ஷேன் வார்னேவின் உடல் அரசு மரியாதையுடன் நல்லடக்கம் செய்யப்படும் – ஆஸ்திரேலிய பிரதமர் ஸ்காட் மோரிசன் அறிவிப்பு!

மாரடைப்பால் காலமான ஆஸ்திரேலிய கிரிக்கெட் வீரர் ஷேன் வார்னேவின் உடல் அரசு மரியாதையுடன் அடக்கம் செய்யப்படும் என ஆஸ்திரேலிய நாட்டுப் பிரதமர் ஸ்காட் மோரிசன் அறிவித்துள்ளார்.

சுழற்பந்துவீச்சில் ஜாம்பவான் எனப் போற்றப்படுபவர் பிரபல ஆஸ்திரேலிய கிரிக்கெட் வீரரான ஷேன் வார்னே. பேட்ஸ்மேனின் கவனத்தை நொடிப்பொழுதில் பதம்பார்த்து விக்கெட்டை வீழ்த்தும் இவரது அபார பந்துவீச்சால் உலக அளவில் மிகவும் புகழ்பெற்றவர். தனது சுழற்பந்து திறனால் பல்வேறு வெற்றிகளை ஆஸ்திரேலியாவுக்குப் பெற்றுத் தந்த வார்னே, உலகம் முழுக்க பல்வேறு ரசிகர்களைப் பெற்றுள்ளார்.

இந்நிலையில் தான், விடுமுறைக்காக தாய்லாந்து சென்றிருந்த வார்னே, திடீரென ஏற்பட்ட மாரடைப்பு காரணமாக மரணமடைந்துள்ளார். அவருக்கு வயது 52. தூக்கத்தில் பேச்சு மூச்சற்றுக்கிடந்த அவரை பரிசோதித்த மருத்துவர்கள் அவர் மரணமடைந்ததாக உறுதித் தகவல் அளித்துள்ளனர். இச்செய்தி, உலகெங்கிலுமுள்ள அவரது கிரிக்கெட் ரசிகர்கள் பலரையும் கலங்கடித்துள்ளது. அவரது மறைவுக்கு கிரிக்கெட் பிரபலங்கள் உள்ளிட்ட பலரும் இரங்கல் தெரிவித்து வருகின்றனர்.

இதைத் தொடர்ந்து, ஷேன் வார்னேவின் உடல் அரசு மரியாதையுன் நல்லடக்கம் செய்யப்படும் என ஆஸ்திரேலிய பிரதமர் ஸ்காட் மோரிசன் தெரிவித்துள்ளார்.

ஷேன் வார்னே மரணிப்பதற்கு சிலமணிநேரங்கள் முன்பு காலமான ஆஸ்திரேலிய கிரிக்கெட் வீரரான ராட் மார்ஷ்-க்கு இரங்கல் தெரிவித்த அவரது ட்விட்டர் பதிவு இணையத்தில் வைரலாகி காண்போரை கலங்கடித்துவருகிறது.

அப்பதிவில் அவர், “ராட் மார்ஷ் காலமானார் என்ற செய்தி கேட்டு மிகவும் வருத்தமடைந்தேன். அவர் ஓர் சிறந்த விளையாட்டு வீரராக மட்டுமல்லாது, பல இளைஞர்களுக்கு உத்வேகமாகவும் இருந்தவர். ராட் கிரிக்கெட்டை மிகவும் விரும்புபவர். எனது அன்புகளை அவருக்கும், அவரது குடும்பத்தாருக்கும் உரித்தாக்குகிறேன். ஆழ்ந்த இரங்கல்” என்று பதிவிட்டிருந்தார்.

தனது மரணத்திற்கு சுமார் 12 மணிநேரத்திற்கு முன் இப்பதிவை இடும்போது இருந்த அவர், 12 மணிநேரத்திற்குப்பின் உயிரோடு இல்லாதிருப்பதை எண்ணி அவரது ரசிகர்கள் கண்ணீர் வடித்துவருகின்றனர்.

பதிவு: March 05, 2022
ஐபிஎல் 2022 கிரிக்கெட் போட்டி! அகமதாபாத், லக்னோ அணிகளுக்காக தேர்ந்தெடுக்கப்பட்டுள்ள வீரர்கள் பட்டியல் வெளியீடு!

ஐபிஎல் 2022 கிரிக்கெட் போட்டியில் புதிதாக இணைந்துள்ள அகமதாபாத் மற்றும் லக்னோ அணிகளுக்கான வீரர்கள் பட்டியலை ஐபிஎல் நிர்வாகம் இன்று அதிகாரப்பூர்வமாக வெளியிட்டது.

இவ்வருடம் நடைபெறவிருக்கும் ஐபிஎல் கிரிக்கெட் போட்டியில் வழக்கமான 8 அணிகளுடன் சேர்த்து புதிதாக லக்னோ மற்றும் அகமதாபாத் அணிகள் பங்கேற்று விளையாடுகின்றன.

ஐபிஎல்லின் பிற 8 அணிகளுக்கான தக்கவைப்பு வீரர்கள் பட்டியல் முன்பே அறிவிக்கப்பட்டுவிட்டதை அடுத்து, வரும் பிப்ரவரி 12 மற்றும் 13 ஆகிய தேதிகளில் பெங்களூரில் ஏனைய விளையாட்டு வீரர்களைத் தேர்வு செய்யும் ஏலம் நடைபெறவிருக்கிறது.

இதையடுத்து, புதிதாக இணைந்துள்ள லக்னோ மற்றும் அகமதாபாத் அணிகளுக்காக ஒப்பந்தம் செய்யப்பட்ட முதல் மூன்று வீரர்கள் குறித்த தகவலை ஐபிஎல் நிர்வாகம் அதிகாரப்பூர்வமாக வெளியிட்டுள்ளது.

அதன்படி, லக்னோ அணியின் கேப்டனாக கே.எல். ராகுல் ரூ.17 கோடிக்கு ஒப்பந்தம் செய்யப்பட்டுள்ளார். இதன் மூலம் கே.எல் ராகுல், ஐபிஎல் வரலாற்றில் அதிக தொகைக்கு எடுக்கப்பட்ட விளையாட்டு வீரர் என்ற பெயரைப் பெறுகிறார். கடந்த ஆண்டு நடைபெற்ற சீசனில் பஞ்சாப் அணியை கே.எல்.ராகுல் வழிநடத்தனார்.

மேலும், இவருடன் ஆஸ்திரேலிய அணியைச் சேர்ந்த ஆல் ரவுண்டர் மார்கஸ் ஸ்டோய்னிஸ் ரூ.9.2 கோடிக்கும், இந்தியாவின் லெக் ஸ்பின்னர் ரவி பிஷ்னோய் ரூ.4 கோடிக்கும் ஒப்பந்தம் செய்யப்பட்டுள்ளனர்.

இதைத் தொடர்ந்து, அகமதாபாத் அணியின் கேப்டனாக ஹர்திக் பாண்டியா ரூ.15 கோடிக்கு ஒப்பந்தம் செய்யப்பட்டுள்ளார். மேலும், கடந்த சீசனில் கொல்கத்தா அணிக்கு ஓப்பனிங் செய்த சுப்மன் கில் ரூ.8 கோடிக்கும், ஸ்பின்னர் ரஷீத் கான் ரூ.15 கோடிக்கும் அகமதாபாத் அணிக்காக ஒப்பந்தம் செய்யப்பட்டுள்ளனர்.

பதிவு: January 22, 2022
செஞ்சூரியன் டெஸ்ட்!- சொந்த மண்ணில் தென் ஆப்பிரிக்காவை வீழ்த்தி `கெத்து' காட்டியது இந்திய படை!

செஞ்சூரியனில் நடந்த தென் ஆப்பிரிக்கா அணிக்கு எதிரான முதல் டெஸ்ட் போட்டியில் இந்திய அணி 113 ரன்கள் வித்தியாசத்தில் வெற்றி பெற்று கெத்து காட்டியது.

தென் ஆப்பிரிக்காவில் சுற்றுப்பயணம் மேற்கொண்டுள்ள இந்திய கிரிக்கெட் அணி 3 போட்டிகள் கொண்ட டெஸ்ட் தொடரில் விளையாடுகிறது. இதில் முதலாவது டெஸ்ட் போட்டி செஞ்சூரியனில் நடைபெற்றது. இப்போட்டியில் டாஸ் வென்ற இந்திய அணி முதலில் பேட்டிங்கை தேர்வு செய்தது. முதல் இன்னிங்சை தொடங்கிய இந்திய அணி 105.3 ஓவர்களில் அனைத்து விக்கெட்டுகளையும் இழந்து 327 ரன்களை குவித்தது.

இதையடுத்து, முதல் இன்னிங்சை துவங்கிய தென் ஆப்பிரிக்க அணி இந்திய அணியின் பந்து வீச்சை எதிர்கொள்ள முடியாமல் 62.3 ஓவர்களில் 197 ரன்களுக்கு ஆல் அவுட் ஆனது. இதன் மூலம் 130 ரன்கள் முன்னிலையுடன் இந்திய அணி தனது இரண்டாவது இன்னிங்சை தொடங்கியது. ஆனால், தென் ஆப்பிரிக்க அணியின் பந்து வீச்சை சமாளிக்க முடியாமல் இந்திய வீரர்கள் அடுத்தடுத்து ஆட்டமிழந்து வெளியேறினர். இறுதியில் இந்திய அணி தனது இரண்டாவது இன்னிங்சில் 62.3 ஓவரில் அனைத்து விக்கெட்டுகளையும் இழந்து 197 ரன்கள் மட்டுமே எடுத்தது. இதனால், தென் ஆப்பிரிகாவை விட 304 ரன்கள் முன்னிலையில் உள்ளது.

இதையடுத்து, 305 ரன்கள் எடுத்தால் வெற்றி என்ற இலக்குடன் தென் ஆப்பிரிக்கா தனது இரண்டாவது இன்னிங்சை தொடங்கி விளையாடி வந்தது. இந்நிலையில், நேற்றைய 4-ம் நாள் ஆட்ட நேர முடிவில் தென் ஆப்பிரிக்க அணி 4 விக்கெட் இழப்பிற்கு 94 ரன்கள் எடுத்து இருந்தது. அந்த அணியின் கேப்டன் எல்கர் 52 ரன்களுடன் களத்தில் இருந்தார்.

இந்நிலையில் 5-வது மற்றும் கடைசி நாள் ஆட்டம் இன்று பகல் 1.30 மணிக்கு தொடங்கியது. வெற்றிபெற மேலும் 211 ரன்கள் தேவை என்ற நிலையில் அந்த அணி இன்று களமிறங்கியது. அந்த அணியின் கேப்டன் டீன் எல்கர் நிதானமாக விளையாடி ரன்களை குவித்தார். அவருடன் ஜோடி சேர்ந்து விளையாடிய பவுமா இந்திய பந்து வீச்சாளர்களுக்கு கடும் சவால் அளித்தார். சிறப்பாக விளையாடிய டீன் எல்கர் 77 ரன்கள் எடுத்திருந்த போது பும்ரா பந்துவீச்சில் ஆட்டமிழந்தார்.

இதன் பிறகு களமிறங்கிய டி காக் 21 ரன்களில் சிராஜ் பந்துவீச்சில் ஆட்டமிழந்தார். பின்னர் வந்த முல்டர் 1 ரன்களில் நடையை கட்ட தென் ஆப்பிரிக்கா அணி 7 விக்கெட்களை இழந்தது. உணவு இடைவேளை வரை தென் ஆப்பிரிக்கா அணி 7 விக்கெட் இழப்பிற்கு 182 ரன்கள் எடுத்து இருந்தது. அந்த அணியின் பவுமா 34 ரன்களுடனும் யான்சென் 5 ரன்களுடனும் களத்தில் இருந்தனர்.

உணவு இடைவேளைக்கு பிறகு முகமது சமி பந்துவீச்சில் யான்சென் 13 ரன்களில் வெளியேறினார். பின்னர் வந்த ரபாடா , இங்கிடி அடுத்தடுத்து அஸ்வின் பந்துவீச்சில் ரன் எடுக்காமல் அவுட்டாகினர். இதனால் இந்திய அணி 113 ரன்கள் வித்தியாசத்தில் வெற்றி பெற்றது . அதோடு 3 போட்டிகள் கொண்ட டெஸ்ட் தொடரில் இந்திய அணி 1-0 என்ற கணக்கில் முன்னிலை வகிக்கிறது. சொந்த மண்ணில் தென் ஆப்பிரிக்க அணியை இந்திய அணி வீழ்த்தி கெத்து காட்டியது.

பதிவு: December 30, 2021
இங்கிலாந்து மோசமான தோல்வி!- ஆஷஸ் டெஸ்ட் தொடரை கைப்பற்றியது ஆஸ்திரேலியா

மெல்போனில் நடந்த 3வது டெஸ்டில் இங்கிலாந்து அணி 2வது இன்னிங்சில் 68 ரன்களுக்கு சுருண்டது. இதனால் ஆஸ்திரேலியா அணி ஒரு இன்னிங்ஸ் மற்றும் 14 ரன்கள் வித்தியாசத்தில் வெற்றி பெற்று ஆஷஸ் டெஸ்ட் தொடரை 3-0 என்ற கணக்கில் கைப்பற்றியது.

ஆஸ்திரேலியாவில் சுற்றுப்பயணம் மேற்கொண்டுள்ள ஜோ ரூட் தலைமையிலான இங்கிலாந்து கிரிக்கெட் அணி 5 போட்டிகள் கொண்ட ஆஷஸ் டெஸ்ட் தொடரில் விளையாடுகிறது. இந்த நிலையில் மெல்போர்னில் நடந்த 3வது டெஸ்ட் போட்டியில் டாஸ் வென்ற ஆஸ்திரேலியா முதலில் பந்துவீச, இங்கிலாந்து முதல் இன்னிங்சில் 185 ரன்னுக்கு சுருண்டது. இதையடுத்து, முதல் இன்னிங்சை தொடங்கிய ஆஸ்திரேலியா 267 ரன்னுக்கு ஆல் அவுட்டானது. ஸ்டார்க் 24 ரன்னுடன் ஆட்டமிழக்காமல் இருந்தார்.

இங்கிலாந்து பந்துவீச்சில் ஆண்டர்சன் 4, ராபின்சன், வுட் தலா 2, ஸ்டோக்ஸ், லீச் தலா 1 விக்கெட் வீழ்த்தினர். இதைத் தொடர்ந்து, 82 ரன் பின்தங்கிய நிலையில் 2வது இன்னிங்சை தொடங்கிய இங்கிலாந்து 2ம் நாள் முடிவில் 4 விக்கெட் இழப்புக்கு 31 ரன் எடுத்தது. மூன்றாம் நாள் ஆட்டம் இன்று நடைபெற்றது. இன்றும் இங்கிலாந்தின் விக்கெட்டுகள் சீட்டுக்கட்டு போல் மளமளவென சரிந்தன. இறுதியில், இங்கிலாந்து இரண்டாவது இன்னிங்சில் 68 ரன்னுக்கு சுருண்டது. ஜோ ரூட், பென் ஸ்டோக்ஸ் மட்டுமே இரட்டை இலக்கை தொட்டனர், மற்றவர்கள் ஒற்றை இலக்கில் அவுட்டாகினர்.

இதன்மூலம் ஆஸ்திரேலியா ஒரு இன்னிங்ஸ் மற்றும் 14 ரன்கள் வித்தியாசத்தில் அபார வெற்றி பெற்றதுடன், ஏற்கெனவே 2 டெஸ்ட் போட்டிகளில் வென்றிருந்ததால் ஆஷஸ் தொடரில் 3-0 என கைப்பற்றியது. ஆஸ்திரேலியா சார்பில் ஸ்காட் போலண்ட் 4 ஓவர் வீசி வெறும் 7 ரன்கள் கொடுத்து 6 விக்கெட் வீழ்த்தியதுடன் ஆட்ட நாயகன் விருது பெற்றார். மிட்செல் ஸ்டார்க் 3 விக்கெட்டு வீழ்த்தினார்.

பதிவு: December 28, 2021
பிரிஸ்பேன் டெஸ்ட்டில் வீழ்ந்தது இங்கிலாந்து!- ஆஷஸ் போட்டியை வெற்றியுடன் தொடங்கியது ஆஸ்திரேலியா

பிரின்ஸ்பேன் மைதானத்தில் நடந்த ஆஷஸ் போட்டித் தொடரின் முதல் டெஸ்ட் போட்டியில் இங்கிலாந்து அணி 9 விக்கெட் வித்தியாசத்தில் ஆஸ்திரேலியா வெற்றி பெற்றது.

ஆஸ்திரேலியா - இங்கிலாந்து அணிகள் இடையிலான 5 போட்டிகள் கொண்ட ஆஷஸ் தொடரின் முதலாவது டெஸ்ட் கிரிக்கெட் போட்டி பிரிஸ்பேனில் நேற்று முன்தினம் தொடங்கியது. டாஸ் வென்று முதலில் பேட் செய்த இங்கிலாந்து 50.1 ஓவர்களில் 147 ரன்னில் சுருண்டது. ஆஸ்திரேலிய வேகப்பந்து வீச்சாளர் கம்மின்ஸ் 5 விக்கெட்டுகளை சாய்த்தார். அதன் பிறகு மழை பெய்ததால் முதல் நாள் ஆட்டம் அத்துடன் முடிவுக்கு வந்தது.


