'விக்ரம்' படத்திற்காக மீண்டும் இணைந்துள்ள பஞ்சதந்திரம் காம்போ! வெளியாகியிருக்கும் அசத்தல் ப்ரோமா!

'பஞ்சதந்திரம்' திரைப்படத்தில் ஐவர் காம்போவாக நடித்து நம்மைக் கவர்ந்த நடிகர்கள் அடங்கிய காட்சிகளைக் கொண்டிருக்கும் விக்ரம் பட புதிய ப்ரோமோ வெளியாகியுள்ளது.

லோகேஷ் கனகராஜ் இயக்கத்தில், கமல்ஹாசன், விஜய் சேதுபதி, ஃபஹத் ஃபாசில், நரேன் ஆகியோர் நடித்துள்ள 'விக்ரம்' திரைப்படம் ஜூன் 3-ல் திரையரங்குகளில் வெளியாகிறது. தேர்ந்த கதையமைப்பின் மூலம் சிறந்த திரைப்படங்களை தமிழ் சினிமாவிற்குக் கொடுத்துவரும் இயக்குநர் என்பதால், லோகேஷின் 'விக்ரம்' மீது பலருக்கும் எதிர்பார்ப்பு அதிகரித்துள்ளது.

இந்நிலையில், கே.எஸ்.ரவிக்குமார் இயக்கத்தில் 2002-ஆம் ஆண்டு வெளியாகி ரசிக்கவைத்த 'பஞ்சதந்திரம்' படத்தில் நடித்து நம்மை வெகுவாகக் கவர்ந்த யூகி சேது, ரமேஷ் அரவிந்த், ஜெயராம், ஸ்ரீமன் ஆகிய நடிகர்கள் அடங்கிய 'விக்ரம்' படத்தின் புதிய ப்ரோமோ வெளியாகி எதிர்பார்ப்பை இன்னும் அதிகரிக்கச் செய்துள்ளது.

'பஞ்ச தந்திரம்' படத்தில் வருவதுபோன்ற நகைச்சுவையான தொலைபேசி உரையாடல் காட்சிகளும், அதில் கமல்ஹாசன் குறித்து விவாதிக்கப்படுவதுமாக ப்ரோமோ அமைந்துள்ளது. படம் குறித்த விளம்பரத்திற்காக இந்த உத்தி கையாளப்பட்டிருந்தாலும், பலரது விருப்பப் படங்களில் ஒன்றான 'பஞ்சதந்திரம்' பட பாணியில் ப்ரோமோ அமைக்கப்பட்டுள்ளது கவரும்படியாக உள்ளது. 

அந்த ப்ரோமோ காணொலி உங்கள் பார்வைக்கு...

பதிவு: May 27, 2022
‘இந்தியன் 2 படப்பிடிப்பு விரைவில் தொடங்கும்’ – 'விக்ரம்' பட செய்தியாளர் சந்திப்பில் கமல் தந்த அசத்தல் அப்டேட்!

ஷங்கர் இயக்கத்தில் கமல்ஹாசன் நடித்துவந்த 'இந்தியன் 2' திரைப்படத்தின் படப்பிடிப்பு விரைவில் தொடங்கும் என்று நடிகர் கமல்ஹாசன் தெரிவித்துள்ளார்.

லோகேஷ் கனகராஜ் இயக்கத்தில், கமல்ஹாசன், விஜய் சேதுபதி, ஃபஹத் ஃபாசில், நரேன் ஆகியோர் நடித்துள்ள 'விக்ரம்' திரைப்படம் ஜூன் 3-ல் திரையரங்குகளில் வெளியாகிறது. இந்நிலையில் இத்திரைப்படத்திற்கான செய்தியாளர்கள் சந்திப்பில் இயக்குநர் லோகேஷ் கனகராஜ், நடிகர் கமல்ஹாசன் ஆகியோர் கலந்துகொண்டனர்.

இதில் பேசிய நடிகர் கமல்ஹாசன், "இந்தியன் 2 படத்தின் படப்பிடிப்பு குறித்த பேச்சுவார்த்தை நடைபெற்றுவருகிறது. விரைவில் 'இந்தியன் 2' படப்பிடிப்பு தொடங்கும்" என்று தெரிவித்தார். மேலும் பேசிய அவர், "ஜூன் 3-ல் கலைஞர் கருணாநிதியின் பிறந்தநாள் என்பதால், அன்றைய தினத்தில் விக்ரம் திரைப்படம் வெளியிடப்படுவதாக சிலர் கூறுகின்றனர். அதற்கும் இதற்கும் எந்த சம்பந்தமுமில்லை.

முதலில் மே 29-ல் தான் விக்ரம் படத்தை வெளியிடலாம் என்று இருந்தோம். ஆனால், கொரோனா உள்ளிட்ட சில காரணங்களால் வெளியீட்டுத்தேதி தள்ளிப்போய் 'ஜூன் 3' படத்தை வெளியிட சரியான தேதியாக இருக்கும் என்று அத்தேதியை முடிவுசெய்தோம். இது தற்செயலாக அமைந்தது. சினிமாவை பொறுத்தவரை கலைஞரைப் பற்றிப் பேசுவதென்றால் ஆயிரம் பக்கங்கள் போதாது" என்று தெரிவித்தார்.

அரசு அதிகாரிகளின் ஊழல் குறித்து விளக்கும் வகையில் வெளியான 'இந்தியன்' படத்தின் முதல் பாகம் மிகப்பெரும் வரவேற்பைப் பெற்று வெற்றிப்படமாகவும், கமல்ஹாசனின் முக்கியப் படங்களில் ஒன்றாகவும் அமைந்தது. இதனிடையே தான் அப்படத்தின் இரண்டாம் பாகம் தயாராகவிருப்பது குறித்த செய்தி அவரது ரசிகர்களிடையே பெரும் மகிழ்ச்சியை ஏற்படுத்தியிருந்தது.

இந்நிலையில், எதிர்பாராமல் நிகழ்ந்த சில தடைகள் மூலம் நிறுத்தப்பட்ட 'இந்தியன் 2' பட படப்பிடிப்பு ரசிகர்கள் பலரை கலக்கத்தில் ஆழ்த்தியது. மேலும் 'இந்தியன் 2' படம் கைவிடப்பட்டதாக வெளியான செய்திகள் அதிர்ச்சியை ஏற்படுத்தின. இந்நிலையில், 'இந்தியன் 2' படப்பிடிப்பு மீண்டும் தொடங்கும் என்ற செய்தி கமல் ரசிகர்களை மீண்டும் மகிழ்ச்சியில் ஆழ்த்தியுள்ளது.

பதிவு: May 26, 2022
ஆர்,ஜே.பாலாஜி, ஊர்வசி நடிப்பில் நகைச்சுவை கிளப்பும் 'வீட்ல விசேஷம்' பட ட்ரெய்லர் வெளியானது!

‘ஆர்.ஜே.பாலாஜி – என்.ஜே.சரவணன்’ இயக்கத்தில், ஊர்வசி, சத்யராஜ், ஆர்.ஜே.பாலாஜி நடித்துள்ள கலகலப்பூட்டும் ‘வீட்ல விசேஷம்’ பட ட்ரெய்லர் காணொலி இணையத்தில் வெளியாகியுள்ளது. பதாய் ஹோ என்ற இந்தி படத்தின் தமிழ் ரீமேக்கான இப்படம், நடுத்தர வயதைத் தாண்டிய தம்பதியினர் குழந்தைப்பேறு அடைந்தால்  என்னென்ன இன்னல்களை அவர்கள் சந்திக்கவேண்டி இருக்கும் என்பது போன்ற கதைக்களத்துடன் நகைச்சுவை பாணியில் தயாராகியுள்ளது. 

