சாலையில் நிர்வாணமாக வந்த மனநலம் பாதிக்கப்பட்டவர்!- நெகிழ வைத்த பெண்ணின் மனிதநேயம்

நிர்வாணமாக நெடுஞ்சாலையில் நடந்து சென்ற மனநலம் பாதிக்கப்பட்டவருக்கு, துணி உடுத்தி, உணவு வழங்கிய நெல்லை பெண்ணின் மனிதநேயம் அனைவரால் பாராட்டப்பட்டு வருகிறது.


திருநெல்வேலி மாவட்டம் மாநகர் பகுதியை ஒட்டிய சொக்கட்டான் தோப்பு பகுதியைச் சேர்ந்தவர் நந்தினி. இவர், தனது உறவினர் வீட்டுக்குச் செல்வதற்காகக் கங்கைகொண்டானுக்கு இருசக்கர வாகனத்தில் சென்றுள்ளார். திருநெல்வேலியிலிருந்து மதுரை செல்லும் தேசிய நெடுஞ்சாலையில், மனநலம் பாதித்த ஒருவர், ஆடை ஏதும் இல்லாமல் சுற்றித் திரிவதைப் பார்த்துள்ளார். உடனடியாக தனது இருசக்கர வாகனத்தை நிறுத்திய நந்தினி, தன்னிடம் இருந்த துணியை எடுத்து மனநலம் பாதித்தவரின் அருகில் சென்று, அவருக்கு துணியைக் கொடுத்திருக்கிறார். ஆனால் அவர் ஆடை வேண்டாம் என தவிர்த்திருக்கிறார். ஒருகட்டத்தில் நந்தினியே துணியை அந்த நபருக்குக் கட்டி விட்டிருக்கிறார்.

இதனையடுத்து துணியை உடுத்திக்கொண்டவர் அருகிலிருந்த சிறிய பாறை மீது அமர்ந்துகொண்டார். உடனே அருகிலிருந்த உணவகத்திற்குச் சென்ற நந்தினி, உணவும், தண்ணீரும் வாங்கி வந்து அவருக்குச் சாப்பாடு ஊட்டி விட்டதை அங்கிருந்த நபர் ஒருவர் வீடியோ எடுத்துள்ளார். இந்த வீடியோ சமூக வலைத்தளங்களில் வைரலாகப் பரவி வருகிறது. மேலும் நந்தினியின் இந்த மனிதநேய செயலை பலரும் பாராட்டி வருகின்றனர்.

பதிவு: December 22, 2021
நீட் தற்கொலை... ஒமிக்ரான் பரவல்... மாணவர்கள் பலி.!- ராமதாஸ் அடுத்தடுத்து ட்வீட்

மாணவர்களின் தற்கொலையை தடுப்பதற்கு நீட் தேர்விலிருந்து தமிழகத்திற்கு விலக்கு பெறுவது தான் ஒரே தீர்வு என்றும் விழிப்புடன் இருந்திருந்தால் ஒமிக்ரான் பாதிப்பை தவிர்த்திருக்கலாம் என்றும் பள்ளியின் கழிப்பறை சுவர் இடிந்து விழுந்ததற்கான காரணம் குறித்து விசாரித்து தவறு இழைத்தவர்கள் மீது கடும் நடவடிக்கை எடுக்க வேண்டும் என்றும் பாமக நிறுவனர் ராமதாஸ் கூறியுள்ளார்.

தனது முதல் ட்வீட்டில், "சென்னையை அடுத்த புழல் காவாங்கரையை சேர்ந்த சுஜித் என்ற மாணவர் நீட் தேர்வில் குறைந்த மதிப்பெண் எடுத்ததால் மருத்துவப் படிப்பில் சேர முடியாது என்ற கவலையில் தற்கொலை செய்து கொண்டது வேதனையளிகிறது. அவரது குடும்பத்திற்கு இரங்கலையும், ஆறுதலையும் தெரிவித்துக் கொள்கிறேன். நீட் தேர்வு அச்சம் மற்றும் தோல்வியால் நடப்பாண்டில் தற்கொலை செய்து கொண்ட ஏழாவது மாணவர் சுஜித் ஆவார். மாணவர்களின் தற்கொலைகளை தடுக்க மத்திய மாநில அரசுகள் எந்த நடவடிக்கையும் எடுக்காதது வருத்தமளிக்கிறது.

மாணவர்களின் தற்கொலையை தடுப்பதற்கு நீட் தேர்விலிருந்து தமிழகத்திற்கு விலக்கு பெறுவது தான் ஒரே தீர்வு. ஆனால், அதற்கான தமிழக அரசின் சட்டத்திற்கு இன்னும் ஆளுனரின் ஒப்புதல் கூட பெறப்படவில்லை. இந்த நிச்சயமற்ற நிலை நீடிக்கக் கூடாது. இன்னும் சில மாதங்களில் அடுத்தக் கல்வியாண்டு தொடங்கப் போகிறது. அதற்குள்ளாக நீட் விலக்கு பெற்றாக வேண்டும். அதற்கான சட்டத்திற்கு ஆளுனர் ஒப்புதல் அளிக்க வேண்டும். பின்னர் குடியரசுத்தலைவர் ஒப்புதலை பெற தமிழக அரசு விரைந்து செயல்பட வேண்டும்" என்று கூறியுள்ளார்.

