப்டம்பர் 1ம் தேதி காலக்கெடு நிர்ணயிக்கப்பட்டுள்ளது. இந்த இரண்டு மாத கால இடைவெளியில் எந்தவொரு வணிகருக்கும் எதிராக எந்த அபராதமும் விதிக்கப்பட மாட்டாது.

இது தொடர்பாக ட்விட்டரில் போஸ்ட் ஒன்றை ஷேர் செய்துள்ள அமைச்சர் பியூஷ் கோயல், "வாடிக்கையாளர்களின் சிறந்த பாதுகாப்பு மற்றும் திருப்திக்கான மத்திய அரசின் முயற்சியைத் தொடர்ந்து, 2021 ஜூன் 16 முதல் (இன்று முதல்) 256 மாவட்டங்களில் கட்டாய ஹால்மார்க்கிங் செயல்படுத்தப்படும். நகை விற்பனையாளர்களுக்கு ஆகஸ்ட் 2021 வரை அபராதம் விதிக்கப்படாது. இந்த முயற்சி இந்தியாவை ஒரு முன்னணி உலகளாவிய தங்க சந்தை மையமாக வளர்க்க உதவும்" என்று கூறி உள்ளார்.


ஹால்மார்க் தங்க நகைகளை மட்டுமே விற்க வேண்டும் என்ற இந்த நடைமுறை நாடு முழுவதும் படிப்படியாக அமல்படுத்தப்பட உள்ளது. இந்த கட்டாய ஹால்மார்க் நடைமுறை மூலம் தரம் குறைந்த தங்க நகைகளை விற்பது முற்றிலும் நிறுத்தப்படும், தங்க நகைகளை வாங்கும் மக்கள் ஏமாறாமல் பாதுகாக்கப்படுவார்கள் என்று அரசு தரப்பு கூறி உள்ளது. 2021 ஜனவரி 15 முதல் நாடு முழுவதும் தங்க நகைகள் மற்றும் கலைப்பொருட்களுக்கு ஹால்மார்க்கிங் கட்டாயமாக்கப்படும் என்று 2019 நவம்பரில் மத்திய அரசு அறிவித்திருந்தது. ஆனால் கோவிட் நெருக்கடியை கருத்தில் கொண்டு பல முறை இதற்கான காலக்கெடு நீட்டிக்கப்பட்டது நினைவில் கொள்ளத்தக்கது.

பதிவு: June 16, 2021

முக்கிய செய்திகள்

'தமிழக வங்கிகளில் தமிழ் தெரியாத வடமாநிலத்தவர்களை பணியமர்த்தும் போக்கை மத்திய அரசு கைவிட வேண்டும்' - சீமான் வலியுறுத்தல்!

தமிழக வங்கிகளில் தமிழ் தெரியாத வடமாநிலத்தவர்களைப் பணி நியமனம் செய்யும் போக்கினை மத்திய அரசு கைவிட வேண்டும் என நாம் தமிழர் கட்சி ஒருங்கிணைப்பாளர் சீமான் வலியுறுத்தியுள்ளார்!

இதுகுறித்து அவர் வெளியிட்டுள்ள செய்தியறிக்கையில், 

"தமிழ்நாட்டிலுள்ள பெரும்பாலான வங்கிகளில் தமிழ் தெரியாத பிறமாநிலத்தவரை அதிக அளவில் பணியமர்த்தும் போக்கு அண்மைக்காலமாக அதிகரித்து வருவது மிகுந்த கவலை அளிக்கிறது. மக்கள் சேவைத்துறைகளில் தமிழ் தெரியாதவர்களை வேண்டுமென்றே பணி நியமனம் செய்யும் இந்திய ஒன்றிய அரசின் எதேச்சதிகாரப்போக்கு வன்மையான கண்டனத்திற்குரியது.

சென்னை அசோக் நகரில், காவலர் பயற்சிக்கல்லூரி எதிரேயுள்ள ‘இந்தியன் ஓவர்சீஸ்’ பொதுத்துறை வங்கியில் தொடர்ந்து தமிழ் தெரியாத பிற மாநில அதிகாரிகளே மேலாளர்களாக நியமிக்கப்படுவதால் வங்கி சேவையைப் பெறுவதில் அடித்தட்டு, ஏழை மக்கள் மிகுந்த அவதிக்குள்ளாகின்றனர். இந்தி தெரியாத பாமர தமிழர்களை, வடநாட்டு அதிகாரிகள் ஆணவத்தோடு, அவமதிக்கும் நிகழ்வுகள் தொடர்வதாக பொதுமக்கள் தெரிவிக்கும் புகார்கள் மிகுந்த ஆத்திரத்தையும், கோவத்தையும் ஏற்படுத்துகிறது.