இதில் ஆர்.ஜே.பாலாஜிக்கு ஜோடியாக அபர்ணா பாலமுரளி நடித்துள்ளார். படத்தொகுப்பு செல்வா ஆர்.கே., இசை கிரிஷ் கோபாலகிருஷ்ணன், ஒளிப்பதிவு, கார்த்திக் முத்துகுமார். ஜூன் 17-ஆம் தேதி திரையரங்குகளில் இத்திரைப்படம் வெளியாகிறது.

பதிவு: May 26, 2022
செல்வராகவனின் 'சாணிக் காயிதம்' பட டீசர் வெளியானது!

                                                       

 

இயக்குநர் அருண் மாதேஸ்வரன் இயக்கத்தில், செல்வராகவன், கீர்த்தி சுரேஷ் ஆகியோர் நடித்துள்ள சாணிக் காயிதம் திரைப்படத்தின் டீசர் வெளியானது. இப்படம் மே 6-ஆம் தேதி அமேசான் ப்ரைம் ஓடிடி தளத்தில் வெளியாகிறது.

 

பதிவு: May 02, 2022
பூஜையுடன் தொடங்கியது ‘பாலா- சூர்யா’ இணையும் ‘SURIYA41’ திரைப்படம்! எகிறியிருக்கும் எதிர்பார்ப்பு!

இயக்குநர் பாலாவின் இயக்கத்தில், நடிகர் சூர்யா கதாநாயகனாக நடிக்கும் ‘SURIYA41’ திரைப்படம் குறித்த அதிகாரப்பூர்வ அறிவிப்பு வெளியாகியுள்ளது.

தமிழ்சினிமாவின் மிக முக்கிய இயக்குநர்களின் பட்டியலில் சந்தேகத்திற்கிடமின்றி இடம்பிடித்திருப்பவர் இயக்குநர் பாலா. சேது, நந்தா, நான் கடவுள், பரதேசி உள்ளிட்ட பல்வேறு வித்தியாசமான படங்களைத் தமிழ்சினிமா உலகிற்குத் தந்ததன் மூலம் மக்கள் மனதில் தவறாது இடம்பித்தவர்.

பாலா இயக்கத்தில் இறுதியாக ஜி.வி.பிரகாஷ். ஜோதிகா நடித்த ‘நாச்சியார்’ திரைப்படம் வெளியானது. பின், நடிகர் விக்ரமின் மகன் துருவ் விக்ரமை வைத்து இவர் இயக்கிய ‘வர்மா’ திரைப்படம் வெளியீட்டிற்கு முன்பாக தயாரிப்பு தரப்பால் தவிர்க்கப்பட்டு பின் வெளியாகி கலவையான விமர்சனங்களைப் பெற்றது.

பாலா என்னும் கலைஞனிடமிருந்து, அவர் இயக்கத்தில் கடைசியாக வெளியான சில படைப்புகள் அவரை முழுமையாக வெளிக்கொணரவில்லையோ என்ற எண்ணத்தை மக்கள் மத்தியில் உருவாக்கியது. அவர் மீண்டும் எப்பொழுது தன் ‘இயல்புக்கு’ வருவார் என்ற எதிர்பார்ப்பு ரசிகர்கள் மத்தியில் பரவலாகவே காணப்பட்டது..

இந்நிலையில் தான் நடிகர் சூர்யா நடிக்க, பாலா இயக்கும் ‘SURIYA41’ திரைப்படம் குறித்த அதிகாரப்பூர்வ அறிவிப்பு வெளியாகியுள்ளது. மேலும் இப்படத்தின் படப்பிடிப்பு இன்று முதல் துவங்கியுள்ளது. நந்தா, பிதாமகன் படங்களை அடுத்து பாலாவுடன் நடிகர் சூர்யா இணையும் மூன்றாவது திரைப்படம் இதுவாகும்.

நடிகர் சூர்யாவின் ‘2D Entertainment’ நிறுவனத்தின் தயாரிப்பில் இப்படம் உருவாகிறது. இப்படத்திற்கு ஜி.வி.பிரகாஷ் குமார் இசையமைக்கிறார். பாலசுப்ரமணியம் ஒளிப்பதிவு செய்கிறார். கீர்த்தி ஷெட்டி கதாநாயகியாக நடிக்கிறார். மேலும் பல தொழில்நுட்பக் கலைஞர்கள் குறித்த அறிவிப்பு அடுத்தடுத்து வெளியாகும் என்று எதிர்பார்க்கப்படுகிறது.

பதிவு: March 28, 2022
இயக்குநர் பாலா – முத்துமலர் தம்பதி விவாகரத்து! வெளியாகியிருக்கும் காரணங்கள்!

தமிழ்சினிமா இயக்குநர் பாலா, தனது மனைவி முத்துமலரை விவாகரத்து செய்துள்ளதை அடுத்து, விவாகரத்திற்கு காரணம் என்ன என்பது குறித்த செய்திகள் வெளியாகியுள்ளன.

தமிழ்சினிமா உலகின் முக்கிய இயக்குநர்களில் ஒருவர், இயக்குநர் பாலா. இயக்குநர் பாலுமகேந்திராவிடம் உதவி இயக்குநராக இருந்த பாலா, ‘விக்ரம்’ நடிப்பில் 1999-ஆம் ஆண்டு வெளியான ‘சேது’ திரைப்படம் மூலம் இயக்குநராக அறிமுகமானார்.

முதல் படமே பல பாராட்டுகளையும், பல்வேறு விருதுகளையும் பெற்று பாலாவை முக்கிய இயக்குநர்களின் பட்டியலில் இணைத்தது. தொடர்ந்து நந்தா, பிதாமகன், நான் கடவுள், அவன் இவன், பரதேசி உள்ளிட்ட தரமான படங்களை இயக்கி, தமிழின் சிறந்த இயக்குநர்களில் ஒருவரானார்.

பரதேசி படத்திற்குப்பின் சசிகுமார், வரலட்சுமி நடிப்பில் இவர் இயக்கிய, இசைஞானி இளையராஜாவின் இசையில் வெளியான 1000-வது படமான ‘தாரை தப்பட்டை’ எதிர்பார்த்த அளவு வரவேற்பைப் பெறவில்லை. இதைத் தொடர்ந்து இவர் இயக்கிய ‘நாச்சியார்’ படமும் அவ்வளவாக பேசப்படவில்லை.

இந்நிலையில், நடிகர் விக்ரம் மகன் ‘துருவ் விக்ரம்’ நடிப்பில், பாலா இயக்கியிருந்த ‘வர்மா’ திரைப்படம், மொத்த படவேலைகளும் முடிந்து ட்ரைலர் வெளியாகியிருந்த நிலையில், தயாரிப்பு நிறுவனத்தால் நிராகரிக்கப்பட்டது. இந்நிகழ்வு தமிழ்சினிமாவில் பரபரப்பாகப் பேசப்பட்டது.

இதன்பின் படங்கள் இயக்காமல் இருந்த பாலா, சூர்யாவை வைத்து புதிய படம் ஒன்றை இயக்கவிருப்பதாக அண்மையில் தகவல் வெளியானது. இந்நிலையில், இயக்குநர் பாலா – முத்துமலர் தம்பதி சென்னை குடும்பநல நீதிமன்றத்தில் விவாகரத்து பெற்றுள்ளனர்.

கடந்த 4 ஆண்டுகளாகவே இருவரும் பிரிந்து வாழ்ந்துவருவதாகக் கூறப்படும் நிலையில், இருவருக்கும் சில கருத்துவேறுபாடுகள் இருந்ததாகக் கூறப்படுகிறது.