பின்னர் ஆஸ்திரேலிய அணி தனது முதல் இன்னிங்ஸ்சில் 104.3 ஓவர்களில் 425 ரன்கள் எடுத்து அனைத்து விக்கெட்டுகளையும் இழந்தது. இங்கிலாந்து தரப்பில் மார்க் உட் அதிகபட்சமாக 3 விக்கெட்டுகளை கைப்பற்றினார். இதன் பிறகு இரண்டாவது இன்னிங்சை ஆட தொடங்கிய இங்கிலாந்து அணியின் தொடக்க வீரர்களாக களமிறங்கிய ஹமீத் 27 ரன்களிலும் ரோரி பர்ன்ஸ் 13 ரன்களிலும் ஆட்டமிழந்தனர். இதன் பிறகு ஜோடி சேர்ந்த டேவிட் மலன் மற்றும் ஜோ ரூட் சிறப்பாக விளையாடி ரன்களை குவித்தனர்.

டேவிட் மலன் 82 ரன்களும், கேப்டன் ரூட் 89 ரன்களும் எடுத்து அணிக்கு நம்பிக்கை அளித்த நிலையில், மற்ற பேட்ஸ்மேன்கள் ஆஸ்திரேலிய பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்தனர். இறுதியில் இங்கிலாந்து அணி 103 ஓவர்களில் 297 ரன்களுக்கு அனைத்து விக்கெட்டுகளையும் இழந்தது. அப்போது இங்கிலாந்து அணி 19 ரன்கள் முன்னிலையில் இருந்தது. ஆஸ்திரேலிய தரப்பில் நாதன் லயன் அதிகபட்சமாக 4 விக்கெட்டுகளை கைப்பற்றினார்.

இதையடுத்து 20 ரன்கள் எடுத்தால் வெற்றி என்ற எளிய இலக்குடன் களமிறங்கிய ஆஸ்திரேலிய அணி 5.1 ஓவர்களில் ஒரு விக்கெட் மட்டும் இழந்து வெற்றி இலக்கை எட்டியது. தொடக்க வீரர் மார்கஸ் ஹாரிஸ் 7 ரன்னுடனும், மார்னஸ் லபுஷேன் ரன் ஏதும் எதுக்காமலும் களத்தில் இருந்தனர்.

இந்த வெற்றியின் மூலம் ஆஸ்திரேலிய அணி 5 போட்டிகள் கொண்ட ஆஷஸ் தொடரில் 1-0 என்ற கணக்கில் முன்னிலையில் உள்ளது. இரண்டாவது டெஸ்ட் போட்டி வரும் 16-ம் தேதி அடிலெய்டு ஓவல் மைதானத்தில் நடைபெற உள்ளது.

பதிவு: December 11, 2021
அச்சுறுத்தும் ஒமிக்ரான் வைரஸ்!- இந்தியா- தென் ஆப்பிரிக்கா கிரிக்கெட் போட்டி தள்ளிவைப்பு

 

ஒமிக்ரான் வைரஸ் அச்சுறுத்தல் காரணமாக இந்தியா- தென் ஆப்பிரிக்கா இடையே நடைபெற இருந்த கிரிக்கெட் போட்டிகள் ஒத்திவைக்கப்பட்டுள்ளன.

தற்போது நியூசிலாந்து அணியுடன் டெஸ்ட் போட்டிகள் விளையாடி வரும் இந்திய அணி வரும் 17-ம் தேதி தென் ஆப்பிரிக்காவில் சுற்று பயணம் மேற்கொண்டு 3 டெஸ்ட் போட்டிகள், 3 ஒரு நாள் போட்டிகள் மற்றும் டி20 போட்டிகள் விளையாட இருந்தது.

இந்த நிலையில் ஒமிக்ரான் வைரஸ் தொற்று காரணமாக தென் ஆப்பிரிக்காவுக்கு இடையேயான கிரிக்கெட் போட்டி தொடர் ஒத்திவைக்கப்படுவதாக பிசிசிஐ தரப்பில் அதிகாரபூர்வமாக அறிவிக்கப்பட்டுள்ளது. தென் ஆப்பிரிக்காவிற்கு எதிரான தொடர் ஒத்திவைக்கப்பட்ட நிலையில் மீண்டும் போட்டிகள் எப்போது நடைபெறும் என பின்னர் அறிவிக்கப்படுவதாக பிசிசிஐ செயலாளர் ஜெய் ஷா தெரிவித்துள்ளார்.

பதிவு: December 04, 2021
நியூசிலாந்து அணிக்கு எதிரான 2வது டெஸ்ட்!- இஷாந்த் சர்மா, ரவீந்திர ஜடேஜா, ரஹானே நீக்கம்

நியூசிலாந்து அணிக்கு எதிரான இரண்டாவது டெஸ்ட் போட்டியில் காயம் காரணமாக இஷாந்த் சர்மா, ரவீந்திர ஜடேஜா, ரஹானே ஆகியோர் நீக்கப்பட்டுள்ளதாக பிசிசிஐ செயலாளர் ஜெய் ஷா தெரிவித்துள்ளார்.

வேகப்பந்துவீச்சாளர் இஷாந்த் சர்மா கான்பூரில் நடந்த முதல் டெஸ்ட் போட்டியின் கடைசி நாளில் இடது சுண்டு விரலில் காயம் ஏற்பட்டு தற்போது சிகிச்சை பெற்று வருகிறார். அவரது காயத்தின் தன்மை குறித்து பிசிசிஐ மருத்துவக் குழு தொடர்ந்து கண்காணித்து வருவதாக தெரிவிக்கப்பட்டுள்ளது.

ஆல்ரவுண்டர் ரவீந்திர ஜடேஜா கான்பூரில் நடந்த முதல் டெஸ்ட் போட்டியின் போது முழங்கையில் காயம் ஏற்பட்டது. ஸ்கேன் பரிசோதனைக்கு பின், அவரது முன்கையில் வீக்கம் இருப்பது தெரியவந்தது. இதனால் அவருக்கு ஓய்வளிக்க அறிவுறுத்தப்பட்டுள்ளார்.

கான்பூரில் நடந்த முதல் டெஸ்ட் போட்டியின் இறுதி நாளில் பீல்டிங் செய்யும்போது ரஹானேவுக்கு சிறிய தொடை தசைப்பிடிப்பு ஏற்பட்டது. ரஹானே முழுமையாக குணமடையாததால், மும்பையில் நடக்கும் 2வது டெஸ்டில் இருந்து விலகியுள்ளார். ரஹானே உடல்நிலை முன்னேற்றத்தை பிசிசிஐ மருத்துவக் குழு கண்காணித்து வருவதாக செயலாளர் ஜெய் ஷா தெரிவித்துள்ளார்.

பதிவு: December 03, 2021
ஆஸ்திரேலியா வரலாற்றில் இதுவே முதன் முறை!- பந்துவீச்சாளர் டெஸ்ட் கேப்டனாக நியமனம்

ஆஸ்திரேலிய டெஸ்ட் கிரிக்கெட் அணியின் கேப்டனாக பேட் கம்மின்ஸ் நியமனம் செய்யப்பட்டுள்ளார். ஸ்டீவ் ஸ்மித்தை துணை கேப்டனாக நியமித்து ஆஸ்திரேலிய கிரிக்கெட் வாரியம் உத்தரவிட்டுள்ளது.

தென் ஆப்பிரிக்காவில் சுற்றுப்பயணம் செய்து ஆஸ்திரேலிய கிரிக்கெட் அணி விளையாடியபோது பந்தை சேதப்படுத்தியதாக எழுந்த குற்றச்சாட்டை அடுத்து அப்போதைய டெஸ்ட் கேப்டன் ஸ்மித் பதவி விலகினார். புதிய டெஸ்ட் கேப்டனாக, டிம் பெய்ன் கடந்த 2018ம் ஆண்டு நியமிக்கப்பட்டார்.

இந்நிலையில், பெண் ஊழியர் ஒருவருக்கு ஆபாச மெசேஜ் அனுப்பிய புகார் பரபரப்பை கிளப்பியது. இந்த விவகாரம் வெளியில் வந்ததை அடுத்து, கடந்த சில நாட்களுக்கு முன் தனது கேப்டன் பொறுப்பில் இருந்து விலகினார் டிம் பெய்ன். இதையடுத்து புதிய கேப்டனாக யார் நியமிக்கப்படுவார்கள் என்ற எதிர்பார்ப்பு எழுந்தது. முன்னாள் கிரிக்கெட் வீரர்கள் பலருடைய பெயரை சிபாரிசு செய்துவந்தனர்.

வேகப்பந்து வீச்சாளர் பேட் கம்மின்ஸ், முன்னாள் கேப்டன் ஸ்மித் ஆகியோர் பெயர்கள் பரிசீலனையில் இருந்தன. இந்நிலையில் பேட் கம்மின்ஸ் புதிய டெஸ்ட் கேப்டனாக நியமிக்கப்பட்டுள்ளார். இவர் ஆஸ்திரேலிய டெஸ்ட் அணியின் 47வது கேப்டன் ஆவார். ஸ்டீவ் ஸ்மித், துணைக் கேப்டனாக நியமிக்கப்பட்டுள்ளார். இதை ஆஸ்திரேலிய கிரிக்கெட் வாரியம் தெரிவித்துள்ளது.

ஆஸ்திரேலியா-இங்கிலாந்து அணிகள் மோதும் 5 போட்டிகள் கொண்ட ஆஷஸ் கிரிக்கெட் தொடர் அடுத்த மாதம் 8ம் தேதி பிரிஸ்பேனில் தொடங்குகிறது. பரபரப்பான இந்த தொடரில் பங்கேற்பதற்காக, இங்கிலாந்து அணி, ஆஸ்திரேலியா சென்றுள்ளது. இந்நிலையில் பேட் கம்மின்ஸ் புதிய டெஸ்ட் கேப்டனாக நியமிக்கப்பட்டுள்ளார். வேகப்பந்து வீச்சாளர் ஒருவர், ஆஸ்திரேலிய டெஸ்ட் கேப்டனாக நியமிக்கப்படுவது இதுவே முதன்முறை. ‘பெரிய ஆஷஸ் தொடருக்கு முன் ஆஸ்திரேலிய டெஸ்ட் அணியின் கேப்டனாக பொறுப்பேற்பதில் பெருமை கொள்கிறேன்’ என்று கம்மின்ஸ் தெரிவித்துள்ளார்.

பதிவு: November 26, 2021
கம்பீரை மிரட்டும் ஐஎஸ் தீவிரவாதிகள்!- வீட்டிற்கு போலீஸ் பாதுகாப்பு அதிகரிப்பு

ஐஎஸ் தீவிரவாதிகள் கொலை மிரட்டல் விடுத்ததாக அளித்த புகாரை அடுத்து கவுதம் கம்பீர் எம்.பி வீட்டுக்கு போலீஸ் பாதுகாப்பு அதிகரிக்கப்பட்டுள்ளது.

இந்திய கிரிக்கெட் அணியின் முன்னாள் தொடக்க ஆட்டக்காரர் கவுதம் கம்பீர். சர்வதேச கிரிக்கெட்டில் இருந்து ஓய்வு பெற்ற பிறகு, அரசியலில் களமிறங்கினார். பாஜக சார்பில் கடந்த நாடாளுமன்றத் தேர்தலில் போட்டியிட்ட அவர், கிழக்கு டெல்லி தொகுதியில் இருந்து மக்களவை உறுப்பினராக தேர்ந்தெடுக்கப்பட்டுள்ளார். இப்போது டிவி நிகழ்ச்சிகளில் கிரிக்கெட் தொடர்பான கருத்துகளை தெரிவித்து வருகிறார்.


இந்நிலையில் தனக்கும் தன் குடும்பத்தினருக்கும் ’ஐஎஸ்ஐஎஸ் காஷ்மீர்’ பயங்கரவாதிகள் கொலை மிரட்டல் விடுத்திருப்பதாக டெல்லி போலீசில் நேற்றிரவு புகார் செய்துள்ளார். கவுதம் கம்பீர் சார்பில் கொடுக்கப்பட்டுள்ள புகாரில், கம்பீருக்கும் அவர் குடும்பத்தினருக்கும் கொலை மிரட்டல் விடுத்து ஐஎஸ் காஷ்மீர் என்ற பெயரில் இமெயில் வந்துள்ளது என்று தெரிவிக்கப்பட்டுள்ளது.

இதையடுத்து அவர் வீட்டுக்கு பாதுகாப்பு பலப்படுத்தப்பட்டுள்ளது. இதை மத்திய டெல்லி இணை போலீஸ் கண்காணிப்பாளர் ஸ்வேதா சவுகான் தெரிவித்தார்.

பதிவு: November 24, 2021
இந்திய கிரிக்கெட் வீரர்கள் பன்றி, மாட்டிறைச்சி சாப்பிட தடையா?- பிசிசிஐ சொல்வது என்ன?

இந்திய கிரிக்கெட் அணி வீரர்கள் பன்னி, மாட்டிறைச்சியை சாப்பிடக்கூடாது என்று தகவல் பரவியலை அடுத்து பிசிசிஐ விளக்கம் அளித்துள்ளது.

இந்தியா- நியூசிலாந்து அணிகளுக்கு இடையே நாளை கான்பூரில் முதல் டெஸ்ட் போட்டி தொடங்க உள்ளது. இந்த போட்டியில் பங்கேற்கும் இந்திய அணி வீரர்களுக்கான உணவுப் பட்டியலை இந்திய கிரிக்கெட் அணி நிர்வாகம் வெளியிட்டுள்ளது. அதன்படி, மாட்டிறைச்சி மற்றும் பன்றிக் கறி உணவு வகைகளை எந்த உணவு வடிவிலும் உட்கொள்ள கூடாது என்று தெரிவிக்கப்பட்டுள்ளது. அசைவ உணவுகளில் ஹலால் உணவுகளை மட்டுமே சேர்த்துக் கொள்ளலாம் என்று கூறப்பட்டுள்ளது.

ஆனால், மறுபுறம் எதிரணியான நியூசிலாந்து அணி நிர்வாகம், தங்களது உணவுப் பட்டியலில் மாட்டிறைச்சி மற்றும் பன்றிக் கறி கட்டாயம் வேண்டும் என்று குறிப்பிட்டுள்ளது.

தற்போது அறிவிக்கப்பட்டுள்ள உணவுப் பட்டியலின் படி, கோழி இறைச்சியும் ஆட்டு இறைச்சியும் மட்டுமே அசைவ உணவுகளாக உள்ளன. பிசிசிஐயின் இந்த முடிவுக்கு பல்வேறு தரப்புகளில் இருந்தும் கடும் எதிர்ப்பு கிளம்பியது.

இதையடுத்து, உணவு குறித்து பிசிசிஐ பொருளாளர் அருண் துமல் விளக்கம் அளித்துள்ளார். "இது தவறான செய்தி. எந்த உணவை சாப்பிட வேண்டும், எந்த உணவை சாப்பிடக்கூடாது என்பது குறித்து வீரர்களுக்கு கட்டுப்பாடு விதிக்கப்படவில்லை" என்று கூறியுள்ளார்.

பதிவு: November 24, 2021
`அந்த பெண்ணுக்கு காயத்தை ஏற்படுத்திவிட்டேன்!'‍- பாலியல் புகாரால் கேப்டன் பதவியை துறந்த டிம் பெய்ன்

"நான் அனுப்பிய அந்த தனிப்பட்ட குறுஞ்செய்தி பொதுவெளியில் பகிரப்பட இருப்பதாக சமீபத்தில் அறிந்தேன். என் மனைவி, குடும்பம் மற்றும் அந்தப் பெண்ணுக்கு நான் காயத்தை ஏற்படுத்தியதற்காக வருந்துகிறேன்" என்று ஆஸ்திரேலியா டெஸ்ட் அணி கேப்டன் பதவியில் ராஜினாமா செய்த டிம் பெய்ன் கூறியுள்ளார்.

தென் ஆப்பிரிக்காவில் சுற்றுப்பயணம் செய்து ஆஸ்திரேலிய கிரிக்கெட் அணி விளையாடியபோது பந்தை சேதப்படுத்தியதாக எழுந்த குற்றச்சாட்டை அடுத்து அப்போதைய டெஸ்ட் கேப்டன் ஸ்மித் பதவி விலகினார். இதனால் புதிய டெஸ்ட் கேப்டனாக, டிம் பெய்ன் கடந்த 2018 ஆம் ஆண்டு நியமிக்கப்பட்டார். பெய்ன், கேப்டனாக நியமிக்கப்பட்ட போதே, பெண் ஒருவர் பாலியல் புகார் அளித்தார். தனக்கு பாலியல் தொடர்பான, குறுஞ்செய்திகளை அனுப்பியதாகக் கூறியிருந்தார். இந்நிலையில், டிம் பெய்ன் தனது பதவியை இப்போது ராஜினாமா செய்துள்ளார்.