தமிழ்நாட்டில் உள்ள சிறுகடைகள் முதல் பெரிய வணிக நிறுவனங்கள், தொழிற்சாலைகள் மற்றும் அனைத்து வகையான கூலித்தொழில்கள் என எல்லா பணிவாய்ப்புகளும் இலட்சக்கணக்கில் வடமாநிலத்தவரால் ஆக்கிரமிக்கப்படுகிறது. அதுமட்டுமின்றி தமிழ்நாட்டிலுள்ள என்.எல்.சி, எல்.ஐ.சி, பி.எச்.இ.எல் உள்ளிட்ட இந்திய ஒன்றிய அரசின் பொதுத்துறை நிறுவனங்களிலும் வட மாநிலத்தவரே பல்லாயிரக்கணக்கில் பணி வாய்ப்புகளைப் பெறுகின்றனர். மேலும் வருமானவரித்துறை, அமலாக்கத்துறை உள்ளிட்ட இந்திய ஒன்றிய அரசின் நிர்வாகத் துறைகளிலும் அனைத்து நிலைகளிலும் வடமாநிலத்தவரே நியமிக்கப்படுகின்றனர்.

இதனால் தமிழ் மக்களுக்குக் கிடைக்க வேண்டிய வேலைவாய்ப்புகள் பறிபோவதோடு, தமிழர்களின் பல்லாயிரம் கோடி ரூபாய் பொருளாதாரமும் கொள்ளைபோகிறது. மேலும் தமிழகத் தொழிலாளர்கள் போராடிப்பெற்ற குறைந்தபட்ச ஊதிய உரிமையும் பறிபோய் வர்க்க பாகுபாட்டில் தமிழ்நாடு பல ஆண்டுகள் பின்னோக்கி செல்லும் அவலச்சூழலும் ஏற்படுகிறது. வடமாநிலத்தவர் நிரந்தரமாகக் குடியேறுவதால் தமிழர்களின் பண்பாடு, வழிபாடு என அனைத்தும் பேரழிவை நோக்கிச் செல்கிறது.

அதுமட்டுமின்றி, குடியேறிய சில மாதங்களிலேயே குடும்ப அட்டை முதல் வாக்காளர் அட்டை வரை அனைத்தையும் பெறுவதால் தமிழர்களின் அரசியல் அதிகாரமும் முற்றாக வடவரிடம் பறிபோகும் பேராபத்தும் ஏற்படுகிறது. இதனால் பணிநிமித்தமாக தமிழ்நாட்டில் நாள்தோறும் நிகழும் வடவர் குடியேற்றத்தைத் தமிழர்கள் மீது தொடுக்கப்படும் அரசியல் மற்றும் பண்பாட்டுப் படையெடுப்பாகவே பார்க்க வேண்டியுள்ளது.

நூற்றாண்டு காலமாக இந்தியைத் திணிக்கும் இந்திய ஆட்சியாளர்களின் முயற்சிகளை தமிழ்நாடு கடுமையாக எதிர்ப்பதால், தற்போது இந்திக்காரர்களை வலிந்து குடியேற்றி அதன் மூலம் மறைமுகமாக இந்தியைத் திணிக்க முயல்கின்றனர் என்பது வெட்டவெளிச்சமாகிறது. குறிப்பாக வங்கி, அஞ்சலகம் உள்ளிட்ட மக்கள் தொடர்புத்துறைகளில் தமிழ் தெரியாத வடமாநில அதிகாரிகளை வேண்டுமென்றே நியமிப்பதன் மூலம் தமிழ்நாட்டிலுள்ள ஏழை, எளிய மக்களை மறைமுகமாக இந்தி கற்க வேண்டிய நெருக்கடி நிலைக்கு ஆளாக்குகின்றனர்.