2வது ட்வீட்டில், "தமிழ்நாட்டில் ஒமிக்ரான் கொரோனா உறுதி செய்யப்பட்டவர் நைஜீரியாவிலிருந்து சென்னைக்கு வந்த போது விமான நிலையத்திலிருந்து எந்த சோதனைக்கும் உட்படுத்தப்படாமல் அனுப்பி வைக்கப்பட்டுள்ளார் என்று ஊடகங்களில் வெளியாகியுள்ள செய்திகள் மிகவும் கவலையளிக்கின்றன. அவருக்கு பல நாட்களுக்கு பிறகு தான் ஒமிக்ரான் இருப்பது உறுதி செய்யப்பட்டது. அதற்கு முன்பாக அவருடன் தொடர்பில் இருந்த 52 பேர் உட்பட 280 பேர் கொரோனா சோதனைக்கு உட்படுத்தப்பட்டு தனிமைப்படுத்தப்பட்டுள்ளனர். விழிப்புடன் இருந்திருந்தால் இதை தவிர்த்திருக்கலாம்! இனி வரும் நாட்களிலாவது சென்னைக்கு வரும் விமானப் பயணிகள் எந்த நாட்டிலிருந்து பயணத்தை தொடங்குகிறார்கள் என்பதை ஆராய்ந்து, அவர்கள் அனைவருக்கும் கொரோனா சோதனையை கட்டாயமாக்க வேண்டும்!" என்று கூறியுள்ளார்.

3வது ட்விட்டில், "நெல்லை டவுன் பகுதியில் அரசு உதவி பெறும் பள்ளியின் கழிப்பறை சுவர் இடிந்து விழுந்ததில் 3 மாணவர்கள் உயிரிழந்தனர்; மூவர் காயமடைந்தனர் என்ற செய்தியறிந்து வேதனையடைந்தேன். உயிரிழந்த மாணவர்களின் குடும்பத்தினருக்கு ஆழ்ந்த இரங்கலையும், அனுதாபத்தையும் தெரிவித்துக் கொள்கிறேன். கழிப்பறை சுவர் இடிந்து விழுந்ததற்கான காரணம் குறித்து விசாரித்து தவறு இழைத்தவர்கள் மீது கடும் நடவடிக்கை எடுக்க வேண்டும். காயமடைந்தவர்களுக்கு தரமான மருத்துவமும், உயிரிழந்த மாணவர்களின் குடும்பங்களுக்கு தலா ரூ.50 லட்சம் இழப்பீடும் அரசு வழங்க வேண்டும்" என்று வலியுறுத்தியுள்ளார்.

பதிவு: December 17, 2021
பள்ளியின் கழிவறை சுவர் இடிந்து விழுந்து 3 மாணவர்கள் உயிரிழப்பு!- நெல்லையில் நடந்த சோகம்

நெல்லையில் தனியார் பள்ளியில் சுவர் இடிந்து விழுந்து 3 மாணவர்கள் உயிரிழந்துள்ளனர். படுகாயம் அடைந்த 4 மாணவர்களுக்கு தீவிர சிகிச்சை அளிக்கப்பட்டு வருகிறது.

நெல்லை சந்திப்பில் உள்ள சாப்ட்டர் தனியார் பள்ளியில் காலை 11 மணியளவில் இடைவேளை விடப்பட்டுள்ளது. அப்போது கழிப்பறை சுவர் இடிந்து விழுந்து விபத்து ஏற்பட்டுள்ளது. இதில் 5க்கும் மேற்பட்ட மாணவர்கள் படுகாயம் அடைந்துள்ளனர். இதில் 3 பேர் உயிரிழந்துள்ள நிலையில் மீட்கப்பட்டுள்ள 3 மாணவர்கள் அரசு மருத்துவமனைக்கு அனுப்பி வைக்கப்பட்டுள்ளனர். இதுகுறித்து தகவல் தெரிவிக்கப்பட்டு காவல் துறையினர், தீயணைப்பு துறையினர் சம்பவ இடத்திற்கு வந்துள்ளனர். காவல்துறை, வருவாய் துறையினர் பள்ளி நிர்வாகத்திடம் விசாரணை நடத்தி வருகின்றனர்.

பாதிக்கப்பட்டுள்ள மாணவர்களின் விவரங்கள் குறித்து விசாரணை நடைபெறுகிறது. பள்ளி மாணவர்கள் சம்பவ இடத்தில் இடிந்து விழுந்தவுடன் ஆங்காங்கே அனைவரும் சிதறி ஓடியுள்ளனர். அனைத்து மாணவர்களையும் வகுப்பறைக்கு வர சொல்லி யார் இல்லை என்பது குறித்து கணக்கெடுக்க கூடிய பணியை பள்ளி நிர்வாகத்தினர் மேற்கொண்டு வருகின்றனர். நெல்லை மாவட்ட காவல்துறை உயர் அதிகாரிகள், கல்வித்துறை அதிகாரிகள், மாவட்ட ஆட்சியர் உள்ளிட்டோர் தற்போது சம்பவ இடத்திற்கு விரைந்துள்ளனர். காவல்துறை விசாரணை நடைபெற்று வரும் நிலையில் தீயணைப்பு துறையினர் இடிபாடுகளில் சிக்கி இருந்த மாணவர்களை மீட்டு மருத்துவமனைக்கு அனுப்பும் பணியில் ஈடுபட்டுள்ளனர்.

8 மற்றும் 9ஆம் வகுப்பு மாணவர்களுக்கு இடைவேளை விடப்பட்டதாக சொல்லப்படுகிறது. சுமார் 30க்கும் மேற்பட்ட மாணவர்கள் சம்பவ இடத்தில் இருந்துள்ளனர். சுவர் இடிந்து விழுந்ததில் 5 பேர் இடிபாடுகளில் சிக்கி உள்ளனர். தற்போது 8 மற்றும் 9ஆம் வகுப்பு தவிர அனைத்து வகுப்புகளுக்கும் விடுமுறை அறிவித்து மாணவர்களை வீட்டிற்கு அனுப்பும் பணியில் ஈடுபட்டுள்ளனர். விபத்து நடந்த இடத்தில் இருந்த மாணவர்களின் விவரங்கள் சேகரிக்கப்பட்டு வருகின்றன.