"இது கடினமான முடிவுதான். ஆனால் எனக்கும் என் குடும்பத்துக்கும், கிரிக்கெட்டுக்கும் இது சரியான முடிவு. நான்கு வருடங்களுக்கு முன், அப்போதைய சக பெண் ஊழியருக்கு குறுஞ்செய்தி அனுப்பினேன். அது தனிப்பட்ட பரிமாற்றம். விசாரணைக்கு வந்தது. அதில் வெளிப்படையாக பங்கேற்றேன். ஆனால், அப்போது கிரிக்கெட் ஆஸ்திரேலியாவின் நடத்தை விதிகள் மீறப்படவில்லை என்று தெரியவந்தது. இந்த சம்பவத்துக்கு ஆழ்ந்த வருத்தம் தெரிவித்தேன். இப்போதும் தெரிவிக்கிறேன். என் மனைவி, குடும்பம் மற்றும் அந்தப் பெண்ணுக்கு நான் காயத்தை ஏற்படுத்தியதற்காக வருந்துகிறேன்.

நான் அனுப்பிய அந்த தனிப்பட்ட குறுஞ்செய்தி பொதுவெளியில் பகிரப்பட இருப்பதாக சமீபத்தில் அறிந்தேன். இதனால், கேப்டன் பதவியில் இருந்து உடனடியாக விலகுவது சரியான முடிவு என்று நம்புகிறேன். ஆஷஸ் தொடருக்கு முன் அணிக்கு இடையூறாக மாறுவதை நான் விரும்பவில்லை. ஆஸ்திரேலிய அணியின் கேப்டனாக என் பங்களிப்பை நேசித்தேன். அணியை வழிநடத்தியதை என் விளையாட்டு வாழ்க்கையின் பாக்கியமாக கருதுகிறேன். சக வீரர்களின் ஆதரவுக்கு நன்றியுள்ளவனாக இருக்கிறேன்’ என்று டிம் பெய்ன் தெரிவித்துள்ளார்.

பதிவு: November 19, 2021
ரூ.5 கோடி மதிப்புள்ள கடிகாரங்கள் பறிமுதலா?- ஹர்திக் பாண்டியா விளக்கம்

துபாயில் இருந்து திரும்பிய இந்திய கிரிக்கெட் அணியின் ஆல் ரவுண்டர் ஹர்திக் பாண்டியாவிடம் இருந்து 5 கோடி ரூபாய் மதிப்பிலான 2 கை கடிகாரங்கள் பறிமுதல் செய்யபட்டதாக தகவல் வெளியானது. இது குறித்து பாண்டியா விளக்கம் அளித்துள்ளார்.

டி 20 உலக கோப்பை கிரிக்கெட் தொடரில் பங்கேற்ற இந்திய அணியினர் இந்தியாவில் இருந்து கடந்த 14ம் தேதி தாயகம் திரும்பினர். துபாயில் இருந்து திரும்பியபோது மும்பை விமான நிலையத்தில் ஹர்திக் பாண்டியாவிடம் இந்த கைக்கடிகாரங்கள் பறிமுதல் செய்யப்பட்டதாகத் தகவல்கள் வெளியானது.

இந்நிலையில், இதனை மறுத்துள்ள ஹர்திக் பாண்டியா விளக்க அறிக்கை ஒன்றை வெளியிட்டுள்ளார்., அந்த அறிக்கையில், ”ரூ.1.5 கோடி மதிப்பிலான ஒரே ஒரு கைக்கடிகாரம் மட்டுமே என்னிடம் இருந்தது. மும்பை விமான நிலையத்தில் நானே முன்வந்து சுங்கத் துறை அதிகரிகளிடம் கைக்கடிகாரம் கொண்டு வந்திருக்கும் தகவலைத் தெரிவித்தேன். ஆனால், சமூக ஊடகங்களில் நான் கைக்கடிகாரத்தை மறைத்துக் கொண்டு வந்ததுபோல் தகவல் வெளியாகியிருக்கிறது.

நான் கடிகாரத்தைப் பற்றி சொன்னவுடன் அவர்கள் என்னிடம் அதற்கான ஆவணங்களைக் கேட்டனர். நான் ஆவணங்களைக் கொடுத்துள்ளேன். அவர்கள், அதற்கான சுங்க வரி மதிப்பீட்டைச் செய்து வருகின்றனர். அவர்கள் மதிப்பிட்டு தொகையைச் சொன்னவுடன் நான் வரியைச் செலுத்தப் போகிறேன். நான் சட்டத்தை மீறிவிட்டதாக பரவும் தகவல்கள் பொய். அதேபோல், நான் கொண்டுவந்த கைக்கடிகாரத்தின் மதிப்பு ரூ.5 கோடி என்பதும் தவறானது” என்று தெரிவித்துள்ளார்.

பதிவு: November 16, 2021
டி20 உலகக் கோப்பை சாம்பியன் ஆஸ்திரேலியா!- இங்கிலாந்து வீரர் நம்பர் ஒன்

டி20 உலகக் கோப்பை கிரிக்கெட் சாம்பியன் பட்டத்தை ஆஸ்திரேலியா வென்றது. நியூசிலாந்து அணியை 8 விக்கெட் வித்தியாசத்தில் ஆஸ்திரேலியா வீழ்த்தியது. உலகக்கோப்பை தொடரில் ஒரு போட்டியில் அதிகபட்ச தனிநபர் ரன்களை இங்கிலாந்தின் ஜாஸ் பட்லர் அடித்துள்ளார்.

கடந்த மாதம் 17ம் தேதி ஐக்கிய அரபு அமீரகத்தில் தொடங்கிய 20 ஓவர் உலக கோப்பை போட்டியில் நேற்று நடந்த இறுதிப்போட்டியில் நியூசிலாந்து அணியை வீழ்த்தி 8 விக்கெட்டுகள் வித்தியாசத்தில் வெற்றி பெற்று ஆஸ்திரேலிய அணி கோப்பையை வென்றது.


கோப்பையை வெல்லும் அணிகளுள் ஒன்றாக கருதப்பட்ட இந்திய அணி லீக் சுற்றுடன் வெளியேறி ஏமாற்றமளித்தது. பாகிஸ்தான், ஆஸ்திரேலியா, இங்கிலாந்து, நியூசிலாந்து அணிகள் இந்த தொடரில் அரையிறுதிக்கு முன்னேறின.

இந்த தொடரில் அதிக ரன் அடித்தவர்கள் பட்டியலில் பாகிஸ்தான் அணியின் கேப்டன் பாபர் அசாம் 303 ரன்களுடன் முதல் இடத்தில் உள்ளார். அவரை தொடர்ந்து ஆஸ்திரேலியா அணி கோப்பை வெல்ல முக்கிய காரணமாக இருந்த அந்த அணியின் டேவிட் வார்னர் பட்டியலில் 289 ரன்களுடன் இரண்டாவது இடத்தில் உள்ளார்.

பாகிஸ்தான் அணியின் மற்றொரு தொடக்க வீரரான முகமது ரிஸ்வான் இந்த பட்டியலில் 281 ரன்களுடன் 3-வது இடத்தில் உள்ளார். இங்கிலாந்து அணியின் ஜாஸ் பட்லர் , இலங்கை அணியின் அசலங்கா, நமீபியா அணியின் டேவிட் விசா ஆகியோர் இந்த பட்டியலில் முறையே 4, 5, மற்றும் 6 வது இடத்தில் உள்ளனர்.

இந்த உலகக்கோப்பை தொடரில் ஒரு போட்டியில் அதிகபட்ச தனிநபர் ரன்களை இங்கிலாந்தின் ஜாஸ் பட்லர் அடித்துள்ளார். இலங்கை அணிக்கு எதிராக ஷார்ஜாவில் நடைபெற்ற போட்டியில் அவர் 101 ரன்கள் அடித்து ஆட்டமிழக்காமல் இருந்தார் என்பது நினைவில் கொள்ளத்தக்கது.

பதிவு: November 15, 2021
டெஸ்ட் கேப்டன் ரஹானே; டி20 கேப்டன் ரோகித்!- நியூசிலாந்துக்கு எதிரான டெஸ்ட் தொடருக்கான இந்திய அணி அறிவிப்பு

நியூசிலாந்து அணிக்கு எதிரான டெஸ்ட் தொடரில் பங்கேற்கவுள்ள இந்திய அணி வீரர்கள் பட்டியலை இந்திய கிரிக்கெட் வாரியம் வெளியிட்டுள்ளது.

நியூசிலாந்து அணி இந்தியாவுக்குச் சுற்றுப்பயணம் செய்து 2 டெஸ்ட் போட்டிகள், 3 டி20 ஆட்டங்களில் விளையாடுகிறது. டி20 தொடர் நவம்பர் 17 அன்று தொடங்கி, நவம்பர் 21 அன்று நிறைவு பெறுகிறது. டெஸ்ட் தொடர் நவம்பர் 25ம் தேதி தொடங்கி, டிசம்பர் 7 அன்று நிறைவுபெறுகிறது. டி20 தொடருக்கான இந்திய அணி அறிவிக்கப்பட்டுள்ளது. ரோஹித் சர்மா தலைமையிலான அணியில் தமிழக வீரர் அஸ்வின் இடம்பெற்றுள்ளார். மேலும், கோலி, ஜடேஜா, பும்ரா, ஷமி ஆகியோருக்கு ஓய்வளிக்கப்பட்டுள்ளது.

உலகக் கோப்பை அணியில் இடம்பெற்ற பாண்டியா, வருண் சக்ரவர்த்தி, ராகுல் சஹார், ஷர்துல் தாக்குர் இடம்பெறவில்லை. சுழற்பந்து வீச்சாளர் சஹால் மீண்டும் தேர்வாகியுள்ளார். இந்நிலையில் டெஸ்ட் தொடருக்கான இந்திய அணி அறிவிக்கப்பட்டுள்ளது. முதல் டெஸ்டில் விராட் கோலி விளையாடாததால் ரஹானே தலைமையில் இந்திய அணி களமிறங்கவுள்ளது. 2-வது டெஸ்டில் விராட் கோலி அணியினருடன் இணைந்து கேப்டனாகச் செயல்படுவார் என அறிவிக்கப்பட்டுள்ளது.

இதனையடுத்து, ரோஹித் சர்மா, ரிஷப் பந்த், பும்ரா, ஷமி ஆகியோர் டெஸ்ட் தொடரில் பங்கேற்கவில்லை. புஜாரா துணை கேப்டனாக அறிவிக்கப்பட்டுள்ளார். முதல் டெஸ்ட் கான்பூரில் நவம்பர் 25 அன்றும் 2-வது டெஸ்ட் மும்பையில் டிசம்பர் 3 அன்றும் தொடங்குகின்றன.

இந்திய அணி விவரம்: ரஹானே(கேப்டன்), புஜாரா (துணை கேப்டன்), கே.எல். ராகுல் , ரவிச்சந்திரன் அஷ்வின், ஷ்ரேயாஸ் ஐயர், முகமது சிராஜ், மயங்க் அகர்வால், ஷுப்மன் கில், வி.சாஹா (விக்கெட் கீப்பர்) , கே.எஸ்.பரத், ஆர்.ஜடேஜா, அக்‌ஷர் படேல், ஜெயந்த் யாதவ், இஷாந்த் சர்மா, உமேஷ் யாதவ், பிரசித் கிருஷ்ணா..மேலும், விராட் கோலி 2வது டெஸ்ட் போட்டியில் இணைந்து, அணிக்கு தலைமை ஏற்று செயல்படுவார் என தெரிவிக்கப்பட்டுள்ளது.

பதிவு: November 12, 2021
பாராஒலிம்பிக் வீரர் மாரியப்பனுக்கு அரசு வேலை!- பணி நியமன ஆணையை வழங்கினார் முதல்வர் ஸ்டாலின்

பாராஒலிம்பிக் வீரர் மாரியப்பன் தங்கவேலுவுக்கு முதல்வர் மு.க.ஸ்டாலின் பணி நியமன ஆணையை வழங்கினார். மாரியப்பன் தங்கவேலுவுக்கு குரூப் 1 பிரிவில் தமிழக அரசு பணி வழங்கி உள்ளது.

ஜப்பான் தலைநகர் டோக்கியோவில் கடந்த ஆகஸ்ட் 24ம் தேதி தொடங்கிய பாராலிம்பிக் போட்டிகள் செப்டம்பர் 5ம் தேதி நிறைவடைந்தது. இதில் ஆடவர் உயரம் தாண்டுதல் (டி63) போட்டியில் இந்தியாவின் மாரியப்பன் தங்கவேலு 1.86 மீட்டர் உயரம் தாண்டி வெள்ளிப் பதக்கத்தையும் மற்றொரு இந்திய வீரர் சரத் குமார் 1.83 மீட்டர் உயரம் தாண்டி வெண்கலப் பதக்கத்தையும் பெற்றனர்.

ரியோவில் நடந்த 2016 பாரா ஒலிம்பிக் போட்டியில் உயரம் தாண்டுதல் டி42 வகுப்பில் தங்கப் பதக்கம் பெற்றுள்ளார். 2020 டோக்கியோ பாரா ஒலிம்பிக் உயரம் தாண்டும் போட்டியில் இவர் வெள்ளிப் பதக்கம் வென்றார். 2017 ஜனவரி 25 ஆம் தேதி, இந்திய அரசு இவருக்கு பத்மஸ்ரீ விருதினை அறிவித்தது. இந்திய அரசு இவருக்கு ஆகஸ்டு, 2020-இல் ராஜீவ் காந்தி கேல் ரத்னா விருதிற்கு பரிந்துரைத்துள்ளது.

இந்த நிலையில், பாராஒலிம்பிக் வீரர் மாரியப்பன் தங்கவேலுவுக்கு முதல்வர் மு.க.ஸ்டாலின் பணி நியமன ஆணையை வழங்கினார். மாரியப்பன் தங்கவேலுவுக்கு குரூப் 1 பிரிவில் காகித ஆலையின் வர்த்தக பிரிவில் துணைமேலாளராக தமிழக அரசு பணி வழங்கி உள்ளது. அரசு பணி ஒதுக்கீடு செய்யப்பட்டதற்கு மாரியப்பன் தங்கவேல் முதல்வருக்கும், அமைச்சர்களுக்கும் நன்றி தெரிவித்துள்ளார். விளையாட்டு வீரர்களை ஊக்கப்படுத்தும் வகையில் அரசு வேலை வழங்கப்பட்டுள்ளது.

பதிவு: November 03, 2021
டி20 உலகக்கோப்பை கிரிக்கெட்... தென் ஆப்பிரிக்கா மோசமான பேட்டிங்... எளிதான இலக்கில் ஆஸ்திரேலியா!

டி20 உலகக்கோப்பை கிரிக்கெட் போட்டியில் முதல் ஆட்டத்தில் தென் ஆப்பிரிக்கா அணி 119 ரன்களை வெற்றி இலக்காக ஆஸ்திரேலியாவுக்கு நிர்ணயித்துள்ளது.

டி20 உலகக் கோப்பை கிரிக்கெட் போட்டியின் முதல் ஆட்டம் அபுதாபி மைதானத்தில் நடந்து வருகிறது. முதல் ஆட்டத்தில் ஆஸ்திரேலியா- தென் ஆப்பிரிக்கா விளையாடி வருகிறது. டாஸ் வென்ற ஆஸ்திரேலியா அணி முதலில் பந்துவீச்சை தேர்வு செய்தது. தொடக்க வீரர்களாக டி காக்- டிர் டுசென் களமிறங்கினர். இந்த ஜோடி சிறிது நேரம் கூட நீடிக்கக்கவில்லை. 2 ரன்னில் டுசென் ஆட்டம் இழக்க மார்க்ரம் களம் கண்டார். இவர் ஆஸ்திரேலியா பந்துவீச்சை தாக்குபிடித்து விளையாடினார்.

மறுமுனையில் விளையாடி வந்த மற்றொரு தொடக்க வீரர் டி காக் 7 ரன்னில் வீழ்ந்தார். பின்னர், மார்க்ரம்முடன் ஜோடி சேர்ந்த க்ளாசென் 13 ரன்னில் வெளியேறினார். இதையடுத்து டேவிட் மில்லர் ஓரளவு தாக்குபிடித்து 16 ரன்கள் அடித்தார். பின்னர் வந்த ப்ரிடோரிஸ் ஒரு ரன்னில் வீழ்ந்தார். அடுத்து வந்த மகராஜ் வந்த வேகத்தில் பெளலியன் திரும்பினார். மறுமுனையில் நன்றாக விளையாடி வந்த மார்க்ரம் 40 ரன்னில் ஆட்டம் இழந்தார். இதையடுத்து, நோர்க்யா- ரபாடா ஜோடி சேர்ந்தனர். இவர்கள் 18வது ஓவரில் அணியின் ஸ்கோரை 101ஆக உயர்த்தினர். 19.1 ஓவரில் ரபாடா அபார சிக்சர் விளாசினார். 4வது பந்தில் நோர்க்யா 2 ரன்னில் ஆட்டம் இழந்தார். 20 ஓவர்கள் முடிவில் தென் ஆப்பிரிக்கா அணி 9 விக்கெட்டுகளை இழந்த 118 ரன்கள் எடுத்துள்ளது. 19 ரன்னில் கடைசி வரை ரபாடா ஆட்டம் இழக்கவில்லை. முதல் ஆட்டத்திலேயே தென் ஆப்பிரிக்கா அணி மோசமான ஆட்டத்தை வெளிப்படுத்தியது.