2018-ல் ஜோதிகா, ஜி.வி.பிரகாஷ் குமார் நடிப்பில் வெளியான நாச்சியார் திரைப்படம் பெரிதாக பேசப்படாத நிலையில், பாலா இதுகுறித்த மனவுளைச்சலில் இருந்துள்ளார். அதன்பின் அவர் இயக்கிய வர்மா திரைப்படமும் நிராகரிக்கப்பட்டது பாலாவை மனதளவில் வெகுவாக பாதித்துள்ளது. வாய்ப்புகள் குறுகி பாலாவின் சினிமா வாழ்க்கை முன்பில்லாததைப்போல் மங்கியது.

இந்நிலையில்தான் இதுகுறித்த பிரச்சினைகள் பாலா – முத்துமலர் தம்பதியிடையே அவ்வப்போது பூதாகரமாகிவந்ததையடுத்து, இருவரும் பரஸ்பரம் பிரிய முடிவுசெய்து விவாகரத்து பெற்றுள்ளனர். இவர்களுக்கு பிரார்த்தனா என்ற பெண் குழந்தை உள்ளது.

பாலாவின் ‘விவாகரத்து’ செய்தி, அவரது ரசிகர்களிடையே பெரும் அதிர்ச்சியை ஏற்படுத்தியுள்ளது. நீண்ட இடைவெளிக்குப்பிறகு சூர்யாவுடன் புதிய படத்தில் இணையவிருப்பதாக வெளியான தகவலால் பெருமகிழ்ச்சியில் இருந்த பாலாவின் ரசிகர்கள், இச்செய்தியினால் கவலையில் ஆழ்ந்துள்ளனர். பாலா, இப்பிரச்சினைகளிலிருந்து விரைவில் மீண்டு, முன்புபோல் படவேலைகளில் ஈடுபடவேண்டும் என்பதே அவரது ரசிகர்களின் எதிர்பார்ப்பாக உள்ளது.

பதிவு: March 08, 2022
வெளியானது சமந்தாவின் 'சாகுந்தலம்' பட முதல் பார்வை போஸ்டர்! வித்தியாசமான சமந்தாவை எதிர்பார்க்கலாமா?

சமந்தா நடிப்பில் உருவாகியுள்ள ‘சாகுந்தலம்’ திரைப்படத்தின் முதல் பார்வை போஸ்டரை வெளியிட்டுள்ளது படக்குழு. இதனை தனது ட்விட்டர் பக்கத்தில் பகிர்ந்துள்ளார் சமந்தா.

தமிழ், தெலுங்கு சினிமா உலகில் முன்னணி நடிகைகளில் ஒருவராக வலம்வருபவர் நடிகை சமந்தா. இவர் நடனமாடி அண்மையில் அல்லு அர்ஜுன் நடிப்பில் வெளியான ‘ஒ சொல்றியா மாமா’ பாடல் பட்டிதொட்டியெங்கும் பரவி ஹிட்டடித்தது.

நாகசைதன்யாவுடனான விவாகரத்துக்குப்பின் சற்றே மனக்கவலையில் இருந்த சமந்தா, தற்சமயம் முழுவீச்சில் படங்களில் நடித்துவருகிறார். இவர் நடிப்பில் தமிழில் ‘காத்துவாக்குல ரெண்டு காதல்’ திரைப்படம் தயாராகி வெளியீடுக்காகக் காத்திருக்கிறது. மேலும் தெலுங்கில் தயாராகும் புதிய படம் ஒன்றிலும் அவர் அடுத்ததாக நடிக்கிறார்.

இந்நிலையில், சமந்தா நடிப்பில், இயக்குநர் குணசேகர் இயக்கத்தில் உருவாகியுள்ள ‘சாகுந்தலம்’ திரைப்படத்தின் முதல் பார்வை போஸ்டர் வெளியாகியுள்ளது.

காளிதாஸரின் நாடக நூலான சாகுந்தலம் நூலை கதையமைப்பாகக் கொண்டு இப்படம் உருவாக்கப்பட்டுள்ளது. இந்நாடகத்தின் முதன்மைக் கதாபாத்திரங்களாக சகுந்தலா மற்றும் துஷ்யந்தன் ஆகியோர் நடித்திருப்பர்.

இக்கதாபாத்திரங்களில் ஒன்றான சகுந்தலா கதாபாத்திரத்தை சாகுந்தலா திரைப்படத்தில் சமந்தா ஏற்றுள்ளார். இவருடன் சேர்ந்து மோகன்பாபு, கௌதமி, அதிதி பாலன் ஆகியோர் முக்கிய கதாபாத்திரங்களில் நடித்துள்ளனர்.

நீலிமா குணா தயாரித்துள்ள இப்படத்திற்கு மணிஷர்மா இசையமைத்துள்ளார். தமிழ், தெலுங்கு, மலையாளம், கன்னடம், இந்தி ஆகிய ஐந்து மொழிகளில் இப்படம் உருவாவதாக போஸ்டரில் தெரிவிக்கப்பட்டுள்ளது.

மேடை நாடகக் கதை என்பதால் நடிப்புக்கு முக்கியத்துவம் உள்ள திரைப்படமாக சாகுந்தலம் இருக்கும் என்று நம்பலாம். இதையடுத்து இப்படத்தின் அடுத்தடுத்த அப்டேட்டுகள் விரைவில் வெளியாகலாம் என்று எதிர்பார்க்கப்படுகிறது.

பதிவு: February 21, 2022
அமீர், வெற்றிமாறன் கூட்டணியின் புதிய படத்திற்கு ‘இறைவன் மிகப்பெரியவன்’ என பெயரிட்டுள்ள படக்குழு! காரணம் இதுதானா?

வெற்றிமாறன் மற்றும் தங்கம் ஆகியோரின் கதையமைப்பில் அமீர் இயக்கும் புதிய படத்திற்கு ‘இறைவன் மிகப்பெரியவன்’ எனப் பெயரிடப்பட்டுள்ளது.

தமிழ் சினிமாவில் ‘மௌனம் பேசியதே’ திரைப்படம் மூலம் இயக்குநராக அறிமுகமானவர் அமீர். அதைத் தொடர்ந்து ராம் திரைப்படத்தின் மூலம் கவனம் பெற்றவர், பருத்திவீரன் திரைப்படம் மூலம் கொண்டாடப்பட்டார். தொடர்ந்து ‘யோகி’ என்ற படத்தை இயக்கிய அமீரின் இயக்கத்தில், இறுதியாக ‘ஆதி பகவன்’ திரைப்படம் வெளியானது.

அமீர் இறுதியாக இயக்கிய இரண்டு படங்களும் அவ்வளவாக வரவேற்பைப் பெறாத நிலையில், நடிப்பில் கவனம் செலுத்தத் துவங்கினார் அமீர். அதன்படி வெற்றிமாறன் இயக்கத்தில் வெளியான வட சென்னை திரைப்படத்தில் இவர் நடித்த ராஜன் கதாபாத்திரம் பெருமளவில் பேசப்பட்டது.

இந்நிலையில் தான், நீண்ட இடைவெளிக்குப்பின் அமீர், வெற்றிமாறன் திரைக்கதையில் புதிய படம் ஒன்றை இயக்கவிருப்பதாக அறிவிப்பு ஒன்று வெளியானது. மேலும் இதில் கதை மற்றும் திரைக்கதை குறித்த பணிகளுக்காக தங்கம் என்பவரும் இணைந்துள்ளார் எனத் தெரிவிக்கப்பட்டது.

