11 உயிர்களைப் பறித்துள்ள தஞ்சை தேர் விபத்து! விபத்துக்குக் காரணம் என்ன?

தஞ்சை களிமேடு பகுதியில் ஏற்பட்ட தேர் விபத்தில் 11 பேர் உயிரிழந்த நிலையில், விபத்திற்கு காரணம் என்ன என்பது குறித்த செய்திகள் வெளியாகிவருகின்றன.

தஞ்சை மாவட்டம், களிமேடு கிராமத்தில் அப்பர் மடம் உள்ளது. இங்கு ஆண்டுதோறும் சித்திரை மாதத்தில் அப்பர் சதய விழா கொண்டாடப்படுவது வழக்கம். கடந்த 93 ஆண்டுகளாக கொண்டாடப்பட்டுவரும் இத்திருவிழா, 94-ஆம் ஆண்டாக இவ்வாண்டும் கடந்த செவ்வாய் அன்று தொடங்கி கொண்டாடப்பட்டு வந்தது.

இந்நிலையில், நேற்றைய தினம் அதிகாலை தேரோட்டம் தொடங்கி நடைபெற்றுவந்த நிலையில், சுமார் 3 மணியளவில் தேர் சாலையின் வளைவில் திரும்புகையில், சாலையின் பக்கவாட்டில் சென்ற உயர்மின் அழுத்தப் பாதையில் உரசியதில் மின்சாரம் பாய்ந்து தேர் தீப்பற்றி எரியத்துவங்கியுள்ளது. மேலும் தேரில் மற்றும் தேரைச் சுற்றியிருந்த 11 பேர் உயர் அழுத்த மின்சாரம் பாய்ந்து பரிதாபமாக உயிரிழந்தனர். மேலும் 10-க்கும் மேற்பட்டோர் காயமடைந்து மருத்துவமனையில் அனுமதிக்கப்பட்டுள்ளனர்.

பலரையும் அதிர்ச்சியில் ஆழ்த்தியுள்ள இச்சம்பவத்திற்கு அரசியல் தலைவர்கள் பலரும் தங்களது கவலைகளைத் தெரிவித்து வருகின்றனர். தேர் விபத்தில் உயிரிழந்தவர்களுக்கு சட்டப்பேரவையில் இரங்கல் தெரிவிக்கப்பட்டது. மேலும் உயிரிழந்தவர்கள் குடும்பத்திற்கு தலா ரூ.5 லட்சம் தமிழக அரசு சார்பில் அறிவிக்கப்பட்டுள்ளது.

இந்நிலையில், விபத்திற்கு மின் கம்பிகளின் பாதை சாலையின் ஓரத்தில் அமைக்கப்படாததே காரணம் என குற்றம் சாட்டுகின்றனர் களிமேடு பகுதி மக்கள்.

இதுகுறித்து களிமேடு கிராம மக்கள் கூறுகையில், ‘தேர், சாலையின் வளைவில் திரும்புகையில், சாலையில் இருந்த மேடு காரணமாக நிலைதடுமாறி சற்றே சாய்ந்து, சாலையின் பக்கவாட்டில் இருந்த மின்னழுத்தப் பாதையில் உரசி விபத்து ஏற்பட்டது. அரசு அதிகாரிகள் சாலை விரிவாக்கத்தின்போது மின்பாதைகளை தள்ளி அமைக்காமல் கவனக்குறைவாக அப்படியே வழியில் விட்டுவிட்டதால் தான் தேர் அதில் உரசி இவ்விபத்து நிகழ்ந்துள்ளது. மின்சாரம் பாய்ந்ததில் அதில் இருந்தவர்கள், தேரை இயக்கியவர்கள், தேரைச் சுற்றி நின்றுகொண்டிருந்தவர்கள் என அனைவரும் சற்றுநேரத்தில் சுருண்டு விழுந்தனர். இத்தனை ஆண்டுகளில் இவ்வாறு விபத்து நிகழ்ந்ததே இல்லை. இவ்விபத்திற்கு மின்சாரத்துறையும் போக்குவரத்துத் துறையும்தான் காரணம்’ என்று வேதனை தெரிவித்தனர்.

இதனைத் தொடர்ந்து விபத்தில் உயிரிழந்த 11 பேரின் உடல் பிரேதப் பரிசோதனை முடிந்து களிமேடு கிராமத்திற்கு கொண்டுவரப்பட தயாராக உள்ளதாகவும், காயமடைந்தவர்களில் ஒருவரது உடல்நிலை கவலைக்கிடமாக உள்ளதாகவும் தகவல் தெரிவிக்கப்பட்டுள்ளது.