இதனிடையே, உயிரிழந்த மாணவர்களின் விவரம் தெரியவந்துள்ளது. 6ம் வகுப்பு சி பிரிவில் படித்த சுதீஷ், 8ம் வகுப்பு ஏ பிரிவில் படித்த விஸ்வரஞ்சன், 9ம் வகுப்பு பி பிரிவில் படித்த அன்பழகன் ஆகிய மாணவர்கள் உயிரிழந்துள்ளதாக பள்ளி நிர்வாகம் தெரிவித்துள்ளது. காயமடைந்த மாணவர்கள் சஞ்சய், இசக்கி பிரகாஷ், சேக் அபுபக்கர், அப்துல்லாவுக்கு மருத்துவமனையில் சிகிச்சை அளிக்கப்பட்டு வருகிறது.

இதனிடையே, பள்ளியில் நடந்த விபத்து குறித்து அறிக்கை அளிக்க மாவட்ட முதன்மை கல்வி அலுவலர் அறிக்கை தர பள்ளி கல்வித்துறை உத்தரவிட்டுள்ளது.

பதிவு: December 17, 2021
தமிழகத்தில் இன்று முதல் நவம்பர் 29 வரை ரெட் அலர்ட்!- இந்திய வானிலை மையம் எச்சரிக்கை

தென்மேற்கு வங்கக்கடலில் நிலவும் வளிமண்டல மேலடுக்கு சுழற்சியால் தமிழ்நாட்டில் இன்று முதல் நவம்பர் 29 வரை ரெட் அலர்ட் விடுக்கப்பட்டுள்ளது.

தென்மேற்கு வங்கக்கடலில் நிலவும் வளிமண்டல மேலடுக்கு சுழற்சியால் தமிழக கடலோர பகுதிகளில் வடகிழக்கு திசையை நோக்கி வரும் புயல் சின்னமாக தமிழ்நாட்டில் இன்று கனமழை முதல் மிக கனமழைக்கு வாய்ப்பு இருப்பதாக இந்திய வானிலை ஆய்வு மையம் தெரிவித்திருக்கிறது.

இன்றைய தினம் தூத்துக்குடி, நெல்லை, தென்காசி மாவட்டங்களில் அதிகனமழை பெய்யும் என எச்சரிக்கை விடுக்கப்பட்டிருக்கிறது. வளிமண்டல மேலடுக்கு சுழற்சியால் அடுத்த ஓரிரு மணி நேரத்தில் 13 மாவட்டங்களில் இடி, மின்னலுடன் கனமழை பெய்யக்கூடும்.

சென்னை, திருவள்ளூர், செங்கல்பட்டு, காஞ்சிபுரம், வேலூர், ராணிப்பேட்டை, திருவண்ணாமலை, விழுப்புரத்தில் கனமழை பெய்யும். இதேபோல் நாமக்கல், கரூர், திருவள்ளூர், கன்னியாகுமரியில் ஓரிரு இடங்களில் இடி, மின்னலுடன் கனமழை பெய்யக்கூடும். தமிழ்நாட்டில் கடந்த 24 மணி நேரத்தில் அதிகபட்சமாக தூத்துக்குடி மாவட்டம் காயல்பட்டினத்தில் 31 செ.மீ. மழை பதிவாகியுள்ளது.

தூத்துக்குடி 27 செ.மீ., திருச்செந்தூர் 25 செ.மீ., நாகை 19, ஸ்ரீவைகுண்டம் 18, குலசேகரப்பட்டினம் 16, வைப்பாறில் 15 செ.மீ. மழை பதிவாகி இருக்கிறது. காரைக்கால், திருவையாறு, சாத்தான்குளம், ஓட்டப்பிடாரம், பெலந்துறையில் தலா 12 செ.மீ. மழை பெய்தது.

திருபுவனம், ஸ்ரீமுஷ்ணம், சாத்தூர், பேராவூரணி, லெப்பை குடிகாடு, பாளையங்கோட்டையில் தலா 11 செ.மீ. மழை பொழிந்தது. தொடர்ந்து திண்டுக்கல், திருவாரூர், பூதலூர், அகரம் சீகூர், வெப்பக்கோட்டை, சிவகங்கையில் 10 செ.மீ. மழை பெய்தது. தாம்பரம், மணிமுத்தாறு, நன்னிலம், காட்டுக்குப்பம், செப்பரம்பாக்கம், கடம்பூர், மணியாச்சியில் தலா 9 செ.மீ. மழை பதிவாகி இருக்கிறது.

நெல்லை, தென்காசி, தூத்துக்குடி உள்ளிட்ட மாவட்டங்களில் நேற்று ரெட் அலர்ட் அறிவிக்கப்பட்டிருந்தது. இன்றைய தினம் அதிக கனமழை இருக்கும் மாவட்டங்களாக கன்னியாகுமரி, திருநெல்வேலி, தென்காசி மாவட்டங்கள் குறிப்பிடப்பட்டுள்ளது.

இந்நிலையில், தென்மேற்கு வங்கக்கடலில் நிலவும் வளிமண்டல மேலடுக்கு சுழற்சியால் தமிழ்நாட்டில் இன்று முதல் நவம்பர் 29 வரை ரெட் அலர்ட் விடுக்கப்பட்டுள்ளது. வரும் 29ம் தேதி தெற்கு அந்தமான் கடலோரப் பகுதிகளில் புதிய குறைந்த காற்றழுத்த தாழ்வு பகுதி உருவாகக்கூடும் என்று இந்திய வானிலை ஆய்வு மையம் தெரிவித்திருந்த நிலையில், அடுத்த 48 மணி நேரத்திற்குள் ஆழ்ந்த காற்றழுத்த தாழ்வு பகுதியாக வலுப்பெற்று மேற்கு - வடமேற்கு திசையில் நகரக்கூடும் என்றும் தெரிவிக்கப்பட்டிருக்கிறது.

பதிவு: November 26, 2021
`உருவானது காற்றழுத்த தாழ்வு பகுதி; தமிழகத்தில் அதிக கனமழை பொழியும்!'- வானிலை ஆய்வு மையம்

வங்க கடலின் மத்தியப் பகுதியில் புதிய காற்றழுத்த தாழ்வு பகுதி உருவாகி உள்ளது. தமிழகத்தில் கடற்கரையோர மாவட்டங்களில் அதிக கனமழை பொழியும்" என்று சென்னை வானிலை ஆய்வு மையம் தெரிவித்துள்ளது.