இந்நிலையில், இப்படத்தின் பெயர் அடங்கிய போஸ்டர் ஒன்றை தற்சமயம் வெளியிட்டுள்ளது படக்குழு. அதன்படி அமீர், வெற்றிமாறன் கூட்டணியின் புதிய படத்திற்கு ‘இறைவன் மிகப்பெரியவன்’ என்று பெயர் சூட்டப்பட்டுள்ளது. இப்படத்தை ஜாஃபர் தயாரிக்கிறார். அமீரின் ஆஸ்தான இசையமைப்பாளரான யுவன் ஷங்கர் ராஜா இசையமைக்கிறார். ராம்ஜி ஒளிப்பதிவு செய்கிறார்.

அண்மையில், கர்நாடகாவின் ஒரு பள்ளியில் இஸ்லாமிய மாணவிகள் ஹிஜாப் அணிய தடை விதிக்கப்பட்ட விவகாரம் நாட்டையே உலுக்கியது. அப்பொழுது தடையை மீறி பள்ளிக்குள் வர முயன்ற மாணவியை ‘ஜெய் ஸ்ரீராம்’ என்ற முழக்கத்துடன் இந்துத்துவா அமைப்பின் மாணவர்கள் தடுக்க நினைத்தபொழுது, ‘அல்லாஹு அக்பர்’ என்ற முழக்கத்துடன் அம்மாணவி பள்ளிக்குள் நுழைந்தார்.

மாணவியால் முழங்கப்பட்ட ‘அல்லாஹு அக்பர்’ என்ற சொல் பலரிடையேயும் கவனம் பெற்று நாடாளுமன்றம் வரை மொழியப்பட்டது.

‘அல்லாஹு அக்பர்’ என்ற சொல்லுக்கு தமிழில் ‘இறைவன் மிகப்பெரியவன்’ என்று பொருள். இதையடுத்து அச்சம்பவத்தின் தாக்கம் காரணமாகக் கூட இத்தலைப்பை அமீர் தேர்வு செய்திருக்கலாம் என்று எண்ணப்படுகிறது. எதுவாயினும், அமீர், வெற்றிமாறன், யுவன் ஷங்கர் ராஜா கூட்டணியில் உருவாகவிருக்கும் இப்படத்திற்கு ரசிகர்களிடையே எதிர்பார்ப்பிற்கு குறைவில்லை என்பதே நிதர்சனம்.

பதிவு: February 14, 2022

முக்கிய செய்திகள்

'தமிழகத்தில் புழங்கும் பரிசுச்சீட்டு விற்பனையை முற்றிலும் தடை செய்யவேண்டும்' - பாமக நிறுவனர் ராமதாஸ் வலியுறுத்தல்!

தமிழகத்தில் புழக்கத்தில் இருக்கும் பரிசுச்சீட்டு விற்பனையை தமிழக அரசு முற்றிலும் தடைசெய்ய வேண்டும் என்று பாமக நிறுவனர் ராமதாஸ் அறிவுறுத்தியுள்ளார்.

இதுகுறித்து அவர் ட்விட்டரில் வெளியிட்டுள்ள செய்தியறிக்கையில், 

சேலத்தில் தடை செய்யப்பட்ட பரிசுச்சீட்டு விற்பனை நடைபெற்று வருவது காட்சி ஊடகம் மூலம் ஆதாரங்களுடன் அம்பலப்படுத்தப்பட்டிருக்கிறது. தடை செய்யப்பட்ட பரிசுச்சீட்டுகள் கட்டுப்பாடின்றி தொடர்ச்சியாக விற்பனை செய்யப்பட்டு வருவது அதிர்ச்சியளிக்கிறது

சேலம், சென்னை உட்பட தமிழகத்தின் பெரும்பான்மையான இடங்களில் தடை செய்யப்பட்ட பரிசுச்சீட்டுகளும், ஒரு நம்பர் பரிசுச்சீட்டுகளும் தடையின்றி விற்பனை செய்யப்பட்டு வருகின்றன. பாட்டாளி மக்கள் கட்சியும் இந்த சமூகத் தீமையை ஒழிக்க வேண்டும் என வலியுறுத்தி வருகிறது

ஆன்லைன் சூதாட்டம் என்ற மிகப்பெரிய சமூகத் தீமைக்கு தமிழக அரசு முடிவு கட்டியிருக்கிறது. ஆன்லைன் சூதாட்டத்தால் எத்தனைக் குடும்பங்கள் சீரழிகின்றனவோ, அதை விட அதிக எண்ணிக்கையிலான குடும்பங்கள் தடை செய்யப்பட்ட பரிசுச்சீட்டுகளால் சீரழிந்து கொண்டிருக்கின்றன

தமிழகத்தில் 2003-ஆம் ஆண்டே பரிசுச்சீட்டுகள் தடை செய்யப்பட்டு விட்டன. அந்தத் தடையை முழுமையாக செயல்படுத்த வேண்டும். பரிசுச்சீட்டுகளை விற்போர் மீது கடுமையான நடவடிக்கை மேற்கொள்ளப்பட வேண்டும். அதன் மூலம் ஏழைக் குடும்பங்கள் வீதிக்கு வருவதை தடுக்க வேண்டும்" இவ்வாறு தெரிவிக்கப்பட்டுள்ளது.

பதிவு: June 28, 2022
AltNews இணை நிறுவனர் முகமது ஜுபைர் கைது! FIR கூட வழங்காமல் கைதுசெய்துவிட்டதாக மற்றொரு இணை நிறுவனர் தகவல்!

AltNews இணை நிறுவனர் முகமது ஜுபைர் டெல்லி போலீசாரால் கைது செய்யப்பட்டுள்ளார். 2018-ல் அவரது ட்விட்டர் பக்கத்தில் அவர் பதிவிட்ட ஒரு கருத்தின் காரணமாக அவர் கைதுசெய்யப்பட்டுள்ளார்.

ட்விட்டரில் பகிரப்படும் செய்திகளின் உண்மைத்தன்மையை ஆராய்ந்து அதுகுறித்த தகவல்களை ட்விட்டர்வாசிகளுக்குப் பகிர்பவர் பத்திரிகையாளர் முகமது ஜுபைர். இவர் AltNews செய்தி நிறுவனத்தின் இணை இயக்குநர் ஆவார். அண்மையில், தனியார் தொலைக்காட்சியில் நபிகள் நாயகம் குறித்து பாஜக தேசிய செய்தி தொடர்பாளர் நுபுர் சர்மா பேசிய காணொலியை வலைதளங்களில் பகிர்ந்தவர் இவரே. அது உலக அளவில் கவனம் பெற்று பல்வேறு எதிர்ப்பலைகளைக் கிளப்பியது.

இந்நிலையில், 2018-ல் அவரது ட்விட்டர் பக்கத்தில் அவர் பதிவிட்ட ஒரு கருத்தின் காரணமாக நேற்றைய தினம் டெல்லி காவலர்களால் கைது செய்யப்பட்டுள்ளார். கைதிற்கு முன்னதாக வழக்கு ஒன்றின் விசாரணைக்காக திங்கள்கிழமை வருமாறு அவரை டெல்லி காவல்துறையின் தனிப்பிரிவினர் அழைத்திருந்ததாகவும், ஆனால் வேறொரு வழக்கில் அவருக்கு எதிராக பதிவு செய்யப்பட்டிருந்த முதல் தகவல் அறிக்கையின் அடிப்படையில் அவர் கைது செய்யப்பட்டதாக போலீஸார் கூறியதாகவும் AltNews நிறுவனத்தின் மற்றொரு இணை நிறுவனர் பிரதீக் சின்ஹா தெரிவித்தார்.