குறிப்பாக இந்திய ஒன்றியத்தில் மோடி தலைமையிலான பாஜக அரசு பதவியேற்ற கடந்த 8 ஆண்டுகளில் இத்தகைய வடவர் திணிப்பு இலட்சக்கணக்கில் பலமடங்கு வீரியமாக அதிகரித்துள்ளது. இது, எதிர்காலத்தில் இந்துத்துவத்தைத் தமிழ் மண்ணில் விதைப்பதற்கான வலுவான அடித்தளமேயன்றி வேறில்லை. இதனை இனியும் தொடர அனுமதித்தால் ஈழத்தைப் போல் தமிழ்நாட்டிலும், தமிழர்கள் தங்கள் சொந்த தாயகத்தில் அதிகாரம் ஏதுமற்ற அகதியாகும் அவலநிலை ஏற்படும்.

ஆகவே, வங்கி, அஞ்சலகம் உள்ளிட்ட ஒன்றிய அரசின் அனைத்து மக்கள் சேவைத் துறைகளிலும் பணிபுரியும் தமிழ் தெரியாத பிறமாநிலத்தவரைக் கணக்கெடுத்து அவர்களை உடனடியாகப் பணியிடமாற்றம் செய்ய வேண்டுமெனவும், தமிழ்நாட்டில் பணிபுரிய தமிழ் எழுத, படிக்க, பேச தெரிந்திருப்பது கட்டாயம் என்பதை உறுதி செய்ய வேண்டுமெனவும், இந்திய ஒன்றியத்தை ஆளும் பாஜக அரசினை வலியுறுத்துகிறேன். மேலும், தமிழ்நாட்டின் தன்னாட்சி, இறையாண்மை மற்றும் தமிழர்களின் வாழ்வுரிமையை அழித்தொழிக்கும் வடவர் திணிப்பைக் கட்டுப்படுத்த நுழைவுச் சீட்டு உள்ளிட்ட தீவிர நடவடிக்கைகளை முழுவீச்சில் எடுக்க வேண்டுமென்று தமிழ்நாடு அரசினையும் கேட்டுக்கொள்கிறேன்" இவ்வாறு தெரிவித்துள்ளார்.

பதிவு: August 03, 2022
பாஜக போன்றே திமுகவும் மாட்டிறைச்சி அரசியல் செய்யுமென்றால் இது திராவிட மாடலா? இல்லை, ஆரிய மாடலா? - சீமான் கேள்வி!

மாட்டிறைச்சியின் பெயரால் பாஜக அரசு செய்யும் அற்பத்தனமான அரசியலைத்தான் திமுக அரசும் செய்யுமென்றால், திமுகவினுடையது திராவிட மாடலா? இல்லை, ஆரிய மாடலா? என்று நாதக ஒருங்கிணைப்பாளர் சீமான் கேள்வி எழுப்பியுள்ளார். 

இதுகுறித்து அவர் வெளியிட்டுள்ள அறிக்கையில், 

"சேலம், தாதகாப்பட்டி, சண்முக நகர் பகுதியிலிருந்த தம்பி பாதுஷா மைதீனுக்குச் சொந்தமான மாட்டிறைச்சி உணவுக்கடையானது திமுக அரசின் நிர்வாக அமைப்பினால் மூடப்படுவதாக அறிவிக்கப்பட்டிருப்பது பெரும் அதிர்ச்சியளிக்கிறது. பல வருடங்களாக அப்பகுதியில் நடத்தி வரப்பட்ட மாட்டிறைச்சி உணவுக்கடையை, இந்து முன்னணி போன்ற மதவாத அமைப்புகளின் அச்சுறுத்தலுக்கு அஞ்சி, திடீரென மூட உத்தரவிட்டிருக்கும் திமுக அரசின் எதேச்சதிகாரச்செயல்பாடு வெட்கக்கேடானது.

ஏற்கனவே, திருப்பத்தூர் மாவட்டம், ஆம்பூரில் மாவட்ட நிர்வாகத்தால் நடத்தப்படுவதாக அறிவிக்கப்பட்ட பிரியாணி உணவுத்திருவிழாவில் மாட்டிறைச்சிக்கு அனுமதி மறுக்கப்பட்டது பேசுபொருளாகி எதிர்ப்புக்கு உள்ளான நிலையில், உணவுத்திருவிழாவையே மொத்தமாக ரத்துசெய்து மதவாத அமைப்புகளை நிறைவடையச்செய்த திமுக அரசு, இப்போது மாட்டிறைச்சி உணவுக்கடைக்கு அனுமதி மறுத்து மூடியிருப்பது கடும் கண்டனத்திற்குரியது.