இது குறித்து வானிலை ஆய்வு மையம் வெளியிட்டுள்ள அறிவிப்பில், “தெற்கு வங்க கடலின் மத்தியப் பகுதியில் உருவாகியுள்ள குறைந்த காற்றழுத்த தாழ்வு பகுதி காரணமாக இன்று திருநெல்வேலி, கன்னியாகுமரி, தூத்துக்குடி, மாவட்டங்களில் ஓரிரு இடங்களில் இடி மின்னலுடன் கூடிய கன மழையும், இதர தென் மாவட்டங்களில் ஒரு சில இடங்களில் இடி மின்னலுடன் கூடிய மிதமான மழையும், கடலோர மாவட்டங்கள், உள் மாவட்டங்கள் மற்றும் புதுவை, காரைக்கால் பகுதிகளில் ஒரு சில இடங்களில் இடி மின்னலுடன் கூடிய லேசானது முதல் மிதமான மழையும் பெய்யக்கூடும்.

நாளை (அக்.28) ராமநாதபுரம், தூத்துக்குடி, திருநெல்வேலி, கன்னியாகுமரி, மயிலாடுதுறை, நாகப்பட்டினம் மாவட்டங்கள் மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய கன மழையும், தென் மாவட்டங்கள், கடலோர மாவட்டங்கள் மற்றும் புதுவை பகுதிகளில் ஒரு சில இடங்களில் இடி மின்னலுடன் கூடிய மிதமான மழையும், உள் மாவட்டங்களில் ஒரு சில இடங்களில் லேசானது முதல் மிதமான மழையும் பெய்யக்கூடும்.

அக்டோபர் 29, 30 தேதிகளில் தென் மாவட்டங்கள் மற்றும் கடலோர மாவட்டங்களில் ஒரு சில இடங்களில் இடி மின்னலுடன் கூடிய கன மழையும், ஓரிரு இடங்களில் கன முதல் மிக கன மழையும், ஏனைய மாவட்டங்களில் அனேக இடங்களில் இடி மின்னலுடன் கூடிய மிதமான மழையும் பெய்யக்கூடும்.

சென்னையை பொறுத்தவரை, அடுத்த 48 மணி நேரத்திற்கு வானம் பொதுவாக மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்யகூடும். அதிகபட்ச வெப்பநிலை 32 மற்றும் குறைந்தபட்ச வெப்பநிலை 26 டிகிரி செல்சியஸை ஒட்டி இருக்கும். இன்று தென்மேற்கு வங்க கடல் பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் அவ்வப்போது 60 கிலோ மீட்டர் வேகத்திலும் வீசக்கூடும் என்பதால் மீனவர்களுக்கு எச்சரிக்கை விடுக்கப்பட்டுள்ளது. எனவே மீனவர்கள் இப்பகுதிகளுக்கு செல்ல வேண்டாம் என்று அறிவுறுத்தப்பட்டுள்ளது.

பதிவு: October 27, 2021
90 வயதில் பஞ்சாயத்து தலைவர்!- உள்ளாட்சித் தேர்தலில் அசத்தினார் சிவந்திப்பட்டி மூதாட்டி

திருநெல்வேலி மாவட்டம், சிவந்திப்பட்டி ஊராட்சி மன்ற தேர்தலில் தலைவர் பதவிக்கு போட்டியிட்ட 90 வயது மூதாட்டி பெருமாத்தாள் அசத்தல் வெற்றி பெற்றுள்ளார்.

தமிழகத்தில் காஞ்சிபுரம், செங்கல்பட்டு, வேலூர், ராணிப்பேட்டை, திருப்பத்தூர், விழுப்புரம், கள்ளக்குறிச்சி, திருநெல்வேலி, தென்காசி ஆகிய 9 மாவட்டங்களில் உள்ள ஊரக உள்ளாட்சி அமைப்புகளுக்கான தேர்தல் இரண்டு கட்டங்களாக கடந்த அக்.6 மற்றும் 9-ம் தேதிகளில் நடைபெற்றது.இந்த இருகட்ட தேர்தலில் பதிவான வாக்குகள் எண்ணும் பணி 74 மையங்களில் நேற்று காலை 8 மணிக்கு தொடங்கியது. தேர்தல் முடிவுகளின்படி, பெரும்பாலான இடங்களில் திமுக முன்னிலை வகிக்கிறது.

இந்நிலையில் தென்காசி மாவட்டம் கடையம் ஒன்றியம் வெங்கடாம்பட்டி ஊராட்சி மன்றத் தலைவர் தேர்தலில் 21 வயது பெண் சாருலதா என்பவர் வெற்றி பெற்றார். இவர், ஒரு வாக்கு வித்தியாசத்தில் வெற்றி பெற்றுள்ளார். மேலும் அவர் வெற்றி பெற்றதற்கான சான்றிதழை தேர்தல் நடத்தும் அலுவலரிடம் பெற்று கொண்டார்.

அதே போல, திருநெல்வேலி மாவட்டம் சிவந்திப்பட்டி ஊராட்சி மன்ற தேர்தலில் 90 வயது மூதாட்டி பெருமாத்தாள் வெற்றி பெற்றுள்ளார். எதிர்த்து போட்டியிட்டவர்களை டெபாசிட்டை இழக்கச் செய்து 1000 வாக்குகள் வித்தியாசத்தில் வெற்றி பெற்றுள்ளார். அதற்கான சான்றிதழை தேர்தல் நடத்தும் அலுவலரிடம் பெற்றுக் கொண்டார்.

பதிவு: October 13, 2021

முக்கிய செய்திகள்

'திமுகவால் தமிழகத்தில் வளர்ச்சியில்லை; தமிழகத்திற்கு தாமரை ஆட்சி தேவை' - காரைக்குடியில் ஜே.பி.நட்டா பேச்சு!