இதுகுறித்து அவர் தனது ட்விட்டர் பக்கத்தில், "2020-ஆம் ஆண்டு பதிவு செய்யப்பட்டிருந்த வழக்கு ஒன்றின் விசாரணைக்காக வரும்படி டெல்லி காவல்துறையின் தனிப்பிரிவினர் அவரை அழைத்தனர். அந்த வழக்கில் தாம் கைது செய்யப்படாமல் இருக்க நீதிமன்றத்தில் இருந்து முன்னதாகவே உத்தரவைப் பெற்றிருந்தார் முகமது ஜுபைர். ஆனால், விசாரணைக்கு ஆஜரான அவரை மாலை 6.45 மணியளவில் வேறொரு வழக்கில் அதன் முதல் தகவல் அறிக்கை நகலைக் கூட வழங்காமல் போலீஸார் கொண்டு சென்றனர். பல முறை கேட்டும் போலீஸார் முதல் தகவல் அறிக்கையைக் காண்பிக்கவில்லை. அவரைக் கொண்டு சென்ற வேனில் இருந்தவர்கள் தங்களுடைய பெயர் பேட்ஜை சீருடையில் அணிந்திருக்கவில்லை" என்று தெரிவித்துள்ளார்.

முகமது ஜுபைர் மீது இந்திய தண்டனைச் சட்டம் 153A (மதம், இனம், பிறந்த இடம், வசிப்பிடம், மொழி ஆகியவற்றின் அடிப்படையில் வெவ்வேறு குழுக்களிடையே பகைமையை ஊக்குவித்தல்) மற்றும் 295A (எந்தவொரு வகுப்பினரின் மத உணர்வுகளையும் சீற்றம் செய்யும் நோக்கில் வேண்டுமென்றே மற்றும் தீங்கிழைக்கும் செயலில் ஈடுபடுதல் மற்றும் மதம் அல்லது மத நம்பிக்கைகளை அவமதித்தல்) உள்ளிட்ட பிரிவுகளின் கீழ் வழக்குப் பதிவு செய்யப்பட்டுள்ளது. ஆனால், அந்த வழக்கில் புகார்தாரர் யார், அதன் விவரம் என்ன என்பதை போலீஸார் தெரிவிக்கவில்லை.

முகமது ஜுபைரின் கைதிற்கு பல்வேறு அரசியல் கட்சி தலைவர்களும் கண்டனம் தெரிவித்துவருகின்றனர். காங்கிரசார் பலரும், உண்மைக்கு புறம்பான செய்திகளைப் பரப்பும் பாஜக நிர்வாகிகளுக்கு மத்திய அரசு பாதுகாப்பும், உண்மையின் குரலாய் அவதூறுகளை வெளிச்சத்திற்குக் கொண்டுவருபவர்கள் மீது வழக்குகளும் பதிந்துவருவதாக சாடியுள்ளனர்.

இந்நிலையில், ஜுபைர் அகமதின் கைது நடவடிக்கை குறித்து தனது ட்விட்டர் பக்கத்தில் பதிவிட்டுள்ள காங்கிரஸ் எம்.பி. ராகுல்காந்தி, "பாஜகவின் வெறுப்பு, மதவெறி மற்றும் பொய்களை அம்பலப்படுத்தும் ஒவ்வொரு நபருக்கும் அவர்களால் அச்சுறுத்தல் ஏற்படுகிறது. உண்மையின் ஒரு குரலைக் கைது செய்வது இன்னும் ஆயிரம் பேரை தட்டி எழுப்பும். உண்மை எப்போதும் கொடுங்கோன்மையின் மீது வெற்றி பெறும்" என்று தனது எதிர்ப்பைத் தெரிவித்துள்ளார்.

மேலும் இதுகுறித்து மஜ்லிஸ் கட்சியின் தலைவர் அசாதுதீன் ஒவைசி தனது ட்விட்டர் பக்கத்தில், "முகமது ஜுபைர் கைது செய்யப்பட்டிருப்பது வன்மையாக கண்டிக்கத்தக்கது. அவர் எந்த அறிவிப்பும் இல்லாமல் & சில அறியப்படாத FIR-இல் கைது செய்யப்பட்டுள்ளார். டெல்லி காவல்துறை முஸ்லீம்களுக்கு எதிரான இனப்படுகொலை முழக்கங்களைப் பற்றி எதுவும் செய்யவில்லை. ஆனால் வெறுப்பூட்டும் பேச்சு மற்றும் தவறான தகவல்களை எதிர்க்கும் "குற்றத்திற்கு" எதிராக விரைவாக செயல்படுகிறது" என்று தெரிவித்துள்ளார்.

பதிவு: June 28, 2022
தமிழக அரசின் உயர்கல்விக்கான ரூ.1000 உதவித்தொகை பெறும் திட்டத்திற்கு யாரெல்லாம் விண்ணப்பிக்க முடியும், முடியாது! விபரங்கள் இதோ!

அரசுப்பள்ளிகளில் பயின்ற மாணவிகளுக்கு உயர்கல்வி பயில்வதற்காக அரசுத்தரப்பிலிருந்து மாதந்தோறும் ரூ.1000 உதவித்தொகை வழங்கப்படும் என்று அறிவிக்கப்பட்ட நிலையில், அதற்கு யாரெல்லாம் தகுதி பெற்றவர்கள் என்ற விபரங்களை தமிழக அரசு வெளியிட்டுள்ளது. 

அதுகுறித்த விவரங்கள் பின்வருமாறு:

1. மாணவிகள் 6-ஆம் வகுப்பு முதல் 12-ஆம் வகுப்பு வரை தமிழ்நாட்டில் உள்ள அரசுப் பள்ளிகளில் படித்து தமிழ்நாட்டில் உயர்கல்வி பயில்பவராக இருத்தல் வேண்டும்.

2. தனியார்ப் பள்ளியில் Right to Education (RTE)யின் கீழ் 6-ஆம் வகுப்பு முதல் 8-ஆம் வகுப்பு வரை பயின்ற பின் 9-ஆம் வகுப்பு முதல் 12-ஆம் வகுப்பு வரை அரசுப் பள்ளியில் படித்த மாணவியர் இத்திட்டத்தின் கீழ் பயனடையலாம்.

3. அரசுப் பள்ளிகள் என்பது பஞ்சாயத்து யூனியன் தொடக்க மற்றும் நடுநிலைப் பள்ளிகள், ஆதிதிராவிடர் நலப் பள்ளிகள், நகராட்சிப் பள்ளிகள், மாநகராட்சி பள்ளிகள், பழங்குடியினர் நலப் பள்ளிகள், கள்ளர் சீர்மரபினப் பள்ளிகள், பிற்படுத்தப்பட்டோர்/ மிகவும் பிற்படுத்தப்பட்டோர் நல பள்ளிகள், மாற்றுத்திறனாளிகள் நலத்துறை பள்ளிகள், வனத்துறை பள்ளிகள், சமூகப் பாதுகாப்புத் துறை பள்ளிகள் போன்றவற்றில் பயிலும் மாணவிகளும் இத்திட்டத்தின் கீழ் பயனடையலாம்.

4. மாணவிகள் 8 (அ) 10 (அ) 12 வகுப்புகளில் படித்து பின்னர் முதன் முறையாக உயர்கல்வி நிறுவனங்களில் (Higher Education Institutions) சேரும் படிப்புக்கு மட்டுமே இத்திட்டம் பொருந்தும். [சான்றிதழ் (Certificate course), பட்டயம் (Diploma / ITI, D.TEd., courses), இளங்கலைப் பட்டம் (Bachelor's Degree) (B.A., B.Sc., B.Com., BBA., BCA. and all Arts & Science, Fine Arts Courses), தொழில்சார்ந்த படிப்பு (B.E., B.Tech, M.B.B.S., B.D.S., B.Sc.(Agri). B.V.Sc., B.Fsc., B.L, etc.) மற்றும் பாரா மெடிக்கல் படிப்பு (Nursing. Pharmacy, Medical Lab Technology, Physiotherapy etc.. CUITO D000.). தொலைதூரக் கல்வி மற்றும் திறந்தவெளி பல்கலைக்கழகத்தில் பயிலும் மாணவிகளுக்கு இத்திட்டம் பொருந்தாது.