ஆஸ்திரேலியா தரப்பில் கம்மின்ஸ் 1 விக்கெட்டும், ஸ்டார்க் 2 விக்கெட்டும், மேக்ஸ்வெல் 1 விக்கெட்டும், ஹேசில்வுட் 2 விக்கெட்டும், ஆடம் 2 விக்கெட்டும் எடுத்தனர். 119 ரன்கள் எடுத்தால் வெற்றி என்ற இலக்குடன் ஆஸ்திரேலியா அணி களமிறங்க உள்ளது.

பதிவு: October 23, 2021
பிரிட்டிஷ், வெர்ஜின் தீவுகளில் பல கோடி ரூபாய் முதலீடு!- வெளிநாட்டில் கறுப்பு பணத்தை பதுக்கினாரா சச்சின்?

வெளிநாடுகளில் ரகசியமாக பல கோடி ரூபாய் முதலீடு மற்றும் ஏராளமான சொத்து ஆவணங்களை வாங்கி குவித்தவர்களின் பட்டியலில் கிரிக்கெட் ஜாம்பவான் சச்சின் டெண்டுல்கரின் பெயரும் இடம் பெற்று இருப்பது பரபரப்பை ஏற்படுத்தியுள்ளது.

கடந்த 2015ம் ஆண்டு பனாமா பேப்பர்ஸ் வெளியாகி சர்வதேச அளவில் பரபரப்பை ஏற்படுத்திய நிலையில், தற்போது பாண்டோரா பேப்பர்ஸ் என்ற ஆவணங்கள் வெளியாகி உள்ளன. ஐசிஐஜே எனப்படும் சர்வதேச புலனாய்வு பத்திரிகையாளர்கள் கூட்டமைப்பு மூலம் இந்த பட்டியல் வெளியாகி உள்ளது. நிதி சேவை வழங்கும் 14 நிறுவனங்களில் இருந்து கசிந்த சுமார் 1.2 கோடி ஆவணங்களை 600க்கும் மேற்பட்ட பத்திரிகையாளர்கள் புலனாய்வு செய்து இந்த பட்டியலை வெளியிட்டுள்ளன.

இந்த பட்டியலில் இந்தியா உள்ளிட்ட 91 நாடுகளில் உள்ள அரசியல் தலைவர்கள், தொழில் அதிபர்கள், பல்துறை பிரபலங்களின் சட்ட விரோத கறுப்புப் பண முதலீட்டு ரகசியங்களை ஆதாரப்பூர்வமாக கண்டுபிடித்து இருப்பதாக ஐசிஐஜே கூறியுள்ளது. பாண்டோரா பேப்பர்ஸ் என பெயரிடப்பட்டுள்ள இந்த பட்டியலில் இந்திய கிரிக்கெட் ஜாம்பவான் சச்சின் டெண்டுல்கரின் பெயரும் இடம் பெற்றுள்ளது. பனாமா பேப்பர்ஸ் ஆவணங்கள் வெளியான சில மாதங்களில் வெர்ஜின் தீவுகளில் உள்ள தனது நிறுவனந்தை கலைக்கும்படி சச்சின் கேட்டுக் கொண்டதாகவும் ஆவணங்களில் கூறப்பட்டுள்ளது.

சச்சின் தவிர பாண்டோரா பேப்பர்ஸ் பட்டியலில் தொழில் அதிபர் அனில் அம்பானி உள்ளிட்ட 300 இந்திய பிரபலங்களின் பெயர்கள் உள்ளதாக தெரிகிறது. அதேபோல் நீரவ் மோடி நாட்டை விட்டு தப்பிச் செல்வதற்கு ஒரு மாதத்திற்கு முன்பு அவரது சகோதரி தொண்டு நிறுவனம் ஒன்றை தொடங்கியதும் தெரியவந்தது. ஜோர்டான் மன்னர் அப்துல்லா, பிரிட்டன் முன்னாள் பிரதமர் டோனி பிளேர், ரஷ்ய அதிபர் விளாடிமிர் புதின், பாப் பிரபலம் ஷகீரா உள்ளிட்டோர் நிதி முறைகேட்டில் ஈடுபட்டுள்ளதாக இந்த ஆவணங்களில் கூறப்பட்டுள்ளது.

பதிவு: October 04, 2021
ஆஸ்திரேலியாவில் இந்திய வீராங்கனை ஸ்மிருதி மந்தனா முதல் சதம்!- இந்திய வரலாற்றில் அசத்தல் சாதனை

ஆஸ்திரேலியாவில், டெஸ்ட் கிரிக்கெட்டில் சதமடித்த முதல் இந்திய வீராங்கனை என்ற சாதனையை படைத்துள்ளார் ஸ்மிருதி மந்தனா. 216 பந்துகளில், 127 ரன்கள் குவித்து அசத்தியுள்ளார் மந்தனா.


இந்திய பெண்கள் கிரிக்கெட் அணி, ஆஸ்திரேலியாவில் சுற்றுப் பயணம் செய்து விளையாடி வருகிறது. 3 போட்டிகள் கொண்ட ஒருநாள் தொடரை 1-2 என்ற கணக்கில் இழந்த இந்தியா, இப்போது டெஸ்ட் போட்டியில் பங்கேற்றுள்ளது. இரு அணிகளுக்கு இடையிலான முதல் பகல்-இரவு டெஸ்ட் கிரிக்கெட் போட்டி கராரா ஓவல் மைதானத்தில் நேற்று தொடங்கியது.

டாஸ் வென்ற ஆஸ்திரேலிய அணி, பந்துவீச்சை தேர்வு செய்தது. அதன்படி இந்திய பெண்கள் அணியின் தொடக்க வீராங்கனைகள் ஸ்மிருதி மந்தனாவும் ஷபாலி வர்மாவும் களமிறங்கினர். அணியின் ஸ்கோர் 93 ரன்னாக இருந்தபோது ஷபாலி வர்மா 31 ரன்னில் ஆட்டமிழந்தார். ஸ்மிருதி மந்தனா 51 பந்துகளில் அரை சதத்தைக் கடந்தார். 44.1 ஓவர்களில் இந்திய பெண்கள் அணி, 132 ரன்னில் இருந்த போது, மழையால் ஆட்டம் பாதிக்கபட்டது.ஸ்மிருதி மந்தனா 80 ரன்களுடனும், பூனம் ரவுத் 16 ரன்களுடனும் களத்தில் இருந்தனர்.


இதையடுத்து 2-வது நாள் ஆட்டம் இன்று தொடங்கியது. சிறப்பான பேட்டிங்கை தொடர்ந்த ஸ்மிருதி மந்தனா, 170 பந்துகளில் தனது முதல் டெஸ்ட் சதத்தை எடுத்தார். தொடர்ந்து விளையாடிய அவர் 216 பந்துகளில், 127 ரன்கள் குவித்து அஸ்லீக் கார்ட்னர் பந்துவீச்சில் தஹிலா மெக்ராத்திடம் கேட்ச் கொடுத்து ஆட்டமிழந்தார்.

இதையடுத்து ஆஸ்திரேலியாவில் டெஸ்ட் சதமடித்த முதல் இந்திய வீராங்கனை என்ற சாதனையை அவர் படைத்தார். மேலும் வெளிநாடுகளில் சதமடித்த 5-வது இந்திய வீராங்கனை என்ற பெருமையையும், ஆஸ்திரேலியாவில், டெஸ்ட் கிரிக்கெட்டில் அந்த அணிக்கு எதிராக அதிக ரன்கள் எடுத்த வீராங்கனை என்கிற பெருமைகளையும் அவர் பெற்றுள்ளார்.

தேநீர் இடைவேளை வரை இந்திய பெண்கள் அணி, 5 விக்கெட் இழப்புக்கு 276 ரன்கள் எடுத்துள்ளது. தீப்தி சர்மா 12 ரன்களுடனும் தனியா பாடியா ரன் ஏதும் எடுக்காமலும் களத்தில் உள்ளனர்.

பதிவு: October 01, 2021
`நான் உணர்ச்சிவசப்படுகிறேன்!'- தொழிலதிபரை மணந்த பிரபல டென்னிஸ் வீராங்கனை நெகிழ்ச்சி

தனது காதலரான தொழிலதிபர் டோனி ஐருக்கை  திருமணம் செய்துகொண்டார் பிரபல டென்னிஸ் வீராங்கனை சிமோனா ஹாலெப்.

ருமேனியா நாட்டைச் சேர்ந்த பிரபல டென்னிஸ் வீராங்கனை சிமோனா ஹாலெப். 29 வயதான ஹாலெப் 2017-19ம் ஆண்டு கால கட்டத்தில் 64 வாரங்களில் நம்பர் ஒன் வீராங்கனையாக இருந்துள்ளார். தற்போது தரவரிசையில் 11வது இடத்தில் இருக்கும் ஹாலெப், 2018ம் ஆண்டு பிரஞ்ச் ஓபன், 2019ம் ஆண்டு விம்பிள்டன் என 2 கிராண்ட்ஸ்லாம் பட்டங்களை வென்றுள்ளார்.

அண்மையில் நடந்த யுஎஸ் ஓபன் தொடரில் 4வது சுற்றில் தோல்வி அடைந்து வெளியேறினார். இந்நிலையில் தனது காதலரான தொழிலதிபர் டோனி ஐருக்கை திருமணம் செய்துகொண்டார். தனது சொந்த ஊரான கான்ஸ்டன்டாவில் நடந்த திருமண நிகழ்ச்சியில் நெருங்கிய உறவினர்கள் மற்றும் நண்பர்கள் மட்டும் கலந்து கொண்டனர்.

திருமணம் முடிந்த கையோடு ஹாலெப் கூறுகையில், ``நான் உணர்ச்சிவசப்படுகிறேன். இவை கிராண்ட்ஸ்லாம் வென்றதைவிட வித்தியாசமான உணர்ச்சி, இது எனது தனிப்பட்ட பகுதி, இது மிகவும் முக்கியமான படியாகும். அது நடப்பதில் மகிழ்ச்சி அடைகிறேன்'' என்றார். திருமண படங்களை ஹாலெப் இன்ஸ்டாகிராம் பக்கத்தில் வெளியிட்டுள்ளார்.

பதிவு: September 17, 2021
`இந்திய கிரிக்கெட் வீரர் ஷிகர் தவானை விவாகரத்து செய்துவிட்டேன்!'- மனைவி அதிர்ச்சி பதிவு

இந்திய கிரிக்கெட் வீரர் ஷிகர் தவானின் மனைவி ஆயிஷா, அவரை விவாகரத்து செய்துள்ளதாகத் தெரிவித்துள்ளார்.

இந்திய கிரிக்கெட் அணியின் தொடக்க ஆட்டக்காரர் ஷிகர் தவான். அதிரடி ஆட்டக்காரரான இவர், இப்போது டி-20 உலகக் கோப்பைப் போட்டிக்காகத் தயாராகி வருகிறார். 35 வயதான இவருடைய மனைவி ஆயிஷா முகர்ஜி. கடந்த 8 வருடங்களுக்கு முன் இவர்கள் காதலித்து திருமணம் செய்துகொண்டனர். இந்தியாவை பூர்விகமாகக் கொண்ட ஆயிஷா (46), ஆஸ்திரேலியாவின் மெல்போர்ன் நகரில் வசித்து வந்தார். கிக்பாக்ஸிங் வீராங்கனை.


ஆஸ்திரேலிய தொழிலதிபர் ஒருவரை திருமணம் செய்துகொண்ட இவர், பின்னர் விவாகரத்து செய்தார். அவர்களுக்கு 2 பெண் குழந்தைகள் உள்ளன. இதையடுத்து ஷிகர் தவானை காதலித்து கடந்த 2012ம் ஆண்டு திருமணம் செய்துகொண்டார். இவர்களுக்கு ஒரு மகன் இருக்கிறார். இந்நிலையில், ஷிகர் தவானை பிரிந்துவிட்டதாக ஆயிஷா முகர்ஜி தனது இன்ஸ்டாகிராமில் தெரிவித்துள்ளார். அதில் இரண்டாவது முறையாக விவாகரத்து செய்யும் வரை, அந்த வார்த்தையை அசுத்தமானதாகவே நினைத்துக் கொண்டிருந்தேன் என்றும் விவாகரத்து பற்றி நீண்ட அறிக்கை ஒன்றையும் அதில் குறிப்பிட்டுள்ளார். இந்த விவகாரம் குறித்து ஷிகர் தவான் ஏதும் தெரிவிக்கவில்லை.

பதிவு: September 08, 2021
பாராலிம்பிக் துப்பாக்கிச் சுடுதலில் தெறிக்கவிட்ட இந்திய வீரர்கள்!- தங்கம், வெள்ளிப் பதக்கம் வென்று அசத்தல்

பாராலிம்பிக் துப்பாக்கிச் சுடுதலில் இந்திய வீரர்கள் மணிஷ் நர்வால் தங்கப்பதக்கமும், சிங்ராஜ் அதானா வெள்ளிப்பதக்கமும் வென்று அசத்தினர்.

ஜப்பான் தலைநகர் டோக்யோவில் மாற்றுத்திறனாளிகளுக்கான 16வது பாராலிம்பிக் போட்டிகள் நடந்து வருகின்றன. இன்று காலை பேட்மிண்டன் விளையாட்டில் இரண்டு பதக்கம் உறுதியானது. இந்நிலையில் பாராலிம்பிக் துப்பாக்கிச் சுடுதல் போட்டியில் இந்தியாவின் மணிஷ் நார்வால் மற்றும் சிங்ராஜ் தங்கம் மற்றும் வெள்ளிப் பதக்கங்களை வென்று அசத்தியுள்ளனர்.

முன்னதாக கலப்பு பிரிவு பாராலிம்பில் துப்பாக்கிச் சுடுதல் 50 மீ எஸ்.எச் 1 பிரிவில் இந்தியாவின் சிங்ராஜ் மற்றும் மணிஷ் நார்வால் ஆகியோர் பங்கேற்றனர். இந்த போட்டியில், 218.2 புள்ளிகளுடன் மணிஷ் நார்வால் முதல் இடத்திலும், 216.7 புள்ளிகளுடன் சிங்ராஜ் இரண்டாம் இடத்திலும் நிறைவு செய்தனர்.

ஏற்கெனவே, ஆண்களுக்கான துப்பாக்கிச் சுடுதல் எஸ்.எச்.1 பிரிவில் 216.8 புள்ளிகள் பெற்று சிங்ராஜ் வெண்கலப் பதக்கம் வென்றிருந்தார். இந்தியாவின் அவானி லெகாராவைத் தொடர்ந்து, ஒரே பாராலிம்பிக்கில் இரண்டு பதக்கங்கள் வென்று சிங்ராஜ் அசத்தியுள்ளார். தங்கம் வென்ற மணிஷ் நார்வாலுக்கு ரூ.6 கோடியும், வெள்ளிப் பதக்கம் வென்ற சிங்ராஜிக்கு ரூ.4 கோடியும் பரிசாக அறிவித்துள்ள ஹரியானா அரசு.

டோக்யோ பாராலிம்பிக் தொடரில், வரலாறு காணாத வகையில் இந்தியா பதக்க மழையை பொழிந்து வருகிறது. இதன்படி 3 தங்கம், 7 வெள்ளி, 5 வெண்கலம் என்று மொத்தம் 15 பதக்கங்களை இந்தியா வென்று 34வது இடத்தை பிடித்துள்ளது.

பதிவு: September 04, 2021
தொடர்ந்து 2வது முறை சாதித்தார்!- பாராலிம்பிக்கில் வெள்ளிப் பதக்கம் வென்றார் மாரியப்பன்

டோக்யோ பாராலிம்பிக் உயரம் தாண்டுதலில் இந்தியாவின் மாரியப்பன் வெள்ளிப் பதக்கம் வென்றார். பாராலிம்பிக்கில் உயரம் தாண்டுதலில் தொடர்ந்து இரண்டாவது முறையாக மாரியப்பன் பதக்கம் வென்று சாதனை படைத்துள்ளார்.


ஜப்பான் தலைநகர் டோக்யோவில் மாற்றுத் திறனாளிகளுக்கான 16-வது பாராலிம்பிக் போட்டிகள் நடந்து வருகின்றன. இதில் இந்திய வீரர், வீராங்கனைகள் 2 தங்கம், 5 வௌ்ளி உள்பட 10 பதக்கங்களை வென்று சாதனை படைத்துள்ளனர். இன்று நடைபெற்ற டி-42 பிரிவில் 1.86 மீட்டர் உயரம் தாண்டி வெள்ளிப் பதக்கத்தை தமிழகத்தைச் சேர்ந்த மாரியப்பன் வென்றார். பாராலிம்பிக்கில் உயரம் தாண்டுதலில் தொடர்ந்து இரண்டாவது முறையாக மாரியப்பன் பதக்கம் வென்று சாதனை படைத்துள்ளார். அமெரிக்க வீரர் கிரீவ் சாமுடன் கடும் போட்டி நிலவிய நிலையில் வெள்ளிப் பதக்கம் மாரியப்பன் வென்றார். இந்தியாவின் மற்றொரு வீரர் ஷரத்குமார் 1.83 மீட்டர் உயரம் தாண்டு வெண்கலப் பதக்கம் வென்றார்.