திமுக குடும்பக் கட்சியாகச் செயல்படுகிறது என்றும், திமுகவின் குறிக்கோள் வெறும் நாற்காலி மட்டும் தான் என்றும் பாஜக தேசிய தலைவர் ஜே.பி.நட்டா காரைக்குடியில் நடைபெற்ற கூட்டத்தில் கடுமையாக சாடி பேசியுள்ளார்.

பாஜகவின் 'ஆபரேஷன் சவுத் இன்டியா' திட்டத்தின் அடிப்படையில் தென்மாநிலங்களில் பாஜக அதன் கட்சிப் பரப்புரைகளை மேற்கொண்டுவருகிறது. வடமாநிலங்களைப் போல் தென்மாநிலங்களில் பாஜகவின் வாக்குகளை அதிகரிக்கச்செய்ய, வரும் 2024 நாடாளுமன்றத் தேர்தலை முன்னிட்டு இந்த வியூகத்தை வகுத்துள்ளது பாஜக. 

இந்நிலையில், சிவகங்கை மாவட்டம் காரைக்குடியில் நடைபெற்ற பாஜக செயற்குழு கூட்டத்தில் கலந்துகொள்ள பாஜக தேசிய தலைவர் ஜே.பி.நட்டா தமிழகம் வருகை தந்தார். அவரை பாஜக மூத்த தலைவர் ஹெச்.ராஜா உள்ளிட்ட பாஜகவினர் வரவேற்றனர். கூட்டத்தில் கலந்துகொண்டு பேசிய அவர், திமுக, திரிணாமூல் உள்ளிட்ட கட்சிகளை கடுமையாக சாடிப் பேசினார். மேலும் தமிழகத்தில் விரைவில் தாமரை மலரும் என்று பேசியிருந்தார். 

கூட்டத்தில் கலந்துகொண்டு பேசிய அவர், "இந்த பொதுக்கூட்டத்தை பார்க்கையில் ஒரு தெளிவான உண்மை எனக்கு தெரிகிறது. பாரதிய ஜனதா கட்சிக்கு தமிழ்நாட்டில் எதிர்காலம் இருக்கிறது. தமிழ்நாட்டில் தாமரை மலரப்போகிறது.

பாஜக மட்டுமே அனைத்திந்திய கட்சி. பாஜக மட்டுமே கொள்கை உடைய கட்சி. மற்ற கட்சிகள் சுருங்கிவிட்டன. கொள்கை இல்லாத கட்சிகளுடம் சண்டையிடவில்லை. பிராந்திய கட்சிகள் தற்போது வாரிசு கட்சிகளாக சுருங்கிவிட்டன. பிடிபி, என்சிபி, அகாலி தளம், சமாஜ்வாடி, திரிணாமூல், முக்தி மோர்சா, ஒடிசா, ஒய்.எஸ்.ஆர்., டி.ஆர்.எஸ்., திமுக ஆகியவை குடும்ப கட்சிகளாக செயல்படுகின்றன.

திமுகவில் முன்பு கருணாநிதி இருந்தார். இப்போது ஸ்டாலின் வந்துள்ளார். அடுத்து அவரது மகன் வருவார். இது என்ன மாதிரியான ஜனநாயகம்? ஸ்டாலினால் வளர்ச்சியை பற்றி பேச முடியுமா? DMK வில் D என்றால் Dynasty (வாரிசு), M என்றால் Money (பணம்), K என்றால் கட்ட பஞ்சாயத்து. இதுதான் திமுக.

திமுகவால் பிராந்தியத்தை பற்றி பேச முடியுமா? நாங்கள்தான் தமிழ் மொழி பற்றி பேசுகிறோம். அதை பாதுகாக்கிறோம். திமுகவின் பங்களிப்பு என்ன? திமுக வெறுப்பு அரசியலில் நம்பிக்கை வைத்து உள்ளது. திமுகவுக்கு பிளவுபடுத்துகிறது. திமுகவுக்கு எந்த குறிக்கோளும் இல்லை. கொள்கை ரீதியாக திமுக பெரிய பூஜ்ஜியம். உங்களின் கொள்கை எப்போதுm நாற்காலியை பற்றிதான்" இவ்வாறு பேசினார்.

பதிவு: September 23, 2022
மீண்டும் தொடங்கியது 'இந்தியன் 2' பட படப்பிடிப்பு வேலைகள்; கமல் தந்த அசத்தல் அப்டேட்! ரசிகர்கள் உற்சாகம்!

'இந்தியன் 2' படப்பிடிப்பு மீண்டும் தொடங்கப்பட்டுள்ளதாக நடிகர் கமல்ஹாசன் தெரிவித்துள்ளார்.

ஷங்கர் இயக்கத்தில், கமல்ஹாசன், மனிஷா கொய்ராலா, ஊர்மிளா, சுகன்யா, கவுண்டமணி, செந்தில் ஆகியோர் நடித்து 1996-ல் வெளியான திரைப்படம் 'இந்தியன்'. ஊழலால் திளைக்கும் அரசு அதிகாரிகளும், அவர்களைக் களையெடுக்கும் 'இந்தியன் தாத்தா' முதியவருமான கதையம்சத்தில் உருவாக்கப்பட்ட இத்திரைப்படம், மாபெரும் வெற்றிப்படமாக அமைந்தது. மேலும் இயக்குநர் ஷங்கர் மற்றும் கமல்ஹாசன் திரைப்பயணத்தின் முக்கியப்படமாகவும் அமைந்தது.

இந்நிலையில், கிட்டத்தட்ட 24 வருடங்களுக்குப்பிறகு இத்திரைப்படத்தின் இரண்டாம் பாகம் குறித்த அறிவிப்பு வெளியாகி படப்பிடிப்பு தொடங்கியது. ஷங்கர் இயக்க, லைகா தயாரிக்கவிருந்த 'இந்தியன் 2' படத்தில் கமல்ஹாசன், காஜல் அகர்வால், விவேக் உள்ளிட்ட நடிகர்கள் ஒப்பந்தம் செய்யப்பட்டனர்.