5. 2022-2023ஆம் கல்வியாண்டில், மாணவியர்கள் புதிதாக மேற்படிப்பில் முதலாம் ஆண்டு சேர்ந்த பின்னர், இணையதளம் வழியாக இத்திட்டத்திற்கு விண்ணப்பிக்கலாம். மேலும், இதர முதலாம் ஆண்டிலிருந்து இரண்டாம் ஆண்டு செல்லும் மாணவியரும், இரண்டாம் ஆண்டிலிருந்து மூன்றாம் ஆண்டு செல்லும் இளங்கலை பட்டப்படிப்பு பயிலும் மாணவியர்களும்,தொழிற்கல்வியைப் பொருத்தமட்டில் மூன்றாம் ஆண்டிலிருந்து நான்காம் ஆண்டிற்கு செல்லும் மாணவிகளுக்கும், மருத்துவக் கல்வியைப் பொருத்தமட்டில் நான்காம் ஆண்டிலிருந்து ஐந்தாம் ஆண்டு செல்லும் மாணவியர்களும் இத்திட்டத்தின் கீழ் பயனடையலாம்.

6. 2021-2022 ஆம் ஆண்டில், இறுதியாண்டு பயிலும் மாணவிகள் இத்திட்டத்தின் கீழ் பயனடைய இயலாது. ஏனெனில் ஒரு சில மாதங்களில் இம்மாணவியர்கள் தங்களது இளநிலைப் படிப்பினை (under graduation) நிறைவு செய்துவிடுவார்கள்.

7. இத்திட்டத்தின் கீழ் இளநிலை படிப்பு பயிலும் மாணவிகள் மட்டுமே பயனடைய இயலும், முதுநிலை படிப்பு பயிலும் மாணவியர்கள் இத்திட்டத்தின் கீழ் பயன்பெற இயலாது. இத்திட்டத்தில் பயன்பெறுவது குறித்து தங்களுக்கு தேவையான தெளிவுரைகள்/கூடுதல் விவரங்களை கட்டணமில்லா தொலைப்பேசி எண் 14417 என்ற எண்ணிற்கு தொடர்பு கொண்டு விவரங்களை பெறலாம் என தெரிவிக்கப்படுகிறது.

8. இளநிலை கல்வி பெறும் அனைத்து மாணவியரும் (இளநிலை முதலாம் ஆண்டு சேரும் மாணவியர்களும், இளங்கலை/தொழிற்கல்வி/மருத்துவக் கல்வியில் 2-ஆம் ஆண்டு முதல் 5-ஆம் ஆண்டு வரை பயிலும் மாணவிகளும்) இத்திட்டத்திற்காகப் புதியதாக உருவாக்கப்பட்டுள்ள இணையதளம் https://penkalvi.tn.gov.in வழியாக தங்கள் விண்ணப்பங்களைப் பதிவேற்றம் செய்யக் கேட்டுக் கொள்ளப்படுகிறார்கள்.

 

பதிவு: June 27, 2022
'அஸ்ஸாம் மக்களின் துயரைக் கண்டுகொள்ளாமல் எம்.எல்.ஏ.,க்களை கடத்திவந்து கும்மாளம் போடுகிறீர்களா?; இதுதான் பாஜகவின் உண்மை முகம்' - கே.பாலகிருஷ்ணன் ஆவேசம்!

மழை வெள்ளத்தால் பாதிக்கப்பட்டுள்ள அஸ்ஸாம் மக்களின் துயரத்தை நினைத்து கவலைப்படாமல், பாஜக மாநில அரசு, மகாராஷ்டிராவில் பாஜக ஆட்சி அமைய சகுனி ஆட்டம் ஆடிவருவதாக கம்யூனிஸ்ட் கட்சியின் மாநில செயலாளர் கே.பாலகிருஷ்ணன் குற்றம்சாட்டியுள்ளார்.

இதுகுறித்து ட்விட்டரில் அவர் பதிவிட்டுள்ள செய்திக்குறிப்பில், 

"அசாமில் பெரும் வெள்ளப்பெருக்கு ஏற்பட்டுள்ளது. இதில் லட்சக்கணக்கான மக்கள் பாதிக்கப்பட்டுள்ளார்கள். குறைந்தது 200 உயிர்கள் இதுவரை பலியாகியிருக்கின்றன. உண்மை பலி விபரம் இன்னும் அதிகமாக இருக்கும்.

வீடுகளை, இருப்பிடத்தை இழந்து சாலைகளில் கண்ணீரோடு தவிக்கும் மக்களின் துயரை வார்த்தைகளால் அடக்க முடியாது. இந்த நிலைமை பற்றியெல்லாம் ஒன்றிய அரசுக்கு கொஞ்சமும் கவலை கிடையாது. அசாம் பாஜக முதல்வருக்கும் எந்த பதட்டமும் இல்லை. மாறாக அவர் ரேடிசன் புளூ விடுதியை கண்காணித்துக்கொண்டுள்ளார்.

அங்கேதான், மராட்டிய எம்.எல்.ஏக்கள் கடத்தி வரப்பட்டு, ஐந்து நட்சத்திர விடுதியில் கும்மாளத்துடன் தங்க வைக்கப்பட்டுள்ளனர். கூட்டணி அரசை கவிழ்த்து, மராட்டியத்தில் தான் ஆட்சியமைக்க வேண்டும் என்று பாஜக இந்த சகுனி ஆட்டத்தை நடத்தி வருகிறது.
 
மக்களை கண்ணீரில் தத்தளிக்க விட்டு, அதிகார மமதையில் ஆட்டம் போடுகிறார்கள். இதுதான் பாஜகவின் உண்மை முகம்" இவ்வாறு பதிவிட்டுள்ளார்.
 
பதிவு: June 25, 2022
'முகாமில் அடைக்கப்பட்டுள்ள ஈழச்சொந்தங்களை உடனடியாக அரசு விடுவிக்க வேண்டும்; தவறினால் மாநிலம் தழுவிய போராட்டத்தை முன்னெடுப்போம்' - சீமான்!

திருச்சி முகாமில் அடைக்கப்பட்டுள்ள ஈழத்தமிழர்களை உடனடியாக விடுவிக்க வேண்டும் என்றும் தவறினால் மாநிலம் தழுவிய மக்கள்திரள் போராட்டத்தை முன்னெடுப்பதாகவும் நாம் தமிழர் கட்சி ஒருங்கிணைப்பாளர் சீமான் தமிழக அரசிடம் வலியுறுத்தியுள்ளார்.

இதுகுறித்து அவர் வெளியிட்டுள்ள செய்தியறிக்கையில்,

"திருச்சி, சிறப்பு முகாமில் அடைக்கப்பட்டுள்ள ஈழச்சொந்தங்களில் 30 பேர் மாத்திரை உட்கொண்டும், ஒருவர் தீக்குளித்தும் தற்கொலைக்கு முயன்றதுமான செய்திகள் பேரதிர்ச்சி தருகின்றன. ‘விதியே! விதியே! என் செய நினைத்திட்டாய் என் தமிழ்ச்சாதியை?’ எனும் பெரும்பாவலன் பாரதியின் கூற்றுக்கிணங்க, தாய்த்தமிழகத்திலேயே ஈழச்சொந்தங்களுக்கு நிகழ்ந்தேறும் இக்கொடுமைகள் கண்டு மனம்வெதும்புகிறேன்.