தனது போராட்ட குணத்தின் மூலம் பாராலிங்பிக்கில் வெள்ளி வென்றுள்ளார் மாரியப்பன் என தமிழ்நாடு விளையாட்டுத்துறை அமைச்சர் மெய்யநாதன் பாராட்டினார். டோக்யோ பாராலிம்பிக் உயரம் தாண்டுதலில் வெள்ளி வென்ற மாரியப்பனுக்கு எனது வாழ்த்துக்கள் என கூறினார். அடுத்த பாராலிமபிக்கில் மாரியப்பன் பங்கேற்க தேவையான அனைத்து உதவிகளும் செய்யப்படும் என கூறினார்.

"மாரியப்பன் தங்கவேலு நிலைத்தன்மை மற்றும் சிறப்பிற்கு ஒத்ததாகும். வெள்ளிப் பதக்கம் வென்ற அவருக்கு வாழ்த்துகள். அவரது சாதனையால் இந்தியா பெருமை கொள்கிறது" என பிரதமர் மோடி தனது ட்வீட்டரில் வாழ்த்து தெரிவித்துள்ளார். வெண்கலப் பதக்கம் வென்றதன் மூலம் ஒவ்வொரு இந்தியரின் முகத்திலும் ஷரத்குமார் அடங்காதவர் புன்னகையை கொண்டு வந்தார். அவரது வாழ்க்கை பயணம் பலரை ஊக்குவிக்கும். அவருக்கு வாழ்த்துக்கள் என மோடி புகழாரம் செய்துள்ளார்.

கடந்த 2016 ரியோ ஒலிம்பிக் போட்டியில் தமிழகத்தைச் சேர்ந்த இந்திய வீரர் மாரியப்பன் தங்கவேலு தங்க பதக்கம் வென்று சாதனை படைத்தார். இதேபோல் இந்திய வீரர் வருண் சிங் வெங்கல பதக்கம் வென்று அசத்தினார் என்பது நினைவில் கொள்ளத்தக்கது.

பதிவு: August 31, 2021
`துப்பாக்கி சூடுதலில் தங்கம்; ஈட்டி எறிதலில் இரட்டை பதக்கம்!'- பாராலிம்பிக்கில் அசத்தும் இந்தியர்கள்

டோக்யோ பாராஒலிம்பிக் மகளிர் துப்பாக்கி சுடுதல் இறுதி போட்டியில் வெற்றி பெற்ற இந்திய வீராங்கனை அவானி லெகாரா தங்க பதக்கமும், ஈட்டி எறிதல் போட்டியில் இந்தியாவின் தேவேந்திரா, சுந்தர் சிங் குர்ஜார் ஆகியோர் இரட்டை பதக்கமும் வென்றனர்.

ஜப்பான் தலைநகர் டோக்யோவில் மாற்றுத் திறனாளிகளுக்கான 16வது பாராலிம்பிக் போட்டிகள் நடந்து வருகின்றன. இதில், மகளிர் துப்பாக்கி சுடுதல் 10 மீட்டர் ஏர் ரைபிள் போட்டி இன்று நடைபெற்றது. இதில் இந்திய வீராங்கனை அவானி லெகாரா அதிரடியாக விளையாடி இறுதிப்போட்டிக்கு முன்னேறினார். இதனால், அவர் இந்தியாவுக்கு கூடுதலாக ஒரு பதக்கம் பெற்று தருவாரா? என்ற எதிர்பார்ப்பு அதிகரித்தது. இறுதிப் போட்டியில் 249.6 புள்ளிகள் பெற்று உலக சாதனையை அவனி லெகாரா சமன் செய்தார். ராஜஸ்தான் மாநிலம் ஜெய்ப்பூரைச் சேர்ந்த 19 வயதான அவானி லெகாரா தங்கம் பதக்கம் வென்று இந்தியாவுக்கு பெருமை சேர்த்துள்ளார்.

ஈட்டி எறிதல் போட்டியில் இந்தியாவின் தேவேந்திரா 64.35 மீ, சுந்தர் சிங் குர்ஜார் 64.01 மீ தொலைவுக்கு ஈட்டி எறிந்து முறையே வெள்ளி மற்றும் வெண்கல பதக்கங்களை தட்டி சென்றுள்ளனர். இன்று ஒரே நாளில் ஒரு தங்கம், 2 வெள்ளி, ஒரு வெண்கலம் என 4 பதக்கங்களை இந்தியா வென்றுள்ளது. இதனால், இந்தியா இதுவரை, ஒரு தங்கம், 4 வெள்ளி மற்றும் 2 வெண்கலம் என மொத்தம் 7 பதக்கங்களை வென்றுள்ளது.

வட்டு எறிதல் போட்டியில் இந்தியாவின் கத்தூனியா வெள்ளி வென்றார். இறுதிப் போட்டியில் 44.38மீ தூரம் வட்டு எறிந்து 2-வது இடத்தை யோகேஷ் வென்றார். டெல்லியை சேர்ந்த 24 வயதுடைய யோகேஷ் பெற்றுள்ள வெள்ளியால் இந்தியாவின் பதக்க எண்ணிக்கை உயர்ந்து உள்ளது. இந்தியா இதுவரை, ஒரு தங்கம், 3 வெள்ளி மற்றும் ஒரு வெண்கலம் என மொத்தம் 5 பதக்கங்களை வென்றுள்ளது.

பாராலிம்பிக்ஸ் துப்பாக்கிச் சுடுதலில் தங்கப் பதக்கம் வென்ற இந்தியாவின் அவனிக்கு பிரதமர் மோடி வாழ்த்து தெரிவித்தார். துப்பாக்கிச்சுடுதலில் உங்களுக்கு உள்ள ஆர்வம் மற்றும் திறமை காரணமாக வெற்றி கிடைத்துள்ளது என குறிப்பிட்டார். இந்திய விளையாட்டுத் துறையில் இது ஒரு சிறப்பான தருணம் என பிரதமர் மோடி அவனிக்கு புகழராம் செய்தார்.

பதிவு: August 30, 2021
`பீஸ்ட்’ படப்பிடிப்பில் தளபதி- தல திடீர் சந்திப்பு!- வைரஸ் புகைப்படம்

சென்னையில் நடந்துவரும் ‘பீஸ்ட்’ படப்பிடிப்பில் நடிகர் விஜய்யை சந்தித்துள்ளார் கிரிக்கெட் வீரர் தோனி. இந்த சந்திப்பு தொடர்பான புகைப்படங்களை பகிர்ந்துள்ள இருவரது ரசிகர்கள் ‘தளபதி - தல’ சந்திப்பு எனக் கூறி கொண்டாடி வருகின்றனர்.

நெல்சன் திலீப் குமார் இயக்கத்தில் விஜய் நடிக்கும் 'பீஸ்ட்' படத்தின் படப்பிடிப்பு கடந்த ஏப்ரல் மாதம் ஜார்ஜியாவில் தொடங்கியது. அதனையடுத்து, சென்னை கோகுலம் ஸ்டூடியோவில் அரங்கம் அமைத்து இரண்டாம் கட்ட படப்பிடிப்பை நடத்தினர்.

இந்த நிலையில், தற்போது சென்னை ஈ.சி.ஆர் பகுதியில் மூன்றாம் கட்டப் படப்பிடிப்பு நடைபெற்றது. மீண்டும் தற்போது கோகுலம் ஸ்டூடியோவில் நடந்துவரும் படப்பிடிப்பில் கலந்துகொண்டுள்ளார் நடிகர் விஜய்.

அதேசமயம், ஐக்கிய அரபு அமீரகத்தில் நடைபெறும் ஐபிஎல் போட்டிக்காக சென்னை சூப்பர் கிங்ஸுடன் செல்ல சென்னை வந்துள்ள தோனி, ‘பீஸ்ட்’ படப்பிடிப்பு நடைபெறும் கோகுலம் ஸ்டூடியோவில் விளம்பர படப்பிடிப்புக்காக கலந்துகொண்டுள்ளார். இந்த சமயத்தில், விஜய்யை தோனி உற்சாகமுடன் சந்தித்து உரையாடியுள்ளார். இந்தப் புகைப்படங்கள் தற்போது சமூக வலைதளங்களில் வைரல் ஆகிக்கொண்டிருக்கின்றன.

பதிவு: August 12, 2021
`சமீஹா பர்வீன் புறக்கணிப்பு ஏன்?; நாளை பதில் வேண்டும்!'- மத்திய அரசுக்கு உயர்நீதிமன்றம் எச்சரிக்கை

தகுதி போட்டியில் தகுதி பெற்றும் பெண் என்பதால் சமீஹா பர்வீன் புறக்கணிக்கப்பட்டாரா? என மத்திய அரசுக்கு கேள்வி எழுப்பிய சென்னை உயர்நீதிமன்றம், இவ்விவகாரம் தொடர்பாக விளையாட்டு மேம்பாட்டு ஆணையம் நாளைக்குள் பதில் தராவிடில் நேரடியாக உத்தரவிட நேரிடும் என எச்சரித்துள்ளது.


கன்னியாகுமரி மாவட்டம். கடையாலுமூடு பகுதியை சேர்ந்தவர் சமீஹா பர்வீன் (18). இவர் ஏழு வயதாக இருக்கும் போது ஏற்பட்ட காய்ச்சல் காரணமாக காது கேட்கும் திறனையும் பேசும் திறனையும் இறந்துவிட்டார். இதற்காக சொந்த வீட்டை கூட விற்று சிகிச்சை அளித்துள்ளனர். தற்போது குடும்பத்தினர் கடையாலுமூடு பகுதியில் வாடகை வீட்டில் வசிக்கின்றனர்.

இந்த நிலையில் தடகள விளையாட்டில் ஆர்வம் கொண்ட சமீஹா பர்வீன், பங்கேற்ற பெரும்பாலான போட்டிகளில் வெற்றி பெற்று வந்தார். கடந்த 2017, 2018, 2019ல் நடைபெற்ற தேசிய தடகள போட்டிகளில் 9 தங்கம் உட்பட 12 பதக்கங்களை வென்றுள்ளார். இதனையடுத்து, போலந்து நாட்டில் இம்மாதம் இறுதியில் நடைபெறவிருக்கும் சர்வதேச செவித்திறன் குறைபாடு உள்ளவர்களுக்கான டெப் அத்லெடிக்ஸ் தடகளப் போட்டிகளில் பங்கேற்க சமீஹா பர்வீன் தேர்வாகி உள்ளார் என தமிழ்நாடு அசோசியேஷன் இருந்து கடந்த ஜூலை 16ம் தேதி அவருக்கு கடிதம் வந்துள்ளது. அதில் டெல்லியில் ஜூலை 22ல் நடைபெறும் தகுதி தேர்வில் பங்கேற்க வேண்டும் என்றும் தெரிவிக்கப்பட்டிருந்தது.

இதையடுத்து பர்வீன் டெல்லிக்கு சென்று தகுதி தேர்வில் பங்கேற்று அதிக புள்ளிகள் பெற்று தகுதி பெற்றார். ஆனால் டெல்லியிலிருந்து போட்டிக்குத் தேர்வான மற்றொரு மாணவி ஒருவர் தகுதி இழந்ததால், சமீஹா பர்வீனை போட்டிக்கு அழைத்துச் செல்ல வேண்டாம் என அதிகாரிகள் முடிவு எடுத்தனர். இந்தியாவிலிருந்து இவர் மட்டுமே பெண்கள் பிரிவில் தகுதி பெற்றுள்ளார். ஒரு பெண்ணை மட்டும் அழைத்துச் செல்வது சிரமம் என இந்திய விளையாட்டுக் கழகம் முடிவு செய்துள்ளதாக தமிழ்நாடு விளையாட்டு கவுன்சில் அதிகாரிகள் போன் மூலம் தெரிவித்தனர். இதனால் சமீஹா பர்வீனும், அவரது பெற்றோரும் அதிர்ச்சியடைந்தனர்.

கடந்த ஏழு ஆண்டுகளாகப் பல வேதனைகளை அனுபவித்த நிலையில் போட்டியில் கலந்துகொள்ள முடியாத சூழலால் கடும் வேதனையில் இருக்கிறோம் என்றும் உலக சாம்பியன் ஆக வேண்டும் என்ற ஒற்றை இலக்கை நோக்கிச் செல்லும் பயணத்தில், சொல்ல முடியாத அளவிற்கு சமீஹா பர்வீன் சிரமங்களை எதிர்கொண்டார் எனவும் சமீஹா பர்வீனின் தாய் சலாமத் கூறினார்.

இதனையடுத்து இந்திய விளையாட்டுக் கழகத்தின் இம்முடிவை எதிர்த்து சமீஹா பர்வீன் சென்னை உயர்நீதிமன்றத்தில் வழக்குத் தொடர்ந்துள்ளார். இந்த வழக்கு இன்று விசாரணைக்கு வந்த நிலையில், தகுதிப்போட்டியில் தகுதி பெற்றும், பெண் என்பதால் சர்வதேச விளையாட்டுப் போட்டியில் பங்கேற்கவிடாமல் தடுப்பதா? என அதிருப்தி தெரிவித்த நீதிபதி, இவ்விவகாரம் தொடர்பாக விளையாட்டு மேம்பாட்டு ஆணையம் நாளைக்குள் பதில் தராவிடில் நேரடியாக உத்தரவிட நேரிடும் என எச்சரித்தார்.

பதிவு: August 12, 2021
`60 பேரில் 4வது இடத்தை பிடித்தார்!'- கோல்ஃப் வீராங்கனை அதிதிக்கு ஜனாதிபதி, பிரதமர், சச்சின் வாழ்த்து

டோக்யோ ஒலிம்பிக் மகளிர் கோல்ஃப் போட்டியில் இந்திய வீராங்கனை அதிதி அஷோக் அதிர்ச்சி தோல்வியடைந்தாலும் ஜனாதிபதி, பிரதமர் மோடி வாழ்த்து தெரிவித்துள்ளனர்.

ஜப்பானில் டோக்யோவில் நடைபெற்று வரும் 32-வது ஒலிம்பிக் போட்டிகள் நாளையுடன் நிறைவு பெற உள்ளது. இதில் தற்போது நடைபெற்று வரும் மகளிருக்கான கோல்ப் தனிநபர் போட்டியில் மொத்தம் 4 சுற்றுகள் நடைபெறும். இதில் 3-வது சுற்று நிறைவில் இந்திய வீராங்கனை அதிதி அசோக் 201 புள்ளிகளுடன் 2-வது இடத்தில் இருந்தார்.

இன்று காலை அதிதி அசோக் பங்கேற்ற 4-வது சுற்று போட்டி தொடங்கியது. அப்போது மழை குறுக்கீட்டால் போட்டி பாதிக்கப்பட்டது. மோசமான வானிலையால் போட்டி நிறுத்தப்படும் முன்பாக 3-வது இடத்தில் அதிதி அசோக் இருந்தார். இந்த நிலையில் தனிநபர் ஸ்ட்ரோக் ப்ளே பிரிவு போட்டியில் அதிதி அசோக் நான்காவது இடம் பிடித்து தோல்வியடைந்தார். இப்போட்டியில் 60 பேர் பங்கேற்ற நிலையில், அமெரிக்க வீராங்கனை நெல்லி கோர்டா முதலிடம் பிடித்தார். அதிதி அசோக்குக்கு பதக்கம் கிடைக்கும் என எதிர்பார்க்கப்பட்ட நிலையில் அவர் தோல்வியடைந்தது ஏமாற்றத்தை ஏற்படுத்தியுள்ளது. ஒலிம்பிக் கோல்ஃப்பில் இந்தியர்கள் யாரும் இதுவரை பதக்கத்தை பெறவில்லை.

ஜனாதிபதி ராம்நாத் கோவிந்த் தனது ட்விட்டர் பதிவில், 'நன்றாக விளையாடினீர்கள் அதிதி அசோக்! இந்தியாவின் இன்னொரு மகள் தன் முத்திரையை பதிக்கிறாள். இன்றைய வரலாற்று சாதனைகளால் இந்திய கோல்ஃபிங்கை புதிய உயரத்திற்கு எடுத்துச் சென்றுள்ளீர்கள்" என்று வாழ்த்தியுள்ளார்.

பிரதர் மோடி தனது ட்விட்டர் பதிவில், நன்றாக விளையாடினீர்கள் அதிதி. உங்களது அபார திறமையையும் முயற்சியையும் காட்டியுள்ளீர்கள். பதக்கத்தை தவறி விட்டாலும் இந்தியாவை ஒளிரச் செய்துவிட்டீர்கள். உங்கள் எதிர்கால முயற்சிகளுக்கு வாழ்த்துகள்" என்று கூறியுள்ளார்.

