'இந்தியா, ஆயுதங்களை வைத்திருப்பது தொடர்பான சட்டங்களை மறுஆய்வு செய்து கடுமையாக்க வேண்டும்' - ப.சிதம்பரம் எம்.பி.!

அமெரிக்காவிலுள்ள பள்ளியில் மர்ம நபரால் நடத்தப்பட்ட துப்பாக்கிச்சூட்டில் 19 பள்ளி மாணவர்கள் பரிதாபமாக கொல்லப்பட்ட நிலையில், ஆயுதங்களை வைத்திருப்பது தொடர்பான சட்டங்களை இந்தியா மறுஆய்வு செய்யவேண்டும் என காங்கிரஸ் எம்.பி. ப.சிதம்பரம் தெரிவித்துள்ளார்.

இதுகுறித்து ட்விட்டரில் பதிவிட்டுள்ள அவர்,

"அமெரிக்காவின் டெக்சாஸ் மாகாணத்தில் உள்ள ஒரு பள்ளியில் 4 ஆம் வகுப்பு பயிலும் 19 குழந்தைகள் கொடூரமான முறையில் கொல்லப்பட்டதை கண்டிக்க வார்த்தைகள் இல்லை. ஒட்டுமொத்த உலகமும் அமெரிக்க மக்கள் மற்றும் குழந்தைகளை இழந்து வாடும் குடும்பத்தினருடன் சோகத்தில் ஆழ்ந்துள்ளது.

வெறுக்கத்தக்க பேச்சு மற்றும் வெறுப்பு கொலைகள் அதிகரிப்பால், இந்த பைத்தியக்காரத்தனம் முழு உலகத்தையும் ஆக்கிரமிப்பதைத் தடுக்க அனைத்து வழிகளையும் நாம் பயன்படுத்த வேண்டும்.

கடுமையான துப்பாக்கி கட்டுப்பாடுகளை விதிப்பது மற்றும் ஆயுதத்தை யார் வாங்கலாம் அல்லது சொந்தமாக வாங்கலாம் என்பதைக் கடுமையாகக் கட்டுப்படுத்துவது இதற்கான வழிகளில் ஒரு வழியாக இருக்கும். இந்த விஷயத்தில் அமெரிக்க சட்டங்கள் மிகவும் தளர்வானவை மற்றும் மென்மையானவை. இந்தியாவும் ஆயுதங்களை கையகப்படுத்துதல் மற்றும் வைத்திருப்பது தொடர்பான சட்டங்களை மறுஆய்வு செய்து கடுமையாக்க வேண்டும்"

இவ்வாறு தெரிவித்துள்ளார்.

பதிவு: May 26, 2022
சவுதியில் கழிவறையில் தயாரிக்கப்பட்டு விற்பனையான உணவுகள்! அதிர்ச்சியில் உறைந்த வாடிக்கையாளர்கள்!

சவுதி அரேபியா நாட்டில் கழிவறையில் தயாரிக்கப்பட்டுவந்த உணவுகள் வாடிக்கையாளர்களுக்கு இத்தனை ஆண்டுகளாக விற்பனை செய்யப்பட்டு வந்த நிகழ்வு அதிர்ச்சியை ஏற்படுத்தியுள்ளது.

சவுதி அரேபியாவின் ஜெட்டா நகரில் பிரபல உணவகம் ஒன்று 30 ஆண்டுகளாக இயங்கிவருகிறது. இந்நிலையில், இந்த உணவகத்தில் சுகாதாரமற்ற முறையில் உணவுகள் தயாரிக்கப்பட்டு வாடிக்கையாளர்களுக்கு விற்பனை செய்யப்படுவதாக புகார் எழுந்தது.

இந்நிலையில், உணவகம் திடீர் பரிசோதனைக்கு உள்ளாக்கப்பட்டதையடுத்து, பல திடுக்கிடும் உண்மைகள் வெளியாகியுள்ளன. அதன்படி இந்த உணவகத்தில் பல ஆண்டுகளாக சமோசா போன்ற உணவுப்பொருட்கள் கழிவறையில் வைத்து தயாரிக்கப்பட்டு வந்துள்ளதாக பரிசோதனையில் தெரியவந்துள்ளது.

சுகாதாரமற்ற முறையில் எலிகளும், பூச்சிகளும் மிகைத்துக்கிடக்கும் இடங்களில் உணவுவகைகள் தயாரிக்கப்பட்டுவந்தது ஆய்வாளர்களை அதிர்ச்சிக்குள்ளாக்கியுள்ளது. மேலும் பல நாட்களான, கெட்டுப்போன மூலப்பொருட்களைப் பயன்படுத்தி உணவுகள் தயாரிக்கப்பட்டதும் தெரியவந்துள்ளது. இதையடுத்து அப்பகுதி அதிகாரிகள் தடாலடியாக அவ்வுணவகத்தை மூடியுள்ளனர். மேலும் கெட்டுப்போன உணவுப்பொருட்களை பறிமுதல் செய்துள்ளனர்.

சவுதி அரேபியாவின் ஜெட்டா பகுதியில், இச்சம்பவத்திற்குப்பின் இதுவரை 26 உணவகங்கள் முறைகேடுகள் அறிந்து மூடப்பட்டுள்ளதாக தெரிவிக்கப்பட்டுள்ளது.

பதிவு: April 27, 2022
ஷேன் வார்னேவின் உடல் அரசு மரியாதையுடன் நல்லடக்கம் செய்யப்படும் – ஆஸ்திரேலிய பிரதமர் ஸ்காட் மோரிசன் அறிவிப்பு!

மாரடைப்பால் காலமான ஆஸ்திரேலிய கிரிக்கெட் வீரர் ஷேன் வார்னேவின் உடல் அரசு மரியாதையுடன் அடக்கம் செய்யப்படும் என ஆஸ்திரேலிய நாட்டுப் பிரதமர் ஸ்காட் மோரிசன் அறிவித்துள்ளார்.

சுழற்பந்துவீச்சில் ஜாம்பவான் எனப் போற்றப்படுபவர் பிரபல ஆஸ்திரேலிய கிரிக்கெட் வீரரான ஷேன் வார்னே. பேட்ஸ்மேனின் கவனத்தை நொடிப்பொழுதில் பதம்பார்த்து விக்கெட்டை வீழ்த்தும் இவரது அபார பந்துவீச்சால் உலக அளவில் மிகவும் புகழ்பெற்றவர். தனது சுழற்பந்து திறனால் பல்வேறு வெற்றிகளை ஆஸ்திரேலியாவுக்குப் பெற்றுத் தந்த வார்னே, உலகம் முழுக்க பல்வேறு ரசிகர்களைப் பெற்றுள்ளார்.

இந்நிலையில் தான், விடுமுறைக்காக தாய்லாந்து சென்றிருந்த வார்னே, திடீரென ஏற்பட்ட மாரடைப்பு காரணமாக மரணமடைந்துள்ளார். அவருக்கு வயது 52. தூக்கத்தில் பேச்சு மூச்சற்றுக்கிடந்த அவரை பரிசோதித்த மருத்துவர்கள் அவர் மரணமடைந்ததாக உறுதித் தகவல் அளித்துள்ளனர். இச்செய்தி, உலகெங்கிலுமுள்ள அவரது கிரிக்கெட் ரசிகர்கள் பலரையும் கலங்கடித்துள்ளது. அவரது மறைவுக்கு கிரிக்கெட் பிரபலங்கள் உள்ளிட்ட பலரும் இரங்கல் தெரிவித்து வருகின்றனர்.

இதைத் தொடர்ந்து, ஷேன் வார்னேவின் உடல் அரசு மரியாதையுன் நல்லடக்கம் செய்யப்படும் என ஆஸ்திரேலிய பிரதமர் ஸ்காட் மோரிசன் தெரிவித்துள்ளார்.

ஷேன் வார்னே மரணிப்பதற்கு சிலமணிநேரங்கள் முன்பு காலமான ஆஸ்திரேலிய கிரிக்கெட் வீரரான ராட் மார்ஷ்-க்கு இரங்கல் தெரிவித்த அவரது ட்விட்டர் பதிவு இணையத்தில் வைரலாகி காண்போரை கலங்கடித்துவருகிறது.

அப்பதிவில் அவர், “ராட் மார்ஷ் காலமானார் என்ற செய்தி கேட்டு மிகவும் வருத்தமடைந்தேன். அவர் ஓர் சிறந்த விளையாட்டு வீரராக மட்டுமல்லாது, பல இளைஞர்களுக்கு உத்வேகமாகவும் இருந்தவர். ராட் கிரிக்கெட்டை மிகவும் விரும்புபவர். எனது அன்புகளை அவருக்கும், அவரது குடும்பத்தாருக்கும் உரித்தாக்குகிறேன். ஆழ்ந்த இரங்கல்” என்று பதிவிட்டிருந்தார்.

தனது மரணத்திற்கு சுமார் 12 மணிநேரத்திற்கு முன் இப்பதிவை இடும்போது இருந்த அவர், 12 மணிநேரத்திற்குப்பின் உயிரோடு இல்லாதிருப்பதை எண்ணி அவரது ரசிகர்கள் கண்ணீர் வடித்துவருகின்றனர்.

பதிவு: March 05, 2022
பிரதமர் நரேந்திர மோடி தலைமையில் இன்று இந்தியா-மத்திய ஆசியா உச்சி மாநாடு...

பிரதமர் நநேந்திர மோடி தலைமையில் இந்தியா-மத்திய ஆசியா இடையிலான முதலாவது உச்சி மாநாடு காணொலி காட்சி மூலம் இன்று நடக்கிறது. 

இந்தியா-மத்திய ஆசியா இடையிலான முதலாவது உச்சி மாநாடு காணொலி காட்சி மூலம் இன்று நடக்கிறது. பிரதமர் மோடி இம்மாநாட்டை நடத்துகிறார். மத்திய ஆசிய நாடுகளான கஜகஸ்தான், கிர்கிஸ் குடியரசு, தஜிகிஸ்தான், துர்க்மெனிஸ்தான், உஸ்பெகிஸ்தான் ஆகிய நாடுகளின் அதிபர்கள் இதில் பங்கேற்கிறார்கள்.

மாநாட்டில் பிராந்திய, சர்வதேச பிரச்சினைகள் குறித்து தலைவர்கள் கருத்து பரிமாற்றம் செய்து கொள்கிறார்கள். இந்தியா-மத்திய ஆசிய நாடுகள் இடையிலான உறவை புதிய உச்சிக்கு கொண்டு செல்வதற்கான நடவடிக்கைகள் குறித்து விவாதிக்கிறார்கள்.

கடந்த 2015-ம் ஆண்டு மேற்கண்ட நாடுகளுக்கு பிரதமர் மோடி பயணம் செய்தார். அதன்பிறகு அந்நாடுகளுடன் இந்தியா பல்வேறு மட்டங்களில் தொடர்பு கொண்டு வருகிறது என்பது குறிப்பிடத்தக்கது.

பதிவு: January 27, 2022
தினுசு தினுசாக யோசித்து ‘லட்சங்களில்’ சம்பாதிக்கும் மனிதர்கள்! இப்படி கூடவா சம்பாதிக்கலாம்..?

லட்சக்கணக்கில் செலவு செய்து படித்துவிட்டு, படிப்பிற்கு உரிய வேலை கிடைக்கவில்லை எனப் புலம்பித்திரியும் மனிதர்களுக்கு மத்தியில், வெகு இயல்பாய் நாம் செய்யும் பணிகளை பிறருக்கான தேவைகளாய் உருவாக்கி அதில் பலன் பெரும் மனிதர்கள் நம்மை பெரும் வியப்பில் ஆழ்த்துகின்றனர்.

இங்கிலாந்தைச் சேர்ந்த எலா மக்மஹோன் என்ற ஒரு மாணவர், நம் வீடுகளில் நாம் அன்றாடம் செய்யும் ஒரு செயலை தனது பணியாக அமைத்துக் கொண்டு, அதன் மூலம் மாதம் ஆயிரக்கணக்கில் சம்பாதிக்கிறார்.

எவர் வீட்டின் அலமாரிகளில் துணிகள் அடுக்காமல் கலைந்து கிடந்தாலும் சற்றும் யோசிக்காமல் இவரை தாராளமாக நாம் தொடர்பு கொள்ளலாம். ஆம்! அலமாரிகளில் மடிக்காமல் கலைந்து கிடக்கும் துணிகளை மடிப்பதையே தனது தொழிலாகக் கொண்டு அதை திறம்படச் செய்து வருகிறார் இவர். இதன் மூலமே மாதம் ரூ.50,000 வரை இவர் சம்பாதிக்கிறாராம்.

அதே போல், லண்டனைச் சேர்ந்த ஃப்ரெட்டி பெக்கிட் என்ற மற்றொரு இளைஞர் செய்யும் தொழில் நம்மை இன்னும் மலைப்பில் ஆழ்த்துகிறது. இவர் வெறும் வரிசையில் நின்று மட்டுமே மாதம் லட்சக்கணக்கில் சம்பாதிக்கிறார்.

வரிசையில் நின்று பயணச்சீட்டையோ அல்லது பிற தேவைகளையோ பூர்த்தி செய்துகொள்ள பொறுமை இல்லாத, பணம் படைத்தவர்களை பயன்படுத்திக் கொள்ளும் இவர், அவர்களுக்கு பதில் வரிசையில் நின்று அவர்களின் தேவையைப் பூர்த்தி செய்வதைத் தொழிலாகக் கொண்டுள்ளார்.

ஒரு மணி நேரம் வரிசையில் நிற்க 20 பவுண்டுகள் வசூலிக்கும் இவர் நாள் ஒன்றுக்கு சுமாராக ரூ.16,000 வரைச் சம்பாதித்து தலை சுற்ற வைக்கிறார்.