அப்பகுதியிலிருக்கும் கோயிலைக் காரணமாகக் காட்டி, சட்டம் ஒழுங்கு சிக்கல் ஏற்பட வாய்ப்பு இருக்கிறதெனக்கூறி, மாட்டிறைச்சி கடையை மூடியதை நியாயப்படுத்த முனையும் மாவட்ட நிர்வாகம், கோழி, ஆடு இறைச்சிகளைக் கொண்ட உணவுக்கடைகளுக்கு மட்டும் அப்பகுதியில் அனுமதி வழங்கியதேன்? மாட்டிறைச்சி உணவுக்கு மட்டும் எதற்கு இந்தத் தீண்டாமைக்கோட்பாடு?

கோயிலுக்கருகே மாட்டிறைச்சி உணவுக்கடை வைக்கக்கூடாதென யார் சொன்னது? ‘ஆவுரித்துத் தின்றுழலும் புலைய ரேனும் கங்கைவார் சடைக்கரந்தார்க் கன்ப ராகில் அவர்கண்டீர் நாம்வணங்கும் கடவு ளாரே’ எனப்பாடி, ‘மாட்டிறைச்சி உண்டாலென்ன? அவர் கொண்டிருக்கிற அன்பினால் சிவபெருமானால் ஏற்கப்படுவார்’ என சைவ சமயக்குரவர் அப்பரே உரைக்கிறபோது இவர்களுக்கென்ன சிக்கல்? பட்டினப்பிரவேசமும், பசு மடமும்கூட ஏற்பாக இருக்கும் திமுக அரசுக்கு மாட்டிறைச்சி உணவு மட்டும் உவர்ப்பாக இருப்பதேன்? அங்கு மாட்டிறைச்சி உணவுக்கடை இருந்தால் கோயிலுக்கு வரும் பக்தர்களின் மனம் புண்படுமெனும் மழுப்பல் வாதம் எதற்கு?

திருச்சி, திருவரங்கம் கோயிலுக்கு எதிரேயுள்ள ஐயா பெரியார் அவர்களது சிலையினால் பக்தர்களின் மனம் புண்படுகிறதெனக்கூறி, சட்டம் ஒழுங்கு சிக்கல் ஏற்படுமென மதவாத அமைப்புகள் எச்சரித்தால், அச்சுறுத்தலுக்குப் பயந்து ஐயா பெரியாரது சிலையையும் இதேபோல அகற்றிவிடுவார்களா? என்ன கேலிக்கூத்து இது? மாட்டிறைச்சி உணவின் பெயரால் பாஜக அரசும், அதன் ஆட்சியாளர்களும், செய்யும் அற்பத்தனமான அரசியலைத்தான் திமுக அரசும் செய்யுமென்றால், இது திராவிட மாடல் அரசா? இல்லை! ஆரிய மாடல் அரசா? என்பதை தமிழக அரசு தெளிவுப்படுத்த முன்வர வேண்டும்.

ஆகவே, சேலத்தில் மூடப்பட்ட மாட்டிறைச்சி உணவுக்கடையை மீண்டும் திறக்க அனுமதி வழங்க வேண்டுமெனும், உணவுரிமையில் தலையிடும் பிற்போக்குத்தனத்தை இனியும் செய்யக்கூடாதெனவும் திமுக அரசை நாம் தமிழர் கட்சி சார்பாக வலியுறுத்துகிறேன்" இவ்வாறு தெரிவித்துள்ளார். 

பதிவு: August 01, 2022
'எதிர்க்கட்சியாக இருந்தபோது பிரதமர் வருகைக்கு கறுப்புகொடி காட்டிய திமுக, ஆளுங்கட்சியானவுடன் எதிர்ப்போர் மீது நடவடிக்கை எடுப்பதா?' - சீமான் கேள்வி!

எதிர்க்கட்சியாக இருந்தபோது, பிரதமரின் வருகைக்கெதிராக கறுப்புடை அணிந்து, கறுப்புக்கொடி காட்டிய திமுக, ஆளுங்கட்சியானவுடன் எதிர்ப்புத் தெரிவிப்போர் மீது அடக்குமுறையை ஏவத்துடிப்பதாக நாதக ஒருங்கிணைப்பாளர் சீமான் கண்டனம் தெரிவித்துள்ளார்!