 

பதிவு: April 27, 2022
தஞ்சை மாணவி தற்கொலை விவகாரத்தில் தவறு செய்தவர்களுக்கு உரிய தண்டனை பெற்றுத்தரப்படும் - அமைச்சர் அன்பில் மகேஷ் உறுதி...

தஞ்சை மாணவி தற்கொலை விவகாரத்தில் தவறு செய்தவர்களுக்கு உரிய தண்டனை பெற்றுத்தரப்படும் என்று அமைச்சர் அன்பில் மகேஷ் உறுதிப்பட கூறினார்.

திருச்சியில் பள்ளிக்கல்வித்துறை அமைச்சர் மகேஷ் பொய்யாமொழி செய்தியாளர்களை சந்தித்தார். அப்போது அவர் கூறியதாவது:

தஞ்சை மாணவி தற்கொலை விவகாரத்தில் உண்மையில் என்ன நடந்தது என்பதை கண்டறியும் வகையில் விசாரணை நடைபெற்று வருகிறது.

தஞ்சை மாணவி தற்கொலைக்கு காரணமாக 68 வயதுடைய பள்ளி விடுதி வார்டன் மனஉளைச்சலை ஏற்படுத்தியதாக குற்றம் சாட்டியுள்ளனர். உடனடியாக அவர்கள் மீது நடவடிக்கை எடுக்கப்பட்டுள்ளது. பள்ளி நிர்வாகமும் விளக்கமளித்த உத்தரவிடப்பட்டுள்ளது.

கிறிஸ்தவ பள்ளியாக இருந்தாலும் அங்கு இந்துக்கள் தான் அதிகமாக படித்து வருகின்றனர். அங்கு தற்போது பயின்று வரும் மாணவர்கள், முன்னாள் மாணவர்களிடமும் கருத்துக்கள் கேட்கப்பட்டது. இந்த கருத்துக்கள் எல்லாம் போலீஸ் அதிகாரிகளிடம் கொடுக்கப்பட்டுள்ளது.

தவறு செய்தவர்கள் யாராக இருந்தாலும் கண்டிப்பாக உரிய தண்டனை பெற்று தரப்படும்.

இதற்கு முன்பாக நடந்த விபத்துகள் வேறு விதமாக இருந்தாலும் இவ்வாறு மாணவி தற்கொலை செய்து கொண்டுள்ளது குறித்து பள்ளிக்கல்வித்துறை மூலமாக விசாரிக்கப்பட்டுள்ளது. வழக்கு நிலுவையில் உள்ளதால் அந்த கருத்துக்கள் போலீஸ் தரப்பிடம் கொடுக்கப்பட்டுள்ளது.

இழந்த உயிரை மீண்டும் கொண்டுவர முடியாது என்றாலும், இதுபோன்று மீண்டும் எங்கும் நடக்க கூடாது என்பதில் அரசு உறுதியாக உள்ளது. தனியார் அமைப்புகள் பாதிக்கப்பட்ட குழந்தையிடம் சென்று இதனால் நடந்திருக்கோ அல்லது அதனால் நடந்திருக்குமோ என்று வினவி குழப்பத்தை ஏற்படுத்தியுள்ளனர்.

அந்த இடத்திலும் பாதிக்கப்பட்ட குழந்தை உறுதியாக ஆமா.. இதனால் தான் என்று சொல்லாமல் இருந்திருக்கலாம், போயிருக்கலாம் என்று சொல்லியுள்ளனர். இதில் சோகமான விசயமாக பார்க்கப்படுவது, பெற்றோர்களால் பள்ளி கட்டணம் செலுத்த முடியாத சூழ்நிலையிலும் தற்போது நடவடிக்கை எடுக்கப்பட்டுள்ள பள்ளி விடுதி வார்டன் தான் பள்ளி கட்டணம் செலுத்தி படிக்க வைத்துள்ளார். இருப்பினும் மனஉளைச்சல் ஏற்பட காரணமாக அவர்களே இருந்துள்ளதால் அவர்கள் மீது இந்த நடவடிக்கை எடுக்கப்பட்டுள்ளது.

அதேபோல் தனியார் அமைப்புகள் இதனை அரசியல் ஆக்காதீர்கள் என்று அமைச்சர் வலியுறுத்தியுள்ளார். இந்த விவகாரம் தீர விசாரிக்கப்பட்டு உரிய நடவடிக்கை கண்டிப்பாக எடுக்கப்படும்.

இவ்வாறு அமைச்சர் கூறியனார்.

பதிவு: January 24, 2022
டெல்டா மாவட்டங்களில் ஆய்வை தொடங்கினார் முதல்வர் ஸ்டாலின்!