கிரிக்கெட் ஜாம்பவான் சச்சின் தனது ட்விட்டர் பதிவில், ''அற்புதமான முயற்சி அதிதி. பதக்கத்தை தவறவிட்டாலும் சாதித்துவிட்டீர்கள்" என்று பாராட்டியுள்ளார்.

பதிவு: January 01, 1970
`பதக்கத்தை இழந்தாலும் உங்கள் ஆட்டம் ஊக்குவிக்கிறது!'- மகளிர் ஹாக்கி வீரர்களுக்கு குவியும் பாராட்டு

"இந்திய மகளிர் ஹாக்கி அணி, சிறப்பாக விளையாடி அனைவரின் நெஞ்சங்களிலும் இடம் பிடித்துள்ளனர்" என்று ஜனாதிபதி ராம்நாத் கோவிந்த், பிரதமர் மோடி உள்ளிட்டவர்கள் பாராட்டு தெரிவித்துள்ளனர்.

32வது ஒலிம்பிக் போட்டிகள் ஜப்பான் தலைநகர் டோக்யோவில் நடைபெற்று வருகின்றன. இன்று நடைபெற்ற ஒலிம்பிக் மகளிர் ஹாக்கி வெண்கலப் பதக்கத்திற்கான போட்டியில் இந்திய அணி இறுதிவரை போராடி இங்கிலாந்து அணியிடம் 4-3 என்ற கோல் கணக்கில் தோல்வி அடைந்துள்ளது.

இந்தியா 3 கோல்கள் அடித்த நிலையில், இங்கிலாந்து 4 கோல் அடித்து வெண்கலப் பதக்கம் வென்றுள்ளது. இப்போட்டியில் முதல் பாதியில் இந்தியா முன்னிலை பெற்று வந்த நிலையில், இரண்டாம் பாதியில் இங்கிலாந்து முன்னிலை பெற்றுள்ளது.

இந்நிலையில், இந்திய மகளிர் ஹாக்கி அணி, சிறப்பாக விளையாடி அனைவரின் நெஞ்சங்களிலும் இடம் பிடித்துள்ளனர் என்று ஜனாதிபதி ராம்நாத் கோவிந்த் கூறியுள்ளார். இது குறித்து தனது ட்விட்டர் பதிவில், "இந்திய மகளிர் ஹாக்கி அணி களத்தில் சிறந்து விளங்கியது. இந்திய மகளிர் ஹாக்கி அணி, சிறப்பாக விளையாடி அனைவரின் நெஞ்சங்களிலும் இடம் பிடித்துள்ளனர். உங்களை நினைத்து நாங்கள் பெறுமை கொள்கிறோம்" என்று கூறியுள்ளார்.

பிரதமர் நரேந்திர மோடி தனது ட்விட்டர் பதிவில், "ஒலிம்பிக் மகளிர் ஹாக்கி போட்டியில் நூலிழையில் பதக்கத்தை தவறவிட்டோம். ஒலிம்பிக் ஹாக்கி போட்டியில் இந்திய மகளிர் வீராங்கனைகள் தங்களது முழு திறமையையும் வெளிப்படுத்தினர். பதக்கத்தை இழந்தாலும் மகளிர் அணியின் திறமையான ஆட்டம், பலரையும் ஊக்குவிக்கும். இந்திய அணியின் சிறப்பான செயல்திறனை எப்போதும் நினைவில் கொள்வோம்" என தெரிவித்துள்ளார்.

முதல்வர் மு.க.ஸ்டாலின் தனது ட்விட்டர் பதிவில், "இந்திய மகளிர் ஹாக்கி அணியின் ஆட்டம் பதக்கம் பெற்ற பிறரின் முயற்சிகளுக்கு சற்றும் குறைவில்லாதது. முதன்முறையாக ஒலிம்பிக்கின் அரையிறுதிவரை இந்தியாவை கொண்டுசென்றதற்காகவும் இறுதிவரை போராடியதற்காகவும் பாராட்டுகள்” என கூறியுள்ளார்.

பதிவு: January 01, 1970
ஒலிம்பிக்கில் வெண்கலப் பதக்கம்!- 41 ஆண்டுக்கு பிறகு இந்திய ஹாக்கி அணி அசத்தல்; குவியும் வாழ்த்து

41 ஆண்டுகளுக்கு பிறகு டோக்கியோ ஒலிம்பிக் ஹாக்கிப் போட்டியில் இந்தியா பதக்கம் வென்று சாதனை படைத்துள்ளது. இந்திய ஹாக்கி அணிக்கு ஜனாதிபதி, பிரதமர் மோடி, முதல்வர் மு.க.ஸ்டாலின் வாழ்த்து தெரிவித்துள்ளனர்.

டோக்யோவில் நடைபெற்று வரும் ஒலிம்பிக் ஆடவர் ஹாக்கி அரையிறுதி போட்டியில் இந்திய அணி நடப்பு சாம்பியன் பெல்ஜியம் அணியிடம் 2-5 என்கிற கோல் கணக்கில் தோல்வியுற்றது. கடந்த 41 ஆண்டுகளாக பதக்கம் வெல்லாமல் இந்திய ஹாக்கி அணி ஒலிம்பிக்கில் பங்கேற்று வருகிறது. இந்த நிலையில் நடப்பு ஒலிம்பிக்கில் இந்திய ஹாக்கி அணியின் மீதான எதிர்பார்ப்பு அதிகரித்திருந்தது. அதே போல அரையிறுதிக்கான ஆட்டத்தில் ஆஸ்திரேலியாவுடன் மோதிய ஜெர்மனி அணி தோல்வியடைந்தது. இதனையடுத்து ஜெர்மனியை எதிர்த்து இந்தியா கடுமையாக போராடி 5-4 என்கிற கோல் கணக்கில் வெற்றி பெற்றுள்ளது.

இதன் மூலம் 41 ஆண்டுகளுக்கு பின்னர் இந்திய ஹாக்கி அணி ஒலிம்பிக் போட்டியில் பதக்கம் வென்றுள்ளது. ஜனாதிபதி ராம்நாத் கோவிந்த், பிரதமர் மோடி இந்திய இந்த வெற்றிக்கு தனது வாழ்த்துகளை பகிர்ந்துள்ளார்.

ஜனாதிபதி ராம்நாத் கோவிந்த் வெளியிட்டுள்ள வாழ்த்து செய்தியில், "ஒலிம்பிக் போட்டியில் வெண்கலம் வென்று வரலாறு படைத்த இந்திய ஹாக்கி அணிக்கு வாழ்த்துகள். இந்திய ஆடவர் ஆக்கி அணி பெற்ற வெற்றி ஹாக்கியில் புதிய சகாப்தத்தை உருவாக்கி உள்ளது. விளையாட்டில் சாதிக்க துடிக்கும் இளைஞர்களுக்கு இந்திய அணியின் வெற்றி உந்து சக்தியாக இருக்கும்" என்று கூறியுள்ளார்.

பிரதமர் மோடி வெளியிட்டுள்ள வாழ்த்து செய்தியில், "வரலாற்று! ஒவ்வொரு இந்தியரின் நினைவிலும் பொறிக்கப்படும் நாள். வெண்கலத்தை வீட்டிற்கு கொண்டு வந்த எங்கள் ஆண்கள் ஆக்கி அணிக்கு வாழ்த்துகள். இந்த சாதனையின் மூலம், ஒட்டுமொத்த நாட்டின் குறிப்பாக நமது இளைஞர்களின் கற்பனையை அவர்கள் நிறைவேற்றி உள்ளனர். எங்கள் ஹாக்கி அணியை நினைத்து இந்தியா பெருமிதம் கொள்கிறது" என கூறியுள்ளார்.

முதல்வர் மு.க.ஸ்டாலின் வெளியிட்டுள்ள வாழ்த்து செய்தியில், "41 வருட காத்திருப்பு முடிவுக்கு வருகிறது. ஆண்கள் ஹாக்கியில் 12 வது ஒலிம்பிக் பதக்கம் வென்ற இந்திய அணிக்கு எனது வாழ்த்துகள். நான் உறுதியாக நம்புகிறேன், டோக்யோ 2020ல் இந்த வெற்றியுடன், இந்திய ஹாக்கி அணி வரலாற்றில் ஒரு புதிய அத்தியாயம் தொடங்கியுள்ளது" என கூறியுள்ளார்.

பதிவு: August 05, 2021
ஒலிம்பிக்கில் இந்தியாவுக்கு மேலும் ஒரு மகுடம்!- பதக்கம் வென்று சாதித்தார் லவ்லினா

டோக்யோ ஒலிம்பிக் மகளிர் குத்துச் சண்டை அரையிறுதியில் இந்திய வீராங்கனை லவ்லினா போர்கோஹெய்ன் தோல்வி தழுவினாலும் இந்தியாவுக்காக இன்னொரு பதக்கமாக வெண்கலம் வென்று சாதனை படைத்தார்.

அரையிறுதியில் துருக்கி வீராங்கனை சர்மெனேலி 5-0 என்று வெற்றி பெற்று இறுதிக்கு முன்னேறினார். ஆனால் போராடி தோல்வி கண்ட லவ்லினா வெண்கலப்பதக்கம் வென்றார். காலிறுதியில் அபார வெற்றி பெற்ற பிறகே வெண்கலப்பதக்கத்தை உறுதி செய்தார் லவ்லினா. இருந்தாலும் இவரது திறமைக்கு தங்கம் அல்லது வெள்ளி வெல்வார் என்று எதிர்பார்த்த நிலையில் உலக சாம்பியன் வீராங்கனையிடம் அரையிறுதியில் போராடி தோல்வி தழுவினார் லவ்லினா. இதன் மூலம் வெண்கலப் பதக்கம் வென்று இந்திய ஒலிம்பிக் வரலாற்று புத்தகத்தில் இடம்பெற்றார்.

இதன் மூலம் இந்தியா டோக்யோ ஒலிம்பிக் போட்டித் தொடரில் 2 வெண்கலம், ஒரு வெள்ளியுடன் 3 பதக்கங்கள் பெற்றுள்ளது. மீராபாய் சானு பளுத்தூக்குதல் வெள்ளி, பி.வி.சிந்து பாட்மிண்டன் வெண்கலம் ஆகியவற்றை அடுத்து லவ்லினா என்ற 3வது பெண் இந்தியாவுக்கு இன்னொரு வெண்கலம் வென்று தந்துள்ளார். வெல்ட்டர் வெய்ட் 69 கிலோ எடைப்பிரிவில் வெண்கலம் வென்று சாதனை படைத்துள்ளார் லவ்லினா போர்கோஹெய்ன்.

அரையிறுதி முதல் சுற்றில் துருக்கி வீராங்கனை புசெனாஸ் சர்மெனேலி 5 ஜட்ஜ்களிடமிருந்தும் 10 புள்ளிகள் பெற லவ்லினா 9 புள்ளிகள் பெற்று நெருக்கமாக வந்தார். இரண்டாவது சுற்றிலும் அதே போல் சர்மெனேலி 5 ஜட்ஜ்களிடமிருந்து 10 புள்ளிகள் பெற லவ்லினா 9 புள்ளிகள் பெற்று நெருங்கி வந்து தோற்றார். அடுத்த சுற்றில் துருக்கி வீராங்கனை சர்மெனேலி மீண்டும் 10 புள்ளிகளை அனைத்து ஜட்ஜ்களிடமிருந்து பெற லவ்லினா 9,9,9, 8,8 என்று பெற்று பின் தங்கினார். இதனையடுத்து 0-5 என்று தோல்வி தழுவினாலும் வெண்கலம் வென்றார் லவ்லினா.

லவ்லினா போர்கோஹெய்ன் அசாம் மாநிலத்தைச் சேர்ந்தவர். இந்த போட்டியை காண்பதற்காக அம்மாநில சட்டப்பேரவை நடவடிக்கைகள் 20 நிமிடங்கள் ஒத்திவைக்கப்பட்டது.

இதனிடையே, லவ்லினாவுக்கு பிரதமர் மோடி வாழ்த்து தெரிவித்துள்ளார். அவர் தனது ட்விட்டர் பக்கத்தில், "ஒலிம்பிக் போட்டியில் வெண்கலப் பதக்கம் வென்ற இந்திய வீராங்கனை லவ்லினாவிற்கு வாழ்த்துகள். குத்துச்சண்டையில் லவ்லினா பெற்ற வெற்றி இந்தியர்களை மேலும் ஊக்கப்படுத்தும். போட்டியில் லவ்லினாவின் உறுதித்தன்மை போற்றத்தக்கது" என கூறியுள்ளார்.

பதிவு: January 01, 1970
ஒலிம்பிக்!- ஈட்டி எறிதல், மல்யுத்தத்தில் கலக்கிய இந்திய வீரர்கள்

டோக்யோ ஒலிம்பிக்கின் ஈட்டி எறிதல் போட்டியில் இந்திய வீரர் நீரஜ் சோப்ரா இறுதிப்போட்டிக்கும், மல்யுத்த போட்டியில் இந்திய வீரர்கள் தீபக் புனியா காலிறுதிக்கும், ரவிக்குமார் அரையிறுதிக்கும் முன்னேறி உள்ளனர்.

32-வது ஒலிம்பிக் போட்டிகள் ஜப்பான் தலைநகர் டோக்யோவில் நடைபெற்று வருகின்றன. அதில் இந்தியாவுக்காக பதக்கம் வெல்வார் என்று எதிர்பார்க்கப்படும் வீரர்களில் ஒருவர் நீரஜ் சோப்ரா. இன்று காலை ஆண்களுக்கான ஈட்டி எறிதல் தகுதிச்சுற்று போட்டி நடைபெற்றது. இதில் இந்தியா சார்பில் கலந்து கொண்ட நீரஜ் சோப்ரா தனது முதல் வாய்ப்பில் 86.65 மீட்டர் தூரம் எறிந்து அசத்தினார். இதன்மூலம் இறுதிச் சுற்றுக்கு முன்னேறும் வாய்ப்பை பெற்றார். இதனைத்தொடர்ந்து ஆகஸ்ட் 7-ம் தேதி நடைபெறும் ஈட்டி எறிதலுக்கான இறுதிச்சுற்று போட்டியில் அவர் கலந்து கொள்வார்.

இன்று காலை நடைபெற்ற மல்யுத்தப்போட்டியின் 86 கிலோ எடைப்பிரிவில் இந்திய வீரர் தீபக் புனியா காலிறுதிக்கு முன்னேறினார். காலிறுதிக்கு முந்திய சுற்றில் நைஜீரிய வீரர் எகெரெகெமியை 12-1 என்ற புள்ளிக்கணக்கில் வீழ்த்தினார்.

ஒலிம்பிக் ஆடவர் மல்யுத்த போட்டி 57 கி எடை பிரிவில் இந்தியாவின் ரவிக்குமார் கொலம்பிய வீரரை 13-2 கணக்கில் வீழ்த்தியுள்ளார். இதன் மூலம் காலிறுதி சுற்றுக்கு தகுதி பெற்றுள்ளார். 8 நாட்டின் வீரர்கள் பங்கேற்ற காலிறுதிக்கான தகுதி சுற்று போட்டியில் கொலம்பியாவின் அர்பனோவை ரவிக்குமார் எதிர்கொண்டார். அதே போல செர்பியாவின் மிகிக்கை எதிர்கொண்ட ஜப்பானின் டகஹஹி காலிறுதிக்கு முன்றேயுள்ளார்.

இதனைத் தொடர்ந்து காலிறுதி போட்டியில், பல்கேரியாவின் வான்கலோவை எதிர்கொண்ட ரவிக்குமார் 14-4 என்கிற செட் கணக்கில் வெற்றி பெற்று அரையிறுதிக்கு முன்னேறியுள்ளார்.

பதிவு: August 04, 2021

முக்கிய செய்திகள்

'தமிழகத்தில் புழங்கும் பரிசுச்சீட்டு விற்பனையை முற்றிலும் தடை செய்யவேண்டும்' - பாமக நிறுவனர் ராமதாஸ் வலியுறுத்தல்!

தமிழகத்தில் புழக்கத்தில் இருக்கும் பரிசுச்சீட்டு விற்பனையை தமிழக அரசு முற்றிலும் தடைசெய்ய வேண்டும் என்று பாமக நிறுவனர் ராமதாஸ் அறிவுறுத்தியுள்ளார்.