இந்நிலையில் தான் படப்பிடிப்பின்போது நிகழ்ந்த விபத்து காரணமாக படப்பிடிப்பு தள்ளிப்போனது. மேலும் கமல்ஹாசன் பிக்பாஸ் நிகழ்ச்சியைத் தொகுத்து வழங்கும் வேலைகளில் ஈடுபட்டிருந்ததால் தொடர்ந்து படப்பிடிப்பு தாமதமாகிவந்தது. தொடர் தாமதம் காரணமாக ஒருபக்கம் தெலுங்கில் ராம் சரண், கியாரா அத்வானி ஆகியோரை வைத்து 'RC15' பட இயக்க வேலைகளில் இறங்கிவிட்டிருந்தார் ஷங்கர்.

இதனால் 'இந்தியன் 2' படம் கைவிடப்பட்டதாக தகவல்கள் வெளியாகின. ஆனால், படப்பிடிப்பு விரைவில் துவங்கும் என்று படக்குழுவிலிருந்து தகவல்கள் அவ்வப்போது அறிவிக்கப்பட்டு வந்தன. இந்த நிலையில், ரசிகர்கள் மகிழ்ச்சியுறும் வகையில், 'இந்தியன் 2' படப்பிடிப்பு இன்று முதல் துவங்குவதாக கமல்ஹாசன் தனது ட்விட்டர் பக்கத்தில் தெரிவித்துள்ளார். இதனால் படம் குறித்த அடுத்தடுத்த அப்டேட்டுகள் விரைவில் வெளியாகலாம் என்று எதிர்பார்க்கப்படுகிறது. 

 

பதிவு: September 22, 2022
ஹெச்.வினோத் இயக்கத்தில் அஜித் நடிக்கும் படத்திற்கு 'துணிவு' எனப் பெயர் வைத்தது படக்குழு! ரசிகர்களின் கருத்து என்ன?

ஹெச்.வினோத் இயக்கத்தில் அஜித்குமார் நடிக்கும் புதிய திரைப்படத்திற்கு 'துணிவு' என்று பெயரிடப்பட்டுள்ளது.

நடிகர் அஜித்குமார் நடிப்பில், ஹெச்.வினோத் இயக்கத்தில், போனி கபூர் தயாரிப்பில் அண்மையில் வெளியான திரைப்படம் வலிமை. நீண்ட நாள் தயாரிப்பாக, பெரும் எதிர்பார்ப்புடன் வெளியான இத்திரைப்படம் ரசிகர்கள் மத்தியில் கலவையான விமர்சனங்களைப் பெற்றது.

இந்நிலையில், அதே கூட்டணியுடன் அஜித்குமார் அடுத்த படத்திலும் நடிக்கவிருக்கிறார் என்ற தகவல் இணையத்தில் வலம்வந்துகொண்டிருந்தது. அதையடுத்து 'AK61' பற்றிய அதிகாரப்பூர்வத் தகவல் வெளியாகி படப்பிடிப்பு நடைபெற்றுவந்தது.

இந்நிலையில், நேற்று 'AK61' படத்தின் முதல் பார்வை போஸ்டர் வெளியாகும் என்று அறிவிக்கப்பட்டிருந்த நிலையில், மாலை 6.30 மணிக்கு அதனை வெளியிட்டது படக்குழு. 'துணிவு' என்று பெயருடன் முதல் பார்வை போஸ்டர் வெளியானது. 

Image

கையில் மிலிட்டரி ரக துப்பாக்கியுடன் நாற்காலியில் அஜித் சாய்ந்து அமர்ந்திருக்கும்படியாக வெளியான இந்த போஸ்டர் ரசிகர்களை வெகுவாகவே கவர்ந்தது. படத்தின் டைட்டில் அமைப்பு, ரூபாய் நோட்டு போன்ற எழுத்தின் வடிவமைப்பில் அமைந்திருந்ததால் ஒருவேளை வங்கிக்கொள்ளை சார்ந்த கதையமைப்புடன் இப்படம் இருக்குமோ என்ற ஊகங்களும் ரசிகர்களிடையே மேலோங்கியுள்ளது. 

'AK61' படத்திற்கு 'துணிவே துணை' என்று பெயர் வைக்கப்படலாம் என்ற தகவல் சில நாட்களுக்கு முன்பு கசிந்த நிலையில், என்னதான் போஸ்டர் பெருவாரியான ரசிகர்களிடையே வரவேற்பைப் பெற்றுவரும் நிலையிலும், 'துணிவு' என்று வைக்கப்பட்டுள்ள பெயர் அஜித் ரசிகர்களில் ஒரு பகுதியினரை அதிருப்தியில் ஆழ்த்தியுள்ளது எனலாம்.

தமிழ் சினிமாவில் மாஸ் ஹீரோவாக பார்க்கப்படும் அஜித்குமார் நடிக்கும் படங்களின் பெயர் மாஸ் பிம்பங்களைக் கொண்டதாக இருக்கவேண்டும் என்ற ரசிகர்களின் எதிர்பார்ப்பு வீரம், வேதாளம், விவேகம், வலிமை போன்ற டைட்டில்களால் நிறைவுபெற்ற அளவிற்கு 'துணிவு' என்ற பெயரால் நிறைவுபெறவில்லை என்பதே ரசிகர்கள் வலைதளங்களில் பதிவிடும் கருத்துகளின் வெளிப்பாடாக உள்ளது. அண்மையில், வம்சி பைடிபள்ளி இயக்கத்தில் விஜய் நடிக்கும் படத்திற்கு 'வாரிசு' எனப் பெயரிடப்பட்டது குறிப்பிடத்தக்கது. 

பதிவு: September 22, 2022
'சுயமரியாதை உள்ள எந்த சமூகமும் மனுஸ்மிருதியை ஏற்காது' - காங்கிரஸ் எம்.பி. ஜோதிமணி பாய்ச்சல்!