வடகிழக்கு பருவமழை சென்னை, திருவள்ளூர், காஞ்சிபுரம், செங்கல்பட்டு மற்றும் கடலூர், விழுப்புரம், டெல்டா மாவடங்களில் பெரும் பாதிப்பை ஏற்படுத்தி உள்ளது. கனமழையால் பாதிக்கப்பட்ட சென்னையில் முதல்வர் மு.க.ஸ்டாலின் பல்வேறு பகுதிகளில் தொடர்ந்து ஆய்வு மேற்கொண்டார். நேற்றும் 6-வது நாளாக காஞ்சிபுரம், செங்கல்பட்டு மாவட்டங்களில் வெள்ளம் பாதித்த பகுதிகளை பார்வையிட்டார்.

பாதிக்கப்பட்ட மக்களுக்கு உணவு மற்றும் நிவாரணப் பொருட்களை வழங்கினார். தண்ணீர் தேங்கி உள்ள பகுதிகளை பார்வையிட்ட முதல்வர், அவற்றை உடனடியாக அப்புறப்படுத்தவும் உத்தரவிட்டார்.

இந்த நிலையில் கனமழையால் பாதிக்கப்பட்ட டெல்டா மாவட்டங்களில் முதல்வர் மு.க.ஸ்டாலின் இன்று ஆய்வு செய்ய உள்ளார். இதற்காக நேற்று இரவே புதுச்சேரி சென்றார். இரவு அங்கு தங்கி இருந்த முதல்வர் மு.க.ஸ்டாலின், இன்று காலை புதுச்சேரியில் இருந்து புறப்பட்டு டெல்டா மாவட்டங்களான கடலூர், மயிலாடுதுறை, நாகப்பட்டினம், திருவாரூர், தஞ்சாவூர் மாவட்டங்களில் கனமழையினால் பாதிக்கப்பட்ட பயிர் சேதங்களை பார்வையிடுகிறார்.

காலை 7.30 மணி முதல் கடலூர் மாவட்டம் அரங்கமங்கலம், அடூர் அகரம் பகுதியில் ஆய்வு செய்த முதல்வர் மு.க.ஸ்டாலின், காலை 9.30 மணி முதல் மயிலாடுதுறை மாவட்டம் இருக்கூர், தரங்கம்பாடி பகுதிகளில் பார்வையிட்டார். அப்போது, பாதிக்கப்பட்ட மக்களுக்கு நிவாரணப் பொருட்களை வழங்கினார். அதன்பிறகு, காலை 11.30 மணி முதல் நாகப்பட்டினம் மாவட்டம் கருங்கனி, அருந்தவபுலம் பகுதிகளிலும், திருவாரூர் மாவட்டம் ராயநல்லூர், புழுதிக்குடி பகுதிகளிலும், மாலை 3.30 மணி முதல் தஞ்சாவூர் மாவட்டம் பெரியக்கோட்டை பகுதியிலும் முதல்வர் ஆய்வு மேற்கொள்கிறார்.

இந்த ஆய்வின்போது பாதிக்கப்பட்ட மக்களின் குறைகளை நேரில் கேட்டறியும் முதல்வர் ஸ்டாலின், அவர்களுக்கு தேவையான உதவிகளை செய்ய அதிகாரிகளுக்கும் உத்தவிட உள்ளார். மேலும், டெல்டா மாவட்டங்களில் ஏற்பட்டுள்ள மழைபாதிப்பு குறித்து ஆய்வு செய்ய அமைச்சர் ஐ.பெரியசாமி தலைமையில் அமைக்கப்பட்டுள்ள குழுவும் இன்று முதல்வரை சந்தித்து பாதிப்புகள் குறித்து விளக்குவார்கள் என்றும் கூறப்படுகிறது.

பதிவு: November 13, 2021

முக்கிய செய்திகள்

'திமுகவால் தமிழகத்தில் வளர்ச்சியில்லை; தமிழகத்திற்கு தாமரை ஆட்சி தேவை' - காரைக்குடியில் ஜே.பி.நட்டா பேச்சு!

திமுக குடும்பக் கட்சியாகச் செயல்படுகிறது என்றும், திமுகவின் குறிக்கோள் வெறும் நாற்காலி மட்டும் தான் என்றும் பாஜக தேசிய தலைவர் ஜே.பி.நட்டா காரைக்குடியில் நடைபெற்ற கூட்டத்தில் கடுமையாக சாடி பேசியுள்ளார்.

பாஜகவின் 'ஆபரேஷன் சவுத் இன்டியா' திட்டத்தின் அடிப்படையில் தென்மாநிலங்களில் பாஜக அதன் கட்சிப் பரப்புரைகளை மேற்கொண்டுவருகிறது. வடமாநிலங்களைப் போல் தென்மாநிலங்களில் பாஜகவின் வாக்குகளை அதிகரிக்கச்செய்ய, வரும் 2024 நாடாளுமன்றத் தேர்தலை முன்னிட்டு இந்த வியூகத்தை வகுத்துள்ளது பாஜக. 

