கரூர்
`மழை குறைந்துவிட்டது; பள்ளிக்கு கிளம்பி போங்க தம்பி!'- மாணவனுக்கு ரீ ட்வீட் செய்த கரூர் கலெக்டர்

கரூரில் கனமழை காரணமாக பள்ளிக்கு விடுமுறை அளிக்குமாறு ட்விட்டரில் கோரிக்கை வைத்த மாணவருக்கு, பள்ளிக்கு புறப்படுங்க தம்பி என, மாவட்ட ஆட்சியர் அளித்த பதில் வைரலாகி வருகிறது.

தமிழ்நாடு முழுவதும் பல இடங்களில் கடந்த ஒரு மாதமாக விட்டுவிட்டு கனமழை பெய்து வருகிறது. இதனால் பள்ளி, கல்லூரிகளுக்கு விடுமுறை அளிக்கப்பட்டு வருகிறது. மழை பெய்தாலே தினமும் காலை மாணவர்கள் செய்தி சேனலில் தமது மாவட்டத்திற்கு விடுமுறையா என பார்ப்பதற்கு அமர்ந்துவிடுகிறார். அதேபோல ஆட்சியருக்கே ட்விட்டரில் டேக் செய்து விடுமுறையா என மாணவர்கள் கேட்பதும் நடந்து வருகிறது.

இதனிடையே, கரூர் மாவட்டம், வேலாயுதம்பாளையம், புன்னம் சத்திரம், மண்மங்களம் உள்ளிட்ட பகுதிகளில் தொடர் மழை பெய்து வருகிறது. நள்ளிரவு முதல் பெய்து வரும் மழையினால் பள்ளி, கல்லூரிக்கு செல்லும் மாணவர்கள் அவதிக்குள்ளாகியுள்ளனர். இந்நிலையில், கரூர் மாவட்ட ஆட்சியரிடம், “கரூர் மாவட்டத்தில் தொடர்ந்து மழை பெய்து வருகிறது. ஆகையால் இன்று மட்டும் பள்ளிகளுக்கு விடுமுறை அளிக்குமாறு கேட்டுக் கொள்கிறேன் ஐயா” என ட்விட்டரில் மாணவர் ஒருவர் கோரிக்கை வைத்தார்.


இதையடுத்து, அந்த மாணவருக்கு பதில் அளித்த மாவட்ட ஆட்சியர் பிரபுசங்கர், "மழை குறைந்துவிட்டது. பள்ளிக்கு கிளம்பி போங்க தம்பி, நண்பர்களையும் கிளம்ப சொல்லுங்க தம்பி. நிறைய படிக்க வேண்டியிருக்கு எனவும் கூறியிருந்தார். தற்போது, இந்த ட்வீட் சமூக வலைத்தளங்களில் பரவி வைரலாக வருகிறது.

பதிவு: December 04, 2021
`இந்த திட்டம் தேவையில்லையா?'- கரூர் ஆட்சியருக்கு எதிராக ஜோதிமணி எம்பி தர்ணா

கரூர் மாவட்ட ஆட்சியர் பிரபு சங்கரை கண்டித்து ஜோதிமணி எம்.பி ஆட்சியர் அலுவலகத்தில் உள்ளிருப்பு போராட்டம் நடத்தி வருவது பரபரப்பை ஏற்படுத்தியுள்ளது. மேலும், மாவட்ட ஆட்சியருக்கு அவர் சரமாரி கேள்வி எழுப்பியுள்ளார்.

நாடாளுமன்ற உறுப்பினர் நிதியிலிருந்து மாற்றுத்திறனாளிக்காக வழங்கப்படும் நிதி தொகுதியிலுள்ள தகுதியுள்ள மாற்றுத்திறனாளிகளுக்கு வழங்க மாவட்ட நிர்வாகம் சார்பில் கூட்டம் நடத்தப்படுவது வழக்கம். இந்த கூட்டம் கரூர் மாவட்டத்தில் கடந்த 6 மாதமாக நடத்தப்படவில்லை என்றும், மேலும் கூட்டம் நடத்த வலியுறுத்தியும் இதுவரை கூட்டம் நடத்தப்படவில்லை என குற்றம்சாட்டி மாவட்ட ஆட்சியர் அலுவலக வளாகத்தில் தரையில் அமர்ந்து காங்கிரஸ் கட்சியை சேர்ந்த ஜோதிமணி எம்.பி இன்று தர்ணா போராட்டத்தில் ஈடுபட்டார்.