சுயமரியாதை உள்ள எந்த சமூகமும் மனுநீதியை ஏற்காது என்று காங்கிரஸ் கரூர் எம்.பி. ஜோதிமணி ட்விட்டரில் காரசாரமான பதிவு ஒன்றை இட்டுள்ளார்.

சனாதனம் குறித்து திமுக எம்.பி. ஆ.ராசா அண்மையில் பேசியது பல்வேறு அதிர்வலைகளை அரசியல் வட்டாரத்தில் ஏற்படுத்தியுள்ளது. தமிழகம் முழுவதும் இந்து அமைப்புகள் ராசாவின் கருத்துக்கு எதிராக போராட்டங்களிலும் ஆர்ப்பாட்டங்களிலும் ஈடுபட்டு வருகின்றனர்.

அதே சமயம், மனுஸ்மிருதியில் உள்ளதையே ஆ.ராசா சுட்டிக்காட்டியுள்ளதாக பலரும் அவருக்கு ஆதரவாகப் பேசியும் வருகின்றனர். இந்நிலையில், மனுநீதி எனப்படும் மனுஸ்மிருதியை சுயமரியாதை உள்ள எந்த சமூகமும் ஏற்காது என்று காங்கிரஸ் எம்.பி. ஜோதிமணி ட்விட்டரில் தெரிவித்துள்ளார்.

இதுகுறித்து ட்விட்டரில் பதிவிட்டுள்ள அவர், "பாஜகவின் வேதப்புத்தகம் பகவத்கீதை அல்ல. மனுநீதியே. மனுநீதி பெண்களை பிறபடுத்தப்பட்ட, தலித் உள்ளிட்ட ஒடுக்கப்பட்ட சமூகங்களை இழிவுபடுத்துவது. அடிமைகளாக கட்டமைப்பது. சுயமரியாதையும், கண்ணியமும் மிகுந்த எந்த சமூகமும் மனுநீதியை ஏற்கமுடியாது. மனுநீதியும், பாஜகவும் மனிதகுல விரோதிகள்" இவ்வாறு தெரிவித்துள்ளார்.

பதிவு: September 21, 2022
'ஆ.ராசாவிற்கு எதிராக பொதுமக்களிடம் கையெழுத்து வாங்கிவருகிறோம்; இதுவரை 20 லட்சம் பேர் கையெழுத்திட்டுள்ளனர்' - அண்ணாமலை!

ஆ.ராசாவின் கருத்துக்கு எதிராகப் போராடிய பாஜகவினர் மீது திமுக பொய் வழக்கு போட்டு கைதுசெய்வதாக பாஜக மாநிலத் தலைவர் அண்ணாமலை குற்றம்சாட்டியுள்ளார்.

இதுகுறித்து செய்தியாளர் சந்திப்பில் பேசிய அவர், "ஆ.ராசாவின் பேச்சுக்கு எதிராக குரலெழுப்பிய பாஜகவினர் மீது திமுக பொய் வழக்குகள் போட்டு கைது செய்கின்றது. சமுதாயத்தில் பிரச்சினையை உருவாக்குதல் என்ற பிரிவில் (IPC Section 153) அவர்கள் மீது வழக்கு பதியப்படுகிறது. அதாவது ஆ.ராசா பேசியது பிரச்சினையை உருவாக்கும், பிளவுபடுத்தும் பேச்சு அல்ல; பாஜகவினர் பேசியதே அவ்வாறு உள்ளதாக குற்றம்சாட்டுகின்றனர். 

இதுகுறித்து திமுக அமைச்சர்களிடம் கேட்டால் 'காது கேட்கவில்லை' என்று ஒரு அமைச்சர் கூறுகிறார். அவர் அடுத்த முறையிலிருந்து காது கேட்கும் கருவியை மாட்டிக்கொண்டு செய்தியாளர் சந்திப்பில் கலந்துகொள்ளுமாறு கேட்டுக்கொள்கிறேன்" என்று கூறியுள்ளார்.

மேலும் பேசிய அவர், இந்தப் பிரச்சினைக்காக பாஜக போராட்டங்களில் எல்லாம் இறங்கப்போவதில்லை; மாறாக ராசா போன்ற எம்.பி. எங்களுக்கு வேண்டாம் என்று பொதுமக்களிடம் பாஜகவினர் கையெழுத்து வாங்கிவருகின்றனர்.

இதுவரை 20 லட்சம் கையெழுத்துகள் பொதுமக்களிடமிருந்து பெறப்பட்டுள்ளன. இப்படியெல்லாம் பெரும்பான்மை சமுதாயத்தைப் பற்றி தவறாக பேசி சிறுபான்மை சமுதாயத்திலிருந்து ஓட்டு வாங்கிவிடலாம் என்று திமுக நினைக்கவேண்டாம். எல்லா சமுதாயத்தினரும் இதற்கு எதிராக குரல்கொடுத்து வருகின்றனர். தமிழகம் மட்டுமல்லாது உத்தரப்பிரதேசம், பீகார் போன்ற பிற மாநிலங்களிலிருந்தும் ஆ.ராசாவின் கருத்துக்கு எதிர்ப்புக்குரல் வலுத்துவருகிறது" இவ்வாறு தெரிவித்தார். 

 

பதிவு: September 21, 2022
'சனாதனம் குறித்து ஆ.ராசா பேசியது கீழ்த்தரமானது' - எடப்பாடி பழனிசாமி சீற்றம்!

இந்து மதத்தை புண்படுத்தும் விதமாக ஆ.ராசா பேசியது கீழ்த்தரமானது என்று அதிமுக இடைக்கால பொதுச்செயலாளர் எடப்பாடி கே.பழனிசாமி கருத்து தெரிவித்துள்ளார்.

பிரதமர் மோதி மற்றும் மத்திய உள்துறை அமைச்சர் அமித்ஷாவை சந்திக்கும் பொருட்டு எதிர்க்கட்சித் தலைவரும் அதிமுக இடைக்கால பொதுச்செயலாளருமான எடப்பாடி பழனிசாமி கடந்த 19-ம் தேதி டெல்லி பயணப்பட்டார்.