இந்நிலையில், சிவகங்கை மாவட்டம் காரைக்குடியில் நடைபெற்ற பாஜக செயற்குழு கூட்டத்தில் கலந்துகொள்ள பாஜக தேசிய தலைவர் ஜே.பி.நட்டா தமிழகம் வருகை தந்தார். அவரை பாஜக மூத்த தலைவர் ஹெச்.ராஜா உள்ளிட்ட பாஜகவினர் வரவேற்றனர். கூட்டத்தில் கலந்துகொண்டு பேசிய அவர், திமுக, திரிணாமூல் உள்ளிட்ட கட்சிகளை கடுமையாக சாடிப் பேசினார். மேலும் தமிழகத்தில் விரைவில் தாமரை மலரும் என்று பேசியிருந்தார். 

கூட்டத்தில் கலந்துகொண்டு பேசிய அவர், "இந்த பொதுக்கூட்டத்தை பார்க்கையில் ஒரு தெளிவான உண்மை எனக்கு தெரிகிறது. பாரதிய ஜனதா கட்சிக்கு தமிழ்நாட்டில் எதிர்காலம் இருக்கிறது. தமிழ்நாட்டில் தாமரை மலரப்போகிறது.

பாஜக மட்டுமே அனைத்திந்திய கட்சி. பாஜக மட்டுமே கொள்கை உடைய கட்சி. மற்ற கட்சிகள் சுருங்கிவிட்டன. கொள்கை இல்லாத கட்சிகளுடம் சண்டையிடவில்லை. பிராந்திய கட்சிகள் தற்போது வாரிசு கட்சிகளாக சுருங்கிவிட்டன. பிடிபி, என்சிபி, அகாலி தளம், சமாஜ்வாடி, திரிணாமூல், முக்தி மோர்சா, ஒடிசா, ஒய்.எஸ்.ஆர்., டி.ஆர்.எஸ்., திமுக ஆகியவை குடும்ப கட்சிகளாக செயல்படுகின்றன.

திமுகவில் முன்பு கருணாநிதி இருந்தார். இப்போது ஸ்டாலின் வந்துள்ளார். அடுத்து அவரது மகன் வருவார். இது என்ன மாதிரியான ஜனநாயகம்? ஸ்டாலினால் வளர்ச்சியை பற்றி பேச முடியுமா? DMK வில் D என்றால் Dynasty (வாரிசு), M என்றால் Money (பணம்), K என்றால் கட்ட பஞ்சாயத்து. இதுதான் திமுக.

திமுகவால் பிராந்தியத்தை பற்றி பேச முடியுமா? நாங்கள்தான் தமிழ் மொழி பற்றி பேசுகிறோம். அதை பாதுகாக்கிறோம். திமுகவின் பங்களிப்பு என்ன? திமுக வெறுப்பு அரசியலில் நம்பிக்கை வைத்து உள்ளது. திமுகவுக்கு பிளவுபடுத்துகிறது. திமுகவுக்கு எந்த குறிக்கோளும் இல்லை. கொள்கை ரீதியாக திமுக பெரிய பூஜ்ஜியம். உங்களின் கொள்கை எப்போதுm நாற்காலியை பற்றிதான்" இவ்வாறு பேசினார்.

பதிவு: September 23, 2022
மீண்டும் தொடங்கியது 'இந்தியன் 2' பட படப்பிடிப்பு வேலைகள்; கமல் தந்த அசத்தல் அப்டேட்! ரசிகர்கள் உற்சாகம்!

'இந்தியன் 2' படப்பிடிப்பு மீண்டும் தொடங்கப்பட்டுள்ளதாக நடிகர் கமல்ஹாசன் தெரிவித்துள்ளார்.

ஷங்கர் இயக்கத்தில், கமல்ஹாசன், மனிஷா கொய்ராலா, ஊர்மிளா, சுகன்யா, கவுண்டமணி, செந்தில் ஆகியோர் நடித்து 1996-ல் வெளியான திரைப்படம் 'இந்தியன்'. ஊழலால் திளைக்கும் அரசு அதிகாரிகளும், அவர்களைக் களையெடுக்கும் 'இந்தியன் தாத்தா' முதியவருமான கதையம்சத்தில் உருவாக்கப்பட்ட இத்திரைப்படம், மாபெரும் வெற்றிப்படமாக அமைந்தது. மேலும் இயக்குநர் ஷங்கர் மற்றும் கமல்ஹாசன் திரைப்பயணத்தின் முக்கியப்படமாகவும் அமைந்தது.