இதுகுறித்து அவர் வெளியிட்டுள்ள அறிக்கையில், 

"பிரதமர் மோடியின் தமிழக வருகைக்கெதிராக சமூக வலைத்தளங்களில் கருத்துப்பதிவிடுவோர் கண்காணிக்கப்பட்டு நடவடிக்கைக்கு உள்ளாக்கப்படுவர் என சென்னை காவல் ஆணையர் சங்கர் ஜிவால் அறிவித்திருப்பது அதிர்ச்சியளிக்கிறது. நாட்டையாளும் ஆட்சியாளர்கள், தலைவர் பெருமக்களின் வருகைக்கெதிராக எதிர்க்கட்சிகளும், பொதுமக்களும் கறுப்புக்கொடி காட்டி எதிர்ப்புணர்வை வெளிப்படுத்தும் சனநாயக உரிமை பேணப்படுகின்ற இந்நாட்டில், சமூக வலைத்தளங்களில் கருத்துகளை வெளிப்படுத்துவதற்கே அச்சுறுத்தல் விடுக்கும் திமுக அரசின் கொடுங்கோல் போக்கு கடும் கண்டனத்திற்குரியது.

எதிர்க்கட்சியாக இருந்தபோது பிரதமர் மோடியின் வருகைக்கெதிராக கறுப்புடை தரித்து, கறுப்புக்கொடி காட்டிய திமுக, ஆளுங்கட்சியானவுடன் மிதமிஞ்சிய வரவேற்பு அளிப்பதும், அவ்வருகைக்கு எதிர்ப்புத்தெரிவிப்போர் மீது அரசதிகாரத்தின் மூலம் அடக்குமுறையைக் கட்டவிழ்த்துவிடுவதுமான செயல்பாடுகள் வெட்கக்கேடானவையாகும்.

அண்டை மாநிலமான தெலுங்கானாவில் ஐயா சந்திரசேகரராவ் அவர்கள் முதுகெலும்போடும், நெஞ்சுரத்தோடு பிரதமர் மோடியின் எதேச்சதிகாரப் போக்கையும், அரசியல் அத்துமீறலையும் வீரியமாக எதிர்த்து நிற்கும் வேளையில், திமுக அரசு பாஜகவின் பாதம்பணிந்து சரணடைவது இழிவில்லையா? ஆரியத்தை எதிர்க்கத் துப்பற்று, காலடியில் விழுந்து மண்டியிடுவதுதான் திராவிட மாடல் ஆட்சியா? கடந்த தேர்தலில் நாம் தமிழர் கட்சியை பாஜக பி டீம் என்று பிரச்சாரம் செய்தவர்கள் இன்று ராஷ்ட்ரீய சேவா சங்க சேய் கழகமாக செயல்படுவது கொடுமை.

மக்கள் விரும்பும் நல்லாட்சியைத் தந்திருந்தால், நாங்கள் ஏன் பாஜக அரசை விமர்சிக்கப்போகிறோம்? எல்லாவற்றையுமே மக்களுக்கு விரோதமாகச்செய்தால், விமர்சிக்காது மக்கள் என்ன செய்வார்கள்? கருத்துரிமையின் அடிநாதமான விமர்சனத்தையே ஏற்க முடியாதென்றால், இந்நாட்டில் நடப்பது பாசிச ஆட்சிதானே!

#GoBackModi என்பது வெற்றுக் கீச்சகக்கொத்துக்குறியல்ல! தமிழர்களோடு காலங்காலமாகப் பகைமைப் பாராட்டி, வஞ்சகத்தின் மூலம் தமிழ்நாட்டை அழிக்கத்துடிக்கும் ஆரிய மேலாதிக்கத்துக்கெதிரான தமிழ்த்தேசிய இனத்தின் அறச்சீற்றம்; இனமானத்தமிழர்களின் ஒப்பற்றப் போர்முழக்கம்! அதனைப் பதிவுசெய்யவிடாது தடுத்து, மக்களின் குரல்வளையை நெரித்து, கருத்துச்சுதந்திரத்தை முடக்க நினையும் திமுக அரசின் செயல் பச்சைச் சந்தர்ப்பவாதமாகும். முந்தைய அதிமுக அரசை, அடிமையாட்சி என்று வர்ணித்துவிட்டு, இன்றைக்கு கொத்தடிமை அரசாக திமுக மாறி நிற்பது நாட்டு மக்கள் மத்தியில் வெட்டவெளிச்சமாகியிருக்கிறது.

காவல்துறையின் இந்த பாஜகவிற்கு ஆதரவான செயல்பாடு ஆகப்பெரும் சனநாயகத்தை கட்டிகாக்கும் திராவிட மாடலென்றால் வாழ்க திராவிட மாடல்.!? பாரத் மாதாக்கி ஜே.!?" இவ்வாறு தெரிவித்துள்ளார்.

