RSS,mohan bagavath,gyanvapi mosque,hindu,muslim

ஒவ்வொரு மசூதியிலும் சிவலிங்கத்தை தேடுவது அநாவசியமானது என்றும் இந்துக்கள் இஸ்லாமியர்களுக்கு எதிரானவர்கள் இல்லை என்றும் ஆர்.எஸ்.எஸ். அமைப்பின் தலைவர் மோகன் பகவத் குறிப்பிட்டுள்ளார்.

மகாராஷ்டிரா மாநிலத்தில் நடைபெற்ற ஆர்.எஸ்.எஸ். நிகழ்ச்சி ஒன்றில் அந்த அமைப்பின் தலைவர் மோகன் பகவத் கலந்துகொண்டார். அப்போது பேசிய அவர், "நாட்டில் அண்மைக்காலத்தில் சில பிரசித்த பெற்ற இந்து கோயில்கள் தொடர்பாக சர்ச்சைகள் ஏற்பட்டுள்ளன. வரலாற்றை நாம் மாற்ற முடியாது. கியானவாபி மசூதி விவகாரத்தில் கடந்தகால வரலாறுகளுக்காக தற்சமயம் வாழும் இஸ்லாமியர்கள் யார்மீதும் பழிசுமத்தக்கூடாது. கியானவாபி சர்ச்சை இன்றைக்கு ஏற்பட்டது அல்ல. அதற்கு இப்போதைய இஸ்லாமியர்களோ, இப்போதைய இந்துக்களோ காரணமாக முடியாது. இது எப்போதோ நடந்த சம்பவம்.

இஸ்லாம் இந்தியாவுக்கு வெளியிலிருந்து வந்த மதம். அடக்கி ஆள நினைத்தவர்கள் கொண்டுவந்த மதம். அப்போது விடுதலை வேட்கையில் இருந்து நம் நாட்டு மக்களை உணர்வுப்பூர்வமாகத் தாக்கி தேவஸ்தானங்கள் அழிக்கப்பட்டன. ஆயிரக்கணக்கான கோயில்கள் அழிக்கப்பட்டன.

சில இந்துக் கோயில்களுக்கு சிறப்பு அந்தஸ்து இருக்கிறது. அதாவது கியானவாபி போல் இந்துக் கோயிலில் மசூதி இருக்கிறது. இதைத் தான் தற்போது இந்து சமூகத்தினர் கேள்விக்கு உள்ளாக்குகின்றனரே தவிர இந்துக்கள் இஸ்லாமியர்களுக்கு எதிராக இல்லை. ஏனெனில் இப்போதைய இஸ்லாமியர்களின் மூதாதையர்கள் எல்லோரும் இந்துக்களாக இருந்தவர்களே.

தினம் தினம் புதிய சர்ச்சைகளை ஏற்படுத்த அவசியம் என்னவிருக்கிறது? ஒவ்வொரு மசூதியிலும் ஏன் சிவலிங்கத்தை தேட வேண்டும்? கியான்வாபி சர்ச்சையில் ஒருமித்த கருத்தின் அடிப்படையில் முடிவு எட்டப்பட வேண்டும். ஒருமித்த முடிவை எட்ட முடியவில்லை என்றுதான் மக்கள் நீதிமன்றத்தை அணுகுகின்றனர். நீதிமன்றம் என்ன முடிவு செய்தாலும் அதை நாம் ஏற்றுக்கொள்ள வேண்டும். நமது நீதித்துறையை நாம் புனிதமாகக் கருத வேண்டும். அதன் முடிவுகளை நாம் கேள்விக்கு உள்ளாக்கக் கூடாது" இவ்வாறு அவர் பேசினார்.

முக்கிய செய்திகள்

கொரோனா வைரஸ் அப்டேட்ஸ்