இதனையடுத்து மாவட்ட ஆட்சியர் பிரபு சங்கர் தரையில் அமர்ந்து மனுவை வாங்கி பேச்சுவார்த்தை நடத்திய நிலையில் உடன்பாடு எட்டாத நிலையில் தொடர் போராட்டத்தில் ஈடுபட்டுள்ளார்.

இதனிடையே, ஜோதி மணி தனது ட்விட்டர் பக்கத்தில், "நான் எனது கரூர் நாடாளுமன்ற தொகுதியில் உள்ள 6800 கிராமங்களில் 6300 கிராமங்களுக்கு போய் மக்களை சந்தித்திருக்கிறேன். உதவி கேட்டு மனு கொடுத்த ஆயிரக்கணக்கான மாற்றுத்திறனாளிகளின் எண்ணிக்கையை கண்டு அதிர்ந்துபோனேன். தேவை இருக்கிறது என்று தெரியாமலா இந்த திட்டத்தை கேட்டு வாங்கியிருப்பேன்?

ஒன்றிய அரசின் திட்டத்தை செயல்படுத்த மறுக்க மாவட்ட ஆட்சியருக்கு அதிகாரம் உள்ளதா? எதனடிப்படையில் மாவட்ட ஆட்சியர் இப்படியொரு பதில் கடிதம் கொடுக்கிறார்?. ஒன்றிய அரசின் திட்டமானாலும், தமிழக அரசின் திட்டமானாலும் அடிப்படையில் மக்கள் வரிப்பணத்தில் நடத்தப்படுவதுதான். கரூருக்கு ஒன்றிய அரசின் திட்டம் இப்பொழுது தேவையில்லை என்று எதனடிப்படையில் மாவட்ட ஆட்சியர் முடிவுக்கு வந்தார்?" என கேள்வி எழுப்பியுள்ளார்.

 

பதிவு: November 25, 2021
"மாணவர்கள் தவறாக நினைக்கிறார்கள்; அவமானமாக இருக்கிறது!'‍- தற்கொலைக்கு முன் கரூர் ஆசிரியர் உருக்கமான கடிதம்

"மாணவர்கள் தன்னை தவறாக நினைக்கிறார்கள். மாணவர்கள் முன் தனக்கு அவமானமாக இருக்கிறது. தான் எந்த தவறும் செய்யவில்லை" என்று தற்கொலை செய்து கொண்ட கரூர் பள்ளி ஆசிரியர் கடிதத்தில் குறிப்பிட்டுள்ளார்.

கரூர் மாவட்டம், காமராஜர் நகரில் வசித்து வந்தவர் சரவணன் (42). இவர் கரூரில் உள்ள தனியார் பள்ளியில் கணக்கு ஆசிரியராக வேலை செய்து வந்தார். இவருக்கு ஜெயந்தி (42) என்ற மனைவியும், ஒரு மகனும் உள்ளனர். இவர் பணிபுரிந்து வந்த அதே பள்ளியில் படித்த பிளஸ்-2 மாணவி ஒருவர் தான், பாலியல் தொல்லையால் தற்கொலை செய்வதாக கூறி கடிதம் எழுதி வைத்துவிட்டு கடந்த சில நாட்களுக்கு முன்பு தற்கொலை செய்து கொண்டார்.

இந்தநிலையில் கணித ஆசிரியர் சரவணன் திருச்சி மாவட்டம், துறையூர் அருகே உள்ள செங்காட்டுப்பட்டியில் உள்ள தனது மாமனார் நடராஜன் என்பவரது வீட்டில் நேற்று தூக்கிட்டு தற்கொலை செய்து கொண்டார். இது குறித்து தகவலறிந்த, இன்ஸ்பெக்டர்(பொறுப்பு) ராஜேஸ்வரி தலைமையிலான போலீசார் சம்பவ இடத்துக்கு விரைந்து வந்து ஆசிரியரின் உடலை கைப்பற்றி பிரேத பரிசோதனைக்காக துறையூர் அரசு மருத்துவமனைக்கு அனுப்பி வைத்தனர்.