பதிவு: July 28, 2022
'2024-ல் மோடி ஆட்சிக்கு வரக்கூடாது. அப்படி வந்தால் சட்டம் முற்றிலுமாக சிதைந்துவிடும்' - பாசிச எதிர்ப்பு மாநாட்டில் திருமாவளவன் எம்.பி. ஆவேசப்பேச்சு!

2024-ல் மோடி மீண்டும் ஆட்சிக்கு வரக்கூடாது என்றும், அப்படி வந்தால் இந்திய அரசியலமைப்புச் சட்டம் சிதைந்துவிடும் என்றும் விசிக தலைவர் தொல்.திருமாவளவன் பேசியுள்ளார். 

பாசிச எதிர்ப்பு மாநாடு தஞ்சாவூரில் நடைபெற்றது. இதில் கலந்துகொண்டு பேசிய விசிக தலைவரும், நாடாளுமன்ற உறுப்பினருமான தொல்.திருமாவளவன், "உலகம் முழுவதும் பாசிசம் என்று சொல்லுகிற, அந்த பொதுமொழி, இந்தியாவில் அது இந்துத்துவாவாக இயங்கிக் கொண்டிருக்கிறது. இந்துத்துவா என்பது இந்து மக்களின் ஒட்டுமொத்த இந்துக்களின் கோட்பாடு அல்ல. அது ஆர்எஸ்எஸ்-ன் கோட்பாடு. இந்துக்கள் அனைவரும் ஏற்றுக்கொள்ளப்பட்ட, ஏற்றுக் கொண்டிருக்கிற ஒரு கருத்தியல் அல்ல. அவர்கள் ஒருமுறைக்கு, இரண்டு முறை ஆட்சிபீடத்தில் அமர்ந்து விட்டார்கள். மூன்றாவது முறையும் அமர்ந்தால் என்ன ஆகும்? இந்த ஆபத்தை நாம் உணர வேண்டும் என்பதற்காக நடத்தப்படுகிற மாநாடாகத் தான் இந்த காவி பாசிச எதிர்ப்பு மாநாட்டை நான் பார்க்கிறேன்.

இந்தியா முழுவதும் இருக்கிற இடதுசாரிகள் ஒருங்கிணைய வேண்டும். அதை உணர்த்துகிற மாநாடுதான் இந்த மாநாடு. அனைத்து இடதுசாரிகள் இன்றைக்கு, அகில இந்திய அளவிலே, ஜனநாயக சக்திகளோடு ஒருங்கிணைய முன்வந்திருக்கின்றனர். இதை அடையாளம் காண வேண்டியதும், இவர்களோடு கைகோர்க்க வேண்டியதும், விடுதலைச் சிறுத்தைகளின் பொறுப்பு, விடுதலைச் சிறுத்தைகளின் கடமை.

இன்றைக்கு நாம் வலுவாக முன்னெடுத்திருக்கிறோம். யார் இணைகிறார்களோ, இல்லையோ, விடுதலைச் சிறுத்தைகள் இணைந்து நிற்கும். 2024-ம் ஆண்டு, பொதுத் தேர்தலில், அகில இந்திய அளவிலே, இதற்கான முன் முயற்சிகளை இடதுசாரிகள் போன்ற இயக்கங்கள் முன்னெடுக்குமேயானால் விடுதலைச் சிறுத்தைகள் அதற்குத் தயாராக இருக்கிறது.

2024-ஆம் ஆண்டில், மோடி, மீண்டும், ஆட்சிக்கு வரக் கூடாது. மோடி ஆட்சிக்கு வந்தால், என்ன நடக்கிறதோ, இல்லையோ இந்திய அரசியலமைப்புச் சட்டத்துக்கு ஆபத்தை ஏற்படுத்தி, சிதைத்து, இல்லாமல் செய்துவிடுவார்கள். பெரியாரை எதிரின்னு அவர்களால் சொல்ல முடியும். அது, தமிழ்நாட்டுக்குள் தான் அவர்களுக்கு அரசியல் பாதிப்பை ஏற்படுத்தும்.

அம்பேத்கரை நேரடியாக, அவர்கள் பகை என்று சொன்னால், இந்திய அளவில், 35 கோடி மக்களின் எதிர்ப்பை அவர்கள் சந்திக்க நேரும். பெரிய பாதிப்பை சந்திக்க நேரும். ஆகவே, அம்பேத்கரை வெளிப்படையாக எதிரி என்று சங்பரிவார்களால் சொல்ல முடியாது. எனவே இதை புரிந்து கொண்டு நாம் காவிப் பாசித்தை முறியடிக்க அணிதிரள வேண்டும்" இவ்வாறு பேசினார்.

