perarivalan,ks alagiri,rajiv gandhi,supremecourt

பேரறிவாளனை உச்சநீதிமன்றம் நிரபராதி என்று சொல்லி விடுவிக்கவில்லை என்றும், ஒரு கட்சியின் கொள்கைகளில் யாரும் தலையிட முடியாது என்றும் தமிழ்நாடு காங்கிரஸ் தலைவர் கே.எஸ்.அழகிரி தெரிவித்துள்ளார்.

முன்னாள் இந்தியப் பிரதமர் ராஜீவ் காந்தி கொல்லப்பட்ட வழக்கில் குற்றம்சாட்டப்பட்ட பேரறிவாளன், சுமார் 31 வருட சிறைதண்டனைக்குப்பின் உச்சநீதிமன்றத்தால் நேற்று(18.05.2022) விடுதலை செய்யப்பட்டார். இதற்கு பல்வேறு கட்சித் தலைவர்களும் ஆதரவும் மகிழ்ச்சியும் தெரிவித்திருந்தனர், தமிழ்நாடு காங்கிரஸ் தலைவர் கே.எஸ்.அழகிரி தவிர்த்து.

இதுபற்றி அவர் பேசுகையில், 'குற்றவாளிகள் கொலைகாரர்கள்; அவர்கள் நிரபராதிகள் அல்ல' என்று காட்டமாக அறிக்கை வெளியிட்டிருந்தார். மேலும் பேரறிவாளனின் விடுதலையை எதிர்த்து காங்கிரஸ் சார்பில் வெள்ளைத் துணியால் வாயை மூடிக்கொண்டு அறவழிப் போராட்டம் மேற்கொள்ளப்படும் என்றும் அறிவித்திருந்தார்.

இந்நிலையில், இன்று காலை 10 முதல் 11 மணி வரை காங்கிரஸ் பிரமுகர்கள் பலரும் இப்போராட்டத்தை மேற்கொண்டிருந்தனர். இதையடுத்து, போராட்டத்திற்குப்பின் பேசிய கே.எஸ்.அழகிரி, ''உச்ச நீதிமன்றம் பேரறிவாளனை குற்றவாளி இல்லை என சொல்லி விடுதலை செய்யவில்லை. ஆளுநர் காலம் தாழ்த்தியதால்தான் நீதிமன்றம் விடுவித்து இருக்கிறது. நீதிமன்றத்தின் தீர்ப்பை பற்றி விமர்சிக்க விரும்பவில்லை. ஒரு சமூக ஒழுங்கு, கட்டுப்பாடு என்பது கேள்விக்குறியாகி உள்ளது. ராஜீவ் காந்தியோடு சேர்த்து 9 போலீசார் உள்ளிட்ட 17 பேர் கொலை செய்யப்பட்டனர். அவர்களுக்கும் குடும்பம் இருக்கிறது. தலைவர் ராஜீவ் காந்திக்கும் குடும்பம் இருக்கிறது.

பேரறிவாளனின் தாயார் அற்புதம் அம்மாளின் மனநிலையை நான் நன்கு அறிவேன். அதுபோல அனைவருக்கும் தாய், மனைவி, குழந்தைகள் உள்ளனர், தாய், மனைவி, குழந்தை போன்ற உறவுகள் உள்ளனர். அவர்கள் மனநிலையை நாம் பார்க்க வேண்டும். சமூகம் இதை ஏற்றுக் கொள்ளுமா? கன்றுக்குட்டி மீது தேரை ஏற்றியது தவறு எனக் கூறி தனது மகனையே தேர்க்காலில் இட்டுக் கொன்ற மனுநீதிச் சோழன் வாழ்ந்த பூமி இது.

கொலைகாரர்களுக்கு பரிந்து பேசினால் அதை சமூகம் ஏற்றுக் கொள்ளுமா? இது நியாயமற்ற செயல். ராஜீவ் காந்தி வழக்கில் பேரறிவாளன் மிக முக்கிய குற்றவாளி என ஆதாரங்களை தெரிவித்ததாக அந்த விசாரணை அதிகாரி தெரிவித்திருக்கிறார். தமிழக சிறைகளில் இதுவரை 600 பேர் 700 பேர் உள்ளனர். அவர்களையும் விடுதலை செய்ய வேண்டும் என ஏன் யாரும் கூறவில்லை. இந்த விவகாரத்தில் தமிழ்நாடு காங்கிரஸ் கமிட்டி சார்பில் ஆழ்ந்த மன வருத்தத்தை தெரிவித்துக் கொள்கிறோம்.

கொள்கை வேறு. கூட்டணி வேறு. எங்களது கொள்கைகளைப் பற்றி அவர்கள் ஏன் என்று கேட்கப்போவதில்லை. அவர்கள் கொள்கைகளைப் பற்றி நாங்கள் எதுவும் பேசுவதில்லை. யுத்தம் என ஒன்று வந்தால் பலர் இறக்கத்தான் செய்வார்கள் என சட்டப்பேரவையில் ஜெயலலிதா அறிவித்திருந்தார். அது அவர்களது கொள்கை. அதுபோல் ஒவ்வொரு கட்சிக்கும் உள்ள கொள்கையில் யாரும் தலையிட முடியாது''

இவ்வாறு தெரிவித்தார்.

முக்கிய செய்திகள்

கொரோனா வைரஸ் அப்டேட்ஸ்