ks alagiri,rajiv gandhi,supremecourt

ராஜீவ் காந்தி கொலை வழக்கில் தண்டனை அனுபவித்துவந்த பேரறிவாளன் விடுதலை செய்யப்பட்டுள்ள நிலையில், குற்றவாளிகள் கொலைகாரர்கள் என்றும், அவர்கள் நிரபராதிகள் இல்லை என்றும் காங்கிரஸ் மாநிலத் தலைவர் கே.எஸ்.அழகிரி சீறியுள்ளார்.

இராஜீவ் காந்தி கொலை வழக்கில் வரலாற்று சிறப்புமிக்க தீர்ப்பு இன்று வழங்கப்பட்டுள்ளது. முன்னாள் இந்தியப் பிரதமர் ராஜீவ் காந்தி கொலை வழக்கில் குற்றம் சுமத்தப்பட்டு கைது செய்யப்பட்ட பேரறிவாளன், சுமார் 31 ஆண்டுகளுக்குப்பின் விடுதலை செய்யப்பட்டுள்ளார். ஆளுநர் இதுகுறித்த முடிவை எடுக்கத் தாமதித்ததால் உச்சநீதிமன்றமே இதுகுறித்து நடவடிக்கை எடுத்து இத்தீர்ப்பை வழங்கியுள்ளது.

இதையடுத்து, இத்தீர்ப்புக்கு பல்வேறு கட்சித் தலைமைகளும் ஆதரவும் மகிழ்ச்சியும் தெரிவித்து வருகின்றனர். இதுகுறித்து தமிழக முதல்வர் ஸ்டாலின், "பேரறிவாளனை உச்சநீதிமன்றம் விடுவித்திருப்பது நீதி, சட்டம், அரசியல், நிர்வாகவியல் வரலாற்றில் இடம்பெறத்தக்க தீர்ப்பு. பேரறிவாளன் விடுதலை என்பது மனித உரிமை, மனிதாபிமான அடிப்படையிலானது. மாநிலத்தின் உரிமை, உச்சநீதிமன்ற தீர்ப்பின் மூலம் மிக கம்பீரமாக நிலைநாட்டப்பட்டுள்ளது" என்று செய்தியாளர் சந்திப்பில் கூறியிருந்தார்.

இந்நிலையில், குற்றம் சாட்டப்பட்டவர்கள் கொலைகாரர்கள் என்று காங்கிரஸ் மாநிலத் தலைவர் கே.எஸ்.அழகிரி தனது ட்விட்டர் பக்கத்தில், உச்சநீதிமன்றத்தின் தீர்ப்பு குறித்து அதிருப்தி தெரிவித்து கருத்து பதிவிட்டுள்ளார்.

இதுகுறித்து அவர், "முன்னாள் பிரதமர் ராஜிவ்காந்தி அவர்களை கொன்ற கொலையாளிகள் எழுவரை உச்சநீதிமன்றம் தான் கொலையாளிகள் என்று கூறி தண்டனை கொடுத்தது. அதே உச்சநீதிமன்றம் சில சட்ட நுணுக்கங்களைச் சொல்லி பேரறிவாளனை விடுதலை செய்திருக்கிறது.

உச்சநீதிமன்றத்தின் தீர்ப்பை நாங்கள் விமர்சிக்க விரும்பவில்லை. அதேநேரத்தில், குற்றவாளிகள் கொலைகாரர்கள் என்பதையும், அவர்கள் நிரபராதிகள் அல்ல என்பதையும் நாங்கள் அழுத்தமாகக் கூற விரும்புகிறோம்" என்று குறிப்பிட்டுள்ளார்.

முக்கிய செய்திகள்

கொரோனா வைரஸ் அப்டேட்ஸ்