இந்நிலையில், கிட்டத்தட்ட 24 வருடங்களுக்குப்பிறகு இத்திரைப்படத்தின் இரண்டாம் பாகம் குறித்த அறிவிப்பு வெளியாகி படப்பிடிப்பு தொடங்கியது. ஷங்கர் இயக்க, லைகா தயாரிக்கவிருந்த 'இந்தியன் 2' படத்தில் கமல்ஹாசன், காஜல் அகர்வால், விவேக் உள்ளிட்ட நடிகர்கள் ஒப்பந்தம் செய்யப்பட்டனர்.

இந்நிலையில் தான் படப்பிடிப்பின்போது நிகழ்ந்த விபத்து காரணமாக படப்பிடிப்பு தள்ளிப்போனது. மேலும் கமல்ஹாசன் பிக்பாஸ் நிகழ்ச்சியைத் தொகுத்து வழங்கும் வேலைகளில் ஈடுபட்டிருந்ததால் தொடர்ந்து படப்பிடிப்பு தாமதமாகிவந்தது. தொடர் தாமதம் காரணமாக ஒருபக்கம் தெலுங்கில் ராம் சரண், கியாரா அத்வானி ஆகியோரை வைத்து 'RC15' பட இயக்க வேலைகளில் இறங்கிவிட்டிருந்தார் ஷங்கர்.

இதனால் 'இந்தியன் 2' படம் கைவிடப்பட்டதாக தகவல்கள் வெளியாகின. ஆனால், படப்பிடிப்பு விரைவில் துவங்கும் என்று படக்குழுவிலிருந்து தகவல்கள் அவ்வப்போது அறிவிக்கப்பட்டு வந்தன. இந்த நிலையில், ரசிகர்கள் மகிழ்ச்சியுறும் வகையில், 'இந்தியன் 2' படப்பிடிப்பு இன்று முதல் துவங்குவதாக கமல்ஹாசன் தனது ட்விட்டர் பக்கத்தில் தெரிவித்துள்ளார். இதனால் படம் குறித்த அடுத்தடுத்த அப்டேட்டுகள் விரைவில் வெளியாகலாம் என்று எதிர்பார்க்கப்படுகிறது. 

 

பதிவு: September 22, 2022
ஹெச்.வினோத் இயக்கத்தில் அஜித் நடிக்கும் படத்திற்கு 'துணிவு' எனப் பெயர் வைத்தது படக்குழு! ரசிகர்களின் கருத்து என்ன?

ஹெச்.வினோத் இயக்கத்தில் அஜித்குமார் நடிக்கும் புதிய திரைப்படத்திற்கு 'துணிவு' என்று பெயரிடப்பட்டுள்ளது.

நடிகர் அஜித்குமார் நடிப்பில், ஹெச்.வினோத் இயக்கத்தில், போனி கபூர் தயாரிப்பில் அண்மையில் வெளியான திரைப்படம் வலிமை. நீண்ட நாள் தயாரிப்பாக, பெரும் எதிர்பார்ப்புடன் வெளியான இத்திரைப்படம் ரசிகர்கள் மத்தியில் கலவையான விமர்சனங்களைப் பெற்றது.

இந்நிலையில், அதே கூட்டணியுடன் அஜித்குமார் அடுத்த படத்திலும் நடிக்கவிருக்கிறார் என்ற தகவல் இணையத்தில் வலம்வந்துகொண்டிருந்தது. அதையடுத்து 'AK61' பற்றிய அதிகாரப்பூர்வத் தகவல் வெளியாகி படப்பிடிப்பு நடைபெற்றுவந்தது.

இந்நிலையில், நேற்று 'AK61' படத்தின் முதல் பார்வை போஸ்டர் வெளியாகும் என்று அறிவிக்கப்பட்டிருந்த நிலையில், மாலை 6.30 மணிக்கு அதனை வெளியிட்டது படக்குழு. 'துணிவு' என்று பெயருடன் முதல் பார்வை போஸ்டர் வெளியானது. 

Image

கையில் மிலிட்டரி ரக துப்பாக்கியுடன் நாற்காலியில் அஜித் சாய்ந்து அமர்ந்திருக்கும்படியாக வெளியான இந்த போஸ்டர் ரசிகர்களை வெகுவாகவே கவர்ந்தது. படத்தின் டைட்டில் அமைப்பு, ரூபாய் நோட்டு போன்ற எழுத்தின் வடிவமைப்பில் அமைந்திருந்ததால் ஒருவேளை வங்கிக்கொள்ளை சார்ந்த கதையமைப்புடன் இப்படம் இருக்குமோ என்ற ஊகங்களும் ரசிகர்களிடையே மேலோங்கியுள்ளது. 