இவ்வாறாக, தூங்குவதன் மூலம், உண்பதன் மூலம் என உலகெங்கும் பலர் பணம் சம்பாதிக்கும் முறைகள் நம்மை அசரடிக்கின்றன. ‘வாழ நினைத்தால் வாழலாம்….வழியா இல்லை பூமியில்’ என்னும் பாடல் வரிகள் தான் எத்தனை உண்மை!

பதிவு: January 22, 2022
ஒமைக்ரானை மிதமாக எடுத்துக் கொள்ள வேண்டாம்- உலக சுகாதார அமைப்பு மீண்டும் எச்சரிக்கை...

ஒமைக்ரானை மிதமாக எடுத்து கொள்ள வேண்டாம் என்று உலக சுகாதார அமைப்பு மீண்டும் எச்சரிக்கை விடுத்துள்ளது.

இதுகுறித்து உலக சுகாதார அமைப்பு இன்று வெளியிட்ட அறிவிப்பில், “ அதிக தொற்று தன்மை கொண்ட ஒமைக்ரான் உலகளவில் பரவி வருகிறது. ஒமைக்ரான் மிதமான பாதிப்பை எற்படுத்துகிறது என்பதை ஏற்க முடியாது. அதனை மிதமாக எடுத்து கொள்ள வேண்டாம் ஐரோப்பா தற்போது கரோனா பரவலின் மையமாக உள்ளது. கடந்த வாரம் மட்டும் ஐரோப்பாவில் 50 லட்சம் பேர் கரோனாவினால் பாதிக்கப்பட்டுள்ளனர்.

ஜெர்மனி மற்றும் பிரான்ஸில் கரோனா தொடர்ந்து அதிகரித்து வருகிறது. இரு நாடுகளில் செவ்வாய்க்கிழமை மட்டும் 1 லட்சம் பேர் வரை கரோனாவினால் பாதிக்கப்பட்டுள்ளனர்” என்று தெரிவிக்கப்பட்டுள்ளது.

கடந்த 2019 டிசம்பரில் சீனாவின் வூஹானின் நகரில் முதன்முதலில் கண்டறியப்பட்ட கரோனா , 2020 தொடங்கியவுடனேயே உலகம் முழுவதும் பரவ ஆரம்பித்தது. இரண்டு ஆண்டுகளை கடந்த பிறகு கரோனா இன்னமும் முடிவுக்கு வரவில்லை.

தடுப்பூசியால் கரோனாவின் தீவிரத் தன்மை உலகளவில் குறைந்தாலும், முதல் அலை, இரண்டாம் அலை, மூன்றாம் அலை என கரோனா தொடர்ந்த வண்ணமே உள்ளது. எனினும் 2022 ஆம் ஆண்டு இறுதிக்குள் கரோனா முடிவுக்கு வரும் என்று மருத்துவ வல்லுனர்கள் பலரும் நம்பிக்கை தெரிவித்துள்ளனர்.

பதிவு: January 19, 2022
`ஒமிக்ரானை எதிர்கொள்ள ஒரே வழி தடுப்பூசிதான்!'- WHO விஞ்ஞானி சௌமியா சாமிநாதன்

"ஒமிக்ரான் தொற்றை எதிர்கொள்ள தடுப்பூசி போட்டுக் கொள்வது மட்டுமே ஒரே வழி" என்று உலக சுகாதார அமைப்பின் மூத்த விஞ்ஞானி சௌமியா சாமிநாதன் கூறியுள்ளார்.

ஜெனீவாவில் நடைபெற்ற காணொளி காட்சி கூட்டத்தில் பேசிய அவர், தடுப்பூசிகளுக்கு ஒமிக்ரானை எதிர்கொள்ளும் ஆற்றல் உள்ளது. தடுப்பூசி போட்டுக் கொண்டவர்களின் டி செல்களில் நோய் எதிர்ப்பு சக்தி உருவாகி உள்ளது. இந்த நோய் எதிர்ப்பு சக்தி ஒமிக்ரானுக்கு எதிராக சிறப்பாக வேலை செய்கிறது.

மருத்துவமனைகளில் நெரிசல், ஆக்சிஜன் பற்றாக்குறை பிரச்னை என எதுவும் இல்லாமல் இருப்பது ஒரு நல்ல அறிகுறி. தடுப்பூசி போட்டுக் கொள்வது கடுமையான நோய் பாதிப்பில் இருந்து நம்மை பாதுகாக்கும். உலகம் முழுவதும் தடுப்பூசி செலுத்தியவர்கள் மற்றும் செலுத்தாதவர்களையும் ஒமிக்ரான் பாதித்தாலும் ஒமிக்ரானுக்கு எதிராக தடுப்பூசிகள் செயல்பட்டு மரணத்தில் இருந்து நம்மை காக்கிறது. யாரேனும் தடுப்பூசி போட்டுக் கொள்ளாதவர்கள் இருந்தாலும் உடனே தடுப்பூசி போட்டுக் கொள்ள வேண்டும்" என்று கூறினார்.

பதிவு: December 30, 2021
`இந்தியா தனது ஹீரோவை இழந்துவிட்டது!'- பிபின் ராவத் மறைவுக்கு உலக நாடுகள் இரங்கல்!

"இந்தியா தனது சிறந்த தேசபக்தர் மற்றும் அர்ப்பணிப்புள்ள “ஹீரோவை” இழந்துவிட்டது" என்று முப்படை தளபதி பிபின் ராவத் மறைவுக்கு அமெரிக்கா, இங்கிலாந்து, ரஷ்யா, பாகிஸ்தான் உள்பட உலக நாடுகள் இரங்கல் தெரிவித்துள்ளன.

நீலகிரி மாவட்டம், குன்னூர் அருகே மலைப்பகுதியில் மரத்தில் மோதி நேற்று ராணுவ ஹெலிகாப்டர் வெடித்து சிதறியது. இதில், முப்படை தலைமை தளபதி பிபின் ராவத், அவருடன் பயணித்த அவரது மனைவி உட்பட 13 பேரும் உயிரிழந்தனர். இந்த கோர விபத்து இந்தியாவையே கடும் அதிர்ச்சிக்குள்ளாக்கியுள்ளது. இந்த நிலையில் முப்படைத் தலைமை தளபதி பிபின் ராவத் மறைவிற்கு உலக நாடுகள் இரங்கல் தெரிவித்துள்ளன.

அமெரிக்க ராணுவம் வெளியிட்ட இரங்கல் குறிப்பில், 'இந்தியாவின் முதல் முப்படைகளின் தலைமை தளபதி பிபின் ராவத், ராணுவத்தை நவீனமாக மாற்றுவதற்கு பல்வேறு முயற்சிகளை மேற்கொண்டவர். அமெரிக்காவின் வலுவான நண்பராகவும், இருநாட்டு ராணுவ கூட்டுறவை விரிவுப்படுத்துவதிலும் முக்கிய பங்காற்றியவர்" என்று புகழாரம் சூட்டப்பட்டுள்ளது.

பிரிட்டன் சார்பில் அந்நாட்டின் தூதர் அலெக்ஸ் எல்லீஸ் ட்விட்டரில் இரங்கல் குறிப்பில், "பிபின் ராவத்தின் மறைவு செய்தியை அறிந்து மிகுந்த அதிர்ச்சி அடைந்ததாகவும், தீரமிக்க வீரராகவும், ராணுவ விவகாரங்களில் மிகுந்த சாமர்த்தியம் கொண்டவர் என்றும் தெரிவிக்கப்பட்டுள்ளது.

இந்தியாவுக்கான ரஷ்ய தூதர் நிக்கோலவ் தெரிவித்திருக்கும் இரங்கல் செய்தியில், “ஹெலிகாப்டர் விபத்தில் ஜெனரல் பிபின் ராவத், அவரது மனைவி மதுலிகா ராவத் மற்றும் பிற அதிகாரிகளின் சோகமான மறைவு அறிந்து ஆழ்ந்த வருத்தம் அடைந்தேன். இந்தியா தனது சிறந்த தேசபக்தர் மற்றும் அர்ப்பணிப்புள்ள “ஹீரோவை” இழந்துவிட்டது. ரஷ்யா ஒரு மிக நெருங்கிய நண்பரை இழந்துவிட்டது. அவர் நமது இருதரப்பு சிறப்பு பெற்ற மூலோபாய கூட்டாண்மையை மேம்படுத்துவதில் பெரும் பங்கு வகித்தார். இந்தியாவுடன் சேர்ந்து வருந்துகிறோம். குட்பை, நண்பரே! பிரியாவிடை, தளபதி!" எனத் தெரிவித்துள்ளார்.

நேபாள பிரதமர் ஷேர் பகதூர் தியூபா இரங்கல் செய்தியில், “ஹெலிகாப்டர் விபத்தில் ஜெனரல் பிபின் ராவத், அவரது மனைவி மற்றும் பல பாதுகாப்பு அதிகாரிகளின் சோகமான மறைவுக்கு ஆழ்ந்த வருத்தம் அளிக்கிறது. அவரை இழந்து வாடும் குடும்பத்தினருக்கும் இந்திய ராணுவ வீரர்களுக்கும் எனது ஆழ்ந்த இரங்கலைத் தெரிவித்துக் கொள்கிறேன்" என்று கூறியுள்ளார்.

பாகிஸ்தான் ராணுவ செய்தித்தொடர்பாளர் தனது ட்விட்டர் பக்கத்தில் வெளியிட்டிருக்கும் இரங்கல் செய்தியில், "தங்கள் நாட்டின் முப்படைகள் சார்பில் பிபின் ராவ்த் மற்றும் 13 பேரின் மறைவுக்கு ஆழ்ந்த இரங்கல் தெரிவித்துக் கொள்வதாக குறிப்பிடப்பட்டுள்ளது.

இதைப்போல இலங்கை பிரதமர் ராஜபக்சே, இஸ்ரேல் முன்னாள் பிரதமர் பெஞ்சமின் நேட்டன்யாகூ, ராணுவ அமைச்சர் பென்னி காண்ட்ஸ், ஆஸ்திரேலிய தூதரகம், பிரெஞ்சு தூதர், சிங்கப்பூர் தூதரகம், மாலத்தீவு அதிபர் இப்ராகிம் சொலி, முன்னாள் அதிபர், தைவான் வெளியுறவு அமைச்சகம், பூடான் பிரதமர் என பல நாடுகளின் தலைவர்கள் இரங்கல் தெரிவித்துள்ளனர்.

 

பதிவு: December 09, 2021
`குளிர்கால ஒலிம்பிக்கை புறக்கணித்தால் உறவு பாதிக்கும்!'- அமெரிக்காவை எச்சரிக்கும் சீனா

பெய்ஜிங் குளிர்கால ஒலிம்பிக்ஸை அமெரிக்கா தூதரக ரீதியில் புறக்கணித்தால் அமெரிக்கா, சீனா, இடையிலான உறவு பெரிதும் பாதிக்கப்படும் என்று சீனா எச்சரிக்கை விடுத்துள்ளது.

ஒலிம்பிக் போட்டிகள், பாராஒலிம்பிக் போட்டிகள், குளிர்கால ஒலிம்பிக் போட்டிகள் ஆகியவை ஒருநாட்டில் நடைபெறும்போது, மற்ற நாடுகளின் அமைச்சர்கள், அதிகாரிகள் அந்தப் போட்டிகளைக் காண சிறப்பு தூதர்களாக பங்கேற்பார்கள். குளிர்கால ஒலிம்பிக் போட்டிகள் சீனாவில் இன்னும் 2 மாதங்களில் நடைபெறவுள்ளன.

இந்நிலையில் இவ்விளையாட்டு போட்டிகளை அதிகாரிகள் அளவில் புறக்கணிக்கப் போவதாக அமெரிக்காவின் அரசியல் முக்கியத்துவம் வாய்ந்த அறிவிப்பு வெளியாகியுள்ளது. இந்த அறிவிப்பை வெளியிட்ட வெள்ளை மாளிகையின் ஊடக செயலாளர், குளிர்கால ஒலிம்பிக்கில் அமெரிக்க வீரர், வீராங்கனைகள் பங்கேற்பர் என்றும் ஆனால் இப்போட்டிக்கான கொண்டாட்டங்கள், விழாக்கள் உள்ளிட்ட நிகழ்வுகளில் அதிகாரிகள் யாரும் கலந்துக்கொள்ள மாட்டார்கள் என்றும் தெரிவித்துள்ளார்.

சீனாவில் நடைபெறும் மனித உரிமை மீறல்களை கண்டிக்கும் வகையில் இம்முடிவு எடுக்கப்பட்டதாகவும் அவர் தெரிவித்தார். அமெரிக்காவின் இந்த முடிவில் சீனா அதிருப்தி அடைந்துள்ளது. விளையாட்டில் அரசியல் செய்வதை அமெரிக்கா நிறுத்தி கொள்ள வேண்டும் என்று தெரிவித்த சீன வெளியுறவுத் துறை அமைச்சர் ஜாவோ லிஜியன், அமெரிக்காவின் இந்த முடிவு ஒலிம்பிக் கொள்கைகளுக்கு எதிரானது என்றும் கண்டித்தார்.

மேலும் அவர், 'ஒற்றுமை என்பது தான் தாரக மந்திரம். ஆனால் விளையாட்டில் அரசியலைக் கலந்து ஒலிம்பிக் விதிகளை அமெரிக்கா மீறி செயல்பட்டு வருகிறது. உலகத்தில் உள்ள ஒட்டுமொத்த வீரர்கள் மற்றும் விளையாட்டு ஆர்வலர்களின் நிலைப்பாட்டிற்கு எதிரான நிலைப்பாட்டை அமெரிக்கா எடுத்துள்ளது. இதற்கு கடும் எதிர்ப்பு தெரிவிப்பது மட்டுமல்லாது. இதற்கான பதில் நடவடிக்கை எடுப்பது குறித்தும் ஆலோசித்து வருகிறோம்' என்றார்.