பதிவு: July 25, 2022
'5% ஜிஎஸ்டி வரிவிதிப்புக்கு 20% விலையை அதிகரிப்பீர்களா?' - ஆவின் பொருட்கள் விலை உயர்வு குறித்து பாமக நிறுவனர் ராமதாஸ் கேள்வி!

உணவுப்பொருட்கள் மீதான ஜிஎஸ்டி வரிவிதிப்பால் ஆவின் பொருட்களின் விலை அதிகரிக்கப்பட்டுள்ள நிலையில், '5% ஜிஎஸ்டி வரி உயர்வுக்கு 20% விலையை உயர்த்துவதா?' என பாமக நிறுவனர் ராமதாஸ் கேள்வியெழுப்பியுள்ளார்.

இதுகுறித்து அவர் வெளியிட்டுள்ள செய்தியறிக்கையில்,

"தமிழ்நாட்டில் ஆவின் தயிர், நெய் ஆகியவற்றின் விலைகள் குறைந்தபட்சம் ரூ.5 முதல் ரூ.45 வரை விலை உயர்த்தப்பட்டிருக்கின்றன. பொருளாதார நெருக்கடி மிகுந்த தருணத்தில், ஏழை மக்களை பாதிக்கும் வகையிலான இந்த விலை உயர்வு நியாயமற்றது; ஏற்றுக் கொள்ள முடியாதது!

கடந்த மார்ச் மாதத்தில் தான் ஆவின் நெய், வெண்ணெய், தயிர், ஐஸ்கிரீம் ஆகியவற்றின் விலைகள் உயர்த்தப்பட்டன. அதன்பின் 4 மாதங்கள் கூட நிறைவடையாத நிலையில் மீண்டும் ஒரு விலை உயர்வை தமிழ்நாட்டு மக்களால் ஏற்றுக்கொள்ள முடியாது!

தயிருக்கு 5% ஜி.எஸ்.டி விதிக்கப்பட்டது தான் விலை உயர்வுக்கு காரணமாக கூறப்படுகிறது. 5% மட்டும் வரி விதிக்கப்பட்ட நிலையில், 20% விலையை உயர்த்துவதும், நெய் மீதான வரி உயர்த்தப்படாத நிலையில் அதன் விலையையும் அரசு உயர்த்துவதும் எந்த வகையில் நியாயம்?

குஜராத்தின் அமுல், கர்நாடகத்தின் நந்தினி போன்ற பால் பொதுத்துறை நிறுவனங்களுக்கு ஜி.எஸ்.டி வரி விலக்கு பெறப்பட்டுள்ள நிலையில், அதே போல் ஆவினுக்கும் பெற வேண்டுமே தவிர விலையை உயர்த்தக்கூடாது. விலை உயர்வை ஆவின் நிறுவனம் திரும்பப் பெற வேண்டும்" இவ்வாறு தெரிவித்துள்ளார்.

பதிவு: July 21, 2022
'பள்ளிகளில் அடையாளக் கயிறுகள் அணிந்து வரக்கூடாது' - சமூகப்பாதுகாப்புத்துறை பள்ளி மாணவர்களுக்கு கட்டுப்பாடுகள் விதிப்பு! என்ன என்ன கட்டுப்பாடுகள்?

பள்ளிக்கு அடையாளங்களுடன் கூடிய கயிறுகள் அணிந்துவரக்கூடாது, பிறந்தநாள் நிகழ்வுகளின்போதும் பள்ளிச் சீருடையில்தான் பள்ளிகளுக்கு வரவேண்டும் உள்ளிட்ட பல கட்டுப்பாடுகளை மாணவர்களுக்கு விதித்துள்ளது சமூகநலத்துறை!

அரசு சார்பில் மாணவர்களுக்காக வெளியிடப்பட்டுள்ள விதிமுறைகள் மற்றும் நன்னெறிப்பண்புகள்!

விதிமுறைகள் 

1. மாணவ மாணவியர்கள் தினமும் பள்ளி சீருடையை சுத்தமாக அணிய வேண்டும்.

2. தலையில் எண்ணெய் வைத்து தலைவார வேண்டும்.