'AK61' படத்திற்கு 'துணிவே துணை' என்று பெயர் வைக்கப்படலாம் என்ற தகவல் சில நாட்களுக்கு முன்பு கசிந்த நிலையில், என்னதான் போஸ்டர் பெருவாரியான ரசிகர்களிடையே வரவேற்பைப் பெற்றுவரும் நிலையிலும், 'துணிவு' என்று வைக்கப்பட்டுள்ள பெயர் அஜித் ரசிகர்களில் ஒரு பகுதியினரை அதிருப்தியில் ஆழ்த்தியுள்ளது எனலாம்.

தமிழ் சினிமாவில் மாஸ் ஹீரோவாக பார்க்கப்படும் அஜித்குமார் நடிக்கும் படங்களின் பெயர் மாஸ் பிம்பங்களைக் கொண்டதாக இருக்கவேண்டும் என்ற ரசிகர்களின் எதிர்பார்ப்பு வீரம், வேதாளம், விவேகம், வலிமை போன்ற டைட்டில்களால் நிறைவுபெற்ற அளவிற்கு 'துணிவு' என்ற பெயரால் நிறைவுபெறவில்லை என்பதே ரசிகர்கள் வலைதளங்களில் பதிவிடும் கருத்துகளின் வெளிப்பாடாக உள்ளது. அண்மையில், வம்சி பைடிபள்ளி இயக்கத்தில் விஜய் நடிக்கும் படத்திற்கு 'வாரிசு' எனப் பெயரிடப்பட்டது குறிப்பிடத்தக்கது. 

பதிவு: September 22, 2022
'சுயமரியாதை உள்ள எந்த சமூகமும் மனுஸ்மிருதியை ஏற்காது' - காங்கிரஸ் எம்.பி. ஜோதிமணி பாய்ச்சல்!

சுயமரியாதை உள்ள எந்த சமூகமும் மனுநீதியை ஏற்காது என்று காங்கிரஸ் கரூர் எம்.பி. ஜோதிமணி ட்விட்டரில் காரசாரமான பதிவு ஒன்றை இட்டுள்ளார்.

சனாதனம் குறித்து திமுக எம்.பி. ஆ.ராசா அண்மையில் பேசியது பல்வேறு அதிர்வலைகளை அரசியல் வட்டாரத்தில் ஏற்படுத்தியுள்ளது. தமிழகம் முழுவதும் இந்து அமைப்புகள் ராசாவின் கருத்துக்கு எதிராக போராட்டங்களிலும் ஆர்ப்பாட்டங்களிலும் ஈடுபட்டு வருகின்றனர்.

அதே சமயம், மனுஸ்மிருதியில் உள்ளதையே ஆ.ராசா சுட்டிக்காட்டியுள்ளதாக பலரும் அவருக்கு ஆதரவாகப் பேசியும் வருகின்றனர். இந்நிலையில், மனுநீதி எனப்படும் மனுஸ்மிருதியை சுயமரியாதை உள்ள எந்த சமூகமும் ஏற்காது என்று காங்கிரஸ் எம்.பி. ஜோதிமணி ட்விட்டரில் தெரிவித்துள்ளார்.

இதுகுறித்து ட்விட்டரில் பதிவிட்டுள்ள அவர், "பாஜகவின் வேதப்புத்தகம் பகவத்கீதை அல்ல. மனுநீதியே. மனுநீதி பெண்களை பிறபடுத்தப்பட்ட, தலித் உள்ளிட்ட ஒடுக்கப்பட்ட சமூகங்களை இழிவுபடுத்துவது. அடிமைகளாக கட்டமைப்பது. சுயமரியாதையும், கண்ணியமும் மிகுந்த எந்த சமூகமும் மனுநீதியை ஏற்கமுடியாது. மனுநீதியும், பாஜகவும் மனிதகுல விரோதிகள்" இவ்வாறு தெரிவித்துள்ளார்.

பதிவு: September 21, 2022
'ஆ.ராசாவிற்கு எதிராக பொதுமக்களிடம் கையெழுத்து வாங்கிவருகிறோம்; இதுவரை 20 லட்சம் பேர் கையெழுத்திட்டுள்ளனர்' - அண்ணாமலை!

ஆ.ராசாவின் கருத்துக்கு எதிராகப் போராடிய பாஜகவினர் மீது திமுக பொய் வழக்கு போட்டு கைதுசெய்வதாக பாஜக மாநிலத் தலைவர் அண்ணாமலை குற்றம்சாட்டியுள்ளார்.