பதிவு: December 08, 2021
15 பேர் தொற்றால் பாதிப்பு!- கனடாவை அச்சுறுத்தும் ஒமிக்ரான்

கனடாவில் 15 பேருக்கு புதிய வகை கொரோனா தொற்றான ஒமிக்ரான் வகை கொரோனா பாதிப்பு கண்டறியப்பட்டுள்ளதாக கனடா சுகாதாரத்துறை தெரிவித்துள்ளது.

கனடா தேசிய ஆலோசனைக் குழுவின் பரிந்துரையை ஏற்று 50 வயதுக்கு மேற்பட்ட அனைவருக்கும் ஆறு மாதங்களுக்குள் தடுப்பூசி தொடரை முடித்து பிறகு பூஸ்டர் ஷாட் போடப்படும் என தெரிவிக்கப்பட்டுள்ளது. கடந்த வாரம் அமெரிக்காவைத் தவிர அனைத்து நாடுகளிலிருந்தும் விமானம் மூலம் வரும் மக்கள் கொரோனா பரிசோதனை எடுக்க வேண்டும் என உத்தரவிட்டு இருந்தது, தென் ஆப்பிரிக்காவிலிருந்து 10 நாடுகளை உள்ளடக்கும் வகையில் பயணிகளுக்கான தடையை விரிவுபடுத்தியது.

டொராண்டோவில் நேற்று ஒமிக்ரான் வகை கொரோனா தொற்று மூன்று பேருக்கு உறுதியானது. அவர்களில் இருவர் சமீபத்தில் நைஜீரியாவிலிருந்து திரும்பினர், மற்றொருவர் சுவிட்சர்லாந்தில் இருந்து திரும்பியவர். தற்போது கடுமையான கொரோனா தொற்று பாதிப்பு இல்லையென்றாலும் வரும் வாரங்களில் பாதிக்கப்பட்டவர்கள் எண்ணிக்கை உயர வாய்ப்புள்ளதாக சுகாதாரத்துறை அதிகாரிகள் தெரிவித்துளள்னர்.

கோவிட்-19 சிகிச்சைக்காக பைசர் நிறுவனத்தின் ஒரு மில்லியன் டோஸ் வாய்வழி வைரஸ் தடுப்பு மருந்தை வாங்க கனடா ஒப்பந்தம் செய்துள்ளது. மேலும் மெர்க் நிறுவனத்துடன் 500,000 டோஸ் ஒப்பந்தம் செய்துள்ளது.

பதிவு: December 04, 2021
`பள்ளிலேயே 3 மாணவர்கள் சுட்டுக்கொலை!'- அமெரிக்காவை பதறவைத்த 15 வயது மாணவன்

அமெரிக்காவில் பள்ளியிலேயே 3 மாணவர்களை மாணவனே கொன்ற சம்பவம் அதிர்ச்சியை ஏற்படுத்தியுள்ளது. துப்பாக்கியால் சுட்டி 15 வயது மாணவனை காவல்துறையினர் கைது செய்துள்ளனர்.

அமெரிக்காவின் மிச்சிகன் மாகாணத்தில் உள்ள டெட்ராய்ட் நகர் அருகே உயர்நிலை பள்ளி ஒன்றில் அடையாளம் தெரியாத நபர் துப்பாக்கிச்சூடு நடத்தினார். இந்த சம்பவத்தில் ஐந்து நிமிட இடைவெளியில் 20 முறை அவர் சுட்டத்தில் 3 மாணவர்கள் பரிதாபமாக உயிரிழந்தனர். இறந்தவர்கள் 16 வயது ஆண், 14 வயது பெண் மற்றும் 17 வயது பெண் என தெரிவிக்கப்பட்டிருக்கிறது.

மேலும் பள்ளியின் ஆசிரியர் உள்பட 8 பேர் காயமடைந்தனர். அவர்கள் அனைவரும் மருத்துவமனையில் சிகிச்சைக்காக அனுமதிக்கப்பட்டுள்ளனர். இதையடுத்து சம்பவ இடத்திற்கு விரைந்த காவல்துறையினர், துப்பாக்கிச்சூடு நடத்திய ஆக்ஸ்போர்ட் உயர்நிலை பள்ளியை சேர்ந்த 15 வயதுடைய மாணவனை சந்தேகத்தின் பேரில் கைது செய்தனர். காவல்துறையினர் பிடித்தபோது அந்த மாணவன் எந்தவித எதிர்ப்பையும் தெரிவிக்கவில்லை. அவரிடம் இருந்து துப்பாக்கி ஒன்றும் பறிமுதல் செய்யப்பட்டது. இந்த சம்பவம் குறித்து மாணவரிடம் காவல்துறையினர் தொடர்ந்து விசாரணை நடத்தி வருகின்றனர்.

காவல்துறையினரை குறிவைத்தும், பொதுமக்கள் அதிகம் கூடும் இடங்களிலும் தொடர் துப்பாக்கிசூடு சம்பவங்கள் அரங்கேறி வருகின்றன. இதனால் துப்பாக்கி விநியோகத்தில் கடும் கட்டுப்பாடுகள் விதிக்கப்பட வேண்டும் என சமூக ஆர்வலர்கள் அரசுக்கு கோரிக்கை விடுத்து வருகின்றனர். இந்த துப்பாக்கிச்சூடு சம்பவத்திற்கு அமெரிக்க அதிபர் ஜோ பைடன் கண்டனமும், இறந்தவர்கள் குடும்பத்திற்கு இரங்கலும் தெரிவித்துள்ளார்.

பதிவு: December 01, 2021
1.25 நிமிடங்கள் அமெரிக்க அதிபர் பதவியை வகித்த கமலா ஹாரிஸ்!

தமிழகத்தை பூர்வீகமாக கொண்ட கமலா ஹாரிஸ் அமெரிக்க அதிபராக 1 மணி நேரம் 25 நிமிடங்கள் பதவி வகித்தார்.

மருத்துவ பரிசோதனைக்காக அமெரிக்க அதிபர் ஜோ பைடன், வாஷிங்டனில் உள்ள மருத்துவமனையில் அனுமதிக்கப்பட்டுள்ளார். அங்கு அவருக்கு பெருங்குடல் தொடர்பாக, மயக்கவியல் முறையில் சிகிச்சை அளிக்கப்பட்டது. இதையடுத்து சிகிச்சையில் இருந்து குணமாகும் வரை தனது அதிபருக்குள்ள அதிகாரத்தை துணை அதிபர் கமலா ஹாரிஸுக்கு தற்காலிகமாக வழங்கி உத்தரவிட்டார்.


இதனையடுத்து அதிபர் பைடனுக்கு மயக்க மருந்து தந்து மருத்துவ சோதனை நடந்ததால் கமலாவுக்கு தற்காலிக அதிகாரம் தரப்பட்டது. 1.25 மணி நேரம் அதிகாரம் வழங்கப்பட்ட நிலையில் அமெரிக்க அதிபர் இருக்கையில் கமலாஹாரிஸ் அமரவில்லை எனவும் தற்காலிக அமெரிக்க அதிபராக கமலா ஹாரிஸ் பதவி வகித்ததாக வெள்ளை மாளிகை தெரிவித்துள்ளது.

வழக்கமான மருத்துவ பரிசோதனை முடிந்த பிறகு ஜோ பைடன் மீண்டும் அமெரிக்க அதிபர் பணியை தொடங்கினார். அமெரிக்காவில் பெண் அதிபராக பதவி வகித்த முதல் பெண் என்ற பெருமையை துணை அதிபர் கமலா ஹாரிஸ் பெற்றார்.

பதிவு: November 20, 2021
உலகின் நம்பர் ஒன் பணக்கார நாடு சீனா!- அமெரிக்காவை பின்னுக்கு தள்ளியது

உலகின் பணக்கார நாடாக இருந்த அமெரிக்காவை பின்னுக்கு தள்ளி சீனா முதலிடத்தை பிடித்துள்ளது.

ஸ்விட்சர்லாந்தில் உள்ள மெக்கன்சி குளோபல் நிறுவனம் வெளியிட்டுள்ள ஆய்வறிக்கையின்படி, உலகின் முன்னணி பணக்கார நாடுகளான சீனா முதல் இடத்திலும், அமெரிக்கா இரண்டாம் இடத்திலும் உள்ளது. பணக்கார நாடுகள் பட்டியலில், ஜெர்மனி 3வது இடத்திலும், பிரான்ஸ், இங்கிலாந்து, கனடா, ஆஸ்திரேலியா, ஜப்பான், மெக்சிகோ, ஸ்வீடன் நாடுகள் அடுத்தடுத்த இடங்களில் உள்ளன. மேலும் உலகின் மொத்த வருமானத்தில் 60 சதவீதத்துக்கும் மேல் 10 நாடுகளுக்கு மட்டுமே சொந்தமாக உள்ளது.

சீனா உலக வர்த்தக நிறுவனத்தின் உறுப்பினராக ஆவதற்கு முந்தைய 2000-ம் ஆண்டில் அதன் சொத்து மதிப்பு 7 லட்சம் கோடி டாலராக இருந்தது. 2020-ல் சீனாவின் சொத்து மதிப்பு 120 லட்சம் கோடி டாலராக உயர்ந்துள்ளது. இதன்மூலம் அமெரிக்காவைப் பின்னுக்குத் தள்ளி சீனா உலகின் பெரும்பணக்கார நாடாக மாறியுள்ளது.

இதே காலத்தில் அமெரிக்காவின் சொத்து மதிப்பு இரண்டு மடங்கு உயர்ந்து 90 லட்சம் கோடி டாலராக உள்ளது. கடந்த 20 ஆண்டுகளில் உலகின் மொத்த சொத்து மதிப்பு மூன்று மடங்கு வளர்ச்சி அடைந்துள்ளது. 2000-ம் ஆண்டில் 156 லட்சம் கோடி டாலராக இருந்த உலகின் சொத்து மதிப்பு 2020-ல் 514 லட்சம் கோடி டாலராக உயர்ந்துள்ளது. இதில் மூன்றில் ஒரு பங்கு வளர்ச்சிக்கு சீனாவே காரணம்.

பதிவு: November 17, 2021
முக அடையாளம் காணும் சேவையை கைவிடுவதாக பேஸ்புக் அறிவிப்பு!

முக அடையாளம் காணும் சேவையை கைவிடுவதாக பேஸ்புக் நிறுவனம் தெரிவித்துள்ளது.

சமூக வலைத்தளமான பேஸ்புக் தனது தாய் நிறுவனத்தின் பெயரை மெட்டா என கடந்த வாரம் மாற்றியது. இந்நிலையில் பேஸ்புக் நிறுவனம் வழங்கி வந்த முக அடையாளம் காணும் சேவையை கைவிடுவதாக அறிவித்துள்ளது. இதுதொடர்பான வழிகாட்டுதல்களை பல நாடுகள் வெளியிடாத நிலையில் அதை கைவிடுவதாகவும் 100 கோடி பேரின் முக அடையாளங்களை நீக்குவதாகவும் தெரிவித்துள்ளது.

பேஸ்புக்கின் கீழ் பல நிறுவனங்கள் ஏற்கெனவே இருக்கின்றன. இன்னும் பல நிறுவனங்கள் அதன் கீழ் வரவிருக்கின்றன. அப்படி இருக்கும்போது அது பேஸ்புக்காக, சமூக வலைதள நிறுவனமாக மட்டுமே அறியப்படுவது சரியல்ல என்று இந்தப் புதிய பெயரை வைத்துள்ளார் மார்க். சமூக வலைதள விஷயங்களில் ஏற்படும் சர்ச்சைகள் மொத்த நிறுவனத்தையும் பாதிக்கக்கூடாது என்பதிலும் தெளிவாக இருக்கிறார் மார்க்.

இந்த 'மெட்டா' என்னும் பெயர் அவரது கனவுத்திட்டமான மெட்டாவெர்ஸிலிருந்து (Metaverse) வந்தது. கடந்த சில வருடங்களாகவே 'மெட்டாவெர்ஸ்' உருவாகும் முயற்சியில் பேஸ்புக் அதீத ஈடுபாடு காட்டி வருகிறது.

பதிவு: November 03, 2021
`ஒரு சிலிண்டர் விலை ரூ.2,657; ஒரு லிட்டர் பால் ரூ.250!' - எங்கே தெரியுமா?

இலங்கையில் சமையல் எரிவாயு சிலிண்டர் விலை 90 சதவிகிதம் வரை அதிகரித்து, 2,657 ரூபாய்க்கு விற்கப்படுவதால் மக்கள் கடுமையாக பாதிக்கப்பட்டுள்ளனர்.

இலங்கையில் கடந்த 8ம் தேதி வரை வீடுகளில் பயன்படுத்தப்படும் சமையல் எரிவாயு சிலிண்டர் விலை ஆயிரத்து 400 ரூபாய்க்கு விற்கப்பட்டது. இந்நிலையில், விலை அதிகரித்து 2,657 ரூபாய்க்கு எரிவாயு சிலிண்டர் விற்பனையாகிறது. அதேபோல ஒரு லிட்டர் பால் 250 ரூபாய்க்கு விற்கப்படுகிறது. கோதுமை மாவு, சர்க்கரை உள்ளிட்ட அத்தியாவசிய பொருட்களின் விலையும் விண்ணை முட்டும் அளவுக்கு அதிகரித்துள்ளது. எனினும் சமையல் எரிவாயு சிலிண்டர் விலை கடுமையாக உயர்ந்திருப்பதால் சமூக வலைதளங்களில் பலர் தங்களது அதிருப்தியை வெளிப்படுத்தி வருகின்றனர். உடனடியாக விலை உயர்வை திரும்ப பெற வேண்டும் என்றும் வலியுறுத்தியுள்ளனர்.