இந்நிலையில், நேற்றைய தினம் டெல்லியிலிருந்து கோவை விமான நிலையம் வந்த அவர், டெல்லி பயணம் பற்றியும், திமுக எம்.பி. ஆ.ராசா அண்மையில் சனாதனம் குறித்து பேசியது பற்றியும் செய்தியாளர்கள் கேட்ட கேள்விக்கு பதிலளித்தார்.

இதுகுறித்து பேசிய அவர், "தமிழகத்தில் கஞ்சா உள்ளிட்ட போதைப்பொருட்களால் மாணவர்கள், இளைஞர்கள் சீரழியும் நிலை உள்ளது. இதை தடுக்க வேண்டும் என மத்திய அரசை வலியுறுத்தினோம்.

இந்து மதத்தை புண்படுத்தும் விதமாக ராசா பேசியது கீழ்த்தரமானது. இதற்கு அவரது கட்சி தலைவர் பதில் அளிப்பார் என எதிர்பார்த்தேன். ஆனால், பதில் கிடைக்கவில்லை. அ.தி.மு.க., விவகாரம் குறித்துப் பேச டெல்லி சென்றதாக சொல்வது தவறானது.

விடியா தி.மு.க., ஆட்சியில் மக்களுக்கு எந்த நன்மையும் கிடைக்கவில்லை. தமிழகத்தில் தற்போது பரவி வரும் காய்ச்சலை தடுப்பது அரசின் கடமை. எளிதாக பரவும் காய்ச்சல் என மருத்துவர்கள் சொல்கின்றனர். இந்த அரசு விழிப்போடு இருந்து குழந்தைகளை காப்பதுடன், மருத்துவக் குழு ஆராய்ந்து இந்த காய்ச்சலை தடுக்க நடவடிக்கைகள் எடுக்க வேண்டும்" இவ்வாறு தெரிவித்தார். 

பதிவு: September 21, 2022
ஆஸ்கர் விழாவில் கலந்துகொள்ள குஜராத்தி படமான 'செலோ ஷோ' இந்தியா சார்பில் தேர்வு! ஆர்.ஆர்.ஆர். தேர்வுசெய்யப்படவில்லை!

2023-ஆம் ஆண்டுக்கான ஆஸ்கர் விருதுகள் தேர்வில் ராஜமௌலியின் ஆர்.ஆர்.ஆர் திரைப்படம் தேர்வு செய்யப்படும் என எதிர்பார்க்கப்பட்ட நிலையில், குஜராத்தி திரைப்படமான செலோ ஷோ தேர்வு செய்யப்பட்டுள்ளது. 

95-வது ஆஸ்கார் விருதுகள் வழங்கும் விழா அடுத்த ஆண்டு மார்ச் 12-ம் தேதி லாஸ் ஏஞ்சல்ஸ் நகர டோலி திரையரங்கில் நடைபெறுகிறது. இந்நிலையில், இந்த விழாவிற்கான திரைப்படங்கள் தேர்வு நடைபெற்றுவந்தது. இதன் பட்டியலில் பிரம்மாண்ட இயக்குநர் ராஜமௌலி இயக்கிய ஆர்.ஆர்.ஆர்., விவேக் அக்னிஹோத்ரி இயக்கிய தி காஷ்மீர் ஃபைல்ஸ், பதாய் ஹோ, மாதவனின் ராக்கெட்ரி, பிரம்மாஸ்த்ரா, இராதாகிருஷ்ணன் பார்த்திபனின் இரவின் நிழல் உள்ளிட்ட முக்கிய திரைப்படங்கள் இடம்பெற்றிருந்தன.  

இதில் குஜராத்தி மொழி திரைப்படமான செலோ ஷோ திரைப்படமும் இடம்பெற்றிருந்தது. பான் நாலின் என்பவர் இயக்கியுள்ள இப்படம் நாடு முழுவதும் வரும் அக்டோபர் 14-ஆம் தேதி திரையரங்குகளில் வெளியாகவுள்ளது. இதில் பவேஷ் ஸ்ரீமாலி, பவின் ரபாரி, ரிச்சா மீனா ஆகியோர் முக்கிய வேடங்களில் நடித்துள்ளனர். இந்தப் படத்தை சித்தார்த் ராய் கபூர் ஃபில்ம்ஸ், ஜுகத் மோஷன் பிக்சர்ஸ், மான்சூன் ஃப்லிம்ஸ், மற்றும் மார் டுலே நிறுவனங்கள் இணைந்து தயாரித்துள்ளன.

ஒரு சிறுவனுக்கு சினிமா மீது ஏற்படும் ஈர்ப்பும், அதனால் அவன் வாழ்வில் நிகழும் மாற்றங்களுமாக நீளும் இத்திரைப்படம், பரிந்துரைக்கப்பட்ட இந்தியப் படங்களிலிருந்து ஆஸ்கர் விருது விழாவில் கலந்துகொள்ள இந்தியா சார்பில் தேர்ந்தெடுக்கப்பட்டுள்ளது. இதுகுறித்த அறிவிப்பை இந்தியத் திரைப்பட கூட்டமைப்பின் தலைவர் நாகபர்ணா தெரிவித்துள்ளார்.

பெரும் பொருட்செலவில் தயாரிக்கப்பட்ட ராஜமௌலியின் ஆர்.ஆர்.ஆர். திரைப்படம் ஆஸ்கர் விருதுக்கு தேர்ந்தெடுக்கப்படும் என பெரிதும் எதிர்பார்க்கப்பட்ட நிலையில், குஜராத்தி படமான செலோ ஷோ இந்தியா சார்பில் தேர்ந்தெடுக்கப்பட்டுள்ளது சினிமா ரசிகர்களிடையே அப்படம் மீதான எதிர்பார்ப்பை அதிகரித்துள்ளது. 

பதிவு: September 21, 2022

மேலும் செய்திகள்

கொரோனா வைரஸ் அப்டேட்ஸ்