தங்களை ஏதிலிகளென இந்தியச்சட்டத்தின்படி பதிவுசெய்துள்ள ஈழச்சொந்தங்களையும் சட்டவிரோதமாகக் குடியேறியவர்களெனக் கூறி, சிறப்பு முகாம் எனப்படும் சித்திரவதைக்கூடங்களில் அந்நிய நாட்டவர்களோடு அடைத்து வைத்துள்ள அநீதிக்கெதிராக, தங்களை விடுவிக்கக்கோரி 35 நாட்களுக்கும் மேலாகப் பட்டினிப்போராட்டம் செய்து அரசு மனமிறங்காத நிலையிலேயே, ஆற்றாமையும், விரக்தியும் தாளாது இத்தகையக் கொடிய முடிவை ஈழச்சொந்தங்கள் எடுத்துள்ளனர் என்பது ஏற்கவே முடியாதப் பெருந்துயரமாகும்.

இந்நாட்டுக்குத் துளியும் தொடர்பற்ற திபெத்தியர்கள் ஏதிலிகளாக அரசால் அங்கீகரிக்கப்பட்டு, அடிப்படை வசதிகளும், பொருளாதார வாய்ப்புகளும் அவர்களுக்கு வழங்கப்பெற்று, பெரும் மதிப்போடு நடத்தப்படும் வேளையில், இந்நாட்டில் வாழும் எட்டுக்கோடி தமிழ்ச்சொந்தங்களின் தொப்புள்கொடி உறவான ஈழச்சொந்தங்கள் குற்றவாளிகளாகச் சித்தரிக்கப்படுவதும், அடிப்படை மானுட உரிமைகளும், அத்தியாவசிய இருப்பு நடவடிக்கைகளும்கூட அளிக்கப்படாது மறுக்கப்படுவதும் தமிழினத்திற்கு இந்நாட்டு அரசுகள் செய்யும் பெருந்துரோகமாகும். தமிழர்களின் வரலாற்றுத்தாயகமான தமிழகத்திலேயே ஈழச்சொந்தங்கள் நாதியற்றவர்கள் போல நாளும் நடத்தப்படுவதும், அவர்களது உணர்வுகளுக்கும், உரிமைகளுக்கும் மதிப்பளிக்கப்படாது அவமதிக்கப்படுவதும் வெட்கித்தலைகுனிய வேண்டிய பெரும் அவமானமாகும்.

தேர்தலுக்கு முன்பு, ஈழச்சொந்தங்களுக்குக் குடியுரிமைப் பெற்றுத் தருவோம் என வாக்குறுதி அளித்த மாண்புமிகு முதல்வர் ஐயா ஸ்டாலின் அவர்கள், தற்போது ஏதிலிகளாகக்கூட அவர்களை வாழவிடாது வஞ்சிப்பது எந்தவகையில் நியாயம்? இதுதான் சமூக நீதியா? ‘ஈழத்தமிழர் எங்கள் இரத்தம்’ என மேடையில் முழக்கமிட்ட முதல்வர் ஸ்டாலின் அவர்கள், இப்போது இரத்தம் வற்றிப்போகிற அளவுக்கு அவர்கள் பட்டினிக்கிடந்து, உடல்மெலிந்து கோரிக்கை வைத்தும் செவிமடுக்காதது ஏன்? அவர்களுக்கு வாக்கில்லை என்பதால், அவர்களது வறண்ட நாக்குகள் இடுகிற முழக்கங்கள் உங்கள் செவிப்பறைக்கு எட்டவில்லையா முதல்வரே? உயிரை முன்னிறுத்தி, போராட்டம்செய்தும் உங்கள் இதயக்கதவுகள் திறக்காதென்றால், நடப்பது தமிழர்களுக்கான ஆட்சியா? இல்லை! சிங்களர்களுக்கான ஆட்சியா? இதுதான் நீங்கள் விடியல் தரும் இலட்சணமா? வெட்கக்கேடு! பேரவலம்!

ஆகவே, இந்தியச்சட்டநெறிமுறைகளின்படி, தங்களை ஏதிலிகளாகப் பதிவுசெய்தும் சட்டவிரோதக் குடியேறியவர்களெனக்கூறி, திருச்சி, சிறப்பு முகாமில் அடைக்கப்பட்டுள்ள ஈழச்சொந்தங்களை உடனடியாக விடுவிக்க வேண்டுமென தமிழக அரசை வலியுறுத்துகிறேன். அதனைச் செய்யத் தவறும்பட்சத்தில், மாநிலம் தழுவிய மக்கள்திரள் போராட்டத்தை முன்னெடுப்போமெனப் பேரறிவிப்பு செய்கிறேன்" இவ்வாறு குறிப்பிடப்பட்டுள்ளது.

பதிவு: June 25, 2022
'மெட்ரிக் பள்ளிகளில் இடஒதுக்கீடு அளிக்காத பள்ளிகள் மீது கடுமையான நடவடிக்கை எடுக்கவேண்டும்' - அன்புமணி ராமதாஸ் வலியுறுத்தல்!

தமிழகத்திலுள்ள பெரும்பாலான மெட்ரிக் பள்ளிகளில் 69% இடஒதுக்கீடு கடைபிடிக்கப்படுவதில்லை என்றும், அப்பள்ளிகள் மீது அரசு நடவடிக்கை எடுக்கவேண்டும் என்றும் பாமக தலைவர் அன்புமணி ராமதாஸ் வலியுறுத்தியுள்ளார்.

இதுகுறித்து அவரது ட்விட்டர் பக்கத்தில் அவர் பதிவிட்டுள்ள அறிக்கையில்,

"தமிழ்நாட்டில் உள்ள அனைத்து மெட்ரிக் பள்ளிகளிலும் 69% இட ஒதுக்கீட்டை கண்டிப்பாக செயல்படுத்த வேண்டும் என்று பள்ளிக்கல்வித்துறை ஆணையிட்டிருக்கிறது. மாணவர் சேக்கையில் சமூகநீதியை நிலைநாட்ட பள்ளிக்கல்வித்துறை காட்டும் அக்கறை பாராட்டத்தக்கது!

தமிழ்நாட்டில் மெட்ரிக் பள்ளிகள் தொடங்கப்பட்ட நாளில் இருந்தே அவை தமிழக அரசின் இட ஒதுக்கீட்டை கடைபிடிப்பது கட்டாயம் ஆகும். ஆனால், பெரும்பான்மையான தனியார் பள்ளிகள் 69% இட ஒதுக்கீட்டை கடைபிடிப்பதில்லை என்பது தான் வேதனையான உண்மை!

ஊரகப்பகுதிகளில் உள்ள சாதாரண மெட்ரிக் பள்ளிகள் 69% இட ஒதுக்கீட்டை பின்பற்றுகின்றன. அதிகக் கட்டணம் வசூலிக்கும் நகர்ப்புறங்களில் உள்ள புகழ் பெற்ற பள்ளிகள் தான் தமிழக அரசின் இட ஒதுக்கீட்டு விதிகளை மதிப்பதில்லை. அவை மீது கடுமையான நடவடிக்கை எடுக்கப்பட வேண்டும்!

அனைத்து மெட்ரிக் பள்ளிகளிலும் 69% இட ஒதுக்கீடு கடைபிடிக்கப்படுவதை அரசு உறுதி செய்ய வேண்டும்; ஒவ்வொரு ஆண்டும் மாணவர் சேர்க்கை முடிவடைந்த பிறகு பள்ளி வாரியாக இட ஒதுக்கீடு நடைமுறைப்படுத்தப்பட்டது குறித்த விவரங்கள் அடங்கிய வெள்ளை அறிக்கையை அரசு வெளியிட வேண்டும்" இவ்வாறு பதிவிட்டுள்ளார்.