இலங்கையில் கொரோனா தொற்று வேகமாக பரவிய நிலையில், அந்நிய செலாவணியை குறைக்க, இறக்குமதி கட்டுப்பாட்டுகளை விதித்தது. இதனால் இலங்கையில் பால் பவுடர் முதல் பல்வேறு அத்தியாவசிய பொருட்களின் விலை கடுமையாக உயர்ந்து வருகிறது.

பதிவு: October 12, 2021
`கோவிஷீல்டு தடுப்பூசி செலுத்திக்கொண்ட இந்தியர்கள் வர எந்த தடையும் இல்லை!'- இங்கிலாந்து திடீர் அறிவிப்பு

"கோவிஷீல்டு தடுப்பூசி செலுத்திக்கொண்ட இந்தியர்கள் தங்கள் நாட்டுக்கு வர எந்த தடையும் இல்ல" என இங்கிலாந்து அரசு திடீரென அறிவித்துள்ளது.

உலகில் பல்வேறு கொரோனா தடுப்பூசிகள் செலுத்தப்படும் போதும் சில தடுப்பூசிகள் மட்டுமே சர்வதேச அங்கீகாரம் பெற்றுள்ளன. அந்த வகையில் ஆக்ஸ்போர்ட் பல்கலைக்கழகத்தின் கோவிஷீல்டு தடுப்பூசியை இங்கிலாந்து அங்கீகரித்துள்ளது. அதே நேரத்தில் இந்தியாவில் கோவிஷீல்டு தடுப்பூசி செலுத்திக் கொண்டவர்களை தங்கள் நாட்டில் அனுமதிக்க மறுத்து வந்தது.

இந்தியாவில் இருந்து வருவோர் கோவிஷீல்டு தடுப்பூசியை 2 தவணைகள் செலுத்திய போதும் தங்கள் நாட்டுக்குள் வரும் போது 10 நாட்கள் தனிமையில் இருக்க வேண்டும் என அறிவித்தது. இது இந்திய பயணிகளுக்கு கடுமையான பாதிப்புகளை ஏற்படுத்தியது. இந்நிலையில் கோவிஷீல்டு உள்பட தங்கள் நாட்டால் அங்கீகரிக்கப்பட்டுள்ள தடுப்பூசிகளில் ஏதேனும் ஒன்றை முழுமையாக செலுத்திக்கொண்ட இந்தியர்கள் வரும் 11ம் தேதி முதல் பிரிட்டனில் கட்டுப்பாடுகள் இன்றி அனுமதிக்கப்படுவார்கள் என இந்தியாவிற்கான இங்கிலாந்து தூதர் அலெக்ஸ் எல்லீஸ் தெரிவித்துள்ளார்.

இங்கிலாந்து அரசின் இந்த அறிவிப்பு இந்திய பயணிகளிடையே வரவேற்பை பெற்றுள்ளது. இதனிடையே உற்பத்தி அதிகரித்துள்ளதால் தடுப்பூசி ஏற்றுமதியை மீண்டும் தொடங்க ஒன்றிய அரசு முடிவு செய்துள்ளது. இதையடுத்து நேபாளம், மியான்மர், வங்கதேசம் ஆகிய நாடுகளுக்கு 10 லட்சம் டோஸ் கோவிஷீல்டு தடுப்பூசிகளை ஏற்றுமதி செய்ய சீரம் நிறுவனத்திற்கு ஒன்றிய அரசு அனுமதி வழங்கியுள்ளது. இதேபோல் ஈரானுக்கு 10 லட்சம் டோஸ் கோவாக்சின் தடுப்பூசிகளை அனுப்பவும் பாரத் பயோடெக் நிறுவனத்திற்கு அனுமதி வழங்கப்பட்டுள்ளது.

பதிவு: October 08, 2021
இயற்பியல் துறைக்கான நோபல் பரிசு அறிவிப்பு!- 3 விஞ்ஞானிகள் யார் தெரியுமா?

இயற்பியல் துறைக்கான இந்தாண்டின் நோபல் பரிசு 3 விஞ்ஞானிகளுக்கு அறிவிக்கப்பட்டுள்ளது.

உலகின் உயரிய விருதுகளில் ஒன்றான நோபல் பரிசு ஆண்டுதோறும், மருத்துவம், இயற்பியல், வேதியியல், பொருளாதாரம், அமைதி, இலக்கியம் ஆகிய ஆறு துறைகளில் சாதனை படைத்தவர்களுக்கு வழங்கப்பட்டு வருகிறது. அமைதிக்கான நோபல் பரிசு மட்டும் நார்வேயில் வழங்கப்படும் நிலையில், ஏனைய விருதுகள் சுவீடன் தலைநகர் ஸ்டாக்ஹோமில் வழங்கப்படுகின்றன. அதன்படி, 2021ம் ஆண்டுக்கான மருத்துவத்துறைக்கான நோபல் பரிசு நேற்று அறிவிக்கப்பட்டது.

இந்த நிலையில் சுவீடன் தலைநகர் ஸ்டாக்ஹோமில் இயற்பியல் துறைக்கான நோபல் பரிசை 3 விஞ்ஞானிகளுக்கு தேர்வுக் குழு அறிவித்துள்ளது. அமெரிக்காவின் ஸ்கியூரோ மனாபே, ஜெர்மனியின் கிளாஸ் ஹாசில்மேன், இத்தாலியின் ஜியார்ஜியோ பாரிசி ஆகியோருக்கு நோபல் பரிசு கூட்டாக வழங்கப்படுகிறது.

புவிவெப்பமயமாதலை நம்பகத்தன்மை உள்ள வகையில் கண்டறியும் முறைக்காக மனாபே, ஹாசில்மேன் அவர்களுக்கு நோபல் பரிசு வழங்கப்படுகிறது. சிக்கலான இயற்பியல் கட்டமைப்புகள் குறித்த விளக்கத்திற்காக ஜியார்ஜியோ பாரிசிக்கு நோபல் பரிசு அறிவிக்கப்பட்டுள்ளது. இவர்களுக்கு நோபல் விருதுடன் ரூ.8 கோடி பரிசாக வழங்கப்படுகிறது.

பதிவு: October 05, 2021
இரவு முடங்கியது காலையில் சீரானது!- பேஸ்புக், வாட்ஸ்ஆப், இன்ஸ்டா சேவை தடைக்கு என்ன காரணம்?

நேற்றிரவு திடீரென பேஸ்புக், வாட்ஸ்ஆப் மற்றும் இன்ஸ்டாகிராமின் சேவைகள் முடங்கியது. இதன் பின்னர் அதிகாலை 4 மணிக்குத்தான் சேவை சீரானது.

மார்க் சகர்பெர்க்கின் சமூக வலைதள நிறுவனங்களான பேஸ்புக், வாட்ஸ்ஆப் மற்றும் இன்ஸ்டாகிராம் தொழில்நுட்ப கோளாறால் நேற்றிரவு முதல் சேவை முடங்கியது. இதனால் ஆதங்கமடைந்த நெட்டிசன்கள், ட்விட்டரில் பல்வேறு வகையான மீம்ஸ்களை பதிவிட்டு முடங்கிய செயலிகளை கலாய்த்தனர். பயனாளர்களின் பதிவுகள் மற்றும் மீம்ஸ்களுக்கு வலு சேர்க்கும் விதமாக ட்விட்டர் நிறுவனமும் அனைவருக்கும் வணக்கம் என்று பேஸ்புக், வாட்ஸ்ஆப் மற்றும் இன்ஸ்டாகிராமை கலாய்த்தது.

ட்விட்டரின் பதிவுக்கு வாட்ஸ்ஆப் 'ஹலோ' மற்றும் இன்ஸ்டா 'ஹாப்பி மண்டே' என்றும் ரிப்ளை செய்தனர். இவை மட்டுமின்றி மெக் டொனால்ஸ், ட்ரு காலர் என பல்வேறு நிறுவனங்களும் ட்விட்டரின் பதிவில் கமன்ட் செய்து உரையாடினர். வழக்கமாக ட்விட்டரில் ட்ரெண்ட் ஆவதை கண்ட பயனாளிகள், ஓர் இரவில் ட்விட்டரே ட்ரெண்டிங் ஆனதை கண்டனர். ஆனால் அதிக பயனாளர்கள் ஒரே நேரத்தில் ட்விட்டர் பக்கம் திரும்பியதால் அதன் சேவையும் ஒரு கட்டத்தில் பாதிக்கப்பட்டது. இதனால் பேஸ்புக், இன்ஸ்டாகிராம், வாட்ஸ்ஆப் பக்கங்கள் முடங்கியதை கேலி செய்த ட்விட்டர் தளமும் முடங்கியது.

இந்த நிலையில் 6 மணி நேரத்திற்கு பிறகு காலை சுமார் 4 மணி அளவில் பேஸ்புக், இன்ஸ்டாகிராம், வாட்ஸ்அப் வலைத்தளங்கள் அடுத்தடுத்து செயல்பாட்டுக்கு வரத்தொடங்கின. இது குறித்த ட்விட்டர் பதிவில், உலகெங்கும் உள்ள பயனாளர்களிடம் மன்னிப்பு கோருவதாக ஃபேஸ்புக் நிறுவனம் கூறியுள்ளது. சேவைகளை முழு அளவில் மீண்டும் வழங்க கடுமையாக பணியாற்றி வருவதாகவும், தொடர்ந்து முழு அளவில் சேவை மீண்டும் வழங்கப்பட்டு வருவதாகவும் அதில் கூறப்பட்டுள்ளது. இஸ்டாகிராம் மற்றும் வாட்ஸ்அப் செயலிகளும் தங்கள் ட்விட்டர் பக்கத்தில் வாடிக்கையாளர்களிடம் வருத்தம் தெரிவித்திருக்கின்றன. அதேநேரத்தில், எதன் காரணமாக பேஸ்புக், இன்ஸ்டாகிராம், வாட்ஸ்அப் சேவைகள் முடங்கியது என்பது குறித்து அந்நிறுவனம் விளக்கம் அளிக்கவில்லை.

பதிவு: October 05, 2021
`பலரது தலை துண்டிப்பு; 116 கைதிகள் உயிரிழப்பு!'- ஈகுவடார் சிறைச்சாலையில் நடந்தது என்ன?

ஈகுவடார் நாட்டில் உள்ள சிறைச்சாலையில் இரு தரப்பினர் இடையே ஏற்பட்ட மோதலில் பலியானோர் எண்ணிக்கை 116 ஆக அதிகரித்துள்ளது.

தென் அமெரிக்க நாடான ஈகுவடாரின் குயாஸ் மாகாணத்தில் உள்ள துறைமுக நகரமான குயாகுவில் சிறைச்சாலை உள்ளது. இந்த சிறைச்சாலையில் கொலை, கொள்ளை, போதைப்பொருள் கடத்தல் உள்ளிட்ட பல்வேறு கொடூர குற்றங்களில் ஈடுபட்ட கைதிகள் அடைக்கப்பட்டுள்ளனர்.

சிறையில் உள்ள கைதிகள் தனித்தனி குழுக்களாக பிரிந்து அவ்வப்போது கோஷ்டி மோதலிலும் ஈடுபட்டு வருகின்றனர். இந்நிலையில், குயாகுவில் சிறைச்சாலையில் இருதரப்பு கைதிகளுக்கு இடையே மோதல் ஏற்பட்டது. அந்த மோதல் பெரும் கலவரமாக வெடித்தது. ‘லாஸ் வெகோஸ்' மற்றும் ‘லாஸ் கேனரஸ்' என்று அழைக்கப்படும் இருதரப்பு கைதிகள் கத்தி உள்ளிட்ட கூர்மையான ஆயுதங்களால் ஒருவரையொருவர் சரமாரியாக தாக்கிக்கொண்டனர்.

மேலும் அவர்கள் துப்பாக்கி சூடு நடத்தியதோடு, கையெறி வெடிகுண்டுகளையும் பயன்படுத்தினர். கலவரம் சிறைக்காவலர்களின் கட்டுப்பாட்டை மீறி சென்றதால் கலவர தடுப்பு பிரிவு போலீசார் மற்றும் ராணுவ வீரர்கள் சிறைச்சாலைக்கு வரவழைக்கப்பட்டனர். இதனை தொடர்ந்து 5 மணிநேர போராட்டத்திற்கு பின்னர் கலவரம் முழுவதும் கட்டுக்குள் கொண்டுவரப்பட்டது. ஆனாலும், இந்த கலவரத்தில் முதற்கட்டமாக 24 பேர் உயிரிழந்ததாக அதிகாரிகள் தரப்பில் தெரிவிக்கப்பட்டது. மேலும் 40-க்கும் மேற்பட்ட கைதிகள் படுகாயங்களுடன் மருத்துவமனையில் சிகிச்சை பெற்று வந்தனர்.

இந்நிலையில், ஈகுவடார் சிறைச்சாலை கலவரத்தில் உயிரிழந்தோர் எண்ணிக்கை 116ஆக அதிகரித்துள்ளது. இதில் 6 கைதிகள் தலை துண்டித்து கொல்லப்பட்டனர். மேலும் 52-க்கும் அதிகமானோர் காயமடைந்துள்ளனர். மருத்துவமனையில் சிகிச்சை பெற்று வருபவர்களில் மேலும் சிலரது நிலைமை கவலைக்கிடமாக உள்ளதால் பலி எண்ணிக்கை மேலும் அதிகரிக்கக்கூடும் என தகவல் வெளியாகியுள்ளது.