இதுகுறித்து செய்தியாளர் சந்திப்பில் பேசிய அவர், "ஆ.ராசாவின் பேச்சுக்கு எதிராக குரலெழுப்பிய பாஜகவினர் மீது திமுக பொய் வழக்குகள் போட்டு கைது செய்கின்றது. சமுதாயத்தில் பிரச்சினையை உருவாக்குதல் என்ற பிரிவில் (IPC Section 153) அவர்கள் மீது வழக்கு பதியப்படுகிறது. அதாவது ஆ.ராசா பேசியது பிரச்சினையை உருவாக்கும், பிளவுபடுத்தும் பேச்சு அல்ல; பாஜகவினர் பேசியதே அவ்வாறு உள்ளதாக குற்றம்சாட்டுகின்றனர். 

இதுகுறித்து திமுக அமைச்சர்களிடம் கேட்டால் 'காது கேட்கவில்லை' என்று ஒரு அமைச்சர் கூறுகிறார். அவர் அடுத்த முறையிலிருந்து காது கேட்கும் கருவியை மாட்டிக்கொண்டு செய்தியாளர் சந்திப்பில் கலந்துகொள்ளுமாறு கேட்டுக்கொள்கிறேன்" என்று கூறியுள்ளார்.

மேலும் பேசிய அவர், இந்தப் பிரச்சினைக்காக பாஜக போராட்டங்களில் எல்லாம் இறங்கப்போவதில்லை; மாறாக ராசா போன்ற எம்.பி. எங்களுக்கு வேண்டாம் என்று பொதுமக்களிடம் பாஜகவினர் கையெழுத்து வாங்கிவருகின்றனர்.

இதுவரை 20 லட்சம் கையெழுத்துகள் பொதுமக்களிடமிருந்து பெறப்பட்டுள்ளன. இப்படியெல்லாம் பெரும்பான்மை சமுதாயத்தைப் பற்றி தவறாக பேசி சிறுபான்மை சமுதாயத்திலிருந்து ஓட்டு வாங்கிவிடலாம் என்று திமுக நினைக்கவேண்டாம். எல்லா சமுதாயத்தினரும் இதற்கு எதிராக குரல்கொடுத்து வருகின்றனர். தமிழகம் மட்டுமல்லாது உத்தரப்பிரதேசம், பீகார் போன்ற பிற மாநிலங்களிலிருந்தும் ஆ.ராசாவின் கருத்துக்கு எதிர்ப்புக்குரல் வலுத்துவருகிறது" இவ்வாறு தெரிவித்தார். 

 

பதிவு: September 21, 2022
'சனாதனம் குறித்து ஆ.ராசா பேசியது கீழ்த்தரமானது' - எடப்பாடி பழனிசாமி சீற்றம்!

இந்து மதத்தை புண்படுத்தும் விதமாக ஆ.ராசா பேசியது கீழ்த்தரமானது என்று அதிமுக இடைக்கால பொதுச்செயலாளர் எடப்பாடி கே.பழனிசாமி கருத்து தெரிவித்துள்ளார்.

பிரதமர் மோதி மற்றும் மத்திய உள்துறை அமைச்சர் அமித்ஷாவை சந்திக்கும் பொருட்டு எதிர்க்கட்சித் தலைவரும் அதிமுக இடைக்கால பொதுச்செயலாளருமான எடப்பாடி பழனிசாமி கடந்த 19-ம் தேதி டெல்லி பயணப்பட்டார்.

இந்நிலையில், நேற்றைய தினம் டெல்லியிலிருந்து கோவை விமான நிலையம் வந்த அவர், டெல்லி பயணம் பற்றியும், திமுக எம்.பி. ஆ.ராசா அண்மையில் சனாதனம் குறித்து பேசியது பற்றியும் செய்தியாளர்கள் கேட்ட கேள்விக்கு பதிலளித்தார்.

இதுகுறித்து பேசிய அவர், "தமிழகத்தில் கஞ்சா உள்ளிட்ட போதைப்பொருட்களால் மாணவர்கள், இளைஞர்கள் சீரழியும் நிலை உள்ளது. இதை தடுக்க வேண்டும் என மத்திய அரசை வலியுறுத்தினோம்.

இந்து மதத்தை புண்படுத்தும் விதமாக ராசா பேசியது கீழ்த்தரமானது. இதற்கு அவரது கட்சி தலைவர் பதில் அளிப்பார் என எதிர்பார்த்தேன். ஆனால், பதில் கிடைக்கவில்லை. அ.தி.மு.க., விவகாரம் குறித்துப் பேச டெல்லி சென்றதாக சொல்வது தவறானது.