இதுகுறித்து அவர் ட்விட்டரில் வெளியிட்டுள்ள செய்தியறிக்கையில், 

சேலத்தில் தடை செய்யப்பட்ட பரிசுச்சீட்டு விற்பனை நடைபெற்று வருவது காட்சி ஊடகம் மூலம் ஆதாரங்களுடன் அம்பலப்படுத்தப்பட்டிருக்கிறது. தடை செய்யப்பட்ட பரிசுச்சீட்டுகள் கட்டுப்பாடின்றி தொடர்ச்சியாக விற்பனை செய்யப்பட்டு வருவது அதிர்ச்சியளிக்கிறது

சேலம், சென்னை உட்பட தமிழகத்தின் பெரும்பான்மையான இடங்களில் தடை செய்யப்பட்ட பரிசுச்சீட்டுகளும், ஒரு நம்பர் பரிசுச்சீட்டுகளும் தடையின்றி விற்பனை செய்யப்பட்டு வருகின்றன. பாட்டாளி மக்கள் கட்சியும் இந்த சமூகத் தீமையை ஒழிக்க வேண்டும் என வலியுறுத்தி வருகிறது

ஆன்லைன் சூதாட்டம் என்ற மிகப்பெரிய சமூகத் தீமைக்கு தமிழக அரசு முடிவு கட்டியிருக்கிறது. ஆன்லைன் சூதாட்டத்தால் எத்தனைக் குடும்பங்கள் சீரழிகின்றனவோ, அதை விட அதிக எண்ணிக்கையிலான குடும்பங்கள் தடை செய்யப்பட்ட பரிசுச்சீட்டுகளால் சீரழிந்து கொண்டிருக்கின்றன

தமிழகத்தில் 2003-ஆம் ஆண்டே பரிசுச்சீட்டுகள் தடை செய்யப்பட்டு விட்டன. அந்தத் தடையை முழுமையாக செயல்படுத்த வேண்டும். பரிசுச்சீட்டுகளை விற்போர் மீது கடுமையான நடவடிக்கை மேற்கொள்ளப்பட வேண்டும். அதன் மூலம் ஏழைக் குடும்பங்கள் வீதிக்கு வருவதை தடுக்க வேண்டும்" இவ்வாறு தெரிவிக்கப்பட்டுள்ளது.

பதிவு: June 28, 2022
AltNews இணை நிறுவனர் முகமது ஜுபைர் கைது! FIR கூட வழங்காமல் கைதுசெய்துவிட்டதாக மற்றொரு இணை நிறுவனர் தகவல்!

AltNews இணை நிறுவனர் முகமது ஜுபைர் டெல்லி போலீசாரால் கைது செய்யப்பட்டுள்ளார். 2018-ல் அவரது ட்விட்டர் பக்கத்தில் அவர் பதிவிட்ட ஒரு கருத்தின் காரணமாக அவர் கைதுசெய்யப்பட்டுள்ளார்.

ட்விட்டரில் பகிரப்படும் செய்திகளின் உண்மைத்தன்மையை ஆராய்ந்து அதுகுறித்த தகவல்களை ட்விட்டர்வாசிகளுக்குப் பகிர்பவர் பத்திரிகையாளர் முகமது ஜுபைர். இவர் AltNews செய்தி நிறுவனத்தின் இணை இயக்குநர் ஆவார். அண்மையில், தனியார் தொலைக்காட்சியில் நபிகள் நாயகம் குறித்து பாஜக தேசிய செய்தி தொடர்பாளர் நுபுர் சர்மா பேசிய காணொலியை வலைதளங்களில் பகிர்ந்தவர் இவரே. அது உலக அளவில் கவனம் பெற்று பல்வேறு எதிர்ப்பலைகளைக் கிளப்பியது.

இந்நிலையில், 2018-ல் அவரது ட்விட்டர் பக்கத்தில் அவர் பதிவிட்ட ஒரு கருத்தின் காரணமாக நேற்றைய தினம் டெல்லி காவலர்களால் கைது செய்யப்பட்டுள்ளார். கைதிற்கு முன்னதாக வழக்கு ஒன்றின் விசாரணைக்காக திங்கள்கிழமை வருமாறு அவரை டெல்லி காவல்துறையின் தனிப்பிரிவினர் அழைத்திருந்ததாகவும், ஆனால் வேறொரு வழக்கில் அவருக்கு எதிராக பதிவு செய்யப்பட்டிருந்த முதல் தகவல் அறிக்கையின் அடிப்படையில் அவர் கைது செய்யப்பட்டதாக போலீஸார் கூறியதாகவும் AltNews நிறுவனத்தின் மற்றொரு இணை நிறுவனர் பிரதீக் சின்ஹா தெரிவித்தார்.

இதுகுறித்து அவர் தனது ட்விட்டர் பக்கத்தில், "2020-ஆம் ஆண்டு பதிவு செய்யப்பட்டிருந்த வழக்கு ஒன்றின் விசாரணைக்காக வரும்படி டெல்லி காவல்துறையின் தனிப்பிரிவினர் அவரை அழைத்தனர். அந்த வழக்கில் தாம் கைது செய்யப்படாமல் இருக்க நீதிமன்றத்தில் இருந்து முன்னதாகவே உத்தரவைப் பெற்றிருந்தார் முகமது ஜுபைர். ஆனால், விசாரணைக்கு ஆஜரான அவரை மாலை 6.45 மணியளவில் வேறொரு வழக்கில் அதன் முதல் தகவல் அறிக்கை நகலைக் கூட வழங்காமல் போலீஸார் கொண்டு சென்றனர். பல முறை கேட்டும் போலீஸார் முதல் தகவல் அறிக்கையைக் காண்பிக்கவில்லை. அவரைக் கொண்டு சென்ற வேனில் இருந்தவர்கள் தங்களுடைய பெயர் பேட்ஜை சீருடையில் அணிந்திருக்கவில்லை" என்று தெரிவித்துள்ளார்.

முகமது ஜுபைர் மீது இந்திய தண்டனைச் சட்டம் 153A (மதம், இனம், பிறந்த இடம், வசிப்பிடம், மொழி ஆகியவற்றின் அடிப்படையில் வெவ்வேறு குழுக்களிடையே பகைமையை ஊக்குவித்தல்) மற்றும் 295A (எந்தவொரு வகுப்பினரின் மத உணர்வுகளையும் சீற்றம் செய்யும் நோக்கில் வேண்டுமென்றே மற்றும் தீங்கிழைக்கும் செயலில் ஈடுபடுதல் மற்றும் மதம் அல்லது மத நம்பிக்கைகளை அவமதித்தல்) உள்ளிட்ட பிரிவுகளின் கீழ் வழக்குப் பதிவு செய்யப்பட்டுள்ளது. ஆனால், அந்த வழக்கில் புகார்தாரர் யார், அதன் விவரம் என்ன என்பதை போலீஸார் தெரிவிக்கவில்லை.

முகமது ஜுபைரின் கைதிற்கு பல்வேறு அரசியல் கட்சி தலைவர்களும் கண்டனம் தெரிவித்துவருகின்றனர். காங்கிரசார் பலரும், உண்மைக்கு புறம்பான செய்திகளைப் பரப்பும் பாஜக நிர்வாகிகளுக்கு மத்திய அரசு பாதுகாப்பும், உண்மையின் குரலாய் அவதூறுகளை வெளிச்சத்திற்குக் கொண்டுவருபவர்கள் மீது வழக்குகளும் பதிந்துவருவதாக சாடியுள்ளனர்.

இந்நிலையில், ஜுபைர் அகமதின் கைது நடவடிக்கை குறித்து தனது ட்விட்டர் பக்கத்தில் பதிவிட்டுள்ள காங்கிரஸ் எம்.பி. ராகுல்காந்தி, "பாஜகவின் வெறுப்பு, மதவெறி மற்றும் பொய்களை அம்பலப்படுத்தும் ஒவ்வொரு நபருக்கும் அவர்களால் அச்சுறுத்தல் ஏற்படுகிறது. உண்மையின் ஒரு குரலைக் கைது செய்வது இன்னும் ஆயிரம் பேரை தட்டி எழுப்பும். உண்மை எப்போதும் கொடுங்கோன்மையின் மீது வெற்றி பெறும்" என்று தனது எதிர்ப்பைத் தெரிவித்துள்ளார்.

மேலும் இதுகுறித்து மஜ்லிஸ் கட்சியின் தலைவர் அசாதுதீன் ஒவைசி தனது ட்விட்டர் பக்கத்தில், "முகமது ஜுபைர் கைது செய்யப்பட்டிருப்பது வன்மையாக கண்டிக்கத்தக்கது. அவர் எந்த அறிவிப்பும் இல்லாமல் & சில அறியப்படாத FIR-இல் கைது செய்யப்பட்டுள்ளார். டெல்லி காவல்துறை முஸ்லீம்களுக்கு எதிரான இனப்படுகொலை முழக்கங்களைப் பற்றி எதுவும் செய்யவில்லை. ஆனால் வெறுப்பூட்டும் பேச்சு மற்றும் தவறான தகவல்களை எதிர்க்கும் "குற்றத்திற்கு" எதிராக விரைவாக செயல்படுகிறது" என்று தெரிவித்துள்ளார்.

பதிவு: June 28, 2022
தமிழக அரசின் உயர்கல்விக்கான ரூ.1000 உதவித்தொகை பெறும் திட்டத்திற்கு யாரெல்லாம் விண்ணப்பிக்க முடியும், முடியாது! விபரங்கள் இதோ!

அரசுப்பள்ளிகளில் பயின்ற மாணவிகளுக்கு உயர்கல்வி பயில்வதற்காக அரசுத்தரப்பிலிருந்து மாதந்தோறும் ரூ.1000 உதவித்தொகை வழங்கப்படும் என்று அறிவிக்கப்பட்ட நிலையில், அதற்கு யாரெல்லாம் தகுதி பெற்றவர்கள் என்ற விபரங்களை தமிழக அரசு வெளியிட்டுள்ளது. 

அதுகுறித்த விவரங்கள் பின்வருமாறு:

1. மாணவிகள் 6-ஆம் வகுப்பு முதல் 12-ஆம் வகுப்பு வரை தமிழ்நாட்டில் உள்ள அரசுப் பள்ளிகளில் படித்து தமிழ்நாட்டில் உயர்கல்வி பயில்பவராக இருத்தல் வேண்டும்.

2. தனியார்ப் பள்ளியில் Right to Education (RTE)யின் கீழ் 6-ஆம் வகுப்பு முதல் 8-ஆம் வகுப்பு வரை பயின்ற பின் 9-ஆம் வகுப்பு முதல் 12-ஆம் வகுப்பு வரை அரசுப் பள்ளியில் படித்த மாணவியர் இத்திட்டத்தின் கீழ் பயனடையலாம்.

3. அரசுப் பள்ளிகள் என்பது பஞ்சாயத்து யூனியன் தொடக்க மற்றும் நடுநிலைப் பள்ளிகள், ஆதிதிராவிடர் நலப் பள்ளிகள், நகராட்சிப் பள்ளிகள், மாநகராட்சி பள்ளிகள், பழங்குடியினர் நலப் பள்ளிகள், கள்ளர் சீர்மரபினப் பள்ளிகள், பிற்படுத்தப்பட்டோர்/ மிகவும் பிற்படுத்தப்பட்டோர் நல பள்ளிகள், மாற்றுத்திறனாளிகள் நலத்துறை பள்ளிகள், வனத்துறை பள்ளிகள், சமூகப் பாதுகாப்புத் துறை பள்ளிகள் போன்றவற்றில் பயிலும் மாணவிகளும் இத்திட்டத்தின் கீழ் பயனடையலாம்.

4. மாணவிகள் 8 (அ) 10 (அ) 12 வகுப்புகளில் படித்து பின்னர் முதன் முறையாக உயர்கல்வி நிறுவனங்களில் (Higher Education Institutions) சேரும் படிப்புக்கு மட்டுமே இத்திட்டம் பொருந்தும். [சான்றிதழ் (Certificate course), பட்டயம் (Diploma / ITI, D.TEd., courses), இளங்கலைப் பட்டம் (Bachelor's Degree) (B.A., B.Sc., B.Com., BBA., BCA. and all Arts & Science, Fine Arts Courses), தொழில்சார்ந்த படிப்பு (B.E., B.Tech, M.B.B.S., B.D.S., B.Sc.(Agri). B.V.Sc., B.Fsc., B.L, etc.) மற்றும் பாரா மெடிக்கல் படிப்பு (Nursing. Pharmacy, Medical Lab Technology, Physiotherapy etc.. CUITO D000.). தொலைதூரக் கல்வி மற்றும் திறந்தவெளி பல்கலைக்கழகத்தில் பயிலும் மாணவிகளுக்கு இத்திட்டம் பொருந்தாது.

5. 2022-2023ஆம் கல்வியாண்டில், மாணவியர்கள் புதிதாக மேற்படிப்பில் முதலாம் ஆண்டு சேர்ந்த பின்னர், இணையதளம் வழியாக இத்திட்டத்திற்கு விண்ணப்பிக்கலாம். மேலும், இதர முதலாம் ஆண்டிலிருந்து இரண்டாம் ஆண்டு செல்லும் மாணவியரும், இரண்டாம் ஆண்டிலிருந்து மூன்றாம் ஆண்டு செல்லும் இளங்கலை பட்டப்படிப்பு பயிலும் மாணவியர்களும்,தொழிற்கல்வியைப் பொருத்தமட்டில் மூன்றாம் ஆண்டிலிருந்து நான்காம் ஆண்டிற்கு செல்லும் மாணவிகளுக்கும், மருத்துவக் கல்வியைப் பொருத்தமட்டில் நான்காம் ஆண்டிலிருந்து ஐந்தாம் ஆண்டு செல்லும் மாணவியர்களும் இத்திட்டத்தின் கீழ் பயனடையலாம்.

6. 2021-2022 ஆம் ஆண்டில், இறுதியாண்டு பயிலும் மாணவிகள் இத்திட்டத்தின் கீழ் பயனடைய இயலாது. ஏனெனில் ஒரு சில மாதங்களில் இம்மாணவியர்கள் தங்களது இளநிலைப் படிப்பினை (under graduation) நிறைவு செய்துவிடுவார்கள்.

7. இத்திட்டத்தின் கீழ் இளநிலை படிப்பு பயிலும் மாணவிகள் மட்டுமே பயனடைய இயலும், முதுநிலை படிப்பு பயிலும் மாணவியர்கள் இத்திட்டத்தின் கீழ் பயன்பெற இயலாது. இத்திட்டத்தில் பயன்பெறுவது குறித்து தங்களுக்கு தேவையான தெளிவுரைகள்/கூடுதல் விவரங்களை கட்டணமில்லா தொலைப்பேசி எண் 14417 என்ற எண்ணிற்கு தொடர்பு கொண்டு விவரங்களை பெறலாம் என தெரிவிக்கப்படுகிறது.

8. இளநிலை கல்வி பெறும் அனைத்து மாணவியரும் (இளநிலை முதலாம் ஆண்டு சேரும் மாணவியர்களும், இளங்கலை/தொழிற்கல்வி/மருத்துவக் கல்வியில் 2-ஆம் ஆண்டு முதல் 5-ஆம் ஆண்டு வரை பயிலும் மாணவிகளும்) இத்திட்டத்திற்காகப் புதியதாக உருவாக்கப்பட்டுள்ள இணையதளம் https://penkalvi.tn.gov.in வழியாக தங்கள் விண்ணப்பங்களைப் பதிவேற்றம் செய்யக் கேட்டுக் கொள்ளப்படுகிறார்கள்.

 

பதிவு: June 27, 2022
'அஸ்ஸாம் மக்களின் துயரைக் கண்டுகொள்ளாமல் எம்.எல்.ஏ.,க்களை கடத்திவந்து கும்மாளம் போடுகிறீர்களா?; இதுதான் பாஜகவின் உண்மை முகம்' - கே.பாலகிருஷ்ணன் ஆவேசம்!

மழை வெள்ளத்தால் பாதிக்கப்பட்டுள்ள அஸ்ஸாம் மக்களின் துயரத்தை நினைத்து கவலைப்படாமல், பாஜக மாநில அரசு, மகாராஷ்டிராவில் பாஜக ஆட்சி அமைய சகுனி ஆட்டம் ஆடிவருவதாக கம்யூனிஸ்ட் கட்சியின் மாநில செயலாளர் கே.பாலகிருஷ்ணன் குற்றம்சாட்டியுள்ளார்.

இதுகுறித்து ட்விட்டரில் அவர் பதிவிட்டுள்ள செய்திக்குறிப்பில், 

"அசாமில் பெரும் வெள்ளப்பெருக்கு ஏற்பட்டுள்ளது. இதில் லட்சக்கணக்கான மக்கள் பாதிக்கப்பட்டுள்ளார்கள். குறைந்தது 200 உயிர்கள் இதுவரை பலியாகியிருக்கின்றன. உண்மை பலி விபரம் இன்னும் அதிகமாக இருக்கும்.

வீடுகளை, இருப்பிடத்தை இழந்து சாலைகளில் கண்ணீரோடு தவிக்கும் மக்களின் துயரை வார்த்தைகளால் அடக்க முடியாது. இந்த நிலைமை பற்றியெல்லாம் ஒன்றிய அரசுக்கு கொஞ்சமும் கவலை கிடையாது. அசாம் பாஜக முதல்வருக்கும் எந்த பதட்டமும் இல்லை. மாறாக அவர் ரேடிசன் புளூ விடுதியை கண்காணித்துக்கொண்டுள்ளார்.