பதிவு: September 30, 2021
அன்று கன்னத்தில் பளார்... இன்று முட்டை வீச்சு..!- பிரான்ஸ் அதிபர் இமானுவேலை தொடரும் சோகம்

பிரான்ஸ் அதிபர் இமானுவேல் மேக்ரான் மீது பொது நிகழ்ச்சி ஒன்றில், முட்டை வீசப்பட்டதால் பரபரப்பு ஏற்பட்டது.

தெற்கு பிரான்சில் உள்ள லியோனில் சர்வதேச உணவு வர்த்தக நிகழ்ச்சி நடைபெற்றது. இதில் கலந்து கொண்ட அந்நாட்டு அதிபர் இமானுவேல் மேக்ரான் மீது கூட்டத்தில் இருந்து ஒருவர் முட்டையை வீசினார். உடனடியாக அவரின் பாதுகாவலர்கள் அதிபரை சூழ்ந்து கொண்டனர். மேக்ரான் தோளில் விழுந்த முட்டை பின்னர் கீழே விழுந்தது. எந்த திசையில் இருந்து முட்டை பறந்து வந்தது என்பதை கண்டறிந்து முட்டை வீசிய நபரை பாதுகாவலர்கள் மடக்கி பிடித்தனர்.

அதிபருடன் பேச வேண்டும் என்பதற்காக தான் முட்டை வீசினேன் என்று கூறி இருக்கிறார் அந்த நபர். ஆனாலும் அவரை கைது செய்து பாதுகாவலர்கள் அழைத்து சென்றனர். இதே போன்று கடந்த ஜூன் மாதம் பொது நிகழ்ச்சி ஒன்றில் கலந்து கொண்டபோது, அதிபர் மேக்ரானை கன்னத்தில் ஒருவர் அறைந்தார். தற்போது அதிபர் மீது மீண்டும் முட்டை வீசப்பட்டு இருப்பது அந்நாட்டு அரசியலில் பரபரப்பை ஏற்படுத்தி உள்ளது. பிரான்ஸ் நாட்டில் 6 மாதத்தில் அதிபர் தேர்தல் நடைபெற உள்ள நிலையில், மேக்ரான் மீதான அதிருப்தி பல இடங்களில் வெளிப்படுவது குறிப்பிடத்தக்கது.

பதிவு: September 28, 2021
`தீவிரவாதிகளை வளர்க்கும் பாகிஸ்தானால் உலகமே அல்லல்படுகிறது!'- ஐநாவில் இந்தியா பதிலடி

கொல்லைப்புறம் வழியாக பயங்கரவாதிகளை வளர்க்கும் பாகிஸ்தானால் ஒட்டுமொத்த உலகமே அல்லல்படுவதாக ஐக்கிய நாடுகள் சபையின் பொது அவையில் இந்தியா குற்றம் சாட்டியுள்ளது.

ஜம்மு - காஷ்மீரின் சிறப்பு தகுதியை நீக்கியது தொடர்பாக ஐ.நா. பொது அவையில் பாகிஸ்தான் பிரதமர் இம்ரான்கான் குற்றம் சாட்டினார். இதற்கு பதில் கொடுக்கும் உரிமை முறையில், பதில் அளித்த ஐ.நாவுக்கான இந்திய செயலாளர் ஸ்னேகா துபே , பயங்கரவாதிகளை ஆதரிக்கும் நாடு என்ற பெயரை பாகிஸ்தான் உலகளவில் வெளிப்படையாக சம்பாதித்து இருப்பதாக குற்றம் சாட்டினார்.

ஜம்மு- காஷ்மீர் மற்றும் லடாக் இந்தியாவுடன் தான் இருந்தது என்று கூறிய அவர், இந்தியாவின் ஒருங்கிணைந்த பகுதியாக பிரிக்கப்பட முடியாத பகுதியாக ஜம்மு - காஷ்மீர் இருக்கும் என்றும் பதில் அளித்துள்ளார். ஐ.நா. பாதுகாப்பு கவுன்சிலால் தடை செய்யப்பட்ட பயங்கரவாதிகளுக்கு அடைக்கலம் அளிக்கும் நாடு என்ற கேவலமான சாதனையை படைத்துள்ள பாகிஸ்தான் தீக்குளித்து கொண்டு தீயணைப்பு வீரரைபோல் நடிக்கிறது என்று காட்டமாக விமர்சித்தார்.

ஒசாமா பின்லேடனுக்கு அடைக்கலம் அளித்த பாகிஸ்தான், அவரை இன்றும் ஒரு தியாகியாக மகத்துவப்படுத்துகிறது என்று சாடிய ஸ்னேகா, கொல்லைப்புறம் வழியாக தீவிரவாதிகளை வளர்க்கும் பாகிஸ்தானால் ஒட்டுமொத்த உலகமே அல்லல்படுகிறது என்றும் காஷ்மீரில் சமூக குடியிருப்புகளை உடனே காலி செய்ய வேண்டும் என்றும் கூறினார்.

பதிவு: September 25, 2021
`உலகத்துக்கு நீங்கள் உந்து சக்தி!'- கமலா ஹாரிஸை இந்தியாவுக்கு அழைத்த பிரதமர் மோடி

அமெரிக்க துணை அதிபர் கமலா ஹாரிஸை சந்தித்த பிரதமர் மோடி இரு தரப்பு உறவுகளை வலுப்படுத்துவது குறித்து பேச்சுவார்த்தை நடத்தினார். மேலும் கமலா ஹாரிஸை இந்தியா வரும்படி பிரதமர் அழைப்பு விடுத்தார்.

அமெரிக்கா சென்ற பிரதமர் நரேந்திர மோடி, அந்நாட்டின் துணை அதிபர் கமலா ஹாரிஸை சந்தித்து இரு தரப்பு உறவுகள் குறித்து பேச்சுவார்த்தை நடத்தினார். அப்போது சர்வதேச விவகாரங்கள், பிராந்திய வளர்ச்சிகள், சுகாதாரம், சிக்கலான தொழில்நுட்பங்கள், கல்வி ஆகியவை குறித்து இருவரும் விவாதித்ததாக வெளியுறவுத் துறை தரப்பில் தெரிவிக்கப்பட்டுள்ளது. பின்னர், இரு நாட்டு தலைவர்களும் கூட்டாக செய்தியாளர்களை சந்தித்தனர்.

அப்போது பேசிய பிரதமர் மோடி, அமெரிக்காவின் துணை அதிபராக கமலா ஹாரிஸ் தேர்வானது வரலாற்று சிறப்பு வாய்ந்தது. உலகம் முழுவதும் பலருக்கு கமலா ஹாரிஸ் உந்து சக்தியாக திகழ்கிறார். பைடன் மற்றும் கமலா ஹாரிஸ் தலைமையில் இந்திய, அமெரிக்க உறவு நிச்சயம் புதிய உயரத்தை அடையும் என தாம் நம்புகிறேன். விரைவில் இந்தியாவுக்கு வர வேண்டும்" என அழைப்பு விடுத்தார்.

இதைத் தொடர்ந்து பேசிய கமலா ஹாரிஸ், உலகம் முழுவதும் கொரோனா பரவத் தொடங்கியபோது, பிற நாடுகளுக்கு தடுப்பூசி வழங்குவதற்கான மூல ஆதாரமாக இந்தியா விளங்கியது. கொரோனா தடுப்பூசியை உலக நாடுகளுக்கு ஏற்றுமதி செய்ய முடிவு செய்துள்ளதற்கு வரவேற்பு தெரிவித்த அவர், அமெரிக்காவிற்கு இந்தியா முக்கியமான நட்பு நாடு எனவும் கமலா ஹாரிஸ் தெரிவித்தார்.

பருவநிலை மாற்றம் குறித்து இந்தியா மேற்கொண்டு வரும் நடவடிக்கையை சுட்டிக்காட்டிய அவர், இதில் இருநாடுகளும் இணைந்து செயலாற்றினால் உலக நாடுகளில் பெரும் தாக்கத்தை ஏற்படுத்திடும் எனவும் கமலா ஹாரிஸ் தெரிவித்தார்.

பதிவு: September 24, 2021
ஜஸ்டின் ட்ரூடோ ஹாட்ரிக் வெற்றி!- 3வது முறையாக கனடா பிரதமர் ஆகிறார்

கனடாவில் நடந்து முடிந்த பொதுத்தேர்தலில் பிரதமர் ஜஸ்டின் ட்ரூடோ தலைமையிலான லிபரல் கட்சி 3வது முறையாக வெற்றி பெற்றுள்ளது. அதேநேரம் நாடாளுமன்றத்தில் லிபரல் கட்சி பெரும்பான்மை இடங்களில் வெல்லவில்லை. 3வது முறையாக பிரதமராகிறார் ஜஸ்டின்.

கனடாவில் வழக்கமாக 4 ஆண்டுகளுக்கு ஒரு முறை பொதுத்தேர்தல் நடத்தப்படுவது வழக்கம். கடந்த 2019 நடைபெற்ற தேர்தலில் எந்தக் கட்சிக்குத் தனிப்பெரும்பான்மை கிடைக்கவில்லை. இதனால் தனிப்பெரும் கட்சியாக உருவெடுத்த ஜஸ்டின் ட்ரூடோவின் லிபரல் கட்சி கனடாவில் ஆட்சி அமைத்தது. இந்த நிலையில் கனடா நாடாளுமன்றம் பதவிக்காலம் முடிவடைய இன்னும் 2 ஆண்டுகள் உள்ள போதும், பெரும்பான்மையை அடைவதற்காக இடைத்தேர்தலுக்கு பிரதமர் ஜஸ்டின் ட்ரூடோ அழைப்பு விடுத்தார்.

அதன்படி கடந்த ஆகஸ்ட் 15ம் தேதி அந்நாட்டின் நாடாளுமன்றம் கலைக்கப்பட்டது. அங்கு செப்டம்பர் 20ம் தேதி தேர்தல் நடைபெற்றது. இதில் லிபரல் கட்சி சார்பில் ஜஸ்டின் ட்ரூடோ, கன்சர்வேட்டிவ் கட்சி சார்பில் எரின் ஓ டூல் களமிறங்கினர். கனடா பொதுதேர்தல் நேற்று முடிந்த நிலையில், உடனே முடிவுகள் வெளியாகின. தனிபெருபான்மைக்கு மொத்தம் 170 இடங்கள் தேவைப்பட்ட நிலையில், ஜஸ்டின் ட்ரூடோ தலைமையிலான லிபரல் கட்சி 156 இடங்களில் வென்று 3வது முறையாக ஆட்சியை பிடித்துள்ளது. எனினும் இந்த முறையும் அந்த கட்சிக்கு மெஜாரிட்டி கிடைக்கவில்லை. கன்சர்வேடிவ் கட்சி 121 இடங்களிலும் முன்னிலையில் உள்ளது. மெஜாரிட்டி கிடைக்கவில்லை என்பதால் சிறுபான்மை அரசின் பிரதமராகவே அடுத்த 4 ஆண்டுகள் ஜஸ்டின் ட்ரூடோ தொடரப்போகிறார்.

பதிவு: September 21, 2021
`சர்ச்சை பதிவுகளுக்கு பேஸ்புக்கே பொறுப்பு!'- ஆஸ்திரேலிய உச்ச நீதிமன்றம் அதிரடி

‘பொதுமக்கள் பதிவிடும் சர்ச்சைக்குரிய கருத்துகளுக்கு பேஸ்புக் நிறுவனமே பொறுப்பேற்க வேண்டும்’ என்று ஆஸ்திரேலிய உச்ச நீதிமன்றம் அதிரடி தீர்ப்பு அளித்துள்ளது.

ஆஸ்திரேலியாவில் சிறார் சிறையில் தண்டனை அனுபவித்த டைலான் வோலர் குறித்து, தனது பேஸ்புக் பக்கத்தில் ஒரு ஊடக அமைப்பு செய்தி வெளியிட்டது. இந்த செய்திக்கு முகநூல் பயன்படுத்துபவர்கள் மோசமான கருத்துகளை பதிவு செய்தனர். இதையடுத்து வோலர், 2017ம் ஆண்டு பேஸ்புக் நிறுவனத்தின் மீது நீதிமன்றத்தில் அவதூறு வழக்கு தொடர்ந்தார்.

இதை விசாரித்த கீழ் நீதிமன்றம், ‘மக்கள் வெளியிடும் அவதூறு கருத்துகளுக்கு பேஸ்புக் நிறுவனமே பொறுப்பேற்க வேண்டும்,’ என்று தீர்ப்பு வழங்கியது. அந்த தீர்ப்பை உச்ச நீதிமன்றமும் உறுதி செய்துள்ளது. அது தனது தீர்ப்பில், ‘ஊடக நிறுவனங்கள், 3ம் நபர்கள் பேஸ்புக் பக்கத்தில் வெளியிடும் சர்ச்சைக்குரிய செய்திகளுக்கு, அதை வெளியிடும் பதிப்பாளர் என்ற வகையில் பேஸ்புக் நிறுவனமே அதற்கு முழு பொறுப்பாக முடியும். மக்களின் சர்ச்சைக்குரிய பதிவுகளுக்கு அவர்களே பொறுப்பு என கூறி, பேஸ்புக் நிறுவனம் தப்பித்துக் கொள்ள முடியாது’ என்று அதிரடியாக கூறியுள்ளது.