மேலும் இது தொடர்பாக வழக்குப்பதிவு செய்து சரவணன் தற்கொலைக்கான காரணம் குறித்து விசாரணை நடத்தி வருகின்றனர். இந்த நிலையில் ஆசிரியர் சரவணன் எழுதிய கடிதம் ஒன்று போலீசாரிடம் சிக்கியுள்ளது. அந்த கடிதத்தில், "மாணவர்கள் தன்னை தவறாக நினைக்கிறார்கள். மாணவர்கள் முன் தனக்கு அவமானமாக இருக்கிறது. தான் எந்த தவறும் செய்யவில்லை. தன்னை ஏன் இப்படி கூறுகிறார்கள் என்று தெரியவில்லை" என்று கடிதத்தில் குறிப்பிட்டுள்ளார்.

மாணவியின் தற்கொலை குறித்து விசாரணை நடைபெற்று வரும் நிலையில், ஆசிரியர் சரவணனின் தற்கொலையும், அவரது உருக்கமான தற்கொலை கடிதமும் இந்த வழக்கில் மேலும் பரபரப்பை தொற்றிக் கொண்டுள்ளது.

பதிவு: November 25, 2021
`பாலியல் வன்கொடுமையால் சாகும் கடைசி பெண் நானாகத்தான் இருக்கணும்; காரணமாக இருந்தவரை சொல்ல பயமா இருக்கு!'- தற்கொலை செய்த மாணவி அதிர்ச்சி கடிதம்

பாலியல் வன்கொடுமையால் சாகும் கடைசி பெண் நானாக தான் இருக்க வேண்டும் என்றும் தன்னை யார் இந்த முடிவை எடுக்க வைத்தார் என்பதை கூறவே பயமாக உள்ளதாகவும் தற்கொலை செய்து கொண்ட பிளஸ் 2 மாணவி கடிதம் எழுதியிருப்பது அதிர்ச்சியை ஏற்படுத்தியுள்ளது.

கரூர் மாவட்டம், வெண்ணைமலை பகுதியில் தனியார் பள்ளி செயல்பட்டு வருகிறது. இந்த பள்ளியில் 12ம் வகுப்பு படித்துவரும் மாணவி உமா (பெயர் மாற்றம்), நேற்று பள்ளியில் இருந்து வீடு திரும்பியுள்ளார். வீட்டில் ஆட்கள் யாரும் இல்லாத நிலையில், தூக்கிட்டு அவர் தற்கொலை செய்துகொண்டார். அவரது உடலை கைப்பற்றி போலீசார் மருத்துவ பரிசோதனைக்கு அனுப்பி வைத்துள்ளனர்.

இந்நிலையில், மாணவி எழுதியுள்ள கடிதம் ஒன்று சிக்கியுள்ளது. அதில், பாலியல் வன்கொடுமையால் சாகும் கடைசி பெண் நானாக தான் இருக்க வேண்டும் என்று குறிப்பிட்டுள்ள மாணவி, தன்னை யார் இந்த முடிவை எடுக்க வைத்தார் என்பதை கூறவே பயமாக உள்ளதாகவும் தெரிவித்துள்ளார்.

மேலும், “இந்த பூமியில் வாழணும் ஆசபட்டேன். ஆனா இப்போ பாதியிலேயே போறேன். இன்னொறு தடவ இந்த உலகத்துல வாழ வாய்ப்பு கிடைத்தால் நல்லா இருக்கும். பெருசாகி நிறைய பேருக்கு உதவி பண்ணனும்னு ஆசை. ஆனா முடியாதுல்ல“ என்று உருக்கமாக கூறியுள்ள உமா, தனது தாய், சித்தப்பா, மாமா ஆகியோரை மிகவும் பிடிக்கும் என்றும், யாருக்கிட்டயும் சொல்லாம போகிறேன். என்னை மன்னித்து விடுங்கள் என்றும் தெரிவித்துள்ளார். இனி எந்த ஒரு பெண்ணும் தன்னை போன்று சாகக் கூடாது என்றும் அவர் கடிதத்தில் குறிப்பிட்டுள்ளார்.

இந்த வழக்கு தொடர்பாக போலீசார் தீவிர விசாரணை நடத்தி வருகின்றனர். மாணவி பாலியல் தொல்லை காரணமாக தற்கொலை செய்துகொண்ட சம்பவம் அதிர்ச்சியை ஏற்படுத்தியுள்ளது.

பதிவு: November 20, 2021

கொரோனா வைரஸ் அப்டேட்ஸ்