விடியா தி.மு.க., ஆட்சியில் மக்களுக்கு எந்த நன்மையும் கிடைக்கவில்லை. தமிழகத்தில் தற்போது பரவி வரும் காய்ச்சலை தடுப்பது அரசின் கடமை. எளிதாக பரவும் காய்ச்சல் என மருத்துவர்கள் சொல்கின்றனர். இந்த அரசு விழிப்போடு இருந்து குழந்தைகளை காப்பதுடன், மருத்துவக் குழு ஆராய்ந்து இந்த காய்ச்சலை தடுக்க நடவடிக்கைகள் எடுக்க வேண்டும்" இவ்வாறு தெரிவித்தார். 

பதிவு: September 21, 2022
ஆஸ்கர் விழாவில் கலந்துகொள்ள குஜராத்தி படமான 'செலோ ஷோ' இந்தியா சார்பில் தேர்வு! ஆர்.ஆர்.ஆர். தேர்வுசெய்யப்படவில்லை!

2023-ஆம் ஆண்டுக்கான ஆஸ்கர் விருதுகள் தேர்வில் ராஜமௌலியின் ஆர்.ஆர்.ஆர் திரைப்படம் தேர்வு செய்யப்படும் என எதிர்பார்க்கப்பட்ட நிலையில், குஜராத்தி திரைப்படமான செலோ ஷோ தேர்வு செய்யப்பட்டுள்ளது. 

95-வது ஆஸ்கார் விருதுகள் வழங்கும் விழா அடுத்த ஆண்டு மார்ச் 12-ம் தேதி லாஸ் ஏஞ்சல்ஸ் நகர டோலி திரையரங்கில் நடைபெறுகிறது. இந்நிலையில், இந்த விழாவிற்கான திரைப்படங்கள் தேர்வு நடைபெற்றுவந்தது. இதன் பட்டியலில் பிரம்மாண்ட இயக்குநர் ராஜமௌலி இயக்கிய ஆர்.ஆர்.ஆர்., விவேக் அக்னிஹோத்ரி இயக்கிய தி காஷ்மீர் ஃபைல்ஸ், பதாய் ஹோ, மாதவனின் ராக்கெட்ரி, பிரம்மாஸ்த்ரா, இராதாகிருஷ்ணன் பார்த்திபனின் இரவின் நிழல் உள்ளிட்ட முக்கிய திரைப்படங்கள் இடம்பெற்றிருந்தன.  

இதில் குஜராத்தி மொழி திரைப்படமான செலோ ஷோ திரைப்படமும் இடம்பெற்றிருந்தது. பான் நாலின் என்பவர் இயக்கியுள்ள இப்படம் நாடு முழுவதும் வரும் அக்டோபர் 14-ஆம் தேதி திரையரங்குகளில் வெளியாகவுள்ளது. இதில் பவேஷ் ஸ்ரீமாலி, பவின் ரபாரி, ரிச்சா மீனா ஆகியோர் முக்கிய வேடங்களில் நடித்துள்ளனர். இந்தப் படத்தை சித்தார்த் ராய் கபூர் ஃபில்ம்ஸ், ஜுகத் மோஷன் பிக்சர்ஸ், மான்சூன் ஃப்லிம்ஸ், மற்றும் மார் டுலே நிறுவனங்கள் இணைந்து தயாரித்துள்ளன.

ஒரு சிறுவனுக்கு சினிமா மீது ஏற்படும் ஈர்ப்பும், அதனால் அவன் வாழ்வில் நிகழும் மாற்றங்களுமாக நீளும் இத்திரைப்படம், பரிந்துரைக்கப்பட்ட இந்தியப் படங்களிலிருந்து ஆஸ்கர் விருது விழாவில் கலந்துகொள்ள இந்தியா சார்பில் தேர்ந்தெடுக்கப்பட்டுள்ளது. இதுகுறித்த அறிவிப்பை இந்தியத் திரைப்பட கூட்டமைப்பின் தலைவர் நாகபர்ணா தெரிவித்துள்ளார்.

பெரும் பொருட்செலவில் தயாரிக்கப்பட்ட ராஜமௌலியின் ஆர்.ஆர்.ஆர். திரைப்படம் ஆஸ்கர் விருதுக்கு தேர்ந்தெடுக்கப்படும் என பெரிதும் எதிர்பார்க்கப்பட்ட நிலையில், குஜராத்தி படமான செலோ ஷோ இந்தியா சார்பில் தேர்ந்தெடுக்கப்பட்டுள்ளது சினிமா ரசிகர்களிடையே அப்படம் மீதான எதிர்பார்ப்பை அதிகரித்துள்ளது. 

பதிவு: September 21, 2022

மேலும் செய்திகள்

கொரோனா வைரஸ் அப்டேட்ஸ்