பதிவு: September 09, 2021
இலங்கையில் கடும் உணவு பஞ்சம்; எகிறியது பொருள்களின் விலை!- கோத்தபய ராஜபக்சே அவசரநிலை பிரகடனம்

இலங்கையில் அந்நிய செலாவணி பற்றாக்குறையினால் உணவு பஞ்சம் ஏற்பட்டதை அடுத்து அந்நாட்டில் பொருளாதார அவசரநிலை பிரகடனப்படுத்தப்பட்டுள்ளது.

கொரோனா ஊரடங்கால சுற்றுலாத் தறை முடங்கியதை அடுத்து இலங்கையில் கடுமையான பொருளாதார நெருக்கடி ஏற்பட்டுள்ளது. அந்நிய செலாவணி பற்றாக்குறையால் இறக்குமதி கடுமையாக பாதிக்கப்பட்டது. இதனால் அந்நாட்டில் சர்க்கரை, அரிசி உள்ளிட்ட பல்வேறு உணவு பொருட்களுக்கு பற்றாக்குறை ஏற்பட்டு அவற்றின் விலை வெகுவாக அதிகரித்துள்ளது.

இந்த நிலையில் பொருளாதார அவசர நிலையை அந்நாட்டு அதிபர் கோத்தபய ராஜபக்சே அமல்படுத்தியுள்ளார். அரிசி, சர்க்கரை மற்றும் இதர உணவு பொருட்களை பதுக்குவோருக்கு கடுமையாக தண்டனை அளிக்கவும் அவற்றின் விலைகளை கட்டுப்படுத்தவும் அதிகாரிகளுக்கு உத்தரவிடப்பட்டுள்ளது. உணவு பொருட்களின் விநியோகத்தை ஒழுங்குப்படுத்த அத்தியாவசிய பண்டங்களுக்கான ஒழுங்குமுறை ஆணையராக ராணுவ அதிகாரி ஒருவர் நியமிக்கப்பட்டுள்ளார். உணவு பற்றாக்குறையால் கடைகளின் முன்பு நீண்ட வரிசையில் பொதுமக்கள் காத்திருக்கின்றனர். அந்நிய செலாவணி பற்றாக்குறையை சமாளிக்க வாகனங்கள் உள்ளிட்ட பல்வேறு பொருட்கள் இறக்குமதியை இலங்கை அரசு தடை செய்திருப்பது குறிப்பிடத்தக்கது.

பதிவு: September 02, 2021
`தங்கள் நாட்டு மக்கள் உடனே வெளியேறவும்!'- ஐஎஸ் பயங்கரவாதிகள் மீது அமெரிக்கா ட்ரோன் தாக்குதல்

ஆப்கானிஸ்தானில் ஐ.எஸ். கோராசான் தீவிரவாதிகளை குறிவைத்து அமெரிக்கா தாக்குதலை தொடங்கியுள்ளது.

ஆப்கானிஸ்தானில் தலிபான்கள் ஆட்சியை பிடித்த பிறகு நாட்டைவிட்டு வெளியேற காபூல் விமான நிலையத்தில் மக்கள் குவிகின்றனர். அவர்களை அமெரிக்கா உள்ளிட்ட பல்வேறு நாடுகளின் ராணுவ விமானங்கள் அழைத்து செல்கின்றன. இந்நிலையில், காபூல் விமான நிலையம் அருகே கடந்த 26-ம் தேதி, 2 இடங்களில் மனித வெடிகுண்டு தாக்குதல் நடத்தப்பட்டது. இதில், ஆப்கானிஸ்தான் மக்கள் 60 பேர், வெளிநாட்டினர், 13 அமெரிக்க ராணுவ வீரர்கள் உட்பட மொத்தம் 180 பேர் பலியாகி உள்ளதாக தகவல் வெளியானது. நூற்றுக்கும் மேற்பட்டோர் படுகாயம் அடைந்து இருப்பதால், இந்த பலி எண்ணிக்கை மேலும் அதிகரிக்கும் என கூறப்படுகிறது.

இந்தநிலையில், வெள்ளை மாளிகையில் அமெரிக்க அதிபர் பைடன் அளித்த பேட்டியில், "காபூல் குண்டுவெடிப்பை மறக்க மாட்டோம், மன்னிக்கவும் மாட்டோம். இதற்கான விலையை அவர்கள் கொடுத்தே ஆக வேண்டும். அவர்களை தேடி சென்று வேட்டையாடுவோம். இந்த மனித வெடிகுண்டு தாக்குதலுக்கு ஐ.எஸ். கோராசான் தீவிரவாதிகளே காரணம்.

அவர்களின் ஆயுதங்கள், கிடங்குகள், முகாம்கள், தலைவர்களை அழிக்க திட்டமிடும்படி உத்தரவிட்டு உள்ளேன். ஆப்கானிஸ்தானில் இருந்து அமெரிக்கர்கள், நட்பு நாடுகளை சேர்ந்தவர்களை மீட்கும் பணி தொடரும். ஆப்கான் தாக்குதலில் அமெரிக்க வீரர்கள் இறந்ததற்கு பொறுப்பேற்கிறேன்" என வருத்தம் தெரிவித்தார்.

அதனைத்தொடர்ந்து இன்று, ஆப்கானிஸ்தானில் ஐ.எஸ். கோராசான் தீவிரவாதிகளை குறிவைத்து அமெரிக்கா தாக்குதலை நடத்தியுள்ளது. வெடிகுண்டு தாக்குதலுக்கு பழிவாங்க தீவிரவாதிகள் மீது ட்ரோன் மூலம் அமெரிக்கா படையினர் தாக்குதல் நடத்தியதாக கூறப்படுகிறது. இந்த தாக்குதல் தொடர்பாக முழு விபரம் வெளியாகவில்லை. மேலும் காபூல் விமானநிலைய நுழைவு பகுதியில் உள்ள தங்கள் நாட்டுமக்கள் உடனே வெளியேறவும் அமெரிக்கா உத்தரவிட்டுள்ளது.

பதிவு: August 28, 2021
காபூலில் தற்கொலை தாக்குதலில் 100 பேர் பலி!- `வேட்டையாடுவோம்' என அமெரிக்க அதிபர் எச்சரிக்கை

ஆப்கானிஸ்தானில் தீவிரவாதிகள் நடத்திய இரட்டை வெடிகுண்டு தாக்குதலில் அமெரிக்க ராணுவ வீரர்கள் உள்பட 100க்கு மேற்பட்டோர் பலியாகியுள்ளனர். காபூல் குண்டுவெடிப்பு தாக்குதலுக்கு கண்டனம் தெரிவித்துள்ள அமெரிக்க அதிபர் ஜோ பைடன், இந்த தாக்குதலில் ஈடுபட்டவர்களை வேட்டையாடுவோம் என எச்சரித்துள்ளார்.

ஆப்கானிஸ்தானை தலிபான்கள் கைப்பற்றிய பின்னர் அங்கு பதற்றமான சூழல் நிலவி வருகிறது. அங்கிருந்து தங்கள் நாட்டு மக்களை மீட்கும் பணியில் அனைத்து நாடுகளும் ஈடுபட்டுள்ளன. அமெரிக்கா படைகள் பத்திரமாக மக்களை வெளியேற்றும் பணியில் ஈடுபட்டுள்ளது. முன்னதாக அமெரிக்க படைகள் வெளியேற இந்த மாத இறுதுக்குள் ஆப்கனை விட்டு வெளியேற வேண்டும் என தலிபான் அமைப்பு கெடு வைத்தது. இதையடுத்து செய்தியாளர்களை சந்தித்த அமெரிக்க அதிபர் ஜோ பைடன், அமெரிக்க படைகள் மக்களை அவரவர் நாடுகளுக்கு அனுப்பும் பணியில் ஈடுபட்டுள்ளனர். படைகள் மீது தலிபான்கள் தாக்குதல் மேற்கொண்டால் அவர்கள் அதற்கான விலையை கொடுக்க வேண்டி இருக்கும் என எச்சரித்தார்.

இந்நிலையில், நேற்று இரவு காபூல் விமான நிலையம் அருகே நேற்று அடுத்தடுத்து 2 தற்கொலை படை தாக்குதல் நடத்தப்பட்டது. இதில், அமெரிக்க ராணுவத்தை சேர்ந்த 13 பேர் உட்பட 100 பொதுமக்கள் உயிரிழந்தனர். இதையடுத்து செய்தியாளர்களை சந்தித்த அமெரிக்க அதிபர் ஜோ பைடன், காபூல் குண்டுவெடிப்பு தாக்குதலுக்கு கண்டனம் தெரிவித்ததோடு, இந்த தாக்குதலில் ஈடுபட்டவர்களை வேட்டையாடுவோம் என எச்சரித்தார். இந்நிலையில், இந்த தாக்குதலுக்கு ஐஎஸ்ஐஎஸ் தீவிரவாத அமைப்பு பொறுப்பேற்றுள்ளது.

பதிவு: August 27, 2021
ஆப்கானில் இருந்து மக்களை மீட்டு வந்த உக்ரைன் விமானம் கடத்தல்!

ஆப்கானிஸ்தானில் உள்ள உக்ரைன் நாட்டைச் சேர்ந்தவர்களை மீட்க வந்த விமானம் கடத்தியதாக தகவல் வெளியாகியுள்ளது அதிர்ச்சியை ஏற்படுத்தியுள்ளது.

ஆப்கானிஸ்தான் தலைநகரமான காபூலில் இருந்து மக்களை மீட்கச் சென்ற தங்கள் நாட்டு விமானத்தை அடையாளம் தெரியாதவர்கள் கடத்தப்பட்டதாக உக்ரைன் அமைச்சர் கூறினார். விமானத்தை கடத்தியவர்கள் அதனை ஈரான் கொண்டு சென்றுள்ளனர் என உக்ரைன் வெளியுறவுத்துறை அமைச்சர் யெனின் கூறினார்.

இன்று காலை காபூல் விமான நிலையத்தில் துப்பாக்கிச்சூடு நடைபெற்றது. காபூல் விமான நிலையம் அருகே நடந்த துப்பாக்கிச்சூடு சம்பவத்தில் ஆப்கன் ராணுவத்தைச் சோ்ந்த வீரா் ஒருவா் உயிரிழந்தாா்.

ஆப்கனைவிட்டு வெளியேறும் நோக்கில் தினமும் ஆயிரக்கணக்கான ஆப்கன் மக்கள், வெளிநாட்டவா்கள் காபூல் சா்வதேச விமான நிலையத்தில் குவிந்து வருகின்றனா். அங்கு ஞாயிற்றுக்கிழமை கூட்ட நெரிசலில் சிக்கி 7 போ் உயிரிழந்தனா். இந்நிலையில், விமான நிலைய நுழைவாயிலின் அருகே திங்கள்கிழமை அடையாளம் தெரியாத சிலா் துப்பாக்கியால் சுட்டதில் ஆப்கன் ராணுவ வீரா் ஒருவா் உயிரிழந்ததாகவும், மூவா் காயமடைந்ததாகவும் ஜொ்மன் ராணுவம் தெரிவித்துள்ளது.

ஆப்கானிஸ்தானில் மருத்துவமனையை நடத்திவரும் இத்தாலியைச் சோ்ந்த தொண்டு நிறுவனம், காபூல் விமான நிலையத்திலிருந்து துப்பாக்கிக் குண்டு காயங்களுடன் அழைத்து வரப்பட்ட 6 பேருக்கு தங்கள் மருத்துவமனையில் சிகிச்சை அளித்ததாகத் தெரிவித்துள்ளது. துப்பாக்கிச்சூடு சம்பவம் பற்றி அமெரிக்க ராணுவமோ, தலிபான்களோ எதுவும் தெரிவிக்கவில்லை. இதைதொடர்ந்து இன்று காபூலில் இருந்து உக்ரைன் சென்ற விமானம் கடத்தப்பட்டுள்ளது.

பதிவு: August 24, 2021
தலிபான்களால் ஆபத்து என அச்சம்!- ஆப்கானில் இருந்து வெளியேறிய 7,000 மக்கள்

ஆப்கானிஸ்தானில் இருந்து இதுவரை 7 ஆயிரம் பேர் விமானம் மூலம் வெளியேற்றப்பட்டிருப்பதாக அமெரிக்க ராணுவம் தெரிவித்துள்ளது.

ஆப்கானிஸ்தானில் அமெரிக்க ராணுவம் வெளியேறத் தொடங்கியதை அடுத்து, தலிபான்கள் ஆட்சியை கைப்பற்றியுள்ளனர். காபூலை, தாலிபான்கள் கைப்பற்றியதும், அதிபர் அஷ்ரப் கனி நாட்டைவிட்டு தப்பினார். அவர் ஐக்கிய அரபு அமீரகத்தில் தஞ்சமடைந்துள்ளார்.

ஆப்கானை கைப்பற்றியுள்ள தலிபான்கள், இஸ்லாமிய அமீரக ஆப்கானிஸ்தான் எனப் பெயர் மாற்றம் செய்துள்ளனர். இந்நிலையில் தலிபான்களால் தங்களுக்கு ஆபத்து ஏற்படும் என அஞ்சும் ஆயிரக்கணக்கான ஆப்கானிஸ்தானியர்கள், நாட்டை விட்டு வெளியேறி வருகின்றனர். விமானத்தின் இறக்கைகளிலும், சக்கரங்களிலும் தொற்றிக் கொண்டு பலர் தப்ப முயன்ற காட்சிகள் வெளியாகி பெரும் அதிர்வலைகளை ஏற்படுத்தியது.

தலிபான்களின் கடந்த கால ஆட்சியின்போது ஏற்பட்ட கஷ்டங்களை நினைத்து அவர்கள் எப்படியாவது அங்கிருந்து வெளிநாடுகளுக்கு தப்பிச் செல்ல நினைக்கின்றனர். காபூல் விமான நிலையத்துக்கு வரும் எந்த விமானத்திலாவது ஏறி செல்லும் மனநிலையில், பீதியோடு விமான நிலையத்தில் குவிந்துள்ளனர்.