பதிவு: June 24, 2022
ஒபிஎஸ் மீது தண்ணீர் பாட்டில் வீச்சு; வாகனத்தின் டயர் பஞ்சர் செய்யப்பட்டு அட்டூழியம்! கூட்டத்தில் பெரிதும் அவமதிக்கப்பட்ட ஒபிஎஸ்... அடுத்த நகர்வு என்ன?

பரபரப்பான சூழலில் அதிமுக பொதுக்குழுக்கூட்டம் இன்று நடைபெற்ற நிலையில், கட்சியின் ஒருங்கிணைப்பாளர் ஒபிஎஸ் தொண்டர்களால் அவமதிக்கப்பட்டு, அவர் மீது தண்ணீர் பாட்டில் வீசப்ப்ட்டுள்ள நிகழ்வு அதிர்ச்சியை ஏற்படுத்தியுள்ளது.

அதிமுகவில் ஜெயலலிதாவின் மறைவுக்குப்பின் எடப்பாடி பழனிசாமி முதலமைச்சராக பதவியேற்றாலும், கட்சியின் முக்கிய முடிவுகள் அனைத்தும் ஒபிஎஸ் - இபிஎஸ் ஆகிய இரு தலைவர்களின் மேற்பார்வையிலேயே நடைபெற்றுவந்தது. 2021 சட்டமன்றத் தேர்தலில் திமுக ஆட்சியைப் பிடித்தபின் யார் எதிர்க்கட்சித் தலைவர் என்ற பூசல் எழுந்து, பின் எடப்பாடியார் அப்பொறுப்பை ஏற்றார். மேலும் பன்னீர்செல்வம் கட்சி ஒருங்கிணைப்பாளர் பதவியில் நீடித்தார்.

இந்நிலையில், அதிமுக சிறந்த எதிர்க்கட்சியாகத் திகழ ஒற்றைத் தலைமைதான் சரியான முடிவு என்ற பேச்சு அதிமுக நிர்வாகிகளிடையே ஆரம்பமான நிலையில், கடந்த 9 நாட்களாக தொடர் அமளிகளில் அதிமுக நிர்வாகிகள் ஈடுபட்டுவருகின்றனர். ஒபிஎஸ் கட்சியின் பொதுச்செயலாளராக பதவியேற்கவேண்டும் என்று அவரது ஆதரவாளர்களும், இபிஎஸ் தான் பொதுச்செயலாளராக பதவியேற்கவேண்டும் என்று அவரது ஆதரவாளர்களும் குரலெழுப்பிவரும் நிலையில், ஒபிஎஸ் கூறிய சில தீர்மானங்களின் பேரில் அதிமுக பொதுக்குழுக்கூட்டம் இன்று நடைபெற்றது.

ஸ்ரீவாரு திருமண மண்டபத்தில் நடைபெற்ற கூட்டத்திற்கு ஒபிஎஸ் முதலிலேயே வந்துவிட்டார். ஆயினும் கூட்டத்திற்குள் நுழைந்த அவரை இபிஎஸ் ஆதரவாளர்கள் வெளியேறச்சொல்லியும், 'துரோகி' என்று முழக்கமிட்டும் முன்னேறவிடாமல் தடுத்தனர். பின் இபிஎஸ் மண்டபத்திற்குள் நுழையும்போது பலத்த கரகோஷத்துடன் தொண்டர்களால் அவருக்கு வரவேற்பு அளிக்கப்பட்டது. 

பின் மேடையில் இருவரும் அமர்ந்தபின் ஒவ்வொருவராக கட்சி நிர்வாகிகளின் நிலைப்பாடு குறித்தும், ஒற்றைத்தலைமை அதிமுகவிற்கு அவசியம் என்றும் பேசினர். அதிமுகவின் அவைத்தலைவராக தமிழ்மகன் உசேன் ஒருமனதாக தேர்ந்தெடுக்கப்பட்டார். தொடர்ந்து மேடையில் பேசிய நிர்வாகிகள் பலரும் இபிஎஸ் பெயரைக் குறிப்பிட்டு அவரை வரவேற்றனர். ஆனால் யாரும் ஒபிஎஸ்-ஐ வரவேற்கவும் இல்லை, அவரிடம் முகம்கொடுத்து பேசவும் இல்லை.

தொடர்ந்து சி.வி.குமார் உள்ளிட்ட முன்னாள் அமைச்சர்கள், அனைத்து தீர்மானங்களையும் பொதுக்குழு நிராகரித்துவிட்டதாகவும், கட்சிக்கு ஒற்றைத் தலைமை வேண்டும் என்றும் பேசினர். இதனால் கூட்டத்தில் சச்சரவும், கூச்சல் குழப்பமும் நிலவியது. ஒரு கட்டத்திற்கு மேல் ஒபிஎஸ் மேடையில் அமராமல் பாதியிலேயே மேடையை விட்டு வெளியேறினார்.

இந்நிலையில், ஒபிஎஸ் மேடையிலிருந்து வெளியேறும்போது அவர் மீது தண்ணீர் பாட்டில்கள் அதிருப்தி நிர்வாகிகளால் எரியப்பட்டது பரபரப்பை ஏற்படுத்தியது. மேலும் அவர் வந்த வாகனத்தின் சக்கரங்களிலிருந்து காற்று பிடுங்கப்பட்டதும் அதிர்ச்சியைக் கிளப்பியது. பின் மாற்றுவாகன உதவியுடன் அவர் அங்கிருந்து கிளம்பினார்.

இதைத்தொடர்ந்து செய்தியாளர்களிடம் பேசிய ஒபிஎஸ் ஆதரவாளரும், அதிமுக துணை ஒருங்கிணைப்பாளருமான வைத்திலிங்கம், 'கட்சியை அழிவுப்பாதைக்கு அழைத்துச்செல்கின்றனர். சதிகாரர்கள்' என்று ஆவேசமாகப் பேசினார்.

பொதுக்குழுக்கூட்டம் பாதியிலேயே முடிந்து எந்த முடிவும் எட்டப்படாத நிலையில், அடுத்த பொதுக்குழுக்கூட்டம் ஜூலை 11 அன்று மீண்டும் நடைபெறும் என்று அறிவிக்கப்பட்டது. ஆனால் அது ஒபிஎஸ்-ன் கையெழுத்து இல்லாமல் நடைபெறாது என்று வைத்திலிங்கம் தெரிவித்தார்.

ஜூலை 11-ல் நடைபெறும் பொதுக்குழுக்கூட்டத்தில் இபிஎஸ் பொதுச்செயலாளராக தேர்ந்தெடுக்கப்படலாம் என்று கூறப்படுகிறது. ஆயினும் கூட்டம் நடைபெறுமா?, அதில் ஒபிஎஸ் கலந்துகொள்வாரா?, என்னென்ன முடிவுகள் அக்கூட்டத்தில் ஏடுக்கப்படும்? என்பது குறித்து பொறுத்திருந்துதான் பார்க்கவேண்டும். ஆயினும் ஒபிஎஸ், இபிஎஸ் தரப்பு நிர்வாகிகளால் பெரிதளவில் அவமதிக்கப்பட்டது தற்சமயம் பேசுபொருளாகி சர்ச்சையைக் கிளப்பிவருகிறது. 

பதிவு: June 23, 2022

மேலும் செய்திகள்

கொரோனா வைரஸ் அப்டேட்ஸ்