3. கைகால் நகங்களை சுத்தமாக வெட்ட வேண்டும் மற்றும் தலை முடி சரியான முறையில் வெட்டப்பட வேண்டும்.

4. காலில் காலணி அணிய வேண்டும்.

5. மாணவர்கள் 'டக் இன்' செய்யும் போது சீருடை வெளியில் வராத வகையில் இருக்க வேண்டும்.

6. பெற்றோர் கையொப்பத்துடன் வகுப்பாசிரியரிடம் அனுமதி பெற்றுத்தான் விடுப்பு எடுக்க வேண்டும்.

7. பள்ளிக்கு செல்லும் போது அடையாள அட்டை அணிய வேண்டும்

8. பிறந்த நாள் என்றாலும் மாணவ மாணவியர்கள் பள்ளி சீருடையில் தான் பள்ளிக்கு வரவேண்டும்.

9. மாணவ மாணவியர்கள் பள்ளிக்கு இருசக்கர வாகனம், மொபைல் போன் போன்றவற்றை பள்ளிக்கு கொண்டு வர அனுமதி இல்லை.

10. வகுப்பறையில் பாடங்களை கவனமாக கவனிக்க வேண்டும்.

11. ஆசிரியர் பேச்சை மாணவர்கள் கேட்க வேண்டும்.

12. மாணவ மாணவியர்கள் சீருடையில் பள்ளிக்கு வரும்போது கூடுதலாக கலர் டிரஸ் எடுத்து வரக்கூடாது.

13. வகுப்பில் மாணவர்கள் ஒற்றுமையாக இருக்க வேண்டும்.

14. அடிக்கடி கை, கால்கள் கழுவ வேண்டும்.

15. மாணவர்கள் எங்கு சென்றாலும் வரிசையாக செல்லவும்.

16. மாணவ மாணவியர்கள் போதை பொருட்களை பயன்படுத்தக்கூடாது மற்றும் எந்தவொரு Tattoo போன்றவற்றுடன் பள்ளிக்கு வர அனுமதி இல்லை.

17. மாணவ மாணவியர்கள் பள்ளிக்கு செல்லும் போது அவர்களின் சீருடை சட்டையிலுள்ள பொத்தான்களை கழட்டக்கூடாது.

18. வகுப்பறையில் நோட்டு புத்தகங்களை கிழித்தெறியக் கூடாது.

19. மாணவர்கள் பள்ளிக்கு செல்லும்போது காப்பு, கம்பல், செயின், கயிறு போன்ற ஆபரணங்கள் ஏதும் அணிய கூடாது.

20. மாணவ மாணவியர்கள் P.T. வகுப்பின்போது பள்ளி வளாகத்துள்ளேயே விளையாட வேண்டும். வெளியே செல்லுதல் கூடாது.

21. ஆசிரியர்கள் பாடம் நடத்தும் பொது மாணவ மாணவியர்கள் வகுப்பறையை விட்டு வெளியில் செல்லக்கூடாது.

நன்னெறிப்பண்புகள்

* மாணவ மானவியர்களிடம் கீழ்குறிப்பிட்டுள்ள பள்ளி நல்லொழுக்கக் கதைகள் எடுத்துரைத்தல்,

     1. நீதிநெறி கதைகள்

     2. தெனாலிராமன் கதைகள்

     3. காப்பிய கதைகள்

     4. நாட்டுப்பற்றை ஊட்டும் சுதந்திர போராட்ட வீரர்களின் கதைகள்

* சுத்தம் கல்வி தரும்

* மாணவ மாணவியர்களிடையே அமைதி கலாச்சாரத்தை ஊக்குவித்தல்.

* மதிப்புகளை வளர்த்தல், அணுகுமுறைகளையும் உத்திகளையும் மாணவ மாணவியர்களிடையே ஊக்குவித்தல்

* பள்ளி ஆசிரியர்கள் மற்றும் மாணவர்களுடனான உறவுமுறைகளை மேம்படுத்துதல்.

* மாணவ மாணவியர்களிடையே சுற்றுச்சூழல் குறித்து விழிப்புணர்வு ஏற்படுத்துதல்.

* மாணவு மாணவியர்களின் குடும்ப உறவுமுறைகளின் முக்கியத்துவம் குறித்த விழிப்புணர்வு ஏற்படுத்துதல்.

பதிவு: July 14, 2022

மேலும் செய்திகள்

கொரோனா வைரஸ் அப்டேட்ஸ்