அங்கேதான், மராட்டிய எம்.எல்.ஏக்கள் கடத்தி வரப்பட்டு, ஐந்து நட்சத்திர விடுதியில் கும்மாளத்துடன் தங்க வைக்கப்பட்டுள்ளனர். கூட்டணி அரசை கவிழ்த்து, மராட்டியத்தில் தான் ஆட்சியமைக்க வேண்டும் என்று பாஜக இந்த சகுனி ஆட்டத்தை நடத்தி வருகிறது.
 
மக்களை கண்ணீரில் தத்தளிக்க விட்டு, அதிகார மமதையில் ஆட்டம் போடுகிறார்கள். இதுதான் பாஜகவின் உண்மை முகம்" இவ்வாறு பதிவிட்டுள்ளார்.
 
பதிவு: June 25, 2022
'முகாமில் அடைக்கப்பட்டுள்ள ஈழச்சொந்தங்களை உடனடியாக அரசு விடுவிக்க வேண்டும்; தவறினால் மாநிலம் தழுவிய போராட்டத்தை முன்னெடுப்போம்' - சீமான்!

திருச்சி முகாமில் அடைக்கப்பட்டுள்ள ஈழத்தமிழர்களை உடனடியாக விடுவிக்க வேண்டும் என்றும் தவறினால் மாநிலம் தழுவிய மக்கள்திரள் போராட்டத்தை முன்னெடுப்பதாகவும் நாம் தமிழர் கட்சி ஒருங்கிணைப்பாளர் சீமான் தமிழக அரசிடம் வலியுறுத்தியுள்ளார்.

இதுகுறித்து அவர் வெளியிட்டுள்ள செய்தியறிக்கையில்,

"திருச்சி, சிறப்பு முகாமில் அடைக்கப்பட்டுள்ள ஈழச்சொந்தங்களில் 30 பேர் மாத்திரை உட்கொண்டும், ஒருவர் தீக்குளித்தும் தற்கொலைக்கு முயன்றதுமான செய்திகள் பேரதிர்ச்சி தருகின்றன. ‘விதியே! விதியே! என் செய நினைத்திட்டாய் என் தமிழ்ச்சாதியை?’ எனும் பெரும்பாவலன் பாரதியின் கூற்றுக்கிணங்க, தாய்த்தமிழகத்திலேயே ஈழச்சொந்தங்களுக்கு நிகழ்ந்தேறும் இக்கொடுமைகள் கண்டு மனம்வெதும்புகிறேன்.

தங்களை ஏதிலிகளென இந்தியச்சட்டத்தின்படி பதிவுசெய்துள்ள ஈழச்சொந்தங்களையும் சட்டவிரோதமாகக் குடியேறியவர்களெனக் கூறி, சிறப்பு முகாம் எனப்படும் சித்திரவதைக்கூடங்களில் அந்நிய நாட்டவர்களோடு அடைத்து வைத்துள்ள அநீதிக்கெதிராக, தங்களை விடுவிக்கக்கோரி 35 நாட்களுக்கும் மேலாகப் பட்டினிப்போராட்டம் செய்து அரசு மனமிறங்காத நிலையிலேயே, ஆற்றாமையும், விரக்தியும் தாளாது இத்தகையக் கொடிய முடிவை ஈழச்சொந்தங்கள் எடுத்துள்ளனர் என்பது ஏற்கவே முடியாதப் பெருந்துயரமாகும்.

இந்நாட்டுக்குத் துளியும் தொடர்பற்ற திபெத்தியர்கள் ஏதிலிகளாக அரசால் அங்கீகரிக்கப்பட்டு, அடிப்படை வசதிகளும், பொருளாதார வாய்ப்புகளும் அவர்களுக்கு வழங்கப்பெற்று, பெரும் மதிப்போடு நடத்தப்படும் வேளையில், இந்நாட்டில் வாழும் எட்டுக்கோடி தமிழ்ச்சொந்தங்களின் தொப்புள்கொடி உறவான ஈழச்சொந்தங்கள் குற்றவாளிகளாகச் சித்தரிக்கப்படுவதும், அடிப்படை மானுட உரிமைகளும், அத்தியாவசிய இருப்பு நடவடிக்கைகளும்கூட அளிக்கப்படாது மறுக்கப்படுவதும் தமிழினத்திற்கு இந்நாட்டு அரசுகள் செய்யும் பெருந்துரோகமாகும். தமிழர்களின் வரலாற்றுத்தாயகமான தமிழகத்திலேயே ஈழச்சொந்தங்கள் நாதியற்றவர்கள் போல நாளும் நடத்தப்படுவதும், அவர்களது உணர்வுகளுக்கும், உரிமைகளுக்கும் மதிப்பளிக்கப்படாது அவமதிக்கப்படுவதும் வெட்கித்தலைகுனிய வேண்டிய பெரும் அவமானமாகும்.

தேர்தலுக்கு முன்பு, ஈழச்சொந்தங்களுக்குக் குடியுரிமைப் பெற்றுத் தருவோம் என வாக்குறுதி அளித்த மாண்புமிகு முதல்வர் ஐயா ஸ்டாலின் அவர்கள், தற்போது ஏதிலிகளாகக்கூட அவர்களை வாழவிடாது வஞ்சிப்பது எந்தவகையில் நியாயம்? இதுதான் சமூக நீதியா? ‘ஈழத்தமிழர் எங்கள் இரத்தம்’ என மேடையில் முழக்கமிட்ட முதல்வர் ஸ்டாலின் அவர்கள், இப்போது இரத்தம் வற்றிப்போகிற அளவுக்கு அவர்கள் பட்டினிக்கிடந்து, உடல்மெலிந்து கோரிக்கை வைத்தும் செவிமடுக்காதது ஏன்? அவர்களுக்கு வாக்கில்லை என்பதால், அவர்களது வறண்ட நாக்குகள் இடுகிற முழக்கங்கள் உங்கள் செவிப்பறைக்கு எட்டவில்லையா முதல்வரே? உயிரை முன்னிறுத்தி, போராட்டம்செய்தும் உங்கள் இதயக்கதவுகள் திறக்காதென்றால், நடப்பது தமிழர்களுக்கான ஆட்சியா? இல்லை! சிங்களர்களுக்கான ஆட்சியா? இதுதான் நீங்கள் விடியல் தரும் இலட்சணமா? வெட்கக்கேடு! பேரவலம்!

ஆகவே, இந்தியச்சட்டநெறிமுறைகளின்படி, தங்களை ஏதிலிகளாகப் பதிவுசெய்தும் சட்டவிரோதக் குடியேறியவர்களெனக்கூறி, திருச்சி, சிறப்பு முகாமில் அடைக்கப்பட்டுள்ள ஈழச்சொந்தங்களை உடனடியாக விடுவிக்க வேண்டுமென தமிழக அரசை வலியுறுத்துகிறேன். அதனைச் செய்யத் தவறும்பட்சத்தில், மாநிலம் தழுவிய மக்கள்திரள் போராட்டத்தை முன்னெடுப்போமெனப் பேரறிவிப்பு செய்கிறேன்" இவ்வாறு குறிப்பிடப்பட்டுள்ளது.

பதிவு: June 25, 2022
'மெட்ரிக் பள்ளிகளில் இடஒதுக்கீடு அளிக்காத பள்ளிகள் மீது கடுமையான நடவடிக்கை எடுக்கவேண்டும்' - அன்புமணி ராமதாஸ் வலியுறுத்தல்!

தமிழகத்திலுள்ள பெரும்பாலான மெட்ரிக் பள்ளிகளில் 69% இடஒதுக்கீடு கடைபிடிக்கப்படுவதில்லை என்றும், அப்பள்ளிகள் மீது அரசு நடவடிக்கை எடுக்கவேண்டும் என்றும் பாமக தலைவர் அன்புமணி ராமதாஸ் வலியுறுத்தியுள்ளார்.

இதுகுறித்து அவரது ட்விட்டர் பக்கத்தில் அவர் பதிவிட்டுள்ள அறிக்கையில்,

"தமிழ்நாட்டில் உள்ள அனைத்து மெட்ரிக் பள்ளிகளிலும் 69% இட ஒதுக்கீட்டை கண்டிப்பாக செயல்படுத்த வேண்டும் என்று பள்ளிக்கல்வித்துறை ஆணையிட்டிருக்கிறது. மாணவர் சேக்கையில் சமூகநீதியை நிலைநாட்ட பள்ளிக்கல்வித்துறை காட்டும் அக்கறை பாராட்டத்தக்கது!

தமிழ்நாட்டில் மெட்ரிக் பள்ளிகள் தொடங்கப்பட்ட நாளில் இருந்தே அவை தமிழக அரசின் இட ஒதுக்கீட்டை கடைபிடிப்பது கட்டாயம் ஆகும். ஆனால், பெரும்பான்மையான தனியார் பள்ளிகள் 69% இட ஒதுக்கீட்டை கடைபிடிப்பதில்லை என்பது தான் வேதனையான உண்மை!

ஊரகப்பகுதிகளில் உள்ள சாதாரண மெட்ரிக் பள்ளிகள் 69% இட ஒதுக்கீட்டை பின்பற்றுகின்றன. அதிகக் கட்டணம் வசூலிக்கும் நகர்ப்புறங்களில் உள்ள புகழ் பெற்ற பள்ளிகள் தான் தமிழக அரசின் இட ஒதுக்கீட்டு விதிகளை மதிப்பதில்லை. அவை மீது கடுமையான நடவடிக்கை எடுக்கப்பட வேண்டும்!

அனைத்து மெட்ரிக் பள்ளிகளிலும் 69% இட ஒதுக்கீடு கடைபிடிக்கப்படுவதை அரசு உறுதி செய்ய வேண்டும்; ஒவ்வொரு ஆண்டும் மாணவர் சேர்க்கை முடிவடைந்த பிறகு பள்ளி வாரியாக இட ஒதுக்கீடு நடைமுறைப்படுத்தப்பட்டது குறித்த விவரங்கள் அடங்கிய வெள்ளை அறிக்கையை அரசு வெளியிட வேண்டும்" இவ்வாறு பதிவிட்டுள்ளார்.

பதிவு: June 24, 2022
ஒபிஎஸ் மீது தண்ணீர் பாட்டில் வீச்சு; வாகனத்தின் டயர் பஞ்சர் செய்யப்பட்டு அட்டூழியம்! கூட்டத்தில் பெரிதும் அவமதிக்கப்பட்ட ஒபிஎஸ்... அடுத்த நகர்வு என்ன?

பரபரப்பான சூழலில் அதிமுக பொதுக்குழுக்கூட்டம் இன்று நடைபெற்ற நிலையில், கட்சியின் ஒருங்கிணைப்பாளர் ஒபிஎஸ் தொண்டர்களால் அவமதிக்கப்பட்டு, அவர் மீது தண்ணீர் பாட்டில் வீசப்ப்ட்டுள்ள நிகழ்வு அதிர்ச்சியை ஏற்படுத்தியுள்ளது.

அதிமுகவில் ஜெயலலிதாவின் மறைவுக்குப்பின் எடப்பாடி பழனிசாமி முதலமைச்சராக பதவியேற்றாலும், கட்சியின் முக்கிய முடிவுகள் அனைத்தும் ஒபிஎஸ் - இபிஎஸ் ஆகிய இரு தலைவர்களின் மேற்பார்வையிலேயே நடைபெற்றுவந்தது. 2021 சட்டமன்றத் தேர்தலில் திமுக ஆட்சியைப் பிடித்தபின் யார் எதிர்க்கட்சித் தலைவர் என்ற பூசல் எழுந்து, பின் எடப்பாடியார் அப்பொறுப்பை ஏற்றார். மேலும் பன்னீர்செல்வம் கட்சி ஒருங்கிணைப்பாளர் பதவியில் நீடித்தார்.

இந்நிலையில், அதிமுக சிறந்த எதிர்க்கட்சியாகத் திகழ ஒற்றைத் தலைமைதான் சரியான முடிவு என்ற பேச்சு அதிமுக நிர்வாகிகளிடையே ஆரம்பமான நிலையில், கடந்த 9 நாட்களாக தொடர் அமளிகளில் அதிமுக நிர்வாகிகள் ஈடுபட்டுவருகின்றனர். ஒபிஎஸ் கட்சியின் பொதுச்செயலாளராக பதவியேற்கவேண்டும் என்று அவரது ஆதரவாளர்களும், இபிஎஸ் தான் பொதுச்செயலாளராக பதவியேற்கவேண்டும் என்று அவரது ஆதரவாளர்களும் குரலெழுப்பிவரும் நிலையில், ஒபிஎஸ் கூறிய சில தீர்மானங்களின் பேரில் அதிமுக பொதுக்குழுக்கூட்டம் இன்று நடைபெற்றது.

ஸ்ரீவாரு திருமண மண்டபத்தில் நடைபெற்ற கூட்டத்திற்கு ஒபிஎஸ் முதலிலேயே வந்துவிட்டார். ஆயினும் கூட்டத்திற்குள் நுழைந்த அவரை இபிஎஸ் ஆதரவாளர்கள் வெளியேறச்சொல்லியும், 'துரோகி' என்று முழக்கமிட்டும் முன்னேறவிடாமல் தடுத்தனர். பின் இபிஎஸ் மண்டபத்திற்குள் நுழையும்போது பலத்த கரகோஷத்துடன் தொண்டர்களால் அவருக்கு வரவேற்பு அளிக்கப்பட்டது. 

பின் மேடையில் இருவரும் அமர்ந்தபின் ஒவ்வொருவராக கட்சி நிர்வாகிகளின் நிலைப்பாடு குறித்தும், ஒற்றைத்தலைமை அதிமுகவிற்கு அவசியம் என்றும் பேசினர். அதிமுகவின் அவைத்தலைவராக தமிழ்மகன் உசேன் ஒருமனதாக தேர்ந்தெடுக்கப்பட்டார். தொடர்ந்து மேடையில் பேசிய நிர்வாகிகள் பலரும் இபிஎஸ் பெயரைக் குறிப்பிட்டு அவரை வரவேற்றனர். ஆனால் யாரும் ஒபிஎஸ்-ஐ வரவேற்கவும் இல்லை, அவரிடம் முகம்கொடுத்து பேசவும் இல்லை.

தொடர்ந்து சி.வி.குமார் உள்ளிட்ட முன்னாள் அமைச்சர்கள், அனைத்து தீர்மானங்களையும் பொதுக்குழு நிராகரித்துவிட்டதாகவும், கட்சிக்கு ஒற்றைத் தலைமை வேண்டும் என்றும் பேசினர். இதனால் கூட்டத்தில் சச்சரவும், கூச்சல் குழப்பமும் நிலவியது. ஒரு கட்டத்திற்கு மேல் ஒபிஎஸ் மேடையில் அமராமல் பாதியிலேயே மேடையை விட்டு வெளியேறினார்.

இந்நிலையில், ஒபிஎஸ் மேடையிலிருந்து வெளியேறும்போது அவர் மீது தண்ணீர் பாட்டில்கள் அதிருப்தி நிர்வாகிகளால் எரியப்பட்டது பரபரப்பை ஏற்படுத்தியது. மேலும் அவர் வந்த வாகனத்தின் சக்கரங்களிலிருந்து காற்று பிடுங்கப்பட்டதும் அதிர்ச்சியைக் கிளப்பியது. பின் மாற்றுவாகன உதவியுடன் அவர் அங்கிருந்து கிளம்பினார்.

இதைத்தொடர்ந்து செய்தியாளர்களிடம் பேசிய ஒபிஎஸ் ஆதரவாளரும், அதிமுக துணை ஒருங்கிணைப்பாளருமான வைத்திலிங்கம், 'கட்சியை அழிவுப்பாதைக்கு அழைத்துச்செல்கின்றனர். சதிகாரர்கள்' என்று ஆவேசமாகப் பேசினார்.

பொதுக்குழுக்கூட்டம் பாதியிலேயே முடிந்து எந்த முடிவும் எட்டப்படாத நிலையில், அடுத்த பொதுக்குழுக்கூட்டம் ஜூலை 11 அன்று மீண்டும் நடைபெறும் என்று அறிவிக்கப்பட்டது. ஆனால் அது ஒபிஎஸ்-ன் கையெழுத்து இல்லாமல் நடைபெறாது என்று வைத்திலிங்கம் தெரிவித்தார்.

ஜூலை 11-ல் நடைபெறும் பொதுக்குழுக்கூட்டத்தில் இபிஎஸ் பொதுச்செயலாளராக தேர்ந்தெடுக்கப்படலாம் என்று கூறப்படுகிறது. ஆயினும் கூட்டம் நடைபெறுமா?, அதில் ஒபிஎஸ் கலந்துகொள்வாரா?, என்னென்ன முடிவுகள் அக்கூட்டத்தில் ஏடுக்கப்படும்? என்பது குறித்து பொறுத்திருந்துதான் பார்க்கவேண்டும். ஆயினும் ஒபிஎஸ், இபிஎஸ் தரப்பு நிர்வாகிகளால் பெரிதளவில் அவமதிக்கப்பட்டது தற்சமயம் பேசுபொருளாகி சர்ச்சையைக் கிளப்பிவருகிறது. 

பதிவு: June 23, 2022

மேலும் செய்திகள்

கொரோனா வைரஸ் அப்டேட்ஸ்