இந்நிலையில், பொதுமக்களை வெளியேற்ற வசதியாக காபூல் விமான நிலையத்தில் தற்போது 5 ஆயிரத்து 200 அமெரிக்க வீரர்கள் நிறுத்தப்பட்டிருப்பதாக அமெரிக்க ராணுவ தலைமையகமான பென்டகன் தெரிவித்துள்ளது. ஒரே நாளில் 9 ஆயிரம் பேர் வரை வெளியேற்ற போதுமான விமானங்கள் கைவசம் இருப்பதாகவும் கடந்த 14ம் தேதி முதல் இதுவரை 7 ஆயிரம் பேரை வெளியேற்றிருப்பதாகவும் அமெரிக்க ராணுவம் தெரிவித்துள்ளது.

பதிவு: August 20, 2021
தப்பிச் சென்ற ஆப்கான் அதிபர் அஷ்ரப் கனி எங்கே இருக்கிறார்?- புதிய தகவல்

ஆப்கானிஸ்தானில் இருந்து தப்பிச்சென்ற அதிபர் அஷ்ரப் கனி எந்த நாட்டில் உள்ளார் என்பது குறித்த தகவல் வெளியாகியுள்ளது.

ஆப்கானிஸ்தான் தலைநகர் காபூலில் தலிபான் பயங்கரவாதிகள் நுழைந்ததும் அந்த நாட்டின் அதிபர் அஷ்ரப் கனி தனது பதவியை ராஜினாமா செய்து விட்டு தனது குடும்பத்துடன் நாட்டை விட்டு தப்பி ஓடினார். அவர் மூட்டை மூட்டையாக பணத்தை எடுத்துக்கொண்டு ஹெலிகாப்டரில் தஜிகிஸ்தானுக்கு தப்பி சென்றதாக தகவல்கள் வெளியாகின. அதே சமயம் அவர் கஜகஸ்தான் நாட்டுக்கு சென்றதாக மற்றொரு தரப்பு தகவல்கள் தெரிவித்தன.‌


மேலும், அவர் உஸ்பெகிஸ்தான் நாட்டிற்கு தப்பிச்சென்றுவிட்டதாக தகவல்கள் வெளியாகின. ஆனால் கஜகஸ்தான், தஜிகிஸ்தான் மற்றும் கஜகஸ்தான் ஆகிய மூன்று நாடுகளுமே அஷ்ரப் கனி தங்கள் நாட்டுக்கு வரவில்லை என அதிகாரப்பூர்வமாக அறிவித்தன.

இந்நிலையில், அஷ்ரப் கனி மற்றும் அவரது குடும்பத்தினர் தங்கள் நாட்டில் உள்ளதாக ஐக்கிய அரபு அமீரகம் அதிகாரப்பூர்வமாக தெரிவித்துள்ளது. ஆப்கானிஸ்தானில் இருந்து தப்பிச்சென்ற அஷ்ரப் கனி மற்றும் அவரது குடும்பத்தினருக்கு ஐக்கிய அரபு அமீரகம் அடைக்கலம் கொடுத்துள்ளது. மனிதாபிமான அடிப்படையில் அஷ்ரப் கனி மற்றும் அவரது குடும்ப உறுப்பினர்களுக்கு அடைக்கலம் கொடுக்கப்பட்டுள்ளதாக ஐக்கிய அரபு அமீரகத்தின் வெளியுறவுத்துறை அமைச்சகம் தெரிவித்துள்ளது.

பதிவு: August 19, 2021

முக்கிய செய்திகள்

'திமுகவால் தமிழகத்தில் வளர்ச்சியில்லை; தமிழகத்திற்கு தாமரை ஆட்சி தேவை' - காரைக்குடியில் ஜே.பி.நட்டா பேச்சு!

திமுக குடும்பக் கட்சியாகச் செயல்படுகிறது என்றும், திமுகவின் குறிக்கோள் வெறும் நாற்காலி மட்டும் தான் என்றும் பாஜக தேசிய தலைவர் ஜே.பி.நட்டா காரைக்குடியில் நடைபெற்ற கூட்டத்தில் கடுமையாக சாடி பேசியுள்ளார்.

பாஜகவின் 'ஆபரேஷன் சவுத் இன்டியா' திட்டத்தின் அடிப்படையில் தென்மாநிலங்களில் பாஜக அதன் கட்சிப் பரப்புரைகளை மேற்கொண்டுவருகிறது. வடமாநிலங்களைப் போல் தென்மாநிலங்களில் பாஜகவின் வாக்குகளை அதிகரிக்கச்செய்ய, வரும் 2024 நாடாளுமன்றத் தேர்தலை முன்னிட்டு இந்த வியூகத்தை வகுத்துள்ளது பாஜக. 

இந்நிலையில், சிவகங்கை மாவட்டம் காரைக்குடியில் நடைபெற்ற பாஜக செயற்குழு கூட்டத்தில் கலந்துகொள்ள பாஜக தேசிய தலைவர் ஜே.பி.நட்டா தமிழகம் வருகை தந்தார். அவரை பாஜக மூத்த தலைவர் ஹெச்.ராஜா உள்ளிட்ட பாஜகவினர் வரவேற்றனர். கூட்டத்தில் கலந்துகொண்டு பேசிய அவர், திமுக, திரிணாமூல் உள்ளிட்ட கட்சிகளை கடுமையாக சாடிப் பேசினார். மேலும் தமிழகத்தில் விரைவில் தாமரை மலரும் என்று பேசியிருந்தார். 

கூட்டத்தில் கலந்துகொண்டு பேசிய அவர், "இந்த பொதுக்கூட்டத்தை பார்க்கையில் ஒரு தெளிவான உண்மை எனக்கு தெரிகிறது. பாரதிய ஜனதா கட்சிக்கு தமிழ்நாட்டில் எதிர்காலம் இருக்கிறது. தமிழ்நாட்டில் தாமரை மலரப்போகிறது.

பாஜக மட்டுமே அனைத்திந்திய கட்சி. பாஜக மட்டுமே கொள்கை உடைய கட்சி. மற்ற கட்சிகள் சுருங்கிவிட்டன. கொள்கை இல்லாத கட்சிகளுடம் சண்டையிடவில்லை. பிராந்திய கட்சிகள் தற்போது வாரிசு கட்சிகளாக சுருங்கிவிட்டன. பிடிபி, என்சிபி, அகாலி தளம், சமாஜ்வாடி, திரிணாமூல், முக்தி மோர்சா, ஒடிசா, ஒய்.எஸ்.ஆர்., டி.ஆர்.எஸ்., திமுக ஆகியவை குடும்ப கட்சிகளாக செயல்படுகின்றன.

திமுகவில் முன்பு கருணாநிதி இருந்தார். இப்போது ஸ்டாலின் வந்துள்ளார். அடுத்து அவரது மகன் வருவார். இது என்ன மாதிரியான ஜனநாயகம்? ஸ்டாலினால் வளர்ச்சியை பற்றி பேச முடியுமா? DMK வில் D என்றால் Dynasty (வாரிசு), M என்றால் Money (பணம்), K என்றால் கட்ட பஞ்சாயத்து. இதுதான் திமுக.

திமுகவால் பிராந்தியத்தை பற்றி பேச முடியுமா? நாங்கள்தான் தமிழ் மொழி பற்றி பேசுகிறோம். அதை பாதுகாக்கிறோம். திமுகவின் பங்களிப்பு என்ன? திமுக வெறுப்பு அரசியலில் நம்பிக்கை வைத்து உள்ளது. திமுகவுக்கு பிளவுபடுத்துகிறது. திமுகவுக்கு எந்த குறிக்கோளும் இல்லை. கொள்கை ரீதியாக திமுக பெரிய பூஜ்ஜியம். உங்களின் கொள்கை எப்போதுm நாற்காலியை பற்றிதான்" இவ்வாறு பேசினார்.

பதிவு: September 23, 2022
மீண்டும் தொடங்கியது 'இந்தியன் 2' பட படப்பிடிப்பு வேலைகள்; கமல் தந்த அசத்தல் அப்டேட்! ரசிகர்கள் உற்சாகம்!

'இந்தியன் 2' படப்பிடிப்பு மீண்டும் தொடங்கப்பட்டுள்ளதாக நடிகர் கமல்ஹாசன் தெரிவித்துள்ளார்.

ஷங்கர் இயக்கத்தில், கமல்ஹாசன், மனிஷா கொய்ராலா, ஊர்மிளா, சுகன்யா, கவுண்டமணி, செந்தில் ஆகியோர் நடித்து 1996-ல் வெளியான திரைப்படம் 'இந்தியன்'. ஊழலால் திளைக்கும் அரசு அதிகாரிகளும், அவர்களைக் களையெடுக்கும் 'இந்தியன் தாத்தா' முதியவருமான கதையம்சத்தில் உருவாக்கப்பட்ட இத்திரைப்படம், மாபெரும் வெற்றிப்படமாக அமைந்தது. மேலும் இயக்குநர் ஷங்கர் மற்றும் கமல்ஹாசன் திரைப்பயணத்தின் முக்கியப்படமாகவும் அமைந்தது.

இந்நிலையில், கிட்டத்தட்ட 24 வருடங்களுக்குப்பிறகு இத்திரைப்படத்தின் இரண்டாம் பாகம் குறித்த அறிவிப்பு வெளியாகி படப்பிடிப்பு தொடங்கியது. ஷங்கர் இயக்க, லைகா தயாரிக்கவிருந்த 'இந்தியன் 2' படத்தில் கமல்ஹாசன், காஜல் அகர்வால், விவேக் உள்ளிட்ட நடிகர்கள் ஒப்பந்தம் செய்யப்பட்டனர்.

இந்நிலையில் தான் படப்பிடிப்பின்போது நிகழ்ந்த விபத்து காரணமாக படப்பிடிப்பு தள்ளிப்போனது. மேலும் கமல்ஹாசன் பிக்பாஸ் நிகழ்ச்சியைத் தொகுத்து வழங்கும் வேலைகளில் ஈடுபட்டிருந்ததால் தொடர்ந்து படப்பிடிப்பு தாமதமாகிவந்தது. தொடர் தாமதம் காரணமாக ஒருபக்கம் தெலுங்கில் ராம் சரண், கியாரா அத்வானி ஆகியோரை வைத்து 'RC15' பட இயக்க வேலைகளில் இறங்கிவிட்டிருந்தார் ஷங்கர்.

இதனால் 'இந்தியன் 2' படம் கைவிடப்பட்டதாக தகவல்கள் வெளியாகின. ஆனால், படப்பிடிப்பு விரைவில் துவங்கும் என்று படக்குழுவிலிருந்து தகவல்கள் அவ்வப்போது அறிவிக்கப்பட்டு வந்தன. இந்த நிலையில், ரசிகர்கள் மகிழ்ச்சியுறும் வகையில், 'இந்தியன் 2' படப்பிடிப்பு இன்று முதல் துவங்குவதாக கமல்ஹாசன் தனது ட்விட்டர் பக்கத்தில் தெரிவித்துள்ளார். இதனால் படம் குறித்த அடுத்தடுத்த அப்டேட்டுகள் விரைவில் வெளியாகலாம் என்று எதிர்பார்க்கப்படுகிறது. 

 

பதிவு: September 22, 2022
ஹெச்.வினோத் இயக்கத்தில் அஜித் நடிக்கும் படத்திற்கு 'துணிவு' எனப் பெயர் வைத்தது படக்குழு! ரசிகர்களின் கருத்து என்ன?

ஹெச்.வினோத் இயக்கத்தில் அஜித்குமார் நடிக்கும் புதிய திரைப்படத்திற்கு 'துணிவு' என்று பெயரிடப்பட்டுள்ளது.

நடிகர் அஜித்குமார் நடிப்பில், ஹெச்.வினோத் இயக்கத்தில், போனி கபூர் தயாரிப்பில் அண்மையில் வெளியான திரைப்படம் வலிமை. நீண்ட நாள் தயாரிப்பாக, பெரும் எதிர்பார்ப்புடன் வெளியான இத்திரைப்படம் ரசிகர்கள் மத்தியில் கலவையான விமர்சனங்களைப் பெற்றது.

இந்நிலையில், அதே கூட்டணியுடன் அஜித்குமார் அடுத்த படத்திலும் நடிக்கவிருக்கிறார் என்ற தகவல் இணையத்தில் வலம்வந்துகொண்டிருந்தது. அதையடுத்து 'AK61' பற்றிய அதிகாரப்பூர்வத் தகவல் வெளியாகி படப்பிடிப்பு நடைபெற்றுவந்தது.

இந்நிலையில், நேற்று 'AK61' படத்தின் முதல் பார்வை போஸ்டர் வெளியாகும் என்று அறிவிக்கப்பட்டிருந்த நிலையில், மாலை 6.30 மணிக்கு அதனை வெளியிட்டது படக்குழு. 'துணிவு' என்று பெயருடன் முதல் பார்வை போஸ்டர் வெளியானது. 

Image

கையில் மிலிட்டரி ரக துப்பாக்கியுடன் நாற்காலியில் அஜித் சாய்ந்து அமர்ந்திருக்கும்படியாக வெளியான இந்த போஸ்டர் ரசிகர்களை வெகுவாகவே கவர்ந்தது. படத்தின் டைட்டில் அமைப்பு, ரூபாய் நோட்டு போன்ற எழுத்தின் வடிவமைப்பில் அமைந்திருந்ததால் ஒருவேளை வங்கிக்கொள்ளை சார்ந்த கதையமைப்புடன் இப்படம் இருக்குமோ என்ற ஊகங்களும் ரசிகர்களிடையே மேலோங்கியுள்ளது. 

