narendra modi,mk stalin,annamalai,dravidian model,bjp

முதல்வர் ஸ்டாலின் பிரதமர் முன்னிலையில் பேசியது அரசியலில் ஒரு கரும்புள்ளி என்றும் முதல்வரின் எல்லா பாயிண்டுகளுக்கும் பாஜக விரைவில் பதில் தரும் என்றும் பாஜக மாநிலத் தலைவர் அண்ணாமலை காட்டமாகப் பேசியுள்ளார்.

தமிழகத்தில் ரூ.31,500 கோடி மதிப்பிலான மக்கள் நடத்திட்டங்களைத் தொடக்கிவைக்க இந்தியப் பிரதமர் நரேந்திர மோதி நேற்றைய தினம் சென்னை வந்தார். பெரும் ஆரவாரத்தோடு பாஜகவினரால் அவருக்கு வரவேற்பு அளிக்கப்பட்டது. ஆளுநர் ஆர்.என்.ரவி, அமைச்சர்கள் துரைமுருகன், கே.என்.நேரு, எதிர்க்கட்சித் தலைவர் எடப்பாடி பழனிசாமி ஆகியோர் விமான நிலையத்தில் அவரை வரவேற்றனர்.

இந்நிலையில், நேரு உள்விளையாட்டு அரங்கத்தில் நடைபெற்ற விழாவில் கலந்துகொண்ட பிரதமர் மோதி முன்னிலையில் முதல்வர் மு.க.ஸ்டாலின் பல்வேறு கோரிக்கைகளை முன்வைத்தார். ஜிஎஸ்டி நிலுவை தொகையை வழங்குவது, இந்தி மொழிக்கு நிகராக தமிழ் மொழியை அலுவல் மொழியாக அங்கீகரிப்பது,
கச்சத்தீவை மீட்பது, நீட் தேர்வுக்கு விலக்கு அளிப்பது உள்ளிட்ட பல்வேறு கோரிக்கைகளை 'வற்புறுத்திக் கேட்கிறேன்' என்று கூறியவாறே பிரதமர் முன் முன்வைத்தார் முதல்வர் ஸ்டாலின். 

இந்நிலையில், முதல்வர் ஸ்டாலின் பிரதமரை அமரவைத்து விளையாட்டு காட்டியதாகவும், அவர் பேசியது அரசியலில் ஒரு கரும்புள்ளி என்றும் சாடியுள்ளார் தமிழக பாஜக தலைவர் அண்ணாமலை. இதுகுறித்து செய்தியாளர்களிடம் பேசிய அவர், "சென்னை நிகழ்ச்சியில் முதல்வர் ஸ்டாலின் பேசிய அனைத்துமே பொய். அனைத்துமே முன்னுக்குப் பின் முரணானவை. அதனால்தான் திராவிட மாடல் என்று பொய் சொன்னார்.

தமிழகத்துக்கும் தமிழ் மண்ணுக்கும் ரூ.31,000 கோடி கொண்டு வந்த பிரதமர் மோடியை மேடையில் உட்கார வைத்து கொண்டு, ஆளும் கட்சிகாரர் நீங்களே பாஸ் போட்டுகிட்டு, பணம் கொடுத்து ஒரு ஒரு எம்.எல்.ஏ.வுக்கும் டார்கெட் கொடுத்து ஒவ்வொருத்தரும் 200 பேரை கொண்டுவாங்கன்னு நேரு ஸ்டேடியத்துல உட்கார வெச்சு என்ன விளையாட்டு காட்டுறீங்களா? இதுதான் அரசு நடத்தும் விதமா? என்ன வம்பு சண்டைக்கு வர்றீங்களா? இதென்ன போட்டியா? இதென்ன போட்டி அரசியலா? ஒரு பிரதமருக்கு என மரியாதை இருக்கு. அது மிக முக்கியம்.

தமிழ் மண்ணில் இந்த நாள் எந்த கட்சி, எந்த ஆட்சியாக இருந்தாலும் பிரதமரை மதித்திருக்கிறோம். பாஜகவுக்கும் திமுகவுக்கும் 360 டிகிரி கொள்கை வேறுபாடு உண்டு. ஆனால் முதல்வர் என்பவரை நாங்கள் மதிப்போம். முதல்வரை நாங்கள் எங்கேயும் விட்டுக் கொடுக்கமாட்டோம். ஆனால் நீங்கள் இப்படி ஒரு கலாசாரத்தை செய்துவிட்டு திராவிட மாடல் என பொய் சொல்கிறீர்கள்.

முதல்வர் ஸ்டாலின் நடந்து கொண்ட விதம் தமிழக அரசியலில் கரும்புள்ளி. முதல்வர் ஸ்டாலின் பேசிய ஒவ்வொரு பாயிண்ட்டுக்கும் பாஜக பதில் தரும். வெள்ளிக்கிழமை மாலைக்குள் பாஜக பதிலடி தரும். கச்சத்தீவை எப்படி கொண்டுவரனும்? மீட்கனும் என்பது எங்களுக்கு தெரியும்" இவ்வாறு கொதிப்புடன் பேசினார்.

முக்கிய செய்திகள்

கொரோனா வைரஸ் அப்டேட்ஸ்