'AK61' படத்திற்கு 'துணிவே துணை' என்று பெயர் வைக்கப்படலாம் என்ற தகவல் சில நாட்களுக்கு முன்பு கசிந்த நிலையில், என்னதான் போஸ்டர் பெருவாரியான ரசிகர்களிடையே வரவேற்பைப் பெற்றுவரும் நிலையிலும், 'துணிவு' என்று வைக்கப்பட்டுள்ள பெயர் அஜித் ரசிகர்களில் ஒரு பகுதியினரை அதிருப்தியில் ஆழ்த்தியுள்ளது எனலாம்.

தமிழ் சினிமாவில் மாஸ் ஹீரோவாக பார்க்கப்படும் அஜித்குமார் நடிக்கும் படங்களின் பெயர் மாஸ் பிம்பங்களைக் கொண்டதாக இருக்கவேண்டும் என்ற ரசிகர்களின் எதிர்பார்ப்பு வீரம், வேதாளம், விவேகம், வலிமை போன்ற டைட்டில்களால் நிறைவுபெற்ற அளவிற்கு 'துணிவு' என்ற பெயரால் நிறைவுபெறவில்லை என்பதே ரசிகர்கள் வலைதளங்களில் பதிவிடும் கருத்துகளின் வெளிப்பாடாக உள்ளது. அண்மையில், வம்சி பைடிபள்ளி இயக்கத்தில் விஜய் நடிக்கும் படத்திற்கு 'வாரிசு' எனப் பெயரிடப்பட்டது குறிப்பிடத்தக்கது. 

பதிவு: September 22, 2022
'சுயமரியாதை உள்ள எந்த சமூகமும் மனுஸ்மிருதியை ஏற்காது' - காங்கிரஸ் எம்.பி. ஜோதிமணி பாய்ச்சல்!

சுயமரியாதை உள்ள எந்த சமூகமும் மனுநீதியை ஏற்காது என்று காங்கிரஸ் கரூர் எம்.பி. ஜோதிமணி ட்விட்டரில் காரசாரமான பதிவு ஒன்றை இட்டுள்ளார்.

சனாதனம் குறித்து திமுக எம்.பி. ஆ.ராசா அண்மையில் பேசியது பல்வேறு அதிர்வலைகளை அரசியல் வட்டாரத்தில் ஏற்படுத்தியுள்ளது. தமிழகம் முழுவதும் இந்து அமைப்புகள் ராசாவின் கருத்துக்கு எதிராக போராட்டங்களிலும் ஆர்ப்பாட்டங்களிலும் ஈடுபட்டு வருகின்றனர்.

அதே சமயம், மனுஸ்மிருதியில் உள்ளதையே ஆ.ராசா சுட்டிக்காட்டியுள்ளதாக பலரும் அவருக்கு ஆதரவாகப் பேசியும் வருகின்றனர். இந்நிலையில், மனுநீதி எனப்படும் மனுஸ்மிருதியை சுயமரியாதை உள்ள எந்த சமூகமும் ஏற்காது என்று காங்கிரஸ் எம்.பி. ஜோதிமணி ட்விட்டரில் தெரிவித்துள்ளார்.

இதுகுறித்து ட்விட்டரில் பதிவிட்டுள்ள அவர், "பாஜகவின் வேதப்புத்தகம் பகவத்கீதை அல்ல. மனுநீதியே. மனுநீதி பெண்களை பிறபடுத்தப்பட்ட, தலித் உள்ளிட்ட ஒடுக்கப்பட்ட சமூகங்களை இழிவுபடுத்துவது. அடிமைகளாக கட்டமைப்பது. சுயமரியாதையும், கண்ணியமும் மிகுந்த எந்த சமூகமும் மனுநீதியை ஏற்கமுடியாது. மனுநீதியும், பாஜகவும் மனிதகுல விரோதிகள்" இவ்வாறு தெரிவித்துள்ளார்.

பதிவு: September 21, 2022
'ஆ.ராசாவிற்கு எதிராக பொதுமக்களிடம் கையெழுத்து வாங்கிவருகிறோம்; இதுவரை 20 லட்சம் பேர் கையெழுத்திட்டுள்ளனர்' - அண்ணாமலை!

ஆ.ராசாவின் கருத்துக்கு எதிராகப் போராடிய பாஜகவினர் மீது திமுக பொய் வழக்கு போட்டு கைதுசெய்வதாக பாஜக மாநிலத் தலைவர் அண்ணாமலை குற்றம்சாட்டியுள்ளார்.

இதுகுறித்து செய்தியாளர் சந்திப்பில் பேசிய அவர், "ஆ.ராசாவின் பேச்சுக்கு எதிராக குரலெழுப்பிய பாஜகவினர் மீது திமுக பொய் வழக்குகள் போட்டு கைது செய்கின்றது. சமுதாயத்தில் பிரச்சினையை உருவாக்குதல் என்ற பிரிவில் (IPC Section 153) அவர்கள் மீது வழக்கு பதியப்படுகிறது. அதாவது ஆ.ராசா பேசியது பிரச்சினையை உருவாக்கும், பிளவுபடுத்தும் பேச்சு அல்ல; பாஜகவினர் பேசியதே அவ்வாறு உள்ளதாக குற்றம்சாட்டுகின்றனர். 

இதுகுறித்து திமுக அமைச்சர்களிடம் கேட்டால் 'காது கேட்கவில்லை' என்று ஒரு அமைச்சர் கூறுகிறார். அவர் அடுத்த முறையிலிருந்து காது கேட்கும் கருவியை மாட்டிக்கொண்டு செய்தியாளர் சந்திப்பில் கலந்துகொள்ளுமாறு கேட்டுக்கொள்கிறேன்" என்று கூறியுள்ளார்.

மேலும் பேசிய அவர், இந்தப் பிரச்சினைக்காக பாஜக போராட்டங்களில் எல்லாம் இறங்கப்போவதில்லை; மாறாக ராசா போன்ற எம்.பி. எங்களுக்கு வேண்டாம் என்று பொதுமக்களிடம் பாஜகவினர் கையெழுத்து வாங்கிவருகின்றனர்.

இதுவரை 20 லட்சம் கையெழுத்துகள் பொதுமக்களிடமிருந்து பெறப்பட்டுள்ளன. இப்படியெல்லாம் பெரும்பான்மை சமுதாயத்தைப் பற்றி தவறாக பேசி சிறுபான்மை சமுதாயத்திலிருந்து ஓட்டு வாங்கிவிடலாம் என்று திமுக நினைக்கவேண்டாம். எல்லா சமுதாயத்தினரும் இதற்கு எதிராக குரல்கொடுத்து வருகின்றனர். தமிழகம் மட்டுமல்லாது உத்தரப்பிரதேசம், பீகார் போன்ற பிற மாநிலங்களிலிருந்தும் ஆ.ராசாவின் கருத்துக்கு எதிர்ப்புக்குரல் வலுத்துவருகிறது" இவ்வாறு தெரிவித்தார். 

 

பதிவு: September 21, 2022
'சனாதனம் குறித்து ஆ.ராசா பேசியது கீழ்த்தரமானது' - எடப்பாடி பழனிசாமி சீற்றம்!

இந்து மதத்தை புண்படுத்தும் விதமாக ஆ.ராசா பேசியது கீழ்த்தரமானது என்று அதிமுக இடைக்கால பொதுச்செயலாளர் எடப்பாடி கே.பழனிசாமி கருத்து தெரிவித்துள்ளார்.

பிரதமர் மோதி மற்றும் மத்திய உள்துறை அமைச்சர் அமித்ஷாவை சந்திக்கும் பொருட்டு எதிர்க்கட்சித் தலைவரும் அதிமுக இடைக்கால பொதுச்செயலாளருமான எடப்பாடி பழனிசாமி கடந்த 19-ம் தேதி டெல்லி பயணப்பட்டார்.

இந்நிலையில், நேற்றைய தினம் டெல்லியிலிருந்து கோவை விமான நிலையம் வந்த அவர், டெல்லி பயணம் பற்றியும், திமுக எம்.பி. ஆ.ராசா அண்மையில் சனாதனம் குறித்து பேசியது பற்றியும் செய்தியாளர்கள் கேட்ட கேள்விக்கு பதிலளித்தார்.

இதுகுறித்து பேசிய அவர், "தமிழகத்தில் கஞ்சா உள்ளிட்ட போதைப்பொருட்களால் மாணவர்கள், இளைஞர்கள் சீரழியும் நிலை உள்ளது. இதை தடுக்க வேண்டும் என மத்திய அரசை வலியுறுத்தினோம்.

இந்து மதத்தை புண்படுத்தும் விதமாக ராசா பேசியது கீழ்த்தரமானது. இதற்கு அவரது கட்சி தலைவர் பதில் அளிப்பார் என எதிர்பார்த்தேன். ஆனால், பதில் கிடைக்கவில்லை. அ.தி.மு.க., விவகாரம் குறித்துப் பேச டெல்லி சென்றதாக சொல்வது தவறானது.

விடியா தி.மு.க., ஆட்சியில் மக்களுக்கு எந்த நன்மையும் கிடைக்கவில்லை. தமிழகத்தில் தற்போது பரவி வரும் காய்ச்சலை தடுப்பது அரசின் கடமை. எளிதாக பரவும் காய்ச்சல் என மருத்துவர்கள் சொல்கின்றனர். இந்த அரசு விழிப்போடு இருந்து குழந்தைகளை காப்பதுடன், மருத்துவக் குழு ஆராய்ந்து இந்த காய்ச்சலை தடுக்க நடவடிக்கைகள் எடுக்க வேண்டும்" இவ்வாறு தெரிவித்தார். 

பதிவு: September 21, 2022
ஆஸ்கர் விழாவில் கலந்துகொள்ள குஜராத்தி படமான 'செலோ ஷோ' இந்தியா சார்பில் தேர்வு! ஆர்.ஆர்.ஆர். தேர்வுசெய்யப்படவில்லை!

2023-ஆம் ஆண்டுக்கான ஆஸ்கர் விருதுகள் தேர்வில் ராஜமௌலியின் ஆர்.ஆர்.ஆர் திரைப்படம் தேர்வு செய்யப்படும் என எதிர்பார்க்கப்பட்ட நிலையில், குஜராத்தி திரைப்படமான செலோ ஷோ தேர்வு செய்யப்பட்டுள்ளது. 

95-வது ஆஸ்கார் விருதுகள் வழங்கும் விழா அடுத்த ஆண்டு மார்ச் 12-ம் தேதி லாஸ் ஏஞ்சல்ஸ் நகர டோலி திரையரங்கில் நடைபெறுகிறது. இந்நிலையில், இந்த விழாவிற்கான திரைப்படங்கள் தேர்வு நடைபெற்றுவந்தது. இதன் பட்டியலில் பிரம்மாண்ட இயக்குநர் ராஜமௌலி இயக்கிய ஆர்.ஆர்.ஆர்., விவேக் அக்னிஹோத்ரி இயக்கிய தி காஷ்மீர் ஃபைல்ஸ், பதாய் ஹோ, மாதவனின் ராக்கெட்ரி, பிரம்மாஸ்த்ரா, இராதாகிருஷ்ணன் பார்த்திபனின் இரவின் நிழல் உள்ளிட்ட முக்கிய திரைப்படங்கள் இடம்பெற்றிருந்தன.  

இதில் குஜராத்தி மொழி திரைப்படமான செலோ ஷோ திரைப்படமும் இடம்பெற்றிருந்தது. பான் நாலின் என்பவர் இயக்கியுள்ள இப்படம் நாடு முழுவதும் வரும் அக்டோபர் 14-ஆம் தேதி திரையரங்குகளில் வெளியாகவுள்ளது. இதில் பவேஷ் ஸ்ரீமாலி, பவின் ரபாரி, ரிச்சா மீனா ஆகியோர் முக்கிய வேடங்களில் நடித்துள்ளனர். இந்தப் படத்தை சித்தார்த் ராய் கபூர் ஃபில்ம்ஸ், ஜுகத் மோஷன் பிக்சர்ஸ், மான்சூன் ஃப்லிம்ஸ், மற்றும் மார் டுலே நிறுவனங்கள் இணைந்து தயாரித்துள்ளன.

ஒரு சிறுவனுக்கு சினிமா மீது ஏற்படும் ஈர்ப்பும், அதனால் அவன் வாழ்வில் நிகழும் மாற்றங்களுமாக நீளும் இத்திரைப்படம், பரிந்துரைக்கப்பட்ட இந்தியப் படங்களிலிருந்து ஆஸ்கர் விருது விழாவில் கலந்துகொள்ள இந்தியா சார்பில் தேர்ந்தெடுக்கப்பட்டுள்ளது. இதுகுறித்த அறிவிப்பை இந்தியத் திரைப்பட கூட்டமைப்பின் தலைவர் நாகபர்ணா தெரிவித்துள்ளார்.

பெரும் பொருட்செலவில் தயாரிக்கப்பட்ட ராஜமௌலியின் ஆர்.ஆர்.ஆர். திரைப்படம் ஆஸ்கர் விருதுக்கு தேர்ந்தெடுக்கப்படும் என பெரிதும் எதிர்பார்க்கப்பட்ட நிலையில், குஜராத்தி படமான செலோ ஷோ இந்தியா சார்பில் தேர்ந்தெடுக்கப்பட்டுள்ளது சினிமா ரசிகர்களிடையே அப்படம் மீதான எதிர்பார்ப்பை அதிகரித்துள்ளது. 

பதிவு: September 21, 2022

மேலும் செய்திகள்

கொரோனா வைரஸ் அப்டேட்ஸ்